གུ་རུ་རིན་པོ་ཆེ་ལ་ཕྱག་འཚལ་ལོ། །
རྫོང་བྲག་གནས་རི་རིན་ཆེན་ཆོས་རྫོང་འདི་ཉིད་ཀྱི་ལོ་རྒྱུས་ཅུང་ཟད་སྨྲོས་ན། བདག་རྩ་བ་གསུམ་གྱི་བསྙེན་སྒྲུབ་དུ་གནས་པའི་སྐབས། འཁྲུལ་སྣང་རབ་རིབ་ཞིག་ལ་ནུབ་ཕྱོགས་ནས་འཇའ་དཀར་པོ་སྣམ་བུ་བརྐྱང་པ་ལྟ་བུ་ཞིག་གི་སྣ་ལ། ཁྱེའུ་ཆུང་དཀར་པོ་ན་བཟའ་དཀར་པོ་འཇའ་འོད་ཀྱི་མཐའ་འཇོག་ཅན། ཕྱག་ན་ཁཊ྄ཱྃ་དར་སྣ་ལྔས་བརྒྱན་པ་ཞིག་བདག་གི་སྔོན་ཐད་ཙམ་ལ་བྱོན་ནས་འདི་ལྟར་གསུངས་པ་ཐོས་སོ། །ཨེ་མ་སྐལ་ལྡན་བུ་ཁྱོད༔ གསལ་སྣང་ཞེན་པས་མ་འཆིང་༔ སྣང་སྲིད་ལྷ་ཡི་དཀྱིལ་འཁོར༔ གྲག་སྟོང་སྒྲ་ཡིས་མ་འཆིང་༔ སྒྲ་གྲགས་སྔགས་ཀྱི་རོལ་པ༔ འཁྲུལ་བ་རྒྱ་ཡན་མ་བཏང་༔ ཁྱོད་ཀྱིས་རང་ངོ་ཤེས་ན༔ ང་ཉིད་ལོག་ན་མེད་དོ༔ ཁྱོད་ཉིད་སྡོད་པའི་གནས་འདི༔ སྔོན་ཚེ་སློབ་དཔོན་པདྨ༔ རྗེ་འབངས་གྲུབ་བརྙེས་རྒྱ་མཚོས༔ བྱིན་གྱིས་རླབས་པའི་གནས་ཆེན༔ རིན་ཆེན་ཆོས་རྫོང་ཡིན་ནོ༔ རྩ་གསུམ་རབ་འབྱམས་རྒྱ་མཚོའི༔ ཞིང་ཁམས་མངོན་བཞུགས་འདིའོ༔ སྐུ་དང་ཡིག་འབྲུ་ཕྱག་མཚན༔ ཞལ་ཕྱག་ཌཱཀྐིའི་བྲོ་ར༔ མི་འགྱུར་གནད་ཀྱི་གཟེར་གདམས༔ མཁའ་འགྲོ་དམ་ཅན་ཚོགས་རྣམས༔ སྤྲིན་བཞིན་འདུས་པའི་གནས་ཡིན༔ འགྲོ་དོན་དུས་ལ་བབས་ཡོང་༔ བུ་ཁྱོད་ཚོགས་བསྐང་མེ་མཆོད༔ རིམ་གཉིས་སྤྱོད་པའི་ངང་ནས༔ འགྲོ་ཕན་སྙིང་སྟོབས་མ་ཆུང་༔ ཞེས་གསུངས་ནས་བུ་ཁྱོད་འགྲོ་དང་ང་ཡིས་གནས་ཀྱི་བཀོད་པ་སྟོན་ཟེར་བའི་ངང་ནས། བྲག་རི་དཀར་པོ་གཏན་ལེགས་པོ་ཞིག་གི་རྩེ་མཐོན་པོ། ཡུལ་གྲུ་མང་པོ་མཐོང་བའི་ས་ནས། ཕྱོགས་ཀྱི་གནས་ཆེན་མང་པོ་དང་། ཆོས་སྡེ་འགའ་ཞིག་མཐོང་བས་སོ་སོར་འདི་ཡིན་གྱི་ལོ་རྒྱུས་ཞིབ་ཏུ་གསུངས་པ་དང་། རྫོང་བྲག་ཕྱི་ནང་གསང་བའི་གནས་མ་ཀི་འདི་ལྟར་ལྟོས་གསུངས་ནས་སོ་སོར་ངོ་བསྟན་པའི་ཉམས་སྣང་འདི་ལྟར་རོ། །
