གསེར་གྱི་ལྷུན་པོ།
ཁྱབ་བདག་རྫོགས་ཆེན་པ་པདྨ་སྐལ་བཟང་མཆོག་གི་གྱ་སྟོན་དུ་ཕུལ་བ།
----རྩོམ་པ་པོ། ཁྲི་སེམས་དཔའ།
ཉི་འོད་སེར་གྱི་ལེར་གངས་ལ་ཕོག
དཀར་བོང་བོང་གི་འཇིག་རྟེན་དེ།
ཁྱེད་ཀྱི་མཐའ་ཡས་པའི་བྱམས་བརྩེ་ཡིན།
སྤྱན་ཟུང་གཡོས་པ་ཙམ་གྱིས།
ངའི་ཁོག་གི་ལོ་ལ་ལོ་བརྩེགས་པའི།འཁྱག་དར་མཐུག་པོ་ཡོངས་སུ་ཞུས།
ཁྱེད་ཉིད་སྤྲིན་དཀར་ཚོམ་བུ་གཅིག་ནང་བཞིན།
ཡངས་པའི་མཁའ་ངོགས་སུ་དྭངས་གཙང་གིས་སྐྱོད།
ཁྱེད་ཉིད་སྦྲང་ཆར་ཐིགས་པ་གཅིག་ནང་བཞིན།
རྨོངས་རློམ་གྱི་ཐང་རྒོད་དུ་ལྷོད་ཀྱིས་ཟགས།
ཁྱེད་ཕེབས་པའི་ལམ་བུ་ཡོད་ཚད་དུ།
མེ་ཏོག་གི་ཆར་བ་མ་བབས་རུང་།
སྙིང་རྗེའི་ས་བོན།
ཕ་བོང་གི་སྙིང་དུ་ཡང་བཏབ་ཟིན་པས།
སྲ་མཁྲེགས་ཀྱི་ངོ་བོ་ལས།
མཉེས་གཤིན་གྱི་ལྗང་མྱུག་འཁྲུངས།
ཁྱེད་ཀྱི་ཤ་འདྲེས་པགས་འདྲེས་ཀྱི།
རུས་གསེང་ནས་ཐོན་པའི་འཛུམ་མདངས་དེས།
མི་སེམས་ཀྱི་ན་བུན་རྨང་ནས་བཀྲུས།
མགོན་པོ་ཁྱེད། གནས་གང་དུ་བཞུགས་ཀྱང་།
ཕྱོགས་གང་དུ་འཁོར་ཡང་།
སྨག་རུམ་སྟུག་པོའི་ཁྲོད་དུ་ཡང་།
གསེར་གྱི་ལྷུན་པོ་ལྟ་བུའི།
ཁྱེད་ཀྱི་མདངས་འཚེར་བའི།
སྐུ་གཟུགས་བརྗིད་པོ་དེ་ལས།
འོད་ཟེར་ལམ་ལམ་སྤྲོ་ཞིང་།
ལམ་གྱི་ཕ་མཐའ་གསལ།
མགོན་པོ་ཁྱེད་ཀྱིས།
ངག་མི་སྨྲ་བའི་བརྟུལ་ཞུགས་འཛིན་ཡང་།
ཁྱེད་ཀྱི་ཤེས་རབ་ཀྱི་ཚན་ཁ།
ཐ་སྙད་ཀྱི་འཇིངས་སུ་འདུར།
སྙན་ངག་གི་ཁམས་སུ་འཁྱིལ།
གནས་ལུགས་ཀྱི་ཁོངས་སུ་འབར།
མི་སེམས་ཀྱི་གཏིང་དུ་གསོན།
ཀྱེ། ཁྱེད་ནི་གསེར་གྱི་ལྷུན་པོ་ཉིད་དོ།།
འོད་དུ་སྤྲུལ།
སྙིང་རྗེའི་གཟུགས་སུ་གྲུབ།
རེ་བ་དང་ཡིད་ཆེས་བསྩོལ།
རྩོམ་སྒྲིག་པ། དོན་འགྲུབ་རྡོ་རྗེ།