གང་དུ་ཆགས་པའི་གནས་ཀྱི་ཆེ་བ་མདོ་ཁམས་རུ་དམ་ལུང་གི་ཕྱི་ནང་གསང་བའི་བཀོད་པ་སྤྱིར་བཤད་པ།
དང་པོ་གདན་ས་གནས་ཀྱི་ཆེ་བ་མདོ་ཁམས་རུ་དམ་ལུང་པའི་ཕྱི་ནང་གསང་བའི་བཀོད་པ་བཤད་པ་ནི། དེ་ཡང་བསྐལ་པ་བཟང་པོའི་རྣམ་འདྲེན་སྟོང་དང་རྩ་གཉིས་མངོན་པར་སངས་རྒྱས་པའི་གནས་མཆོག་དཔལ་ལྡན་ཛམྦུ་པྲྀཀྵས་མཚན་པའི་གླིང་ཆེན་པོའི་ཡུལ་དབུས། གནས་མཆོག་མ་ག་དྷ་རྡོ་རྗེ་གདན་ནས་བྱང་ཕྱོགས་སུ་དཔག་ཚད་བརྒྱ་ཕྲག་བགྲོད་པའི་ས་ཕྱོགས་ན། ཇི་སྐད་དུ། ལྷ་མོ་དྲི་མ་མེད་པས་ཞུས་པའི་མདོ་ལས། བྱང་ཕྱོགས་གངས་རིའིརྒྱུད་ཀྱི་སར། །དགེ་བ་ལྡན་པའི་ས་ཕྱོགས་སུ། །དམ་པའི་ཆོས་ནི་རྒྱས་པར་འགྱུར། །ཞེས་དང༌། འཇམ་དཔལ་རྩརྒྱུད་ལས། ང་ནི་འདས་ནས་ལོ་བརྒྱ་ན། །ཁ་བ་ཅན་དུ་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། །ཞེས་སོགས་མདོ་རྒྱུད་དུ་མ་ནས་ལུང་གིས་ཟིན་ཅིང༌། ཁྱད་པར་བཀའ་གདམས་གླེགས་བམ་ལས། ཤར་རྡོ་རྗེ་གདན་གྱི་བྱང་ཕྱོགས་ན། །གནས་པུར་རྒྱལ་བོད་ཅེས་བྱ་བ་ཡོད། །རི་མཐོན་པོ་གནམ་གྱི་ཀ་བ་ཡོད། །མཚོ་དམའ་མོ་གཡུ་ཡི་མེ་ལོང་ཡོད། །གངས་དཀར་པོ་ཤེལ་གྱི་མཆོད་རྟེན་ཡོད། །སྤང་སེར་པོ་གསེར་གྱི་ལྷུན་པོ་ཡོད། །དྲི་ཞིམ་པོ་སྨན་གྱི་བདུག་སྤོས་ཡོད། །ཚོན་བཀྲ་བའི་གསེར་གྱི་མེ་ཏོག་ཡོད། །དབྱར་བཀྲ་བ་གཡུ་ཡི་མེ་ཏོག་ཡོད། །ཅེས་དང་། རི་པདྨ་སྟོང་ལྡན་དབྱིབས་ལེགས་པ། །དུས་དགུན་གསུམ་དཀར་པོ་ཤེལ་གྱི་མདོག །དུས་དབྱར་གསུམ་སྔོན་མོ་གཡུ་ཡི་མདོག །དུས་སྟོན་གསུམ་སེར་པོ་གསེར་གྱི་མདོག །དུས་དཔྱིད་གསུམ་ཁྲ་བོ་གཟི་ཡི་མདོག །ཅེས་པ་ལྟར་ཁོར་ཡུག་གངས་དཀར་གྱི་ཕྲེང་བ་ཚར་དུ་དངར་བས་ཕྱོགས་ཀུན་ཡོངས་སུ་བསྐོར་བའི་གདོད་མའི་མཛེས་ལྗོངས་བྷོ་ཊའི་ལྗོངས་སམ་ཕྱི་གླིང་པའི་སྐད་དུ་ཏྲི་བྷེ་ཏྲི་དང་། རང་ཅག་གངས་ཅན་པ་རྣམས་ལ་བོད་ཡུལ་ཆོས་ཀྱི་ཞིང་ཁམས་ཞེས་ཡོངས་སུ་གྲགས་པའི་རྒྱལ་ཁམས་འདི་ལ། སྟོད་ལ་མངའ་རིས་སྐོར་གསུམ། བར་དུ་དབུས་གཙང་རུ་བཞི། སྨད་ན་མདོ་ཁམས་སྒང་དྲུག་ཅེས་ཆོལ་ཁ་གསུམ་དུ་ཕྱེ་བའི་ནང་ཚན་མདོ་ཁམས་སྒང་དྲུག་གི་ཡ་གྱལ་འབྲི་ཟླ་ཟལ་མོ་སྒང་གི་སའི་ཆར་གཏོགས་པ། བོད་ཀྱི་རི་དབང་སྤུན་དགུའི་ནང་ཚན་