འོ་རི་བོ་ཕྱི་ལྟར་ན་གླང་ཆེན་ཉལ་འདྲ། ནང་ལྟར་ན་རྩ་གསུམ་རབ་འབྱམས་རྒྱ་མཚོའི་ཞིང་ཁམས། གསང་བ་རྒྱུ་འཕྲུལ་ཞི་ཁྲོ་རྒྱལ་བའི་དཀྱིལ་འཁོར། ཡང་གསང་ལྟར་ན་ཡི་དམ་ཀྱཻ་ཡི་རྡོ་རྗེ། དཔལ་གསང་བ་འདུས་པ། སྒྲུབ་སྡེ་ཆེན་པོ་དགུ་ཡི་ཕོ་བྲང་མངོན་སུམ་དུ་བཞུགས། ཕྱི་ཀུན་གྱིས་མཐོང་སར། ཤར་དུ་རྡོ་རྗེ་མཁའ་འགྲོའི་ཞབས་རྗེས། དེ་ཕྱོགས་རྣམས་སུ་འབྲུ་གསུམ། མཁའ་འགྲོའི་གསང་ལམ། བྱང་ཤར་གུ་རུ་མཚན་བརྒྱད། མ་ཎི་འབྲུ་དྲུག །སེང་གདོང་མ། ངོ་མཚར་རྨད་དུ་བྱུང་བའི་ཡི་གེ །སེང་གདོང་རང་བྱོན་ནས། ལྷོ་ངོས་ཕྱོགས། རིན་ཆེན་ཌཱཀྐིའི་ཞབས་རྗེས། ཁྲོས་མ་ནག་མོ། ཕག་མོ་སེར་མོ། དུང་དཀར་སོགས་རང་བྱོན། ཀླུ་མཁར་ནག་གི་ཕོ་བྲང་། ནུབ་ངོས་གནས་སྲུང་བཙན་རྒོད་ཆེན་པོའི་ཕོ་བྲང་བྲག་དམར་གྲུ་གསུམ་ཏྲཱིཿས་མཚན་པ། རྩེ་མོར་ཨོ་རྒྱན་ཆེན་པོའི་ཞབས་རྗེས། ཆོས་ལོངས་སྤྲུལ་གསུམ་སོ་སོའི་རང་བྱོན། པདྨ་མཁའ་འགྲོས་ཞབས་རྗེས། པདྨའི་ཕྲེང་བ་སོགས། བྱང་ངོས་ཕྱོགས་བར་དོའི་ལམ་འཕྲང་། སྒྱུ་འཕྲུལ་ཞི་ཁྲོའི་ཕོ་བྲང་། མི་འགྱུར་བའི་ཨ་དཀར་པོ། དགེ་བསྙེན་ཟུར་ར་གཏན་གནས་བྲག །སེངྒེའི་རྗེས། ཆོས་རྒྱལ་འཕགས་པའི་ཞབས་རྗེས། བཙན་རྒོད་ཆེན་པོའི་ཆིབས་རྗེས། ཀརྨ་མཁའ་འགྲོའི་ཞབས་རྗེས། དབུས་སུ་སངས་རྒྱས་མཁའ་འགྲོའི་བྲོ་ར། གཞན་ཡང་ཕྱོགས་མཚམས་ཀུན་ཏུ་རྡོ་རྗེ། ཕུར་པ། ཁ་ཊ྄ཱྃ་ཀ །ཕྱག་མཚན་མང་པོ། བྱང་ཤར་གཤིན་རྗེའི་ཕུག་པ། དེའི་ཕྱག་མཚན་སོགས་རང་བྱོན། ནུབ་བྱང་པདྨ་དབང་ཕུག །རྟ་འགྲིན་སྐུ་རང་བྱོན། ཀརྨ་པ་དྲུག་པ་མཐོང་བ་དོན་ལྡན་གྱི་ཕྱག་རྗེས། སྒྲོལ་མའི་སྐུ་རང་བྱོན། གུ་རུ་སིདྡྷི་རང་བྱོན་སོགས་མང་དུ་བཞུགས་པ་ཀུན་གྱིས་མཐོང་རྒྱུ་ཡོད་པ་འདི་རྣམས་སོ། །ཞེས་གསུངས་ནས་སོ་སོར་གསལ་བར་བསྟན་པས། བདག་གིས་ཅུང་ཟད་ཐེ་ཚོམ་དུ་གྱུར་ནས་འདི་སྐད་ཞུས། སྙིགས་མའི་འགྲོ་བ་རྣམས་འགུ་དཀའ་བས་འདི་རྣམས་ཀུན་གྱིས་མངོན་སུམ་དུ་མཐོང་ངོ་མ་ཨེ་ཡོད། དེ་ཡོད་ན་བདག་ཀྱང་སྤྲོ་དགའ་དང་དད་མོས་ཆེ་བས་འགྲོ་བ་རྣམས་བསོད་ནམས་གསོག་པའི་ཞིང་དམ་པར་འགྱུར་བས་དོགས་ཆོད་ཞུས་པས་འདི་གསུངས། ཨེ་མ་སྐལ་ལྡན་བུ་ཁྱོད་ཐེ་ཚོམ་མི་དགོས༔ ཐེ་ཚོམ་ལེ་ལོ་བདུད་ཀྱི་བར་ཆད༔ རྣམ་གཡེང་འདུ་འཛི་དགེ་སྦྱོར་ཆགས་པས༔ གཉིས་འཛིན་འཁྲུལ་སྣང་དབང་དུ་མ་གཏོང་༔ སྐུ་གསུང་ཐུགས་ཀྱི་རྟགས་མཚན་འདི་རྣམས༔ ཀུན་གྱིས་མཐོང་བས་ཐེ་ཚོམ་མེད་དོ༔ འདི་ལ་དད་མོས་ཕྱག་སྐོར་བགྱིས་རྣམས༔ བསྐལ་པར་བསགས་པའི་སྡིག་སྒྲིབ་དག་གོ༔ ཚོགས་མཆོད་མར་མེ་ཞལ་ཟས་ཕུལ་ན༔ ཚེ་འཕོས་རིམ་གྱིས་རིག་འཛིན་ས་ཐོབ༔ ཀླུང་རྟ་དར་ལྕོགས་ཕྱོགས་མཚམས་འཛུགས་ན༔ ཚེ་སྲོག་སྲ་ཞིང་བསོད་ནམས་འཕེལ་ལོ༔ འདི་ལ་ཕྱག་བསྐོར་འབྲེལ་བ་ཐོབ་ཚད༔ ནད་མཚོན་མི་གེའི་འཇིགས་པ་ཀུན་ཞི༔ ཚེ་བསོད་འབྱོར་རྒྱས་སྣང་ཁམས་དབང་འདུ༔ མཐའ་དམག་འདྲེ་གདོན་གཡུལ་ལས་རྒྱལ་ལོ༔ སྨོན་ལམ་གང་བཏབ་འགྲུབ་པར་འགྱུར་བས༔ དེ་ཕྱིར་ཀུན་ལ་གོ་བར་གྱིས་ཤིག༔ ཅེས་གསུངས་སོ། །
<< རྫོགས་ཆེན་སྐྱབས་མགོན་སྐུ་ཕྲེང་བཞི་པ་མི་འགྱུར་ནམ་མཁའི་རྡོ་རྗེའི་འདྲ་འབག >>
༈ ཡང་འགྱུར་ཁྱད་དང་། བོད་ཁམས་བདེ་བའི་ས་བཅོས་རིམ་གྲོ་རང་རང་གི་ཚེ་ཚད་སོགས་ལུང་བྱང་མང་དུ་གསུངས་པས་ཅུང་ཟད་རེ་ཟུར་དུ་བྲིས་སོ། །དེ་ནས་བདག་གིས་ཕྱག་དང་བསྐོར་བ་བགྱིས། ཞབས་སྤྱི་བོར་བླངས་ནས། འདི་ཕྱི་བར་དོ་གསུམ་དུ་མི་འབྲལ་བའི་གསོལ་བ་བཏབ་ཚེ་ལུས་ངག་ཡིད་ལ་བདེ་བར་སྐྱེས་པ་དང་། བདེ་གསལ་མི་རྟོག་པའི་ཉམས་འཆར་བའི་ངང་ནས་རང་མལ་དུ་རྨི་ལམ་ཟད་པ་ལྟར་བྱུང་བ་ནི་གནས་ཀྱི་དག་སྣང་སྐོར་དེ་ལྟར་ཤར་བའོ། །དག་སྣང་འཁྲུལ་སྣང་དེ་འདྲ་བ་ལན་གསུམ་བྱུང་མཐར་རང་གིས་ཐེ་ཚོམ་སྒྲོ་འདོགས་ཆོད་ནས་ཡུལ་མི་རྣམས་ལ་བསྒྲགས་ནས་དད་མོས་ལྡན་པ་ཐམས་ཅད་ནས་ཕྱག་བསྐོར་དགེ་བསྐུལ་བྱས་པ་དོན་ཆེ་སྙམ་པ་ལགས། གྲུབ་པའི་དབང་ཕྱུག་རྫོགས་སྤྲུལ་བཞི་པ་མི་འགྱུར་ནམ་མཁའི་རྡོ་རྗེ་གནས་འདིར་ཆིབས་བསྒྱུར་ཞབས་བཀོད་སྐུ་མཚམས་མཛད་ཅིང་། གླིང་གཏེར་རྗེ་དྲུང་དང་གནས་ཀྱི་རྒྱུ་མཚན་ཐུགས་གྲོས་དང་བཀའ་མོལ་གནང་བའི་རྐྱེན་གྱིས་རྫོགས་སྤྲུལ་ལ་འདི་ལྟར་ཤར་བའོ།། །།
རྩོམ་སྒྲིག་པ། དོ་འགྲུབ་རྡོ་རྗེ།