༄༅། །རྫོགས་པ་ཆེན་པོ་ཀློང་ཆེན་སྙིང་གི་ཐིག་ལེའི་བརྒྱུད་པའི་ཕྱག་འཚལ་བྱིན་རླབས་སྤྲིན་ཕུང་བཞུགས་སོ། །
དབྱིངས་རིག་དབྱེར་མེད་འོད་གསལ་ཆོས་ཀྱི་སྐུ། །ལྷུན་གྲུབ་ཡོན་ཏན་རྒྱ་མཚོའི་མངའ་དབང་ཅན། །རབ་འབྱམས་དཀྱིལ་འཁོར་རྒྱ་མཚོའི་ཁྱབ་བདག་མགོན། །ཀུན་བཟང་དང་པོའི་སངས་རྒྱས་ལ་ཕྱག་འཚལ་། །རྒྱལ་ཀུན་ཐུགས་ཀྱི་ཡེ་ཤེས་དྭངས་མའི་ཁམས། །ལྔ་ལྡན་ལོངས་སྐུའི་ཞིང་དུ་མཚན་དཔེའི་གར། །མ་འདྲེས་དབང་པོའི་གཞུ་རིས་ལྟར་གསལ་བའི། །སྟོན་མཆོག་རྡོ་རྗེ་སེམས་དཔའ་ལ་ཕྱག་འཚལ། །སྣ་ཚོགས་གདུལ་བྱའི་མོས་ངོར་སྤྲུལ་པའི་སྐུ། །བྱེ་བ་ཕྲག་བརྒྱ་ཆུ་ཟླའི་རོལ་གར་བཞིན། །གཅིག་ལས་དུ་མར་འཆར་བའི་སྒྱུ་འཕྲུལ་འཆང་། །གསང་འཛིན་དགའ་རབ་རྡོ་རྗེ་ལ་ཕྱག་འཚལ། །ཐེག་དགུའི་ཡང་རྩེ་འོད་གསལ་རྫོགས་པ་ཆེ། །སྡེ་གསུམ་ཀློང་དགུའི་མན་ངག་གངྒཱའི་ཀླུང་། ། རྣམ་དཔྱོད་ཧུབ་ཀྱིས་བཏུང་བའི་དྲང་སྲོང ་ཆེ། །མཆོག་གཟིགས་མཉྫུ་མི་ཏྲ་ལ་ཕྱག་འཚལ། །ཐེག་མཆོག་གངས་ཀྱི་རི་བོའི་སྤོ་ལ་འགྱིངས། །རྒྱུ་འབྲས་བྱ་རྩོལ་བྲལ་བའི་གད་རྒྱངས་སྒྲས། །ཡིད་དཔྱོད་གྲུབ་མཐའ་ཞེན་པའི་རི་དྭགས་ཁྱུ། །སྐྲག་མཛད་དཔལ་གྱི་སེང་གེ་ལ་ཕྱག་འཚལ། །མངོན་སུམ་འོད་གསལ་ཆེན་པོའི་སྣང་བ་ཡིས། །ཟག་བཅས་ཕུང་པོ་དབྱངས་སུ་དག་པ་ལས། ནམ་མཁའ་ལྟ་བུའི་ཡེ་ཤེས་སྐུ་བརྙེས་པ། །པཎ་ཆེན་ཛྙཱ་ན་སུ་ཏྲ་ལ་ཕྱག་འཚལ། །འཕོ་ཆེན་འཇའ་ལུས་རྡོ་རྗེའི་སྐུར་སྨིན་ཅིང་། །ཡེ་ཤེས་གཟིགས་པ་དག་པའི་མེ་ལོང་དུ། །དུས་གསུམ་ཤེས་བྱའི་གཟུགས་བརྙན་འབུམ་འཆར་བའི། །དྲི་མེད་ཆོས་ཀྱི་བཤེས་གཉེན་ལ་ཕྱག་འཚལ། །
མཐའ་ཀླས་རྒྱལ་བའི་གསང་གསུམ་ནུས་པའི་བྱིན། །གཅིག་བསྡུས་ཕྲིན་ལས་འོད་ཟེར་སྟོང་འབར་བས། །ས་གསུམ་ཕན་བདེའི་པདྨོ་འཛུམ་པའི་གཉེན། །རྒྱལ་དབང་མཚོ་སྐྱེས་རྡོ་རྗེ་ལ་ཕྱག་འཚལ། །འཕགས་བོད་མཁས་གྲུབ་བྱེ་བའི་ཐུགས་ཀྱི་བཅུད། །ཟབ་གསང་ནོར་བུའི་གན་མཛོད་སྒོ་འབྱེད་པའི། །གངས་ལྗོངས་བསྟན་པའི་ཤིང་རྟ་རྗེ་འབང་གྲོགས་། །བཀའ་དྲིན་མཚུངས་པ་མེད་རྣམས་ལ་ཕྱག་འཚལ། །ཕ་མཐའ་བྲལ་བའི་མཁྱེན་རབ་ནམ་མཁའི་ཁྱོན། །གཟུངས་དང་ཏིང་འཛིན་སྤྲིན་ཕུང་གཡོ་བ་ལས། །ལུང་རིགས་དབྱར་གྱི་རྔ་གསང་ཆེར་སྒྲོགས་པ། །ཀུན་མཁྱེན་དྲི་མེད་འོད་ཟེར་ལ་ཕྱག་འཚལ། །དགོངས་བརྒྱུད་བྱིན་བརླབས་རྟོགས་པའི་རྩལ་གསུམ་རྫོགས། །ངེས་གསང་ལམ་གྱི་རྒྱངས་གླུས་ས་གསུམ་འགེང་། །རྨད་བྱུང་ཐུགས་ཀྱི་མཛད་པས་འགྲོ་ཁམས་འདྲེན། །ཀློང་ཆེན་ནམ་མཁའི་རྣལ་འབྱོར་ལ་ཕྱག་འཚལ། །གསང་ཆེན་སྙན་བརྒྱུད་གདམས་པའི་མཛོད་འཆང་ཞིང་། །གྲུབ་གཉིས་མངོན་གྱུར་གྲགས་པའི་རྔ་ཆེན་ལྡིར། །སློབ་བརྒྱུད་རིག་འཛིན་སྐར་ཚོགས་ལྟར་བཀོད་པའི། །གྲུབ་དབང་བྱང་ཆུབ་རྡོ་རྗེ་ལ་ཕྱག་འཚལ། །འཁོར་འདས་ཡེ་གྲོལ་དགོངས་པ་ཟད་སར་ཕྱིན། །སྣང་སེམས་དབང་བསྒྱུར་ཐབས་ཀྱི་སྤྱོད་པ་ཡིས། །འབྲེལ་ཚད་རིག་པ་འཛིན་པའི་ས་ལ་སྦྱོར། །འགྲོ་མགོན་ཡེ་ཤེས་རྡོ་རྗེ་ལ་ཕྱག་འཚལ། །གྲུ་འཛིན་མགོན་པོ་མི་ཡི་ཟོལ་བསྟན་ནས། །བྱང་ཆུབ་སྤྱོད་པའི་ཆོས་ཀྱི་གྲུ་ཆར་གྱིས། །སྐལ་བཟང་གདུལ་བྱའི་ལོ་ཏོག་སྨིན་མཛད་པ། །འཇིགས་མེད་རྒྱལ་བའི་མྱུ་གུ་ལ་ཕྱག་འཚལ། །ཚེ་དབང་རིག་འཛིན་གྲུབ་པའི་རྩལ་འཆང་ཞིང་། །སྣང་བཞི་མཐར་ཕྱིན་ཆོས་ཉིད་ཟད་སར་སྐྱེལ། །བྱར་མེད་ཨ་ཏིའི་རྣམ་འབྱོར་རྫོགས་ཆེན་པ། མི་འགྱུར་ནམ་མཁའི་རྡོ་རྗེ་ལ་ཕྱག་འཚལ། །གྲུབ་བརྒྱུད་འོད་གསལ་དགོངས་པའི་གཏེར་ཆེན་གྲོལ། །བཤད་རྒྱུད་ལུང་རིགས་སྨྲ་བའི་སྤོབས་པ་མཐོ། །སྙིགས་མའི་དུས་འདིར་རྒྱལ་བའི་མཛད་པ་ཅན། །རྒྱལ་སྲས་གཞན་ཕན་མཐའ་ཡས་ལ་ཕྱག་འཚལ། །མངོན་སུམ་ཆོས་ཉིད་རྟོགས་པའི་ཤ་ཚུགས་བརླིངས། །ལྔ་རིག་རིན་ཆེན་གསེར་གྱི་དྲྭ་བས་གཡོགས། །གཞན་ཕན་བྱང་ཆུབ་སེམས་ཀྱི་ཁུར་ཆེན་འདེགས། །ཨོ་རྒྱན་ཆོས་ཀྱི་དབང་པོ་ལ་ཕྱག་འཚལ། །ལུང་རིགས་སྐྱ་རེངས་གསར་བའི་འོད་སྣང་གིས། །ཕས་རྒོལ་ལོག་རྟོག་རྨོངས་པའི་མུན་པ་བསལ། །གསང་རྒྱུད་རྒྱ་མཚོའི་མངའ་བདག་རྡོ་རྗེ་འཆང་། །མཁས་གྲུབ་པདྨ་བཛྲ་ལ་ཕྱག་འཚལ། །ཟབ་རྒྱས་ཆོས་ཚུལ་བདུད་རྩིའི་ཆུ་གཏེར་ལས། །མང་ཐོས་གཙུག་ལག་ནོར་བུའི་གདེངས་ཀ་འཛིན། །ལུང་རྟོགས་གྲུ་ཆར་འཇོ་བའི་དགེ་བའི་བཤེས། ཨོ་རྒྱན་བསྟན་འཛིན་ནོར་བུ་ལ་ཕྱག་འཚལ། །འཕགས་ཡུལ་མཁས་པའི་ལེགས་བཤད་འོད་སྣང་གིས། གངས་ལྗོངས་ཐུབ་བསྟན་པདྨོའི་འདབས་སྟོང་བཞད། བཤད་སྒྲུབ་བསྟན་པའི་ཟིལ་མངར་སྨིན་པའི་གཉེན། །གཞན་ཕན་ཆོས་ཀྱི་སྣང་བ་ལ་ཕྱག་འཚལ། །འོད་གསལ་ཐེག་མཆོག་ལྟ་བའི་གསང་ལམ་ནས། །གྲུབ་བརྙེས་རིག་འཛིན་མཆོག་གི་དགོངས་སྤྱོད་ལ། །དབང་འབྱོར་བྱ་བྲལ་ནམ་མཁའི་རྣལ་འབྱོར་བ། །འཇིགས་མེད་ཡོན་ཏན་མགོན་པོ་ལ་ཕྱག་འཚལ། །ཀ་དག་སྟོང་ཆེན་ལྟ་བའི་གཏན་སྲིད་ཟིན། །ལྷུན་གྲུབ་སྣང་བཞིའི་སྒོམ་པ་ཚད་དུ་འཁྱོལ། །ཟུང་འཇུག་སྐུ་གསུམ་འབྲས་བུའི་སར་ཕྱིན་པ། །རྟོགས་ལྡན་བློ་གྲོས་རྒྱ་མཚོ་ལ་ཕྱག་འཚལ། །གཟིགས་པ་སྒྲིབ་མེད་མཁྱེན་པའི་གསང་མཛོད་ལས། །ཟབ་རྒྱས་ཆོས་ཀྱི་གཏེར་ཆེན་འགྲོ་ལ་འགྱེད། །སྐལ་བཟང་གདུལ་བྱ་སྨིན་ཅིང་གྲོལ་བའི་མགོན། །ཁྱབ་བདག་དཔལ་ལྡན་བླ་མ་ལ་ཕྱག་འཚལ། །དེ་ལྟར་བརྒྱུད་པ་གསེར་གྱི་ཉག་ཐག་ལ། །མཁས་གྲུབ་ནོར་བུའི་ཕྲེང་བ་ཟར་ཚགས་སུ། བྱོན་པའི་སངས་རྒྱས་མི་གཟུགས་ཅན་རྣམས་ལ། །སྒོ་གསུམ་གུས་པས་གསོལ་བ་བཏབ་པའི་མཐུས། །དལ་འབྱོར་གྲུ་ཆེན་དད་བརྩོན་རླུང་གིས་བསྐྱོད། །རྣམ་གཡེངས་ལེ་ལོའི་རྦ་ལ་མི་འཁོར་བར། །དོན་གཉིས་ལྷུན་གྲུབ་ནོར་བུའི་གླིང་སོན་ནས། །སྲིད་ཞིའི་འབྱོར་བས་འགྲོ་ཀུན་ཚིམ་བྱེད་ཤོག །གནས་སྐབས་ཀུན་ཏུ་བདེ་སྐྱིད་དཔལ་གྱིས་འབྱོར། །བཀྲ་ཤིས་ཉི་མ་གླིང་བཞིའི་དཔལ་དུ་འབར། །དགེ་ལེགས་གྲགས་པའི་མུ་ཁྱུད་སྲིད་མཐའ་འཁོར། །ཕན་བདེའི་འོད་ཀྱིས་ས་གསུམ་ཁྱབ་པར་ཤོག །ཅེས་པ་འདི་ནི་མངོན་མཐོའི་དཔལ་གྱིས་འབྱོར་བའི་བུ་བཀྲ་ཤིས་ཚེ་འཕེལ་གྱིས་གསུངས་བཞིན་རྨོངས་པ་པདྨ་བཛྲ་པས་གང་དྲན་ཐོལ་བྱུང་དུ་བྲིས་པ་དགེ་ཞིང་བཀྲ་ཤིས་པར་གྱུར་ཅིག།
རྫོགས་དགོན་ཆོས་ཁྲིམས་གཞན་ཕན་ལྷུན་གྲུབ་ནས་བསྐུལ་དོན་བཞིན་མཁན་ཆེན་པདྨ་བཛྲ་ནས་བདག་ཅག་གི་རིགས་བདག་བླ་མའི་བར་བརྒྱུད་སྲོལ་བཞིན་བསྟན་འཛིན་ལུང་རྟོགས་ཉི་མས་སིངྒ་ལའི་ནགས་སུ་ཁ་སྐོང་བགྱིས་པའོ།།
རྩོམ་སྒྲིག་པ། དོན་འགྲུབ་རྡོ་རྗེ།