སྐད་ཅིག་རིག་པ་མ་བཅོས་གཞི་ཀ་དག །རྩལ་སྣང་མ་འགགས་དྭངས་ཤེལ་འཇའ་ཚོན་བཞིན། །ཡེ་ཤེས་རང་སྣང་རོལ་པ་དངོས་མེད་ལྷ། །གུ་རུ་ཞི་བ་དཀར་པོ་ཟླ་ཤེལ་འདྲ། །སྐུ་མདོག་ཕྱག་མཚན་ཆ་ལུགས་ཡོངས་སུ་རྫོགས། །རྒྱས་བའི་ལྷ་ནི་འཛམ་བུའི་ཆུ་གསེར་མདོག །ཉི་མའི་འོད་ཟེར་འབར་བས་འཁྲུལ་མུན་སེལ། །འགྲོ་རྣམས་ཐར་ལམ་བདེར་བཀོད་འདྲེན་པར་མཛད། །ཁྲོ་འཛུམ་ཡེ་ཤེས་སྤྱན་གྱིས་འཁོར་འདས་གཟིགས། །སྟོབས་ལྡན་ཁ་ཊྭཱཾ་ཉི་ཟེར་ཕྱག་མཚན་བསྣམས། །བདུད་འདུལ་དཔའ་བོ་ཧེ་རུ་ཀ་ཡི་ཆས། །དབང་ལྷ་དམར་པོ་སོར་རྟོག་ཡེ་ཤེས་ཀྱི། །མདངས་ལྡན་པདྨ་རཱ་གའི་ལྷུན་པོ་ལ། །ཉི་ཟེར་འཁྱུད་བཞིན་བཀྲག་སྣུམ་ལམ་མེ་བ། །ཁྲོ་འཛུམ་གཟི་བརྗིད་ངོམ་པས་སྣང་སྲིད་རྣམས། །ཟིལ་གནོན་འཁོར་ལོའི་བསྒྱུར་བའི་ཆ་ལུགས་ཅན། །དྷ་རུ་ལྕགས་སྒྲོག་བསྣམས་པས་དབང་སྡུད་ཅིང་། །སྐྱེ་འགྲོ་འཆིང་ཚུལ་མདུན་དུ་ཀྲོང་ངེ་གཟིགས། །ཐར་ལམ་བདེ་ལ་བཀོད་པའི་དོན་མཛད་ཕྱིར། །གཟུང་འཛིན་མདུད་དཀྲོལ་རིག་པའི་རང་ངོ་སྤྲད། །སྐུ་གསུམ་བརྡ་མཚོན་དངུལ་དཀར་མེ་ལོང་བསྟན། །སེང་གེ་སྒྲ་སྒྲོག་ཨིནྡྲ་ནཱི་ལའི་མདོག །དཔའ་བོ་བགེགས་འདུལ་ཆས་རྣམས་ཡོངས་རྫོགས་ཤིང་། །རྣ་ལྟག་གཡས་ན་སེང་གེའི་དབུ་ངོམས་ཤིང་། །ང་རོ་ལྡིར་བས་མུ་སྟེགས་ཝ་ཞུམ་འདྲ། །ཕྱག་གཡས་སྡིགས་འཛུབ་ནམ་མཁར་གདེངས་པའི་ཚུལ། །བྱ་ཁྱུང་ཁྲ་ཐབས་སྤྲུལ་པ་བཀྱེ་བ་ཡིས། །ཀླུ་གདོན་འདུལ་ཞིང་ཤ་ཁྲག་ཞལ་དུ་གསོལ། །ཤཱཀྱ་སེང་གེ་གསེར་མདོག་མཚན་བཟང་པོ། །སུམ་ཅུ་རྩ་གཉིས་དཔེ་བྱད་བརྒྱད་ཅུ་ངོམ། །སྐུ་དབུས་རྩ་བཟང་གཙུག་ཏོར་རྩེ་མོ་མཐོ། །ཡེ་ཤེས་རླུང་ཞོན་མཁའ་ལ་བྱ་ལྟར་འཕུར། །སྤྲུལ་སྐུ་ཚངས་པར་སྤྱོད་པའི་ཆ་ལུགས་ཅན། །རྒྱལ་ཀུན་མཁྱེན་བརྩེའི་བྱིན་རླབས་ནུས་སྟོབས་ཐིམ། །འགྲོ་བའི་དུག་ལྔའི་ནད་རྣམས་འཇོམས་མཛད་པའི། །ཡེ་ཤེས་བདུད་རྩིས་བཀང་བའི་ལྷུང་བཟེད་བསྣམས། །རིན་ཆེན་བཻཌཱུརྱ་ལས་གྲུབ་པའི་ཚུལ། །ཕྱག་གཡས་ས་གནོན་ས་འགུལ་འཇིགས་སྐྱོབས་མཛད། །བློ་ལྡན་མཆོག་སྲེད་འཇམ་དཔལ་དབྱངས་ཀྱིས་འཕྲུལ། །གུར་གུམ་མེ་ཏོག་མདངས་ལྡན་ཞི་འཛུམ་མཛེས། །དེ་ཡང་འཁོར་ལོས་བསྒྱུར་བའི་རྒྱལ་པོའི་ཆས། །ཐབས་ཤེས་བརྡ་མཚོན་ཌ་མ་རུ་འཁྲོལ་བས། །ཆོས་ཀྱི་སྒྲ་བརྒྱ་འུར་བས་འགྲོ་སེམས་རྨོངས། །གཏི་མུག་གཉིད་ལས་སད་པའི་འདྲེན་མཆོག་ལྷ། །རྡོ་རྗེ་གྲོ་ལོད་དམར་སྨུག་རྔམས་གཏུམ་ཁྲོའི། །དབང་དྲག་གཉིས་འཛོམས་ལྟོབས་ལྡན་དཔའ་བོའི་ཆས། །མདོ་སྔགས་ཟུང་འཇུག་བརྡ་སྟོན་ན་བཟའ་གསོལ། །ཕྱག་གཡས་གསེར་གྱི་རྡོ་རྗེ་རྩེ་ལྔ་གསོལ། །བདུད་བགེགས་ཡུལ་རྣམས་ཡམ་ཡམ་ཤིག་ཤིག་འདར། །གཡུལ་ངོའི་མཚོན་ཆ་ཆག་འཐོར་དཔའ་སྟོབས་ཞུམ། །ཞབས་གཉིས་རྒྱ་ལྷམ་སྟག་ཆེན་ངར་མའི་སྟེང་། །གོམ་སྐབས་གསུམ་གྱིས་ས་གསུམ་ནོན་པར་མཛད། །ཕྱག་གཡོན་གནམ་ལྕགས་སྡིག་པ་ཁྲུ་གང་པ། །མགོ་དགུ་མིག་རྣམས་ཁྲ་ཅེམ་ར་རྣམས་གཟེང་། །རྒྱལ་འགོང་བགེགས་ཀྱི་བླ་རྟེན་དེར་འདུས་ཐིམ། །འདྲེ་འཇིགས་གུ་གུལ་དུད་པའི་དྲི་འཐུལ་ཞིང་། །དེ་ལས་སྤྲུལ་པ་སྐར་མདའ་ཆད་པ་ལྟར། །དུང་སྡིག་དཀར་པོ་གསེར་སྡིག་སེར་པོ་དང་། །ཟངས་སྡིག་དམར་པོ་གཡུ་སྡིག་ལྗང་ཁུ་རྣམས། །ཐོར་ཐོར་བྱ་འཕུར་བཞིན་དུ་ཐོགས་པ་མེད། །རྒྱལ་འགོང་བགེགས་ཀྱི་སྙིང་ལ་ཐུལ་གྱིས་ཟུགས། །སྙིང་ཁྲག་འཐུང་ཞིང་རྣམ་ཤེས་བདེ་ཆེན་སྤོར། །གང་དེ་སྲིན་པོའི་རྒྱལ་པོའི་སྐུ་རུ་གྱུར། །སྟོབས་དང་ནུས་པ་གཟི་བརྗིད་མེ་ལྟར་འབར། །འགལ་རྐྱེན་འཇིགས་བརྒྱད་ཤིང་ཚེར་བསྲེགས་པ་འདྲ། །བསྟན་འགྲོའི་བདེ་སྐྱིད་འཇོམས་པའི་ངན་སེམས་ཅན། །འདྲེ་བགེགས་མི་ཡི་ཁོག་ཏུ་ཞུགས་པ་ལ། །ཞི་དུལ་འཕགས་མཆོག་ཐུགས་ཆེན་སྤྱན་རས་གཟིགས། །སྐུ་གསུམ་རྒྱལ་བའི་ཐུགས་རྗེའི་སྤྱན་གྱིས་གཟིགས། །འཇིགས་བརྒྱད་སྡུག་བསྔལ་ཞི་བའི་སྐྱབས་མགོན་མཛོད། །ཨོཾ་མ་ཎི་པདྨེ་ཧཱུྃ་ཧྲཱིཿ ཡིག་དྲུག་ཅི་ནུས་བཟླས་རྗེས་དགེ་བསྔོ་བྱ། ཞེས་དམག་འཁྲུག་ནད་ཡམས་རྒྱལ་འཁྱམས་ཤི་འདྲེས་འཚེ་བས་ཉེན་འཚེ། དེ་ཉིད་བཟློག་ཐབས་ཀྱི་ལས་ཚོགས་འདི། མདོ་ཁམས་རྫོགས་ཆེན་པདྨ་རིག་འཛིན་གྱི་སྐུ་ཕྲེང་བཞི་པའི་མིང་འཛིན་པ་དུས་མཐའི་བཙུན་པ་ཨོ་རྒྱན་ཆེ་མཆོག་དཔལ་གྱི་རྡོ་རྗེ་ལ་དག་སྣང་དུ་ཤར་བ་བྱིན་བརླབས་ཀྱི་ཚན་ཁ་ལྷག་པར་མྱུར་བས་ཉམས་སུ་ལོངས་ཤིག །སརྦ་དཱ་ཀྱ་ལྱཱ་ཎཾ་བྷ་ཝ་ཏུ།
རྩོམ་སྒྲིག་པ། དོན་འགྲུབ་རྡོ་རྗེ།