ལམ་ནི་རིང་ཞིང་ཐུང་བའི་ཚེ་གཅིག་སྟེ།།
སྙིང་དུ་སྡུག་པའི་དམ་བཅའ་མང་བོ་ཞིག།
ལག་པས་བཏེགས་ཤིང་སེམས་ཀྱིས་གཉོར་བ་ན།།
ཚོར་བའི་གསེང་ལ་དྲོད་ཀྱི་ཚ་རྒྱུག་ཅིང་།།
རྩ་རྒྱུས་གསེབ་ལ་འཁྱག་པའི་དར་ཆགས་ཏེ།།
རྨི་ལམ་ལྟ་བུའི་སྐུད་པ་ཆད་གྱུར་ནས།།
དབྱངས་སུ་འགུག་པའི་མགྲིན་པ་འགག་པ་ན།།
ངོ་མདོག་གྱུར་བའི་མི་ཚོགས་ཁྲི་སྟོང་གིས།།
ཧད་ཀྱིས་འཕྱ་ཞིང་དགོད་པའི་ཉམས་སྟོན་བཞིན།།
རྒྱང་ལ་འཁུར་བའི་རྒྱབ་གཟུགས་ཕྱེད་ཀ་རེས།།
ཁྱོད་ལ་ན་ཟུག་འཇོག་བཞིན་མིག་ཆུ་བསླངས།།
སྐབས་དེར་སྤྲིན་གྱི་ཟླ་བ་མག་མོག་གིས།།
དགུན་ཟླ་ཚེས་པས་གྲང་ལ་འཇིགས་པའམ།།
སྟོང་བའི་དབྱིངས་ཀྱི་ཁ་དོག་གློ་ཁ་ཡིས།།
མཐའ་བཞིའི་སེམས་པ་འཁྱག་སིབ་སིབ་ཏུ་བཏང་།།
ལག་པ་འཁྱག་པས་ལོ་ཟླ་སྐྱོར་བཞིན་དུ།།
མིག་ཟུང་ཆུང་ངུས་རྒྱང་རིང་བསམ་བཞིན་དུ།།
ཞེ་ལ་བཞད་པའི་ཀུ་རེ་ཐེངས་མང་བྱས།།
སྡུག་ལ་ཐུག་པའི་ཚིག་འབྲུས་ཤོག་ངོས་བཀང་།།
གཏད་སོ་མེད་པའི་ལྷིང་འཇགས་རིང་མོ་འདིས།།
མེ་ལོང་ནང་གི་རང་ལ་བལྟས་པ་ན།།
མཚམས་རེར་བགད་ཅིང་མཚམས་རེར་ངུ་བསམ་མོ།།
ལས་ཀྱི་གྲིབ་སོ་སྟོང་བའི་ཐང་ན་འདར།།
དབྱངས་ཀྱི་རླབས་རིས་གཙང་བོའི་ཁ་ན་གཡོ།།
ཕ་མཐའ་མེད་པའི་ཚེ་སྲོག་གྲངས་མེད་ཅིག།
ང་དང་ལྷན་དུ་རྒྱང་ནས་རྒྱང་ལ་བཞུད།།
སྐྲ་ཡི་འདབ་ལོ་ཁ་བར་མ་གྱུར་ཡང་།།
བརྒལ་བའི་ལོ་ཟླ་ཧ་ཅང་རིང་སོང་འདོད།།
ཐོད་ལ་བྲིས་པའི་ཁ་ཡིག་ནག་པོ་ཡིས།།
ཉི་མའི་འོད་ཐིག་གསལ་དང་མ་གསལ་བར།།
གདོན་གྱི་ཆོ་འཕྲུལ་མངའ་བའི་བྱེ་ཐང་དུ།།
སྒྱུ་མའི་རྟ་གླང་སེམས་ཀྱིས་འཚོས་གྱུར་ནས།།
དྭངས་གསལ་ཆུ་ཡི་སྐོམ་པ་སེལ་བར་བྱས།།
གྲང་བའི་རླུང་བུ་སྒོ་ཡི་གསེབ་ནས་ལྡང་།།
དུས་ཀྱི་དྲན་པ་ཡ་ཆུང་སྙིང་ལ་ཟུག།
དབྱངས་ཅན་ལྷ་མོས་པི་ཝང་འཛིན་བཞིན་དུ།།
ཚིག་གི་ཞགས་པ་ང་ཡི་ཕྱོགས་སར་བསྐྱངས།།
ང་ཡིས་ཚིག་གི་རྨི་ལམ་ཀུན་བཞེངས་ཏེ།།
རྨི་ལམ་ངོས་ཀྱི་ཁྱེད་རང་དྲན་པ་ན།།
དགོད་སྒྲར་འདྲེས་པའི་ཞེན་ཆགས་ལྕི་མོ་དེས།།
ཚེ་ཡི་འདུ་བྱེད་ཀུན་ཀྱང་སྟོང་གྱུར་ན།།
ང་ཡི་རྣམ་ཤེས་དེ་ལྟར་འཆི་སྲིད་པས།།
གཏམ་རྒྱུད་ཁྲག་ཏུ་བཞུར་བའི་འཇིག་རྟེན་ནས།།
རི་དང་ལུང་བར་མུན་པ་ཡང་དུ་འཐིབ།།
ཕྱི་ལོ་2021ལོའི་ཟླ་1ཚེས་26ཉིན།
རྩོམ་སྒྲིག་པ། དོན་འགྲུབ་རྡོ་རྗེ།