དྲི་མེད་མཁྱེན་པའི་མཁའ་ལམ་ཡངས་པོར་ལྷག་བསམ་དུང་གི་ཟླ་བ་ཚེས།།
ལེགས་གསུང་གདམས་པའི་ཟེགས་མ་འབུམ་གྱིས་བློ་ལྡན་བློ་ཡི་ཀུན་དཱ་བཞད། །
མཛད་འཕྲིན་གསེར་གྱི་འཁོར་ལོ་རྩིབས་སྟོང་སྲིད་དང་ཞི་བའི་བླ་ན་མཐོ།།
རིས་མེད་རྒྱལ་བསྟན་སྲོག་གི་ཀ་བ་ཁྱབ་བདག་པདྨ༵འི་མཚན་ལ་འདུད། །
པ༵དྨ༵་ལས་འཁྲུངས་པདྨ་ཀ་ར་ཡི། །
ཐུགས་ཀྱི་སྒྱུ་འཕྲུལ་ལུང་རྟོགས་བསྟན་པའི་བདག །
སྐ༵ལ་བཟ༵ང་གདུལ་བྱའི་རེ་སྐོང་གང་དེ་ཡི། །
རྟོགས་བརྗོད་པདྨ་དཀར་པོའི་དོ་ཤལ་སྤེལ། །
ཨེ་མ་གསང་གསུམ་ཡོན་ཏན་ནོར་བུའི་གཏེར། །
བློ་ཆུང་བློ་ཡིས་འབྱེད་པའི་མཐུ་དམན་ཡང་། །
དད་གསུམ་གསེར་གྱི་ལྡེ་མིག་ལ་བསྟེན་ཕྱིར། །
མཛད་པའི་ཆ་ཙམ་འདིས་ཀྱང་ཚོགས་ཆེན་རྫོགས། །
རྒྱལ་ཀུན་མཁྱེན་བརྩེ་ནུས་པའི་རང་གཟུགས་རིགས་གསུམ་སེམས་དཔའི་གསང་བ་ཆེ། །
འཛམ་གླིང་གྲུབ་པའི་འཁོར་སྒྱུར་ཨོ་རྒྱན་མཚོ་སྐྱེས་བླ་མའི་ཐུགས་ཀྱི་སྲས།།
དམར་སེར་ངུར་སྨྲིག་གར་གྱི་རྣམ་རོལ་འཆད་རྩོད་རྩོམ་པའི་གཡས་འཁྱིལ་དུང་། །
རབ་འབྱམས་བདེ་གཤེགས་ཞིང་གི་རྡུལ་ན་ཡིད་འཕྲོག་དྲི་ཟའི་གླུ་དང་བསྡེབས། །
སྤྱན་རས་གཟིགས་དབང་ཆོས་ཀྱི་དབང་པོ་དང་། །
སྔ་འགྱུར་ཉིན་བྱེད་འཇམ་མགོན་མི་ཕམ་སོགས། །
མཁས་གྲུབ་གསེར་རིའི་འཕྲེང་ལྟར་བྱོན་པའི་གནས། །
མདོ་ཁམས་འབྲི་རྫ་ཟལ་མོ་སྒང་གི་ཆར། །
ལྷ་གཉན་ཆེན་པོ་རྡོ་རྗེ་འཕན་ཕྱུག་གིས། །
བདག་བཟུངས་རྫ་ཡུལ་རྫ་ཆབ་སྔོན་མོའི་འགྲོའི། །
ཤར་ཕྱོགས་དལ་གྱིས་འབབ་པའི་སྟོད་རྒྱུད་དུ། །
ལྗགས་ལ་དྷཱིཿཡིག་རང་བྱོན་རིགས་བཟང་གི།
ཡུམ་གྱི་ལྷུམས་སུ་ཞུགས་ཚེ་མདངས་ལྡན་གྱི། །
ཤེལ་དཀར་མཆོད་སྡོང་འོད་ཟེར་འབར་བ་ཞིག །
སྦྲ་ཐོག་བབ་པའི་ངོ་མཚར་རྨི་ལྟས་དང་། །
ལྷན་ཅིག་ལུས་སེམས་དགའ་བདེས་རྟག་ཏུ་མྱོས། །
ཁོར་ཡུག་ཆུ་སྐྱེས་གསར་བའི་ཚོམ་བུ་བཞད། །
མཁའ་ལ་འཇའ་ཟེར་ཐིག་ལེའི་སྤྲིན་ཕུང་འཁྲིགས། །
རེག་འཇམ་བདུད་རྩིའི་སྦྲང་ཆར་སིལ་མ་བཅས། །
བལྟམས་ཚེ་（༡༩༤༣）གཙང་ཆབ་འོ་མའི་བདུད་རྩིར་གྱུར། །
ལྔ་ཕྲག་དུས་སུ་མཁྱེ༵ན་ཀོ༵ང་རྣམ་གཉིས་དང་། །
ཡེ་ཤེས་སྤྱན་ལྡན་དུ་མའི་བཀའ་ལུང་བཞིན། །
གསང་ཆེན་མངའ་བདག་པདྨ༵་བཛྲ༵་གྱི། །
སྐྱེ་སྲིད་གསུམ་པའི་མཚན་གྱི་ཅོད་པཎ་གསོལ། །
གཞོན་ནུ་ཉིད་ནས་དད་དང་ངེས་འབྱུང་དང་། །
བྱམས་དང་སྙིང་རྗེས་ཐུགས་རྒྱུད་ཡོངས་གང་ཞིང་། །
ཅིར་སྣང་དག་པའི་རོལ་མོར་འབྱམས་ཀླས་པའི། །
ངོ་མཚར་སྤྲུལ་པའི་རྣམ་འགྱུར་ལྷག་པར་གསལ། །
བཤེས་གཉེན་ཆེན་པོ་དྷརྨཱ༵འི་མཚན་ཅན་ལས། །
བརྡ་སྤྲོད་ཡི་གེའི་ཕྱི་མོ་ཀློག་ཙམ་གྱིས། །
མཁྱེན་ཞིང་ཆུབ་པའི་སྐྱེས་ཐོབ་ཤེས་རབ་ཅེས། །
ངོ་མཚར་སྙན་པའི་དབྱར་རྔ་ཕྱོགས་སུ་ལྡིར། །
དགུང་གྲངས་བཅུ་ཕྲག་གྲུབ་དབང་རྫོགས་ཆེན་པའི། །
གདན་ས་རུ་དམ་བསམ་གཏན་ཆོས་གླིང་གི། །
ཕོ་བྲང་ཁམས་གསུམ་ཟིལ་གནོན་ཡང་རྩེ་རུ། །
གཟིམ་སྤྱིལ་འཆི་མེད་གྲུབ་པའི་དགའ་ཚལ་དུ། །
རིན་ཆེན་གཙུག་ཏོར་གྲུབ་དབང་འཇི༵གས་བྲ༵ལ་བ། །
ཀུན་མཁྱེན་དངོས་སྣང་གུ༵་ཎ༵་ན༵་ཐ༵་སོགས། །
དད་ལྡན་སེར་སྐྱ་སྟོང་ཕྲག་དུ་མ་ཡིས། །
རབ་འབྱམས་ཀུན་བཟང་མཆོད་པས་མདུན་བསུ་བཅས། །
མི་འཇིགས་གསེར་གྱི་ཁྲི་ལ་མངའ་གསོལ་ཚེ། །
མཁའ་ལ་ཉི་ཟླ་སྐར་གསུམ་དུས་གཅིག་ཤར། །
སྣང་བཞི་མཐར་ཕྱིན་པདྨ༵འི་མཚན་ཅན་གྱིས། །
ཆིག་བརྒྱུད་ཚིག་གསུམ་གདམས་པའི་མན་ངག་བསྩལ། །
གདོད་མའི་མགོན་པོ་མི་ཡི་བརྫུར་ཞུགས་པ། །
ཡོངས་འཛིན་མཁན་ཆེན་གུ༵་ཎ༵འི་མཚན་ཅན་ལས། །
ཟབ་གསང་སྙིང་ཐིག་གདམས་པའི་སྨིན་གྲོལ་སོགས། །
ཐེག་གསུམ་ཆོས་ཀྱི་དགའ་སྟོན་དཔལ་ལ་རོལ། །
རྡོ་རྗེ་འཆང་དངོས་དྷརྨཱ༵་མ༵་ཏི༵་སོགས། །
བཤེས་གཉེན་གསེར་རིའི་འཕྲེང་བ་ལྟར་བསྙེན་ནས། །
བཀའ་གཏེར་གསར་རྙིང་རྒྱུད་སྡེ་ཕལ་མོ་ཆེའི། །
གདམས་ཟབ་བདུད་རྩིས་ཐུགས་ཀྱི་བུམ་བཟང་གཏམས། །
རི༵ག་སྟོང་དག་པ་འོད་གསལ་ཆོས་སྐུའི་དབྱིངས། །
རི༵ག་རྩལ་མ་འགགས་ཆོས་རབ་རྣམ་འབྱེད་ཀྱི། །
རང་གྲོལ་མགྲིན་པ་རྡོ་རྗེའི་གསང་མཛོད་ལས། །
མདོ་སྔགས་ཆོས་ཚུལ་རྒྱ་མཚོའི་གཏེར་ཆེན་རྡོལ། །
སྲིད་གསུམ་གྲོང་ཁྱེར་སྲིན་མོའི་གླིང་བཞིན་དུ། །
གཟིགས་པས་ངེས་འབྱུང་སྐྱོ་ཤེས་ཀྱིས་བསྐུལ་ཏེ། །
སྡོམ་བརྩོན་འདུལ་འཛིན་གསེར་རིའི་འཕྲེང་བསྟར་ནས། །
དམར་སེར་ངུར་སྨྲིག་གསར་བའི་ཅོད་པཎ་གསོལ། །
ཕྱི༵་རུ་ཉེས་ལྟུང་རྙོག་བྲལ་ཉེ་བ་འཁོར། །
ན༵ང་དུ་བྱང་སེམས་སྤྱོད་པས་ཞི་བ་ལྷ། །
གས༵ང་བ༵་གསང་འཛིན་དགའ་རབ་དཔའ་བོའི་ཟླ། །
ཡ༵ང་གས༵ང་གདོད་མའི་མགོན་པོ་ཁྱེད་ལས་སུ། །
ཇོ་ཤཱཀ་རྣམ་གཉིས་བསམ་ཡས་གཙུག་ལག་ཁང་། །
སྤྱན་རས་གཟིགས་དབང་གངས་ཅན་མགོན་པོ་སོགས། །
ལྷ་ལྡན་ཡུལ་གྱི་རྟེན་གནས་ཕལ་མོ་ཆེར། །
བསགས་སྦྱང་སྤེལ་བའི་རྣམ་དཀར་མཆོད་སྤྲིན་བསྟར། །
སྐྱབས་གཅིག་མཁན་ཆེན་ཨཱ༵་ཡུ༵འི་མཚན་ཅན་གྱི། །
གསང་བ་སྙིང་པོ་གཞུང་ཆེན（༡༣）ཆ་ལག་བཅས། །
ལེགས་སྦྱང་རྩ་འགྲེལ་བློ་འཛིན་འཆད་རྒྱུགས་སོགས། །
སྐྱེས་སྦྱང་ཤེས་རབ་མཁས་པའི་གྲགས་པ་འབར། །
