ཧཱུྃ་ཧྲཱི༔ ཁྱབ་བདག་སྟོན་པ་ཆོས་སྐུ་ཀུན་ཏུ་བཟང་། །རིགས་ལྔ་ལོངས་སྐུ་རྒྱལ་བ་འོད་དཔག་མེད། །རྡོ་རྗེ་སེམས་དཔའ་སྤྱན་རས་གཟིགས་དབང་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །དགའ་རབ་རྡོ་རྗེ་འཇམ་དཔལ་བཤེས་གཉེན་དང་། ཤྲཱི་སེང་ཧཱ་རང་བྱུང་པདྨ་འབྱུང་། །མནྡ་ར་བ་མཚོ་རྒྱལ་གསང་བའི་ཡུམ། །ཁྲི་སྲོང་ལྡེའུ་བཙན་ལྷ་སྲས་དམ་འཛིན་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། ཟབ་གཏེར་མངའ་བདག་སངས་རྒྱས་གླིང་པའི་ཞབས། །ཡེ་ཤེས་རྡོ་རྗེ་བློ་གྲོས་འགྲོ་བའི་མགོན། །པུཎྱེ་དྷརྨ་ཀརྨ་བྷ་དྲའི་མཚན། གྲུབ་མཆོག་བཟང་པོ་རིག་འཛིན་སྙིང་པོ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །བདེ་ཆེན་དར་རྒྱས་ཀུན་བཟང་རང་གྲོལ་རྩལ། ཕྲིན་ལས་རྡོ་རྗེ་བསྟན་པའི་རྒྱལ་མཚན་དང་། འཁོར་ལོའི་མགོན་པོ་ངེས་དོན་བསྟན་འཛིན་ཞབས། །ནམ་མཁའ་ཚེ་དབང་རིག་འཛིན་བཟང་པོ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །གྲུབ་པའི་དབང་ཕྱུག་པདྨ་འགྲོ་འདུལ་རྩལ། །པདྨ་བཀྲ་ཤིས་མི་འགྱུར་ནམ་མཁའི་མཚན། །རྒྱལ་བའི་སྲས་པོ་གཞན་ཕན་མཐའ་ཡས་དང་། །པདྨ་བཛྲ་ཀུན་བཟང་ཐེག་མཆོག་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཆོས་ཀྱི་རྡོ་རྗེ་གར་དབང་འགྲོ་འདུལ་རྩལ། །ཐུབ་བསྟན་བཤད་སྒྲུབ་ཆོས་ཀྱི་ཉི་མ་སོགས། །དགོངས་བརྡ་སྙན་བརྒྱུད་བརྒྱུད་སྲོལ་ཀུན་འདུས་པའི། །བྱིན་རླབས་ཀུན་འབྱུང་རྩ་བརྒྱུད་བླ་མ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །དཀྱིལ་འཁོར་གཙོ་མཆོག་པདྨ་བཛྲ་རྩལ། །དབང་ཆེན་རྟ་མགྲིན་རྡོ་རྗེ་ཕག་མོ་དང་། །ཞི་ཆགས་ཁྲོ་ཚུལ་དགོངས་པ་འདུས་པའི་ལྷ། །འཕྲིན་ལས་ཀུན་སྒྲུབ་མཁའ་འགྲོ་ཆོས་སྲུང་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ངེས་འབྱུང་བློ་ཡི་ཞིང་ས་གཤིན་པོ་ལ། །བྱང་ཆུབ་སེམས་ཀྱིས་མྱུ་གུ་ལེགས་འཁྲུངས་ཤིང་། །གསང་ཆེན་སྨིན་གྲོལ་སྙིང་པོའི་ཉམས་ལེན་གྱིས། །ཚེ་འདིར་རྡོ་རྗེ་འཆང་དབང་མྱུར་འགྲུབ་ཤོག །གཞི་རྒྱུད་དག་པ་སེམས་ཉིད་གསལ་སྟོང་སྐུ། །ལམ་རྒྱུད་བསྐྱེད་དང་རྫོགས་པས་སྨིན་བྱས་ཏེ། །འབྲས་རྒྱུད་སྐུ་དང་ཡེ་ཤེས་མངོན་གྱུར་ཏེ། །ཁྱབ་བདག་གདོད་མའི་མགོན་དུ་སངས་རྒྱས་ཤོག། །
ཅེས་གྲུབ་དབང་རྫོགས་ཆེན་པའི་གདན་སར་དགོངས་འདུས་སྒྲུབ་ཆེན་གསར་འཛུགས་སྐབས་ཉེར་མཁོའི་ཆ་ལག་ཏུ་བསྐུལ་དོན་བཞིན་བསྟན་འཛིན་ལུང་རྟོགས་ཉི་མས་འཕྲལ་མར་བྲིས་པ་དགེའོ།།
རྩོམ་སྒྲིག་པ། དོན་འགྲུབ་རྡོ་རྗེ།