ཚོར་བ་རབ་རིབ།
སྒེའུ་ཁུང་འགྲམ་ནས།
རྨི་ལམ་ཟིན་དུ་བཅུག་པས།
མཐོང་མྱོང་འདྲ་བའི་འོད་མདང་ཞིག་འཚེར་འཚེར་བྱས་རྗེས།
ངའི་མིག་མདུན་དུ་ ཁྱོད་ཀྱི་རྒྱབ་གཟུགས་ལས་ཅི་ཡང་མེད།
རྒྱུས་ཡོད་རྒྱུས་མེད་འདྲ་ ཆ་ཡོད་ཆ་མེད་འདྲ།
གཟུགས་རིས་སྐྱ་ཐིང་ཐིང་ ཁང་ཁྱིམ་སྐྱ་ཐིང་ཐིང་།
ཁྱོད་དང་ང་གཉིས་ཀྱང་སྐྱ་མདོག་དུ་ཐིམས་ནས།
གས་གྲུབ་ཤོར་བའི་མེ་ལོང་དུ།
ཟློས་གར་ལ་རོལ་བ་ཁྱོད་ཀྱིས་ཚོར་རམ།
གདུག་རྩིབ་ཀྱི་མེ་ལྕེ་འབར་ཤུལ།
འཁྱག་རལ་དུ་རྐང་རྗེས་འཇོག་ཤུལ།
སྐྱོ་དབྱངས་ཀྱི་སྒྲ་ཐག་སྒྲོག་ནས།
ཚོར་བ་རབ་རིབ་བསུ་བ་མཐོང་ངམ།
2024/8/31 ཉིན་བྲིས།
ཉིན་ཞིག་ལ།
ལྷོག་ལྷོག་ཏུ་ཁོལ་བའི་ཚ་ཆུ་ཞིག
གཞི་ནས་འཁྱག་སིབ་སིབ་ངང་གནས་རན་སོང་།
འཛུམ་དམུལ་དམུལ་དུ་བཞད་པའི་མེ་ཏོག་ཞིག
ད་སྐབས་དྲག་རླུང་འཚུབ་མ་དེས་གཏོར་རན་སོང་།
འུར་འུར་ཟིང་ཟིང་ནས་རྙེད་པའི་ལམ་ཕྲན་ཞིག
རིམ་བཞིན་མཇུག་བསྡུ་རན་སོང་།
རེ་འདོད་ཀྱི་དར་ལྕོག་ཟད་པོ་གན་ཡང་།
ད་གཟོད་འཐོར་དགོས་བྱུང་སོང་།
ཉིན་ཞིག་ལ།
འུ་གཉིས་རྟག་ཏུ་བྲལ་བྱུང་།
ཆ་ཡོད་ལས་ཆ་མེད་དང་རྒྱུས་མེད་དུ
ཤར་མར་འགྱུར་རན་སོང་།
ཁྱོད་དང་ང་ཡི་འབྲོག་འཚེར།
བསིལ་རླུང་འཇམ་པོ་ལྡིང་།
རི་བོར་སྨུག་སྤྲིན་ཐིབས།
ཆར་ཆུ་ཟམ་ཟིམ་རེས།
མཚོན་མདངས་གསལ་གསལ།
རྣམ་དག་གི་དག་ཞིང་དངོས་མ།
སྦྲ་ནག་དང་གཡང་དཀར་གྱི་ཁྲ་རྒྱན།
ཁྱོད་དང་ང་ཡི་འབྲོག་འཚེར།
དྭངས་གསལ་ཆུ་བོ་དེ་གཞུར་རྒྱུན་མ་ཆད།
རིགས་རུས་གཙང་མ་ལ་མཚོན་གྱིས་མ་སླད།
འབྲུ་མོ་ཡི་ངུར་སྒྲ་དང་གཡང་དཀར་གྱི་འབའ་སྒྲ།
རྟ་ཡི་འཚེར་སྒྲ་དང་སྒོ་ཁྱི་ཟུག་སྐད།
ལྷད་མྱོང་མེད་པའི་ མེས་པོས་རྣམ་ཤེས་འཁོར་ས་སམ།
ཁྱོད་དང་ང་ཡི་འབྲོག་འཚེར།
ཟེགས་མ་ནག་མོ།
ཁ་སང་གི་ད་ཚོད་ཅིག་ལ་ ང་ཡིས།
རྒྱ་སེ་མེ་ཏོག་གཅིག་ཁུར་ནས།
ཆང་ཁང་ནང་དུ་བསླེབས་དུས།
ཁྱོད་ཉིད་སྔོན་ནས་འུད་སོང་ཟེར།
དེ་རིང ང་ཡིས་ཡང་བསྐྱར་དུ།
གསེར་གྱི་རྣ་ལུང་གཉིས་ཉོས་ཏེ།
ཆང་ཁང་དུ་བསླེབས་དུས།
ཁྱོད་ཉིས་སླར་ཡང་ཁྱིམ་ནང་དུ་ལོག་སོང་ཟེར།
ཟེགས་མ་ནག་མོ དྲང་མོར་བཤད་ན།
ང་ཡིས་ སྐྱལ་སྟོང་འདུ་འཛོམས་ཀྱི།
ཆང་ཁང་འདི་ནས།
ཁྱོད་རང་ཡོང་བ་ལ་དུས་ཚོད་ཅི་ཙམ་བསྒུག་དགོས།
དོན་ངོ་མར་ ང་ཡིས།
ལམ་གློག་འཚེར་བའི་མཚན་མོ་འདི་ནས།
ཁ་བ་དང་བུ་ཡུག་གི་འཁྱག་གྲང་ཁོག་ལ་བཅུག་སྟེ།
ཁྱོད་རང་དུས་ཚོད་ཅི་ཙམ་བསྒུག་དགོས།
ཟེགས་མ་ནག་མོ།
ཟེགས་མ་ནག་མོ།
ཁ་སང་གི་ད་ཚོད་ཅིག་ལ་ ང་ཡིས།
རྒྱ་སེ་མེ་ཏོག་གཅིག་ཁུར་ནས།
ཆང་ཁང་ནང་དུ་བསླེབས་དུས།
ཁྱོད་ཉིད་སྔོན་ནས་འུད་སོང་ཟེར།
དེ་རིང་ ང་ཡིས་ཡང་བསྐྱར་དུ།
གསེར་གྱི་རྣ་ལུང་གཉིས་ཉོས་ཏེ།
ཆང་ཁང་དུ་བསླེབས་དུས།
ཁྱོད་ཉིས་སླར་ཡང་ཁྱིམ་ནང་དུ་ལོག་སོང་ཟེར།
ཟེགས་མ་ནག་མོ་ དྲང་མོར་བཤད་ན།
ང་ཡིས སྐྱལ་སྟོང་འདུ་འཛོམས་ཀྱི།
ཆང་ཁང་འདི་ནས།
ཁྱོད་རང་ཡོང་བ་ལ་དུས་ཚོད་ཅི་ཙམ་བསྒུག་དགོས།
དོན་ངོ་མར་ ང་ཡིས།
ལམ་གློག་འཚེར་བའི་མཚན་མོ་འདི་ནས།
ཁ་བ་དང་བུ་ཡུག་གི་འཁྱག་གྲང་ཁོག་ལ་བཅུག་སྟེ།
ཁྱོད་རང་དུས་ཚོད་ཅི་ཙམ་བསྒུག་དགོས།
ཟེགས་མ་ནག་མོ་ དོན་ངོ་མར།
ང་ལ་རེ་བ་ཆེ་པོ་ཞིག་མེད་དེ།
ང་ཡིས་ཁྱོད་དང་ལྷན་དུ་མི་ཚེ་གང་བོར།
གཏམ་རྒྱུད་མང་པོ་ཞིག་བཤད་ཀྱིན།
སེམས་གཏམ་མང་པོ་ཞིག་གླེང་ན་འདོད་པ་ལས།
བསམ་བློ་གཞན་མེད།
མཚན་མོའི་དབྱངས།
མཚན་མོའི་དབྱངས།
ངས་ཁྱོད་ཀྱི་དབྱངས་རྟ་སྙན་མོ་ལ་རྣ་བ་གཏད་ཚེ།
ངའི་རྨི་ལམ་གྱི་ཁུག་པ་བཅོ་བརྒྱད་ན་ཁྱོད་ཉིད་འཚུབས་སོང་ལ།
དྲན་གདུང་གི་མཚོ་མོའི་དཀྱིལ་འཁོར་ན་ཁྱོད་ཉིད་འཛུམ་བྱུང་།
ངས་ཡིད་འོང་གི་མཛེས་པའི་ཕ་ཡུལ་ནས་ཁྱོད་རང་མཐོང་སོང་ལ།
