མཐོ་ལ་བརྗིད་པ་ཡི་བྲག་སྐྱིབས་དྲོན་མོ་དང་གཅིག།
དེ་དང་འགྲོགས་པ་ཡི་ཐང་དཀར་རྒོད་ཁྱུ་དང་གཉིས།།
གནས་སྐབས་འབྲེལ་བ་དེ་བཞག་པ་ཡུད་ཙམ་ཞིག་གདའ།།
རྒོད་པོ་གཤོག་ཐོགས་ཚོ་ནམ་འཕང་གཅོད་པ་ལ་སོངས།།
བྲག་དམར་བྱ་ཚང་ང་སྔར་གྱི་ཁ་མལ་ནས་འདུག།
རྒོད་པོ་གཤོག་ཐོགས་ཚོ་བསེར་བུས་མ་འཐགས་པ་བྱས།།
བྲག་དམར་བྱ་ཚང་ང་ཐོག་གིས་མ་བཤིགས་པ་བྱས།།
ཡང་ཡང་ལྷན་ཅིག་ཏུ་འཛོམས་པའི་སྨོན་ལམ་ནི་འདེབས།།
སྔོ་ལ་ལྗང་བ་ཡི་ཐང་ཤིང་སྔོན་མོ་དང་གཅིག།
དེ་དང་འགྲོགས་པ་ཡི་ཁུ་བྱུག་ཁྱུ་ཚོགས་དང་གཉིས།།
གནས་སྐབས་འབྲེལ་བ་དེ་བཞག་པ་ཡུད་ཙམ་ཞིག་གདའ།།
གཞན་གསོས་བུ་མོ་ཚོགས་ལྷོ་རོང་ནགས་ཚལ་ལ་སོངས།།
ལྷ་ཤིང་ཤུག་པ་ང་གངས་རིའི་ཞིང་ཁམས་ནས་འདུག།
དཔྱིད་ཀྱི་ཕོ་ཉ་ཚོ་བྱ་ཁྲས་མ་བཟུང་བ་བྱས།།
ཐང་ཤིང་སྔོན་མོ་ང་སོག་ལེས་མ་བསྒྱེལ་བ་བྱས།།
ཡང་ཡང་ལྷན་ཅིག་ཏུ་འཛོམས་པའི་སྨོན་ལམ་ནི་འདེབས།།
དྭངས་ལ་གཙང་བ་ཡི་མཚོ་མོ་སྔོན་པོ་དང་གཅིག།
དེ་ལ་འཁོར་བ་ཡི་གསེར་མིག་ཉ་ཚོགས་དང་གཉིས།།
གནས་སྐབས་འབྲེལ་བ་དེ་བཞག་པ་ཡུད་ཙམ་ཞིག་གདའ།།
ཉ་མོ་གཤོག་ཐོགས་ཚོ་ཆུ་གཏེར་སྐོར་བ་ལ་སོངས།།
དྭངས་གཙང་མཚོ་མོ་ང་སྔར་གྱི་ཁ་མལ་ནས་འདུག།
ཉ་མོ་གཤོག་ཐོགས་ཚོ་རྙི་ཡིས་མ་བཟུང་བ་བྱས།།
གཡུ་མཚོ་སྔོན་མོ་ང་འཁྱགས་པས་མ་བསྡམས་པ་བྱས།།
ཡང་ཡང་ལྷན་ཅིག་ཏུ་འཛོམས་པའི་སྨོན་ལམ་ནི་འདེབས།།
སྒམ་ལ་གནག་པ་ཡི་དགེ་རྒན་རང་སད་དང་གཅིག།
དེ་ལ་འདྲིས་པ་ཡི་སློབ་མའི་ཁྱུ་ཚོགས་དང་གཉིས།།
གནས་སྐབས་འབྲེལ་བ་དེ་བཞག་པ་ཡུད་ཙམ་ཞིག་གདའ།།
རིག་བཟང་སློབ་བུ་ཚོ་རྒྱང་རིང་སློབ་ཆེན་ལ་སོངས།།
མཐོ་འབྲིང་དགེ་རྒན་ང་ཕ་ས་ཕ་ཡུལ་ནས་འདུག།
སྐལ་ལྡན་སློབ་བུ་ཚོས་དགེ་རྒན་མ་བརྗེད་པ་བྱས།།
གཞི་རིམ་དགེ་རྒན་ངར་བར་ཆད་མེད་པ་ཞིག་བྱས།།
ཡང་ཡང་ལྷན་ཅིག་ཏུ་འཛོམས་པའི་སྨོན་ལམ་ནི་འདེབས།།
༢༠༢༣• ༦ • ༡༠ རྩོམ་སྒྲིག་པ། དོན་འགྲུབ་རྡོ་རྗེ།