ཧྲཱིཿ སྲིད་གསུམ་འདི་ན་མཐུ་དང་དབང་ཆེ་བ། །དབང་ཆེན་རྟ་མཆོག་པདྨ་ཧེ་རུ་ཀའི། །བཀའ་ཉན་ཐ་ཚིག་རྡོ་རྗེའི་ཡལ་གམ་ཅན། །དོན་དམ་སྟོང་ཉིད་ནམ་མཁའི་ངོ་བོ་ལ། །སྣང་བ་མཐའ་ཡས་པདྨ་རཱ་གའི་མདོག །ཐུགས་ཉིད་སྙིང་རྗེ་ཆེན་པོའི་ངང་ཉིད་ལས། །ཡེ་ཤེས་དབྱིངས་ལ་འཕོ་འགྱུར་མི་མངའ་ཡང་། །ལོག་རྟོག་མཚན་མའི་རྟོག་པ་བསལ་བའི་ཕྱིར། །གསུང་གི་བློན་པོ་རྡོ་རྗེ་གྲགས་ལྡན་ནི། །མ་རུང་ཁྲག་དྲོན་བཏུང་བས་མ་ཚིམས་པར། །ལུས་ཀུན་ཞུགས་འདྲའི་ལང་ཚོ་གསར་བའི་གཟི། །ཞལ་གཅིག་ཕྱག་གཉིས་རུ་མཚོན་བཙན་ཞགས་བསྣམས། །ཞལ་གདངས་ལྗགས་འདྲིལ་མཆེ་བ་རབ་ཏུ་གཙིགས། །ཁྲོས་པའི་དབང་ཕྱུག་ཅུང་ཟད་འཛུམ་ཆགས་ཉམས། །སྨ་ར་སྨིན་མ་གློག་སྟོང་འགྱུ་བ་བཞིན། །བསེ་ཁྲབ་བསེ་རྨོག་རིན་ཆེན་རུས་པས་བརྒྱན། །ཞབས་ལ་སག་ལྷམ་འཇའ་རིས་ཡུ་རིང་གསོལ། །མི་བཟད་གར་དགུའི་ཉམས་ལྡན་བརྗིད་པའི་སྐུ། །གཡས་བསྐུམ་གཡོན་བརྐྱངས་མེ་དཔུང་ཀློང་ན་བཞུགས། །རོལ་དུ་འཕར་སྤྱང་བྱ་རོག་འུག་པ་འགྱེད། །ཕོ་ཉ་ཐོག་དང་རླུང་ནག་འཚུབ་མ་ཁྲིད། །གསང་བའི་ཡུམ་ཆེན་གཟི་བརྗིད་ཆེན་མོ་ནི། །དཀར་དམར་མདངས་ལྡན་ཡིད་འོང་ལྷ་མོའི་ཚུལ། །སྤྲུལ་པ་རབ་བྱུང་ཕག་ནག་སྟེང་ན་འགྱིང་། །བློན་པོ་བདུད་ནག་མདུང་དར་རྒྱུ་ཞགས་བསྣམས། །རུ་འདྲེན་སྡེ་བཞི་འཁོར་དང་བཅས་པ་རྣམས། །གནམ་ས་རི་ཀླུང་བར་སྣང་ཁམས་ཀུན་གང་། །དད་དང་དམ་ཚིག་དབང་གིས་སྤྱན་འདྲེན་ན། །སྣ་ཚོགས་དབང་པོའི་གཞུ་ལྟར་རབ་བཀྲ་བའི། །སྣ་ཚོགས་དར་གྱི་གཡབ་མོས་སྤྱན་འདྲེན་ཞིང་། །སྣ་ཚོགས་རོལ་མོའི་སྒྲ་ཡིས་བསྐུལ་བའི་ཚེ། །སྣ་ཚོགས་མཐུན་པའི་དམ་རྫས་བཤམས་ནས་སུ། །རྣམ་དག་ནམ་མཁའ་གང་བའི་ལྷ་ལམ་ནས། །རྣམ་འཕྲུལ་ཆ་ལུགས་སྣ་ཚོགས་སྐུར་སྟོན་ཞིང་། །རྣམ་པ་འཇིག་རྟེན་དྲེགས་པའི་སྐུར་བཞེངས་པ། །རྣམ་རྒྱལ་ཕོ་བྲང་ལྟ་བུའི་གཞལ་ཡས་འདིར། །དགྱེས་ཤིང་མི་གཡོ་བརྟན་པར་བཞུགས་སུ་གསོལ། །