ནམ་རྒྱུན་གྱི་བསམ་བློའི་མདུན་ཕྱོགས་ན་ཁྱོད་ཉིད་བཞད་ཀྱང་སོང་།
དེའི་རྒྱུ་མཚན་ནི། ང་ཁྱོད་ལ་དུང་བས་ཡིན།
མཚན་མོའི་དབྱངས།
ང་མཚན་མོ་མར་ལ་ཉལ་ཐེངས་རེ་ལ།
ནམ་རྒྱུན་ཁྱོད་ཀྱི་དབྱངས་རྟ་གསོན་པོ་དེ་རྣ་བར་སྒྲོག་ནས།
འཇིག་རྟེན་གྱི་དགའ་སྐྱོ་ཆགས་སྡང་ལ་ཞན་པ་ལོག་བཞིན།
འཆི་བ་མི་རྟག་པ་དེ་སྙིང་ནས་དྲན་གྱིན་ཡོད་ལ།
ད་དུང་ང་ལ་ནམ་རྒྱུན་ཕ་མས་ཐོན་ཤོར་ཟེར་བས།
ཡི་གེ་འབྲུ་དྲུག་མ་དེ་ཁ་ནས་འདོན་ཁུ་ཡོད།
མཚན་མོའི་དབྱངས།
ང་ཁྱོད་ལ་དུང་བ་ནས་བཟུང་ས་མཐའི་ཡུལ་གྲུ་འདི་ནས།
ངས་ཕ་ཡུལ་དྲན་ཐེངས་རེ་ལ།
ཁྱོད་ཀྱི་དབྱངས་རྟ་གསོན་པོ་དེ་ཡིད་ནས་དྲན་གྱིན།
ཕ་ཡུལ་གྱི་ཕྱོགས་སུ་སྙན་ངག་ཐུང་ངུ་ཞིག་བྲིས་ནས།
སྙན་མོ་ངག་ལ་འགུག་ན་འདོད་མྱོང་།
མཚན་མོའི་དབྱངས།
ང་ནི་ཁྱོད་འདྲའི་སྐད་ངག་གི་སྒྱུ་རྩལ་ལྡན་པ་ཞིག་མིན་ཡང་།
ངས་ཚིག་འབྲུ་རེ་འགའ་ཤོག་ངོས་སུ་བྲིས་ནས།
ངས་མཚན་མོ་རེ་རེར་ཁྱོད་ཀྱི་སྙན་ངག་གསོན་པོ་དེ་དང་།
སྙན་ངག་གི་ཚོར་བ་ཕྱིར་འདོན་ཐུབ་པའི་འགྲིན་པ་དེ་ང་ལ་ལན་གཅིག་གཡར་ན་བསམ་བྱུང་།
མཚན་མོའི་དབྱངས། མདོར་ན།
ང་ཡིས་ཁྱོད་ཉིད་སྒྲོག་གིན་སྐར་མ་སྨིན་དྲུག་ལ་བལྟས་ནས།
དབང་མེད་དུ་རིང་མ་ཐུང་གི་རྩོམ་འདི་ཤོར་སོང་།
ཐེངས་གཅིག་ཀློག་ཟིན།
ཁུ་སིམ་པའི་དབེན་ཐང་ནས།
ངས་སྨྱུག་གུ་ལག་ལ་བཟུང་ནས།
དུངས་བརྗོད་ཀྱི་སྙན་ངག་ཅིག་འབྲི་ན་འདོད་སོང་།
ཁུ་སིམ་པའི་དབེན་ཁྲོད་ནས།
ངས་བརྩེ་དུང་གི་དར་སྐུད་འཐེན་པའི།
གཞོན་ནུ་ཕོ་མོ་གཉིས་ཀྱི་ལོ་རྒྱུས་འབྲི་ན་འདོད་སོང་།
བརྩེ་དུང་གི་ལོ་རྒྱུས་ཟབ་མོ་དེ།
ད་ལྟ་དངོས་སུ་འཇིག་རྟེན་དུ་སྤེལ་ན་འདོད་སོང་།
བརྩེ་བ་འབྲི་འོ་དཀར་མོ་ལྟར་མཆིས་འདུག་ལ།
དུང་བའང་རྒྱ་མཚོ་ཆེན་པོ་བཞིན་གནས་འདུག
ངས་ལྟས་ཀྱིན་ལྟས་ཀྱིན་ ད་གཟོད།