སྐུ་གསུམ་ཀུན་འདུས་པདྨ༵་ཐོ༵ད་འཕྲེ༵ང་དང་། །
མཁྱེ༵ན་བརྩེ༵འི་འོ༵ད་ཟེ༵ར་དྷརྨཱ༵་དྷ༵རྟུའི་མཚན། །
བདེ༵་མཆོ༵ག་རྡོ༵་རྗེ༵་པདྨ༵་བཛྲ༵་སོགས། །
མཁས་དང་གྲུབ་པའི་ཟློས་གར་ཅིར་ཡང་བསྒྱུར། །
སྐུ་ལ་དམར་སེར་ངུར་སྨྲིག་གོས་བཟང་བཀླུབས། །
ངག་ལ་ལེགས་གསུང་གསུང་རབ་རིན་ཆེན་རྡོལ། །
ཐུགས་ལ་མཁྱེན་གཉིས་ཡེ་ཤེས་ཉི་མ་ཤར། །
མགོན་ཁྱོད་བསྟན་འདིར་སྟོན་པ་གཉིས་པ་ཡིན། །
ངམ་ནག་དུས་ཀྱི་རྒུད་པས་ཡོངས་གཙེས་ཤིང་། །
ཐུབ་བསྟན་མིང་གི་ལྷག་མ་ཙམ་གྱུར་ཀྱང་། །
དམ་པའི་རང་གཤིས་ནམ་ཡང་བསུབ་མེད་པས། །
སོར་བྱང་སྔགས་ཀྱི་དམ་སྡོམ་སྲོག་དང་བསྡོས། །
བརྣག་དཀའི་དཀའ་བ་འབུམ་གྱི་ངལ་ལས་འོག །
སྣང་གྲགས་ལྷ་སྔགས་ཆོས་སྐུའི་རོལ་རྩལ་ངང་། །
རབ་འབྱམས་རྩ་བ་གསུམ་གྱི་བསྙེན་སྒྲུབ་དང་། །
རྐྱེན་ངན་ལམ་ཁྱེར་རྟོགས་པའི་བོགས་འདོན་མཛད། །
སྔོན་བསགས་བསོད་ནམས་ཨུ་དུམ་ཝཱ་རའི་ཚལ། །
བསླབ་གསུམ་ཡོན་ཏན་ཡོངས་འདུའི་ལྗོན་བཟང་རྩེར། །
སྐུ་གཉིས་འབྲས་བུའི་མེ་ཏོག་མདངས་བཀྲ་བའི། །
དོན་གཉིས་ལྷུན་གྲུབ་བླ་མ་གཙུག་ན་རྒྱལ། །
ཡང་དར་བསྟན་པའི་ཕན་བདེའི་འོད་སྟོང་གིས། །
གངས་ལྗོངས་རྒུད་པའི་སྨག་རུམ་བསལ་དང་ལྷན། །
རྒྱལ་བསྟན་ཕྱི་མོ་གྲུབ་དབང་རྫོགས་ཆེན་པའི། །
ཡོངས་རྫོགས་བསྟན་པའི་ཁུར་ཆེན་ཁྱོད་ཀྱིས་བཞེས། །
ལེགས་བྱས་རྣམ་དཀར་ཚོགས་གཉིས་ཆུ་གཏེར་ལས། །
ལེགས་འཁྲུངས་གཙུག་ལག་གསེར་གྱི་རྒྱ་ཕིབས་ཅན། །
རབ་མཛེས་ཉི་ཟླའི་གཟི་མདངས་འཕྲོག་བྱེད་པས། །
རུ་དམ་གྲུབ་པའི་ཕ་ཁྱིམ་དོག་མོར་བྱས། །
བསྟན་འཛིན་ཉི་ཟླའི་གཟི་མདངས་ནུབ་རིར་ཆས། །
ལུང་རྟོགས་པདྨའི་ཚལ་ནི་ཟུམ་པའི་དུས། །