དད་ཅིང་གདུང་བ་ཅན་གྱི་ཚོགས་རྣམས་ལ། །བརྟེན་ན་སྙིང་ཉེ་སྒྲུབ་ན་བུ་བཞིན་སྐྱོང་། །དམ་ལྡན་སྒྲུབ་པའི་སྙིང་གྲོགས་ཁྱོད་གཅིག་པུ། །ཁྱོས་ལས་གཞན་པའི་སྲུང་མ་མ་མཆིས་ན། །སྲུང་མའི་དབང་པོ་ཁྱོད་ཀྱིས་རྗེས་དགོངས་ཤིག །དར་ཟབ་རིན་ཆེན་སྣ་ཚོགས་འབྲུ་སྣའི་རིགས། །ཇ་ཆང་འོ་སྐོལ་བཏུང་བའི་རིགས་བྱེད་དང་། །ཕྱེ་མར་རི་རབ་ལྟ་བུ་བརྗིད་ལྡན་ཚོགས། །དྲི་ཞིམ་བདུད་རྩི་ཤིང་སྣའི་ཚོགས་རྣམས་དང་། །སྣ་ཚོགས་མཐུན་པའི་མཆོད་པའི་རྫས་རྣམས་ཀུན། །རཾ་ལས་སྐྱེས་པའི་འབར་བའི་མེ་ནང་དུ། །བསྲེགས་པའི་དུད་སྤྲིན་ནམ་མཁའ་གང་བའི་རྩེར། །རྒྱལ་སྲིད་སྣ་བདུན་བཀྲ་ཤིས་རྫས་རྟགས་བརྒྱད། །རིན་ཆེན་བདུན་དང་ཉེ་བའི་རིན་ཆེན་བདུན། །རྡོ་རྗེ་སྒེག་མོ་ལ་སོགས་ཕྱི་སྒེག་བཞི། །བཛྲ་དྷཱུ་པེ་ལ་སོགས་ནང་སྒེག་བཞི། །རྔ་ཟླུམ་ལ་སོགས་གསང་བའི་རིག་མ་ལྔ། །རེག་བྱ་ལ་སོགས་འདོད་ཡོན་ལྷ་མོ་གསུམ། །གཞན་ཡང་རྡོ་རྗེའི་ལྷ་མོའི་ཚོགས་རྣམས་ནི། །གཟུགས་མཛེས་ཡིད་འོང་ནམ་མཁའི་སྐར་ལྟར་བཀྲ། །ཡིད་འོང་དགའ་བདེའི་དཔལ་སྟེར་སྩོལ་མཛད་པ། །ངོ་མཚར་ཡོན་ཏན་བྱེ་བའི་རོལ་གར་ཚོགས། །རྣམ་མང་སྲིད་ཞིའི་འབྱོར་བ་བསམ་ལས་འདས། །བདུད་རྩིའི་སྤྲིན་ཕུང་བསང་གི་མཆོད་པ་འདིས། །རྡོ་རྗེ་གྲགས་ལྡན་འཁོར་བཅས་བསང་ཞིང་མཆོད། །དེ་ལྟར་བསང་མཆོད་ཕུལ་བའི་བྱིན་རླབས་ཀྱིས། །བདག་ཅག་མི་ནོར་འཁོར་དང་བཅས་རྣམས་ལ། །དྲག་ཤུལ་གདུག་པའི་སེམས་འཆང་མི་བསྲུན་པ། །བྱད་ཕུར་རྦོད་གཏོང་གཤོམ་པའི་བྱད་མ་མཁན། །ད་ལྟ་ཉིད་དུ་སྒྲོལ་བའི་ཕྲིན་ལས་མཛོད། །མི་ཁ་ངན་སྨྲས་དབྱེན་ཤགས་དུག་སྦྱོར་མཁན། །སྦྱོར་ངན་བྱེད་པའི་མི་དང་མི་མིན་ཚོགས། །ཚེ་དཔལ་དབང་ཐང་འཚེ་བར་བྱེད་པ་རྣམས། །མ་བསྐུལ་པར་ཡང་ཁྱོད་ཀྱི་ཟ་སྐལ་གྱིས། །མི་དང་མི་མིན་ཤེས་རྒྱུད་རློམ་བྱེད་པའི། །དམ་སྲི་ཤི་འདྲེ་རྒྱལ་འགོང་འབྱུང་པོའི་ཚོགས། །སྲུང་མ་ཁྱོད་ཀྱི་ཐུགས་རྗེའི་འོད་ཟེར་གྱིས། །མིང་ཙམ་མེད་པར་བརླག་པའི་ཕྲིན་ལས་མཛོད། །རྩོད་ལྡན་སྙིགས་མ་ལྔ་བརྒྱའི་ཡང་མཐའ་འདིར། །བསྟན་པའི་ཉི་མ་ནུབ་རིར་ཆས་པའི་ཚེ། །སྲུང་མ་གཞན་གྱིས་གདུལ་བར་མི་ནུས་པས། །མཐུ་ཆེན་ཁྱོད་ཀྱི་ཐུགས་དམ་དུས་ལ་བབས། །སངས་རྒྱས་གཉིས་པ་པདྨ་ཐོད་ཕྲེང་གི །ལུང་རྟོགས་བསྟན་པའི་རྒྱལ་མཚན་འཛིན་མཛད་པ། །གྲུབ་དབང་རྫོགས་ཆེན་སྐུ་ཕྲེང་རིམ་བྱོན་གྱི། །སྐུ་ཚེ་མཛད་ཕྲིན་ཡར་ངོའི་ཟླ་བ་ལྟར། །གོང་ནས་གོང་འཕེལ་དགོན་གནས་ཆོས་འཁོར་གྱི། །བརྒྱུད་འཛིན་སློབ་མའི་ཚོགས་རྣམས་དབྱར་མཚོ་ལྟར། །ནམ་ཡང་ནུབ་མེད་འཕེལ་ཞིང་རྒྱས་པར་མཛོད། །
དེང་ནས་བྱང་ཆུབ་སྙིང་པོ་མ་ཐོབ་པར། །སྲུང་མའི་དབང་པོ་ཁྱོད་དང་མི་འབྲལ་ཞིང་། །བར་ཆད་རྐྱེན་གྱི་རྣམ་སྨིན་ཅི་བྱུང་ཡང་། །ལྷ་མཆོག་ཁྱོད་ཉིད་དྲན་པ་ཙམ་གྱིས་ཀྱང་། །སྐུ་ཡི་དཔལ་འབར་འོད་ཟེར་ཕྱོགས་བཅུར་འཕྲོ། །གསུང་གི་ང་རོས་སྟོང་གསུམ་གང་བར་བྱེད། །ཐུགས་ནི་སྙིང་རྗེའི་དབྱིངས་ལས་མ་གཡོས་ཀྱང་། །མངོན་སྤྱོད་དྲག་པོའི་རོལ་པས་ཚར་ཆོད་ཅིག །མདོར་ན་གཞན་ཕན་བྱང་ཆུབ་སེམས་ཀྱི་བློས། །བསྟན་དང་འགྲོ་བའི་དོན་ཆེན་སྒྲུབ་པ་ལ། །མཐུ་ལྡན་སྲུང་མའི་དབང་པོ་ཁྱོད་ཉིད་ཀྱིས། །ཞལ་བཞེས་ཐ་ཚིག་གཉན་པོ་རྗེས་དགོངས་ལ། །མགོན་སྐྱབས་སྡོང་གྲོགས་རྟག་ཏུ་མ་གཡེལ་ཞིག །དེ་ལྟར་རྡོ་རྗེ་གྲགས་ལྡན་བསང་མཆོད་འདི། །བཀྲ་ཤིས་ཕུན་སུམ་ཚོགས་པའི་ལུང་བའི་ནང་། །སྤང་ལྗོངས་ནེའུ་སེང་མེ་ཏོག་བཀྲ་བའི་ཡུལ། །རིན་ཆེན་བྲག་རི་ལྗོན་ཤིང་བརྒྱན་པའི་ཞིང་། །ལྷ་བྱ་སྐད་སྙན་སྣ་ཚོགས་ཕྱོགས་བཅུར་བསྒྲགས། །ཡན་ལག་བརྒྱད་ལྡན་འབབས་པའི་གཡོན་ཕྱོགས་སུ། །ཐུབ་བསྟན་ནོར་བུས་ཡང་ཡང་བསྐུལ་བའི་ངོར། །དྲིན་ཆེན་བླ་མ་མཁྱེན་བརྩེའི་དབང་པོ་ཡི། །སློབ་མའི་ཡང་ཐ་འབངས་ཀྱི་ཐ་ཤལ་པ། །རྫོགས་སྤྲུལ་ལྔ་བ་ཐུབ་བསྟན་མིང་ཅན་གྱིས། །ས་ཕོ་རྟ་ལོའི་རབ་ཚེས་བཅོ་ལྔ་ལ། །གཟའ་སྐར་ལེགས་ཚོགས་རྟེན་འབྲེལ་རྐྱེན་དབང་གིས། །རྟག་ཏུ་ལྷག་པའི་ལྷ་མཆོག་འདི་ཉིད་ལ། །སྲུང་མའི་གཙོ་བོ་བསྟེན་པའི་གང་ཟག་དེས། །རང་སྣང་གང་ཤར་བློ་ལ་བྲིས་པ་འདི། །ཉེས་འགལ་མཆིས་ན་སྲུང་མའི་ཚོགས་ལ་བཤགས། །དོན་འབྲས་མཆིས་ན་བསྟན་དང་སེམས་ཅན་ལ། །རྟག་ཏུ་ཕན་པ་རྒྱ་ཆེན་རྒྱུར་གྱུར་ཅིག །སརྦ་མངྒལཾ། །
རྩོམ་སྒྲིག་པ། དོན་འགྲུབ་རྡོ་རྗེ།