ལྷ་གཉེན་རྡོ་རྗེ་གཡུང་དྲུང་རྩལ་གྱིས་སྲུང་བའི་གནས་མཆོགསྦས་ཡུལ་རོང་མོ་ལྗོངས་དང་འདབས་འབྱོར་ཞིང་། དབུས་ཕྱོགས་པདྨ་བརྩེགས་པ་དང༌། ཡར་ལུང་ཤེལ་གྱི་བྲག་ཕུག་སོགས་གནས་ཆེན་རྣམས་དང་བརྒྱུད་མར་འབྲེལ་བའི་རུ་དམ་སྐྱིད་ཁྲམ་ལུང་པ་ནི་ཆོས་སྡེ་ཆེན་མོ་འདི་ཉིད་གང་དུ་ཆགས་པའི་གནས་གཞི་ཡིན་ལ། གནས་འདིའི་བཀོད་པ་ཐ་མལ་པ་དག་གི་སྣང་ངོ་ལྟར་ན། རང་བྱུང་གི་མཛེས་ལྗོངས་མཐོང་བ་ཙམ་གྱིས་ཡིད་དབང་འཕྲོག་ཅིང་ཉམས་དགའི་སྤྲོ་སྣང་ངང་གིས་འཕེལ་བའི་གདོད་མའི་སྐྱེད་ཚལ་ཞིག་སྟེ། སྐྱབས་རྗེ་པདྨ་སྐལ་བཟང་རིན་པོ་ཆེའི་གསུང་རྩོམ་ལས། ན་བུན་གོས་བཟང་བཀླུབས་པའི་ཀེ་ལ་ཤར། །ཟླ་འོད་བདུད་རྩིའི་ཐིགས་པ་སྟོབ་དང་ལྷན། །ཡིད་འོང་བྲག་རིའི་བ་གམ་རབ་མཛེས་པར། །ནང་གི་ཉི་མ་རྣལ་འབྱོར་སྙིང་ལ་ཤར། །འདབ་བརྒྱ་གེ་སར་བཞད་པའི་ལང་ཚོའི་དཔལ། །ཚང་ཚིང་གཡུ་ལོས་སྤུད་པའི་མཛེས་སྡུག་གར། །དྲི་བཞོན་གསར་པས་བསྐུལ་བའི་འཕྱོར་ལྡེམ་ལ། །ལྗོན་ཤིང་ཡལ་གའི་ཚོགས་ཀྱང་འགྲན་པ་བཞིན། །རླབས་དཀར་དྲག་ཏུ་འཕྱོ་བའི་རྦབ་ཆུ་དང་། །ངག་སྙན་བྱ་དང་བྱེའུའི་མགྲིན་གླུ་ཡིས། །དམ་པའི་ཆོས་སྒྲ་བར་མེད་སྒྲོག་དང་བཅས། །ཟག་མེད་ཡིད་ཀྱི་དགའ་སྟོན་རྣམ་པར་སྤེལ། །རྩེ་བརྒྱད་ལྷུན་པོའི་སྤོ་ལས་དྭངས་པའི་མཁའ། །རྩིབས་བརྒྱད་འཁོར་ལོའི་གཟུགས་སུ་སྣང་བ་ཡི། །ཤར་ནུབ་ཉི་ཟླའི་ཟེར་མདངས་གསར་པ་ཉིད། །སྟོང་གསལ་ཕྱི་ཡི་མཚོན་དཔེར་ངང་གིས་གྲུབ། །འདབ་བརྒྱད་པདྨ་རྒྱས་པའི་གཤོང་ཡངས་པའི། །ནེའུ་གསིང་ཆུ་གཙང་ཆབ་ཀྱིས་མ་བཏང་བས། །བདེ་སྟོང་ལྷན་ཅིག་སྐྱེས་པའི་ཡེ་ཤེས་དང་། །དབྱེར་མི་ཕྱེད་པའི་བརྡ་ཆོས་རྒྱན་དུ་ཤར། །ཞེས་སོགས་ཆེད་དུ་བརྗོད་པའི་གསུང་གིས་གསལ་བ་ལྟར། སྟོད་ན་དཀར་གསལ་གངས་རིའི་རྩེ་མོ་དགུང་སྔོན་ལ་ཟུག་ཅིང་དལ་བུར་རྒྱུ་བའི་སྤྲིན་དཀར་གྱི་ཕུང་པོས་མགུལ་བ་བརྒྱན་པ། གསེར་མདོག་ཉི་མའི་འོད་ཀྱིས་མཛེས་མདངས་གསོས་ཚེ་རང་བྱུང་ཤེལ་དཀར་གྱི་མཆོད་རྟེན་ལ་གསེར་ཞུན་གྱི་རི་མོ་མིག་མང་རིས་སུ་བཀྲ་བས་མཛེས་པ་ལྟར་ལྷང་ངེར་འཕགས་པ། སྐེད་ན་རྔམ་ཆེན་རྫ་བྲག་གི་མཁར་རྫོང་བར་སྣང་ལ་མཐོ་བར། སྨུག་སྤྲིན་དར་འཕྱང་དཀར་པོས་བླ་བྲེབྲེས་པ་མཐའ་འཁོར་རི་ཕྲན་གྱི་རྗེ་བོ་ལྟར་ལྷུན་བརྗིད་ཆགས་པ། ཕྱོགས་དང་ཕྱོགས་ཀྱི་ངོས་ཀུན་ཏུ་བྲག་སྐྱིབས་སྒྲུབ་པའི་དབེན་རྫོང་ངོ་མཚར་བ་མང་པོས་ཡོངས་སུ་ཁེངས་པས་དད་དང་དང་བའི་ངེས་འབྱུང་སྙིང་ནས་འདྲེན་པ། མཐའ་འཁོར་རྣམས་སུ་སྔོ་ལྗང་གཡུ་མདོག་གིས་སྤུད་པའི་ལྗོན་པའི་ནགས་ཚལ་སྣ་ཚོགས་ཀྱི་ཚང་ཚིང་འཁྲིགས་པ་ཡལ་འདབ་ལོ་མའི་ལྕུག་ཕྲན་ཕྱུར་བུར་རྒྱས་པ་དྲི་བཞོན་རླུང་གིས་དལ་བུར་ལྡེམ་པ། སིལ་དང་མེ་ཏོག་གི་འབྲས་བུས་དུད་པ་ལ། ཁུ་བྱུག་དང་། འཇོལ་མོ། མཐིང་རིལ་སོགས་སྣ་ཚོགས་སྤུ་སྡུག་གི་སྒྲོ་མདངས་བཀྲ་ཞིང༌། དྲུག་འགྱུར་མགྲིན་པའི་དབྱངས་སྙན་འཁྲོལ་བའི་འདབ་ཆགས་སྣ་ཚོགས་པས་བག་ཡངས་གཤོག་རྩེད་ཀྱིས་རོལ་བ། ཡང་མཐར་ནེའུ་སེང་སྤང་ཐང་ཕྱུག་མོ་ཕྱོགས་མཐར་བརྡལ་བར་དཀར་དམར་མེ་ཏོག་གི་ཁྲ་ཚོམ་རྣམ་པར་བཀྲ་ཞིང་༌། སྣ་ཚོགས་རྩི་སྨན་གྱི་འབྲས་བཟང་ཚར་དུ་དངར་བ་སོགས་རང་བྱུང་ངང་གིས་གྲུབ་པའི་སྐྱེད་མོས་ཚལ་དེ་ནི་བཟོ་བོ་མཁས་པའི་སོར་རྩེ་ལས་ཐོན་པའི་མཛེས་རིས་དང་གཉིས་སུ་མ་མཆིས་པའི་མཛེས་ལྗོངས་སུ་གྲུབ་པ་མ་ཟད། སའི་དཔྱད་བཟང་པོ་ཐམས་ཅད་མ་ཚང་བ་མེད་པ་ཕུན་སུམ་ཚོགས་པའི་གནས་མཆོག་སྟེ། དེ་ཡང་གནམ་དབྱིབས་འཁོར་ལོ་རྩིབས་བརྒྱད་དང་། ས་དབྱིབས་པད་མ་འདབ་བརྒྱད་ཀྱི་ཚུལ་དུ་ཆགས་པས་ཆོས་སྲིད་སྡེ་བཞིའི་དཔལ་ཡོན་འབད་མེད་དུ་འདུ་བ། ཤར་ཕྱོགས་ཉི་ཟླའི་འཆར་ལམ་ཡངས་ཤིང་རིང་བས་གཙུག་ལག་རིག་པའི་གནས་ལ་སྤྱན་དཀྱུས་རིང་བའི་མཁས་པའི་ཁྱུ་ཚོགས་བར་མེད་དུ་འབྱུང་བ། ལྷོ་ཕྱོགས་ནོར་བུ་རི་ཆེན་མདུན་དུ་སྤུངས་པས་ཆོས་ནོར་གཏེར་གྱི་ལོངས་སྤྱོད་རྒྱས་པ། ནུབ་རི་དར་གྱི་ཡོལ་བ་རྒྱབ་ནས་བྲེས་པས་ཆེ་དགུའི་གཙུག་གིས་གུས་པར་བསྙེན་པ། བྱང་རི་བཙན་པོས་འགག་སྒོ་བསྡམས་པས་མ་རུང་འཚེ་བའི་རྒྱུ་འགྲུལ་གཅོད་པ། ཕྱོགས་བཞིར་སྲུང་ཆེན་བཞི་དང་། བར་མཚམས་རྣམས་སུ་བཀྲ་ཤིས་རྟགས་བརྒྱད་ཀྱི་དབྱིབས་སུ་མངོན་པའི་རི་ཕྲན་གྱི་ར་བས་ཕྱི་ནང་བར་གསུམ་བསྐོར་བ་སོགས་ངོ་མཚར་དགེ་བའི་མཚན་མ་འབུམ་དུ་བཀྲ་བ། ལྷོ་ཕྱོགས་གངས་ཀྱི་རི་བོ་ལས་འོང་བའི་དལ་འབབ་འོ་མའི་ཆུ་རྒྱུན་དཀར་པོ་གཡུ་འབྲུག་གི་གྲེ་བར་ནས་དྲག་ཏུ་འབབ་པའི་ངར་སྐད་ཕྱོགས་ཀུན་ལྡིར་བ་དང་བཅས་འབབ་རྒྱུན་གཡས་སུ་ལན་དགུར་འཁྱིལ་བས་མི་ཟད་ཚེ་དང་གཡང་གི་དངོས་གྲུབ་འདྲེན་པ། གཞན་ཡང་སྣ་ཚོགས་ནོར་བུའི་རིགས་ཀྱི་མདངས་འོད་འབར་བའི་མཚོ་དང་མཚེའུ་མང་པོས་ཕྱོགས་ཀུན་བསྐོར་བ་སོགས་ཡ་མཚན་རྨད་དུ་བྱུང་བའི་མཛེས་ལྗོངས་ངོ་མཚར་མིག་གི་དཔྱིད་དུ་མངོན་པ་མཐུན་སྣང་ཕྱི་ཡི་བཀོད་པ་མདོ་ཙམ་དང་། གསང་བ་ལྟར་ན་འཛམ་གླིང་གྲུབ་བརྒྱའི་སྤྱི་མེས་ཨོ་རྒྱན་སངས་རྒྱས་གཉིས་པ་གུ་རུ་པདྨ་འབྱུང་གནས་ཀྱིས་རྫུ་འཕྲུལ་ཆེན་པོའི་ཞབས་ཀྱིས་ཉེ་བར་བཅགས་ཏེ་རུ་ཏྲ་དམ་སྲི་སྤུན་དགུ་བཀའ་རྟགས་ཕྱག་རྒྱས་དམ་འོག་ཏུ་བཙུད་ཅིང་། བཀའ་བརྒྱད་བདེ་གཤེགས་འདུས་པའི་དཀྱིལ་འཁོར་གྱི་དར་ཞལ་ཕྱེས་ནས་བདུད་རྩི་སྨན་གྱི་སྒྲུབ་པ་མཛད། གངས་བྲག་རི་མཚོརྣམས་སུ་ཆོས་ནོར་རྫས་ཀྱི་གཏེར་ཁས་ཕྱུར་བུར་བཀང་ནས་ཡོན་ཏན་གནས་ཀྱི་གཙོ་བོར་བྱིན་གྱིས་བརླབས་པ་སྟེ། ཇི་སྐད་དུ། སྤྲུལ་བའི་གཏེར་ཆེན་ཨོ་རྒྱན་མཆོག་གྱུར་བདེ་ཆེན་གླིང་པའི་གཏེར་བྱང་ལས། ཆུ་ཕོ་སྤྲེལ་ལོའི་སྤྲེལ་ཟླའི་ཚེས་བཅུ་ལ་ཨོ་རྒྱན་གུ་རུ་པདྨ་འབྱུང་གནས་དག་པའི་འཁོར་དུ་མ་དང་བཅས་པ་རུ་དམ་གངས་ཀྱི་ར་བའི་དབུས་ཀྱི་ནེའུ་གསེང་དུ་དར་གྱི་གུར་ཕུབ༔ རིན་པོ་ཆེའི་ཁྲི་ལ་བཞུགས༔ ཟ་འོག་གི་ན་བཟའ་སྣ་ཚོགས་གསོལ༔ ཞལ་ཟས་དུ་མའི་མཆོད་པ་ཡེ་ཤེས་ཀྱི་བདུད་རྩིར་བྱིན་གྱིས་བརླབས༔ ཡེ་ཤེས་ཀྱི་མཁའ་འགྲོ་མ་མཚན་ལྡན་མང་པོས་ཚོགས་ཀྱི་འཁོར་ལོར་རོལ་བའི་ངོ་མཚར་བདེ་གཤེགས་ཀུན་འདུས་ཀྱི་ཚོམ་བུའི་སྒྲུབ་པ་མཛད་ཚེ༔ འཁོར་རྣམས་ཀྱིས་མགྲིན་གཅིག་ཏུ༔ ཀྱེ་དུས་གསུམ་རྒྱལ་བ་ཀུན་འདུས་གུ་རུ་རྗེ༔ ཡེ་ཤེས་སྤྱན་གྱིས་གཟིགས་པ་དགོངས་སུ་གསོལ༔ ཉིད་ཀྱིས་ཞབས་བཅགས་སྒྲུབ་པའི་གནས་སུ་གཟིགས༔ དཔལ་དང་ལྡན་པའི་ཕུན་སུམ་ཚོགས་པའི་གནས༔ འདི་ཡི་བྱུང་ཚུལ་ལོ་རྒྱུས་ཡོན་ཏན་དང༔ མ་འོངས་དུས་སུ་ཇི་ལྟར་འབྱུང་བ་རྣམས༔ ད་ལྟ་བཞུགས་དང་མ་འོངས་འབྱུང་འགྱུར་གྱི༔ སྒྲུབ་པ་པོ་ལ་ངེས་ཤེས་སྤྲོ་སྐྱེད་ཕྱིར༔ སྤྱན་ལྔ་ལྡན་པ་ཉིད་ཀྱིས་གསུང་དུ་གསོལ༔ ཞུས་པས་གུ་རུ་ཉིད་ཀྱིས་བཀའ་བསྩལ་པ༔ ཞེས་སོགས་དང༌། གཉིས་པ་གནས་ཀྱི་ཡོན་ཏན་ནི༔ གངས་རི་འགྱུར་མེད་ཆོས་ཀྱི་སྐུ༔ གཡུ་མཚོ་གཏན་འཁྱིལ་ལོངས་སྤྱོད་རྫོགས༔ བྲག་རི་གཡའ་སྤང་ནགས་ཁྲོད་སོགས༔ ཇི་ལྟར་འདོད་པ་སྤྲུལ་བའི་སྐུ༔ གཙོ་བོ་སྐུ་ཡི་གནས་ཡིན་ཕྱིར༔ ཀུན་ཏུ་བཟང་པོ་ཡབ་དང་ཡུམ༔ དེ་བཞིན་རྣམ་སྣང་རྡོ་རྗེ་སེམས༔ རིགས་ལྔའི་རང་བཞིན་སྐུ་ཡི་གནས༔ ཤེལ་གྱི་གུར་ཕུབ་འདྲ་བ་ལྔ༔ ཡབ་ཡུམ་སྐུ་ཡང་གསལ་བར་ཤར༔ བྱང་ཆུབ་སེམས་དཔའ་རིགས་གསུམ་མགོན༔ སྐུ་མཆོག་གསལ་བའི་གངས་རི་གསུམ༔ རྩེ་རྒྱས་དཔལ་བཤོས་བསླང་བ་འདྲ༔ ལུང་ཆེན་ཉི་ཤུ་ལུང་ཕྲན་བརྒྱད༔ དམ་པ་རིགས་བརྒྱའི་དཀྱིལ་འཁོར་རྫོགས༔ གབ་ཅིང་སྦས་པའི་ལུང་པ་བཅུ༔ དབུས་ཕྱོགས་རུ་ཡི་ལུང་པ་རུ༔ རིག་འཛིན་བླ་མ་སྤྲིན་ལྟར་གཏིབ༔ དབང་ཆེན་རྟ་ཡི་ལུང་པ་རུ༔ རུ་ཏྲ་བསྒྲལ་བའི་བཀོད་པ་ཚང༔ གསང་སྔགས་བསྟན་པ་འབྱུང་བའི་གནས༔ བྱང་ཕྱོགས་མཁའ་འགྲོའི་ལུང་པ་རུ༔ རྡོ་རྗེ་ཕག་མོ་རིགས་ལྔ་བཞུགས༔ དཔའ་བོ་མཁའ་འགྲོ་འདུ་བའི་གླིང༔ ཤར་ཕྱོགས་རྔམ་ཁྲོའི་ལུང་པ་རུ༔ སྒོ་སྲུང་ཁྲོ་བོ་ལས་ལ་རྔམ༔ ཡི་དམ་དཔལ་ཆེན་ཁྲོརྒྱལ་རྣམས༔ གར་དགུའི་རོལ་བས་དབུས་ནས་འགྱིངས༔ གུ་རུ་པདྨ་འབྱུང་གནས་བདག༔ བདེ་ཆེན་ཚོགས་ལ་རོལ་པ་ཡི༔ རྫུ་འཕྲུལ་གར་གྱིས་ཞབས་བརྡབས་པས༔ མཐོང་བས་སྣང་བ་འགྱུར་པའི་མཚོ༔ བསྒྲུབས་པས་ཡེ་ཤེས་སྐྱེད་པར་བྱེད༔ ཅེས་དང༌། ལྷོ་ཕྱོགས་གསང་བའི་ལུང་པ་རུ༔ དར་གྱི་ཡོལ་བ་བྲེས་འདྲའི་གངས༔ ཚེ་ཡི་བུམ་པ་འདྲ་བའིབྲག༔འཆི་མེད་ནགས་ཚལ་ལྷ་ཡི་ལྗོངས༔ གཡུ་མཚོ་གཏན་འཁྱིལ་ཚེ་ཡི་བཅུད༔ ལྗོན་པའི་ཤིང་མཆོག་ཚེ་ཡི་མདའ༔ས་ཡི་ཐིག་ལེ་དཔལ་གྱི་རི༔ ནུབ་ཕྱོགས་མགོན་པོ་ཤྭ་ནཱའི་ལུང༔ ཞིང་སྐྱོང་སེང་གེའི་གདོང་ཅན་གནས༔ གཞན་ཡང་ཕྱོགས་བཞིའི་གངས་ཁྲོད་དུ༔ ཨོ་རྒྱན་ང་ཡི་སྒྲུབ་ཕུག་བཞི༔ ཨོ་རྒྱན་ང་ཡི་ཕྱག་རྗེས་རེ༔ མཁའ་འགྲོ་གནས་པའི་མཚོ་ཆུང་རེ༔ ཡི་དམ་ལྷ་ཡི་དཀྱིལ་འཁོར་རེ༔ ཨོ་རྒྱན་མཚན་ཅན་གཏེར་ཆེན་རེ༔ འདོན་མི་རུང་བའི་བླ་གཏེར་བཞི༔སུས་ཀྱང་འདོན་རུང་གཏེར་ཕྲན་བརྒྱད༔ ཕྱི་ལྟར་ཕུན་ཚོགས་བཀོད་པ་ཚང༔ ནང་ལྟར་རྒྱལ་བའི་དཀྱིལ་འཁོར་རྫོགས༔ གསང་བ་ཡེ་ཤེས་ལྔ་ཡི་ཞིང༔ ཞེས་སོགས་དང་༌། རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེའི་རུ་དམ་གནས་ཡིག་ལས། མཁའ་སྤྱོད་ས་ལ་འཕོས་པ་བདེ་ཆེན་ཞིང་༌། །སྦས་ཡུལ་པདྨ་བཀོད་ཀྱི་གནས་བཟང་དེའི། །ཆ་ལག་རུ་དམ་སྐྱིད་ཁྲམ་ལུང་པ་ནི། །རི་དབྱིབས་པདྨ་ཁ་ཕྱེ་ལྟ་བུ་ལ། །རྒྱབ་མདུན་དར་དཀར་ཡོལ་བ་དཀྲིས་པ་འདྲ། །ཤར་ཕྱོགས་ཐང་ལ་རྟ་མཆོག་འདྲ་བའི་བྲག །གུ་རུ་ཐོད་ཕྲེང་སྡེ་ལྔའི་རང་བྱོན་ཡོད། །གནས་དེའི་བྱང་ཤར་ཚེས་བརྒྱད་འདྲ་བའི་བྲག །གནོད་སྦྱིན་འབར་བ་སྤུན་བདུན་ཕོ་བྲང་ཡོད། །ཅེས་དང་༌། ཡུལ་དབུས་ཨོ་རྒྱན་བསམ་གཏན་ཆོས་ཀྱི་གླིང་། །སྟེང་ན་རྩ་གསུམ་མཁའ་འགྲོ་སྤྲིན་ལྟར་གཏིབ། །བར་ན་མཆོག་ཐུན་དངོས་གྲུབ་ཆར་ལྟར་འབེབ། །གཤམ་ན་དམ་ཅན་ཆོས་སྐྱོང་གློག་ལྟར་འཁྱུག །མདོ་སྔགས་བཤད་སྒྲུབ་ཆོས་སྒྲའི་གླུ་དབྱངས་ལེན། །ཞེས་སོགས་གསུངས་པ་དང༌། དེ་བཞིན་གྲུབ་པའི་རིག་འཛིན་ཆེན་པོ་དཔའ་བོ་ལས་རབ་རྩལ་སྐུ་ཕྲེང་གཉིས་པའི་གཏེར་བྱང་གནས་ཡིག་མཁའ་འགྲོའི་བཀའ་རྒྱ་ཟབ་མོ་ལས་ཀྱང་། གཡས་ཀྱི་ལུང་པ་དམར་སེར་གྲུབ་པ་ནི༔ རོ་མ་དམར་མོ་རྩ་ཡི་ཚུལ་དུ་ཆགས༔ གཡོན་གྱི་ལུང་པ་དཀར་མདོག་འདུག་པ་ནི༔ རྐྱང་མ་དཀར་པོ་རྩ་ཡི་ཚུལ་དུ་ཆགས༔ དབུས་ཀྱི་ལུང་པ་ཡིད་ཙམ་འཛུམ་པ་ནི༔ ཨ་ཝ་དྷུ་ཏི་ཡེ་ཤེས་ཆེན་པོར་གནས༔ ཤར་ལ་པད་མོ་བཀོད་པའི་ཆགས་ཚུལ་ཡོད༔ལྷོ་ན་དུར་ཁྲོད་བསིལ་ཚལ་ཆགས་ཚུལ་ཡོད༔ བྱང་ན་ཨོ་རྒྱན་མཁའ་འགྲོའི་བཀོད་པ་ཡོད༔ གཞན་ཡང་ཤར་ལྷོ་ཨོརྒྱན་སྤྲིན་ནག་འདུ༔ ལྷོ་ནུབ་ཡང་ལེ་ཤོད་ཀྱི་བཀོད་པ་དང༔ ནུབ་བྱང་དགའ་བའི་ཚལ་གྱི་བཀོད་པ་ཡོད༔ བྱང་ཤར་ཁྲག་མཚོ་ཁོལ་མའི་དུར་ཁྲོད་ཡོད༔ ཅེས་སོགས་ནས། མདོར་ན་གནས་མཆོག་ཁྱད་འཕགས་སྦས་ཡུལ་འདིར༔ བོད་ཡུལ་གནས་ཆེན་བརྒྱ་དང་རྩ་བརྒྱད་ཀྱི༔ ཡ་གྱལ་སངས་རྒྱས་གཉིས་པའི་གཏེར་གནས་ཡིན༔ ཡེ་ཤེས་སྤྱན་ལྡན་སྐྱེས་བུ་ལས་ཅན་གྱིས༔ རྩི་ཤིང་ནགས་ཚལ་ས་རྡོ་རི་བྲག་ཀུན༔ དཔལ་རིའི་ཕོ་བྲང་པདྨ་འོད་དུ་མཐོང༔ གནས་འབྲེལ་ཕྱག་བསྐོར་མནྜལ་ཕུལ་གྱུར་ན༔ དུས་གསུམ་རྒྱལ་བར་ཕྱག་མཆོད་བྱས་དང་མཚུངས༔ ཞེས་གསུངས་པ་དང༌། གྲུབ་དབང་ལྔ་པ་ཐུབ་བསྟན་ཆོས་ཀྱི་རྡོ་རྗེའི་གནས་མཇལ་ཕན་ཡོན་ལས། སྔོན་ཚེ་སློབ་དཔོན་པདྨ་འབྱུང་གནས་ཀྱིས། །བདེ་ཆེན་བསམ་འགྲུབ་ཤེལ་གྱི་ཕུག་པ་རུ། །བདུད་རྩི་སྨན་གྱི་དཀྱིལ་འཁོར་ཞལ་ཕྱེས་ཚེ། །ཐུགས་རྗེ་ཆེན་པོའི་བྱིན་གྱིས་བརླབས་པའི་གནས། །དབུས་ཕྱོགས་རུ་ཡི་ལུང་པ་ཞེས་བྱ་བར། །རིག་འཛིན་བླ་མའི་ཚོགས་རྣམས་སྤྲིན་ལྟར་གཏིབས། །ཡོན་ཏན་གནས་མཆོག་རུ་དམ་ལུང་པ་ཡི། །ཁྱད་པར་གནོད་སྦྱིན་དབང་པོས་ཕྱོགས་སྐྱོང་བའི། །དཔྱལ་གྱི་བྲག་དཀར་རིན་ཆེན་སྤུངས་པའི་དབྱིབས། །དོན་ལ་ཟངས་མདོག་དཔལ་གྱི་རི་བོ་སྟེ། །རྣམ་པ་སྒྲུབ་སྡེ་བརྒྱད་ཀྱིལྷ་ཚོགས་དང༌། །སྤྱན་རས་གཟིགས་དང་རི་བོ་རྩེ་ལྔ་ཡི། །བཀོད་པའི་བྱེ་བྲག་མ་ལུས་ཡོངས་སུ་རྫོགས། །ཞེས་སོགས་ཚད་མར་གྱུར་པའི་གསུང་ལས་ཡང་ཡང་གསལ་བ་ལྟར་དང༌། གསང་བ་ཟབ་མོ་དག་པའི་གཟིགས་པ་མངའ་བའི་འཕགས་ཆེན་དམ་པའི་ཡེ་ཤེས་ཀྱི་གཟིགས་ངོ་ལྟར་ན། ཞིང་ཁམས་དང་། དཀྱིལ་འཁོར། གཞལ་ཡས་ཁང་གི་ངོ་བོར་སྣང་བ་སྟེ། བཀའ་བབས་བདུན་ལྡན་མཁྱེན་བརྩེའི་དབང་པོ་པདྨ་འོད་གསལ་མདོ་སྔགས་གླིང་པ་མཆོག་གིས་རྫོགས་ཆེན་ཚེས་བཅུའི་གར་འཆམ་ལ་གཟིགས་སྐབས་ཞལ་ནས། དེ་རིང་རུ་དམ་ལུང་པ་འདི་དཔལ་རི་པདྨ་འོད་ཀྱི་ཞིང་ཁམས་མངོན་སུམ་དུ་འདུག་ཅེས་གསུངས་པས་མཚོན་མཁས་གྲུབ་ཀྱི་སྐྱེས་ཆེན་ཚད་མར་གྱུར་པ་དག་གི་ཞལ་སྔ་ནས་ས་སྤྱོད་ཀྱི་ཞིང་ཁམས་དངོས་ཡིན་པར་གསུངས་སོ། །
བར་སྐབས་ཀྱི་ཚིགས་སུ་བཅད་པ།
སྨྲས་པ། གང་ན་གཞི་དང་སྙིང་པོས་བརྒྱན་པ་ཡི། །ཞིང་མཆོག་དེ་ན་རྣམ་སྣང་གངས་ཆེན་མཚོ། །བཞུགས་པའི་ཕྱག་མཚན་པད་མའི་གེ་སར་རྩེར། །རྒྱལ་བའི་དཀྱིལ་འཁོར་ཞིང་ཁམས་ཉེར་ལྔ་བཀྲ། །དེ་ལས་བཅུ་གསུམ་མི་མཇེད་འཇིག་རྟེན་ཁམས། །གླིང་བཞི་གླིང་ཕྲན་རི་རབ་རོལ་མཚོ་སོགས། །དྭངས་པའི་ཆུ་མཚོར་རྒྱུ་སྐར་ཟླ་གཟུགས་བཞིན། །ངོ་མཚར་བཀོད་པའི་རྣམ་འགྱུར་ཅིར་ཡང་ངོམས། །ཁྱད་པར་དཔལ་ལྡན་ཛམྦུ་པྲིཀྵ་ཡིས། །མངོན་པར་མཚན་པའི་གླིང་འདིའི་ཤར་ཕྱོགས་སུ། །རབ་དཀར་ས་འཛིན་གངས་ཀྱི་རི་བོ་ཡི། །མུ་ཁྱུད་ཕྲེང་བས་བསྐོར་བ་བྷོ་ཊའི་ཡུལ། །ལྗོངས་དེའི་བྱེ་བྲག་མདོ་ཁམས་གསེར་ལྡན་གཞི། །སྡེ་བཞིའི་མངའ་ཐང་དར་བ་གླིང་དཀར་སྟོད། །དགེ་བཅུའི་འབྱོར་བ་རྒྱས་པ་སའི་ཐིག་ལེ། །རུ་དམ་ལུང་ཞེས་སྙན་པའི་གྲགས་པ་གཡོ། །མདུན་རི་ཁ་བའི་རྡུལ་མང་བརྩེགས་པའི་རྩེས། །སྔོ་སངས་ནམ་མཁའི་ལྟོ་བ་ཧྲལ་བ་ལས། །འོངས