༄༅། །ཀུན་གཟིགས་མཁན་ཆེན་བླ་མ་པདྨ་ཚེ་དབང་རིན་པོ་ཆེའི་བླ་མའི་རྣལ་འབྱོར་དད་པའི་གསོས་སྨན་བཞུགས་སོ༎
ནམ་མཁའི་གནས་སུ་ནམ་མཁའ་གང་བ་ཡི། །བླ་མ་ཡི་དམ་མཁའ་འགྲོའི་ཚོགས་རྣམས་དང་། །སངས་རྒྱས་ཆོས་དང་འཕགས་པའི་དགེ་འདུན་ལ། །བདག་དང་འགྲོ་དྲུག་གུས་པས་སྐྱབས་སུ་མཆི། །ལན་གསུམ་གྱིས་སྐྱབས་འགྲོ་དང་། བདག་དང་མཐའ་ཡས་སེམས་ཅན་རྣམས། །ཡེ་ནས་སངས་རྒྱས་ཡིན་པ་ལ། །ཡིན་པར་ཤེས་པའི་བདག་ཉིད་དུ། །བྱང་ཆུབ་མཆོག་ཏུ་སེམས་བསྐྱེད་དོ། །ལན་གསུམ་གྱིས་སེམས་བསྐྱེད། རྡོ་རྗེ་སློབ་དཔོན་སངས་རྒྱས་དཔལ། །དུས་གསུམ་བཞུགས་ལ་ཕྱག་འཚལ་བསྟོད། །མཆོག་གསུམ་རྟེན་པའི་ཞིང་གྱུར་ལ། །གཉིས་མེད་ཡིད་ཀྱིས་སྐྱབས་སུ་འཆི། །དངོས་འབྱོར་ཡིད་ཀྱིས་རྣམ་སྤྲུལ་པའི། །དག་པའི་མཆོད་པ་བཞེས་སུ་གསོལ། །དངོས་གྲུབ་ཆུ་བོ་གཅོད་པའི་གེགས། །ཉེས་བྱས་མ་ལུས་བཤགས་པར་བགྱི། །ཕྱོགས་བཅུ་འཁོར་གསུམ་དག་པའི་ཆོས། །མ་ཆགས་སྤྱོད་ལ་རྗེས་ཡི་རང་། །དག་པའི་མཐའ་བཞི་དྲི་མ་མེད། །རྫོགས་པའི་བྱང་ཆུབ་སེམས་བསྐྱེད་དོ། །བདེ་གཤེགས་དབང་ཕྱུག་སེམས་ཅན་ལ། །དགོས་པ་གསུམ་ཕྱིར་ལུས་འབུལ་ལོ། །ཚེ་རབས་བསྒྲངས་པའི་ལས་རྣམས་ཀུན། །བསྡུས་ཏེ་བྱང་ཆུབ་ཆེན་པོར་བསྔོ། །ཞེས་ཚོགས་བསགས་མཐར།
རང་མདུན་ནམ་མཁར་རྣམ་མང་མཆོད་སྤྲིན་དབུས། །སེང་ཁྲི་དར་ཟབ་འབོལ་བརྩེགས་གདན་གྱི་སྟེང་། །ཕྱོགས་དུས་རྒྱལ་བའི་མཁྱེན་རབ་གཅིག་བསྡུས་པ། །དྲན་པས་ནང་གི་མུན་སེལ་སྨྲ་བའི་ཉི། །སྐྱབས་མཆོག་མཚུངས་མེད་མཁན་ཆེན་བླ་མ་ཉིད། །དཀར་གསལ་མཛེས་འཛུམ་པནྜི་ཏ་ཡི་ཆས། །ཕྱག་གཡས་ཆོས་འཆད་ལ་འཁྲིལ་ཨུཏྤལ་རྩེར། །སྔོ་བསང་རལ་གྲིའི་གཟི་འོད་ཀུན་ཏུ་འབར། །ཕྱག་གཡོན་མཉམ་བཞག་སྟེང་ན་རྡོ་རྗེའི་མཚན། །བསྟོད་པ་གླུར་བླང་ལེའུའི་གླེགས་བམ་སྣམས། །མཐའ་སྐོར་ཁྱད་ཆོས་དྲུག་ལྡན་སྔ་འགྱུར་བའི། །པན་གྲུབ་རྒྱ་མཚོ་ཏིལ་གོང་བཞིན་དུ་བཞུགས། །གནས་གསུམ་འབྲུ་གསུམ་ཐུགས་དབུས་དྷཱི་ཡིག་ལས། །འོད་འཕྲོས་རྒྱལ་ཀུན་སྤྱན་དྲངས་དབྱེར་མེད་ཐིམ། །མཐའ་ཡས་ཤེས་བྱ་འབྱེད་པའི་བློ་གྲོས་ཀྱི། །སྣང་བའི་གཟི་བྱིན་མཆོག་ཏུ་འབར་བར་གསལ། །དང་འདོད་ཡིད་ཆེས་ཀྱི་དད་པ་དྲག་ཏུ་བསྐྱེད་དེ། སངས་རྒྱས་ཀུན་གྱི་འཕྲིན་ལས་གཅིག་འདུས་པ། །མ་ལུས་འགྲོ་བ་ཡོངས་ཀྱི་གཉེན་གཅིག་པུ། །དཀྱིལ་འཁོར་ཡོངས་ཀྱི་སྤྲོ་བསྡུས་སྤྱི་དཔལ་རྗེ། །སྐལ་ལྡན་བདག་གི་གཏན་གྱི་སྐྱབས་ནས་མཆོག །སྟོན་ཟླའི་མཚན་མོ་དཀར་བའི་རི་བོང་འཛིན། །རྒྱུ་སྐར་ཡོངས་ཀྱི་དབུས་ན་མཛེས་པ་ལྟར། །དད་ལྡན་བྱེ་བས་མངོན་པར་བཀུར་བ་ཡི། །མཐོང་བའི་མི་ངོམས་སྐུ་མཆོག་མིག་གི་སྨན། །ཆར་ལྡན་དུས་སྟོན་དར་བའི་སྐབས་ཞིག་ན། །ལྷང་ལྷང་ལྡིར་བའི་སྤྲིན་གྱི་རོལ་མོ་བཞིན། །ཚར་གཅོད་རྗེས་སུ་འཛིན་ལ་དབང་འབྱོར་བའི། །དགག་བཞག་སྤོང་བའི་གསུང་འདི་རྣ་བར་འཇེབས། །སྤྲོས་ཟད་མཁའ་ལ་མཁྱེན་པའི་ཉི་འོད་ཀྱིས། །ལྔ་བདོའི་རྒུད་པའི་མུན་ཚོགས་དབྱིངས་སུ་བསྙིལ། །སྐལ་ལྡན་བློ་ཡི་འདབས་སྟོང་ཅིར་ཡང་བཞད། །ཐུགས་རྗེ་ཐུགས་འདི་ཡིད་ལ་ཡང་ཡང་འཁོར། །ཞེས་གསལ་བཏབ་ལ། གསོལ་བ་གདབ་པ་ནི། ཀྱེེ་མ་བླ་མ་རིན་པོ་ཆེ། །བདག་ལ་ཐུགས་རྗེའི་ཉེར་དགོངས་ལ། །ཁྱེད་དང་སྐལ་བ་མཉམ་པ་རུ། །ད་ལྟ་ཉིད་དུ་བྱིན་གྱིས་རློབས། ། ཅེས་དང་། དགེ༵་ལེག༵ས་ཕན་བདེའི་འབྱུང་གནས་རྒྱལ་བའི་བསྟན། །ཆོས༵་བཞིན་སྤྱོད་པའི་ཐོས་བསམ་སྒོམ་པ་ཡིས། །ངེས་དོན་བཤད་སྒྲུབ་བསྟན་པ་འཕེལ༵་མཛད་པའི། །ལེགས་བཤད་སྨྲ་བའི་ཉི་མར་གསོལ་བ་འདེབས། །ཞེས་དིལ་མགོ་མཁྱེན་བརྩེ་རིན་པོ་ཆེས་མཛད་པའི་གསོལ་འདེབས་ཅི་ནུས་དང་། ཨོཾ་གུ་རུ་ཀལྱ་དྷརྨ་བརྡྷ་སིདྡྷི་ཨཿཧཱུྃ། ཅི་འགྲུབ་བཟླ། ཐུན་འཇོག་ཁར། མཐར་ནི་བླ་མ་རང་ལ་ཐིམ། །རང་སེམས་སྐྱེ་མེད་འོད་གསལ་འདི། །ལྷ་དང་བླ་མ་དབྱེར་མེད་པར། །ཐག་ཆོད་ངང་ལ་མཉམ་པར་བཞག ། ཨ་ཨ་ཨ།
ཞེས་སྣང་སྲིད་ཐམས་ཅད་བླ་མའི་ངོ་བོར་མོས་ལ་དགེ་རྩ་བྱང་ཆུབ་ཏུ་བསྔོ་བར་བྱའོ༎ ཞེས་པ་འདི་ནི་དད་སློབ་མཁན་ཤེས་རབ་བཟང་པོའི་ངོ་ཆེན་པ་བྱས་ཏེ་ཕུ་ཁང་ཆོས་གྲྭ་ན་འཁོད་པའི་མཁན་སློབ་འགའ་ཞིག་གིས་ནན་ཟབ་བསྐུལ་བའི་ངོར་རབ་བྱུང་༡༧པའི་མེ་གླང་ཟླ་༣ཚེས་༡༠ ལ་ངག་དབང་བློ་གྲོས་མཚུངས་མེད་པས་སྤེལ་བ་དགེ། བསྐུལ་བ་པོ་ཁོང་རྣམས་ཀྱིས་ཐུགས་ལ་འཕྲོད་པའི་ཚིག་དོན་ལེགས་པོ་ཞིག་མ་བྱུང་ཡང་ཁོ་བོའི་ཚེ་གང་བོ་ལ་རྩོལ་མེད་དུ་རང་གི་ཡིད་ངོར་ཤར་བ་བཞིན་མ་གཏོགས་ཚིག་དོན་གཉིས་ཆར་ལ་བསྒྱུར་བཅོས་བྱེད་མ་མྱོང་བས་ཐུགས་ཁྲེལ་མེད་པར་ཞུ། སྤྱི་ལོ་༡༧ལོའི་ཟླ་༣ཚེས་༢༤ལའོ༎
༧ སྐྱབས་རྗེ་ཡིད་བཞིན་ནོར་བུས་མཛད་པའི་བླ་རྣལ་དད་པའི་གསོས་སྨན་གཞིར་བཞག་ལ་བླ་མའི་སྐུའི་རྣམ་པ་གསལ་ཚུལ་ཞིག་ཡོད་ན་རང་འདྲའི་བློ་དམན་ལ་ཅུང་ཟད་ལེགས་པར་སེམས་ཏེ་མཁན་ཆེན་བླ་མའི་གསུང་གི་བདུད་རྩིས་བསྐྱངས་པའི་སློབ་འབངས་ཐ་ཤལ་བ་ཨོ་རྒྱན་རིག་འཛིན་ནས་བླ་མའི་སྐུའི་རྣམ་པ་གསལ་ཚུལ་གྱི་ཚིགས་བཅད་ཤོ་ལོ་ཀ་བཞི་ཁ་སྐོང་གི་ཚུལ་དུ་བྲིས་པ་དཔལ་མགོན་བླ་མའི་བྱིན་རླབས་ཀྱི་སྣང་བ་རང་གཞན་གྱི་རྒྱུད་ལ་འཇུག་པའི་རྒྱུར་གྱུར་ཅིག སརྦ་མངྒ་ལཾ། །
རྩོམ་སྒྲིག་པ། དོནའགྲུབ་རྡོ་རྗེ།