འཇིག་རྟེན་གྱི་ཁམས་ན་འབྲུག་ལྟར་གྲགས་པའི་
ཕོ་མོའི་བརྩེ་དུང་ཟེར་བ་དེ།
ནང་དོན་དངོས་ནས་གོ་སོང་བ་འདྲ།
ངས་བསམ་གྱིན་བསམ་གྱིན་ ད་གཟོད།
དུས་སྐབས་ཀྱི་གཞོན་པ་ཚོའི་བརྩེ་དུང་ནི་
འདོད་པ་ཁོ་ནས་ཚོར་བ་མཐོང་སོང་བ་འདྲ།
མི་ཚེ་ཡི་རིན་ཐང་གི་ཁྲོད་ནས།
རི་མོ་ཡིད་འཕྲོག་དེ་གླེང་ན་འདོད།
གང་ལྟར་ སྐྱོ་ངལ་གྱི་ཁུག་སོ་ནས།
ཁྱོད་ཉིད་ཀྱི་གཏམ་རྒྱུད།
མཚན་མོ་ཞིག་ལ་ ཐེངས་གཅིག་ཀློག་ཟིན།
འཆི་ཀའི་སེམས་ཐ་མ་དེའང་།
འདི་ལྟར་བསླེབས་ན་འདོད།
འདི་ལྟར་བུད་སོང་བ་ཡིན་ནམ།
༡
མི་ཚེ་གཅིག་དང་ཟླ་བ་གཅིག
ཟླ་གཅིག་དང་ཉིན་ཞག་གཅིག
ཉིན་ཞག་གཅིག་དང་དུས་ཚོད་གཅིག
དུས་ཚོད་གཅིག་དང་སྐར་མ་གཅིག
སྐར་མ་གཅིག་དང་སྐར་ཆ་གཅིག
འདི་ལྟར་ཕྱིན་སོང་བ་ཡིན་ནམ།
བརྩེ་དུང་གི་རི་བོ་བརྒལ་མ་ཐུབ་པར།
དུང་བརྗོད་ཀྱི་སྙན་ངག་བྲིས་མ་ཚར་པར།
ཁོ་མོ་ཡི་སྙིང་ཆུང་རེག་མ་ཐུབ་པར།
རང་གི་མི་ཚེ་ལ་རྗོགས་ཚིག་བཀོད་དེ།
འདི་ལྟར་རྒྱང་དུ་བུད་སོང་བ་ཡིན་ནམ།
དུང་ཞེན་གྱིས་མི་བུ་སྙིང་མ་རྗེ་པར།
སྙན་ངག་གི་གར་སྟེགས་མ་འཇིག་གོང་།
ཐ་སྙད་ཀྱི་ཆར་ཆུ་མ་སྐམ་སྔོན།
བརྩེ་དུང་གི་ཟིན་བྲིས་མ་འགྲུབ་པར།
འདི་ལྟར་རྒྱང་དུ་བུད་སོང་བ་ཡིན་ནམ།
༢
འུ་ཚོས་མཉམ་དུ་ལྦུ་ཆང་ཁམ་གང་འཐུང་མ་ཐུབ།
འུ་ཚོས་མཉམ་དུ་སྙན་མོའི་ཚིག་འགའ་སྤེལ་མ་ཟིན།
འུ་ཚོས་མཉམ་དུ་རིགས་པའི་གཞུང་འགའ་ཀློག་མ་ཚར།
ཁྱོད་རང་འདི་ལྟར་འདི་ལྟར་བུད་སོང་བ་ཡིན་ནམ།
གལ་སྲིད་སྐྱེ་བ་ཕྱི་མ་ཟེར་བ་ཞིག་ཡོད་པའི་དབང་དུ་བཏང་ན།
གལ་སྲིད་སྐྱེ་བ་ཕྱི་མ་འཇིག་རྟེན་འདིར་སྐྱེ་སྲིད་པའི་དབང་དུ་བྱས་ན།
ངས་ཐོག་མར་ཁྱོད་དང་མཉམ་དུ་ལྦུ་ཆང་ཡིད་ཚིམས་པ་ཞིག་འཐུངས་ཏེ།
སྙན་ངག་ཅིག་ཤུགས་ཀྱིས་གྱེར་ན་བསམ།
ངས་ཐོག་མར་ཁྱོད་དང་མཉམ་དུ།
ཐ་སྙད་ཅིག་མཐོ་རུ་བཏེགས་ན་བསམ།