་པའི་འོ་མའི་ཆུ་རྒྱུན་དཀར་པོའི་འགྲོས། །རབ་དཀར་དར་གྱི་ཤམ་བུ་གཡོ་བ་བཞིན། །རྒྱབ་རི་གླང་ཆེན་འཕྲེས་ལ་ཉལ་འདྲའི་དབྱིབས། །རྨད་བྱུང་རླབས་ཆེན་སྙིང་སྟོབས་དར་མ་ཡིས། །ཀུན་ཏུ་མི་ངལ་འདེགས་པའི་རྣམ་འགྱུར་ངོམས། །ཕྱོགས་དང་ཕྱོགས་སུ་རི་ཕྲན་ཕྲེང་བའི་ཚར། །རིན་ཆེན་བདུན་དང་བཀྲ་ཤིས་རྟགས་བརྒྱད་ཀྱིས། །རི་མོ་འབུར་དུ་དོད་པའི་རང་བྱུང་དབྱིབས། །ལྗོངས་འདིའི་རྒྱན་དུ་བཀོད་པའི་ངོ་མཚར་མང༌། །བར་དང་བར་མཚམས་རྣམས་སུ་བདུད་རྩིའི་མཚོ། །སྣ་ཚོགས་ནོར་བུའི་ཁ་དོག་འཁྱིལ་བའི་མདངས། །མ་འདྲེས་དབང་པོའི་གཞུ་བཞིན་གསལ་བ་ནི། །འཇིག་རྟེན་མེས་པོའི་ཆེད་དུ་བསྐྲུན་པ་བཞིན། །ཁོ་ར་ཁོར་ཡུག་སྨན་ཤིང་མེ་ཏོག་གི། །ལྗོན་པའི་ནགས་ཚལ་ཕྲེང་བས་རབ་དཀྲིགས་ཤིང་། །ནེའུ་གསིང་སྤང་ལྗོངས་རང་བྱུང་སྐྱེད་མོས་ཚལ། །དཀར་དམར་མེ་ཏོག་སྣ་ཚོགས་ཐགས་སུ་བཀྲ། །ཉེ་འཁོར་ལྷུན་པོའི་རྫ་བྲག་དཔངས་མཐོ་བར། །དྲང་སྲོང་ཆེན་པོའི་བསྟི་གནས་ཉམས་དགའ་བ། །རང་བྱུང་བྱ་སྐྱིབ་རྡོ་ཡི་ཁང་བཟང་སོགས། །བསམ་གཏན་སྤྱོད་པའི་དབེན་ཁྲོད་ཡིད་གར་འོང༌། །སྤུ་སྡུག་རི་མོས་མཛེས་པའི་རི་སྐྱེས་དང་། །འདབ་བཟང་བྱ་རིགས་སྙན་པའི་མགྲིན་གླུ་ཅན། །འཕུར་ལྡིང་སྟངས་སྟབས་དལ་གྱིས་རྒྱུ་བ་ཀུན། །འཇིགས་དང་བག་ཟོན་བྲལ་བའི་རྩེ་དགས་རོལ། །ཨེ་མ་མ་ལུས་དགེ་མཚན་མཐའ་ཡས་པའི། །ངོ་མཚར་བཀྲ་ཤིས་རེ་ཁ་ཀུན་རྫོགས་པ། །མདོ་ཁམས་རུ་དམ་ཆོས་ཀྱི་ཞིང་ས་ཞེས། །ཀུན་ཁྱབ་གྲགས་པ་གླིང་བཞིའི་རྣ་བར་སྙན། །འཕགས་པའི་གནས་མཆོག་ཉམས་དགའ་ཆོས་ཀྱི་ཞིང༌། །མཐོང་དང་ཐོས་པའི་སྐྱེ་བོ་སྲིད་དོ་ཅོག །རིང་པོར་མི་ཐོག་རྣམ་གྲོལ་ཞི་བའི་སར། །ངེས་པར་དབུགས་འབྱིན་བདེན་གསུང་ལུང་གིས་བསྔགས། །དག་པ་དབྱིངས་ཀྱི་དཀྱིལ་འཁོར་ལྷུན་རྫོགས་པའི། །གསང་ཆེན་མཁའ་སྤྱོད་དྷུ་མ་ཐ་ལ་ཡི། །རྡོ་རྗེའི་གནས་མཆོག་དོན་གྱི་འོག་མིན་སྟེ། །འཕུར་འགྲོའི་ཞིང་ཁམས་ས་ལ་འཕོས་འདི་རྨད། །ཅེས་པ་ནི་གང་དུ་ཆགས་པའི་གནས་ཀྱི་ཆེ་བ་མདོ་ཁམས་རུ་དམ་ལུང་གི་ཕྱི་ནང་གསང་བའི་གནས་ཀྱི་བཀོད་པ་བཤད་པའི་སྐབས་ཀྱི་ངལ་གསོ་བའི་ཚིགས་སུ་བཅད་པའི་ཕྲེང་བའོ། །
རྩོམ་སྒྲིག་པ། དོན་འགྲུབ་རྡོ་རྗེ།