སླར་ཡང་དཔལ་གྱི་སེང་གེའི་ཆོས་གྲྭ་ཞེས། །
རྒྱལ་བསྟན་སྲོག་གི་ཀ་བ་ཁྱེད་ཀྱིས་བཙུགས། །
རིན་ཐང་འཛམ་གླིང་ནོར་གྱིས་གཞལ་དཀའ་ཞིང་། །
ལྷག་བསམ་ཟླ་བ་དཀར་པོས་བསྐྲུན་མིན་པའི། །
རྙེད་དཀའི་རྟེན་མཆོག་མཚན་བཟང་གཟུགས་སྐུ་ཡི། །
ཟུངས་ཁྲག་དྲོན་པོས་བསྟན་ལ་རིམ་གྲོ་བྱས། །
སྤྱི་མཐུན་ལས་ཀྱིས་ནོངས་པའི་སྨག་རུམ་ཁྲོད། །
རྒྱལ་བསྟན་སྣུམ་ཟད་མར་མེ་ལྟར་གྱུར་ཀྱང་། །
ཁྱེད་ཀྱིས་གཞི་གསུམ་འདུལ་བའི་ཕྱག་བཞེས་བཞིན། །
ས་ཆེན་ཁྱོན་ཡངས་གསེར་གྱི་མདངས་སུ་བསྒྱུར། །
ཆེར་སྙིགས་རྩོད་ལྡན་དུས་ཀྱི་ཡང་མཐའ་འདིར། །
འགའ་རེས་བསྟན་འདི་གྲགས་སྙན་ནོར་ལ་སྤེལ། །
ཁ་ཅིག་སྲིད་སྒྲུབ་བྱེད་པའི་ཕྱག་ཆར་དམིགས། །
ཁྱེད་ཀྱིས་བསྟན་སྙིང་ལུང་དང་རྟོགས་ལ་འཛིན། །
བརྒྱུད་གསུམ་བླ་མའི་གདམས་ངག་བདུད་རྩིའི་ཀླུང་། །
རིམ་དགུ་ཐེག་པའི་བསྟན་པ་གཞིར་བཞེངས་སུ། །
བསླངས་པའི་དགེ་མཚན་གསར་བའི་ཆོས་རྔ་ཆེ། །
རུ་དམ་པདྨའི་ཚལ་ན་ལྷག་པར་སྙན། །
བྱང་སེམས་གོ་ཆས་ངལ་བ་ཁྱད་བསད་དེ། །
འཛམ་གླིང་ཤར་ནུབ་རྒྱ་མཚོའི་འགྲམ་ངོག་ཚུན། །
སྣ་ཚོགས་གདུལ་བྱའི་མོས་པ་དང་བསྟུན་པའི། །
སྨིན་གྲོལ་ཆོས་ཀྱི་བཀའ་དྲིན་སྙིང་ལ་ལྕི། །
ཆོས་ཅན་འཁྲུལ་བའི་སྣང་བ་སྒྱུ་མར་གཟིགས། །
ཆོས་ཉིད་བརྗོད་བྲལ་ཡུལ་མེད་མཁའ་ལྟར་རྟོགས། །
མཐའ་གྲོལ་ཀློང་ཡངས་ཆེན་པོར་འབྱམས་ཀླས་པའི། །
ཡོངས་གྲོལ་ཆོས་སྐུའི་རྒྱལ་ས་ཁྱེད་ཀྱིས་རྙེད། །
སྙིང་ཐིག་སྙིང་པོའི་སྙན་རྒྱུད་མན་ངག་གི །
བརྒྱུད་འཛིན་བུ་སློབ་ནམ་མཁའི་སྐར་ཚོགས་ལྟར། །
སྐྱེད་སྲིང་ཡ་མཚན་གྲུབ་པའི་རོལ་མོ་འབུམ། །
རྒྱལ་དང་དེ་སྲས་མཛད་པ་སུ་ཡིས་དཔོག །
དམ་པའི་གདན་ས་རུ་དམ་པདྨའི་ཐང་། །
དམར་སེར་འདུས་པ་རྒྱ་མཚོས་ཡོངས་གཏམས་ཏེ། །
རབ་འབྱམས་ཀུན་བཟང་མཆོད་པའི་སྤྲིན་ཕུང་བཅས། །
བྱང་ཆུབ་སྤྱོད་པའི་སྨོན་ལམ་ཡང་ཡང་སྤྲོས། །
བརྒྱུད་གསུམ་བླ་མའི་ཞལ་རླངས་མ་ཡལ་བའི། །
སྡེ་གསུམ་ཀློང་དགུའི་ཟབ་དོན་གདམས་པའི་བཅུད། །
ཤིན་ཏུ་ཉེ་ལམ་འོད་གསལ་རྫོགས་ཆེན་གྱི། །
མན་ངག་བདུད་རྩིའི་བགོ་སྐལ་ཁྱེད་ཀྱིས་འགྱེད། །
ཁྱེད་ཀྱི་མཛད་བཟང་གསལ་བའི་ཟེར་འཕྲེང་འབུམ། །
གླིང་བཞིའི་མཁའ་ལ་འཚེར་བའི་རི་བོང་འཛིན། །
མཐོང་མིན་བ་ཚྭའི་མཚོ་ལ་ཟླ་བ་ཞེས། །
འཁྲུལ་བའི་མིག་ལ་གཟུགས་བརྙན་ཟླ་བར་སྣང་། །
དེང་དུས་བསྟན་འཛིན་ཟོལ་མ་ཕལ་མོ་ཆེས། །
ཆོས་བརྒྱད་ལོག་འཚོས་བསྟན་ཞབས་སྡུད་པའི་དུས། །
ཁྱེད་ཀྱིས་དབེན་གནས་རུ་དམ་པདྨའི་ཐང་། །
སྙིང་པོའི་སྒྲུབ་ལ་རྩེ་གཅིག་གཞོལ་བ་རྨད། །
ཡེ་སྟོང་གདོད་ནས་དག་པའི་ནམ་མཁའ་ལ། །
ལྷུན་གྲུབ་སྣང་བཞིའི་གཤོག་རྩལ་ཡོངས་རྫོགས་པའི། །
གདོད་མའི་རྒྱལ་སར་དབང་བསྒྱུར་དམ་པའི་མགོན། །
ཕ་རྗེས་བུས་ཟིན་ཁྱེད་ལ་རྟག་ཏུ་སྨོན། །
གསང་གསུམ་རཏྣའི་གཏེར་ཆེན་ཐང་མར་བརྡལ། །
མཛད་འཕྲིན་ཉི་ཟླའི་ཟེར་འཕྲེང་གླིང་བཞིར་འབར། །
གྲགས་སྙན་དབྱར་རྔས་ཡངས་པའི་ས་ཆེན་ཁྱབ། །
ཁྱེད་ཀྱི་སྐུ་ཚེ་བསྐལ་བརྒྱར་འཚོ་གཞེས་གསོལ། །
ཅེས་རྗེ་བཙུན་བླ་མ་མཆོག་གི་རྟོགས་བརྗོད་རྒྱ་མཚོ་ལྟ་བུ་ལས་འདིར་སྐྲ་རྩེའི་ཟེགས་མ་ཙམ་ཞིག་ཕྲན་པདྨ་འོད་གསལ་མཐའ་ཡས་ཀྱིས་རང་གནས་དུང་དཀར་པདྨ་ཤེལ་རིའི་སྒྲུབ་གནས་འོད་གསལ་གླིང་དུ་སྤེལ་བ་སརྦ་མངྒ་ལཾ།། །།
རྩོམ་སྒྲིག་པ། དོན་འགྲུབ་རྡོ་རྗེ།