ཐ་སྙད་དེ་ལ “སྙན་ངག ”ཅེས་སུ་འབོད།
ད་ནི་ཁྱོད་ཉིད་བཞུད་ཚར་སོང་།
ད་ནི་སེམས་ཉིད་སྟོང་སངས་སོང་།
ཚོར་བའི་བཟི་ཐེངས་གཅིག
མི་ཚེ་རིང་མ་ཐུང་གི་བར་གསེང་ནས།
ངས་ཁྱོད་ལ་ལག་སྐྱེས་གཏེར་བ་ཇི་གཞིན།
གནམ་རྒན་མས་ཀྱང་།
ང་ལ་ཚོར་བ་གསར་བ་ཞིག་གཏེར་སོང་།
སྤྲིན་གསེབ་གཅིག་ནས་གནམ་གྲུ་མཐོང་བ་ལྟར།
རབ་རིབ་ཀྱི་འོག་ནས་བསིལ་རླུང་འཇམ་པོ་ཞིག
སྙིང་ལ་འཚུབ་པའི་ཚོར་སྣང་གཅིག་གཏེར།
གས་ཆག་ཤོར་བའི་གཏམ་རྒྱུད་རེའི་ཁྲོད་དུ།
སེམས་ལ་ན་ཟུག་འཆར་བ་གཞིན།
སྣུམ་ལམ་སྐྱ་བོ་ཡི་འགྲམ་ངོགས་ནས།
སྙིང་ལ་མི་བདེ་བའི་ཚོར་བ་བསིལ་བོ་ཞིག་སྐྱེས།
ཡོད་ཡོད་དང་མེད་མེད་འདྲ་བའི་ཚོར་བ་ཡིས།
ང་རང་ཐེངས་གཅིག་བཟི་དགོས་བྱུང་།
དབྱངས་ཞི་བ། 2003ལོར་ཁམས་ཞིང་སྡེ་ཉི་མ་རྫ་ཆུ་ཁ་རུ་སྐྱེས། དངོས་མིང་དུ་རཊ་ཤུལ་ཐུབ་བསྟན་བསྟན་འཛིན་ཟེར་ཞིང་། མི་ལོ་དུ་མའི་རིང་ལ་ནང་བསྟན་རིག་གཞུང་ལ་ཆེད་སྦྱོང་བྱས་ཏེ་དེ་དག་གི་བར་གསེང་ནས་རྩོམ་རིག་བསྐོར་ལ་རྒྱུན་འཁྱོང་དང་འབད་བརྩོན་བྱས་ནས།དེ་སྔ་སྙན་ངག་གཙོས་རྩོམ་ཡིག་བརྒྱ་ལྷག་བྲིས་ཡོད། བརྩམས་ཆོས་བཅུ་ཕྲག་དུ་མ།《མཆོད་མེ་བོད་ཀྱི་རྩོམ་རིག་དྲ་བ།》《གངས་དཀར་རི་བོ》《གུར་ཀུམ་ཆུན་པོ།》《པདྨའི་ཚལ།》《འདན་གླིང་རྩོམ་རིག》《རིག་མཛོད།》《གངས་ལྗོངས་འཕྲིན་གསར།》《མཚོ་སྔོན་བོད་ཡིག་གསར་འགྱུར》《ཁམས་པའི་བོད་ཡིག་སློབ་ཁྲིད་ཐོན་ཁུངས་དྲ་བ།》《རྒྱལ་ཡོངས་ས་ཆེན་དྲ་བ།》《ཁམས་པའི་ཚགས་པར》《ཀན་ལྷོའི་གསར་འགྱུར》《རྔ་བའི་གསར་འགྱུར》《གཞིས་ཀ་རྩེའི་ཚགས་པར》སོགས་དུས་དེབ་དང་ཚགས་པར་དྲ་བ་དུ་མའི་ནང་དུ་བཀོད་ཡོད་ལ <ཁམས་པའི་ཚགས་དུ་དམིགས་གསལ་ས་མིག>སྤྲད་མྱོང་བའི་བོད་རྩོམ་རིག་གི་སྡིངས་ཆ་ཆེན་མོ«ང་རོའི་ཆོ་འཕྲུལ»ཚང་གི་ཚོགས་མི་བཅས་ཡིན།
རྩོམ་སྒྲིག་པ། དོན་འགྲུབ་རྡོ་རྗེ།