སྔ་དུམ།"
ཡབ་ཤེས་རབ་རྒྱལ་མཚན་གྱི་དཔྲལ་བའི་མིག་ཟུང་།།
ཡུམ་མྱང་ཚ་སྐར་རྒྱན་གྱི་དྲིན་གྱི་ལན་ཆགས།།
གཉེན་ཉེ་དུ་ཡི་གདོན་ལྟར་ཕུད་པའི།།
ཡུལ་གུང་ཐང་གི་མ་སྨད་ལས་ངན།།
བྲག་ས་རྡོ་བརྩིགས་པའི་རྩིག་པ་མཐོ།།
རོ་རུས་པའི་སྟེང་གི་སྐྱི་ལྤགས་སྲབ།།
གཉའ་ཚང་ར་གཉིས་ཀྱི་ལྷུ་མགོ་ཐེད།།
རྒྱབ་རྣག་ཁྲག་ཆུ་སེར་ཆུ་བཞིན་བརྡོལ།།
ཤ་རིད་དེ་རུས་ཀྲང་འབར་འབུར་བྱེད།།
མདངས་ཡལ་ཏེ་རོ་མདོག་སྔོ་སྐྱར་གྱུར།།
རྗེ་མར་པས་རྡོ་དང་དབྱུག་པས་བསྣུན།།
ལུས་ན་ཚ་བཟོད་དམ་མ་བཟོད་ཀྱེ།།
ཚེགས་དཀའ་ལས་མི་གཙང་ལྟར་དུ་དོར།།
མགོས་སྡིག་སྒྲིབ་རལ་བ་འདོམ་གང་དྲུད།།
སྲང་བཞི་མདོ་ལྔ་མདོར་ཁྱི་བཞིན་རྒྱུ།།
ལོ་ཟླ་བ་མུ་གེ་གཡོག་གིས་བསྐྱལ།།
ལུས་སེམས་ཀྱི་སྡུག་བསྔལ་བག་རེ་ཚ།།
ན་ཚོད་ཀྱི་སྡུག་ཡུས་སུ་ལ་ཕོས།།
དོ་ཤི་དང་དོ་ཆད་ག་ཙམ་བྱས།།
ཤི་དམྱལ་བ་མཐོང་ངམ་མ་མཐོང་ཀྱེ།།
ཆོས་ཕྱིར་དུ་ངལ་བ་ཁྱད་དུ་བསད།།
ཕྱི་དུམ།"
ཁྱོད་འཁོར་བའི་ཆོས་ལ་ཞེན་ལོག་སྟེ།།
ལུས་སྒོམ་ཐག་སྣེ་མོར་དམ་དུ་འཇུས།།
ཁྱོད་སྒོམ་ཞུ་མནབས་ནས་རི་ལ་བཞུགས།།
རིར་སྒྲུབ་ཁང་མཛད་ནས་ལོ་མང་བཞུགས།།
བྱ་རི་དྭགས་གཅན་གཟན་གྲོགས་སུ་བཀུག །
སེམས་ཏིང་འཛིན་བསྒོམས་པའི་བསྒོམས་ཀྱང་གྲོལ།།
མགུར་ལྡ་མ་ལྡེམ་གྱིས་ཁམས་ཀྱང་གསོས།།
ཟས་ཏིང་འཛིན་ཟས་སུ་ཡང་ཡང་གསོལ།།
ཆོས་བདག་མེད་ལྟ་མགུར་ཐོལ་གྱིས་མགུར།།
རྟགས་རྟེན་འབྲེལ་གཉིས་ཀྱང་ངང་གིས་འགྲིག །
མི་རྟ་བསད་སྡིག་སྒྲིབ་རིམ་གྱིས་བྱང་།།
རྗེ་མི་ལའི་ཞེ་རྩ་ཆོས་ཀྱིས་དྲོས།།
ཡུམ་མྱང་ཚའི་དབུགས་རྔ་དེ་ནས་ཆོད།།
རི་བྲག་རོང་གཉིས་སུ་འུག་པ་བཞིན།།
རྗེ་ཡབ་ཡུམ་དྲན་ནས་ནགས་སུ་བཤུམས།།
སྤྲིན་བང་རིམ་ཅན་ལ་འཕྲིན་ཡང་བསྐུར།།
ཆགས་འཛིན་དང་རེ་དོགས་དབྱིངས་སུ་ཡལ།།
གཞི་རྫོགས་པ་ཆེན་པོའི་རྣམ་འབྱོར་པ།།
རྗེ་མི་ལའི་ཞབས་རྡུལ་སྤྱི་བོས་ལེན།།
༢༠༢༢ ༣ ༡༧
རྩོམ་སྒྲིག་པ། དོན་འགྲུབ་རྡོ་རྗེ།