མཁྱེན་རབ་ཡེ་ཤེས་མཆོག་གིས་རྣམ་ཀུན་གྱི། །
ཤེས་བྱ་མཐའ་དག་གཟིགས་པའི་སྤྱན་སྟོང་ཅན། །
ཕུལ་བྱུང་སྟོབས་མཐུས་འགྲོ་འདིའི་བཤེས་གཉེན་དུ། །
མཚུངས་མེད་བླ་མས་ཁྱེད་ལ་ཤིས་པ་སྩོལ། །
སྔོན་དགེའི་ལས་འཕྲོ་ཆོས་དཀར་རྒྱུས་བསྐྲུན་པའི། །
ཕུན་ཚོགས་མི་ལུས་དལ་འབྱོར་མི་ལུས་ཅན། །
ལེགས་པར་རྙེད་པའི་ཚེ་རབས་འདི་ཉིད་དུ། །
བྱང་ཆུབ་སྤྱོད་པ་མཆོག་གི་རྗེས་སློབས་ཤིག །
མཐའ་དག་ཤེས་བྱ་ཀུན་གཟིགས་རྒྱལ་རྣམས་ཀྱིས། །
ཟབ་རྒྱས་བཀའ་གསུང་ཇི་སྙེད་བསྟན་པའི་དོན། །
སྙིང་པོར་གྱུར་པ་སྐྱེས་བུ་ཆེན་པོའི་ལམ། །
ངེས་པར་སློབས་ཤིག་ཐར་འདོད་གཞོན་ནུ་ལགས། །
བདག་མེད་འདི་ནི་འཕགས་ལམ་ཀུན་གྱི་སྙིང་། །
སྟོང་ཉིད་དོན་ནི་རྒྱལ་ཀུན་དགོངས་པའི་བཅུད། །
བྱམས་དང་སྙིང་རྗེའི་བློ་ལྡན་སྤྱོད་པའི་མཆོག །
གཙོ་བོར་བསྟེན་དགོས་ཐར་འདོད་གཞོན་ནུ་ལགས། །
སྲིད་པའི་བདེ་འབྱོར་སྙིང་མེད་ཆུ་ཤིང་བཞིན། །
བདག་ལྟ་འཁོར་བའི་རྒྱུ་དང་རྩ་བར་གསུངས། །
གཟུང་འཛིན་འཁྲུལ་རྟོག་སྡུག་བསྔལ་བཞི་དང་བརྟན། །
དེ་ཀུན་འཆོས་དགོས་ཐར་འདོད་གཞོན་ནུ་ལགས། །
དེང་སང་སྣོད་བཅུད་སྙིགས་མ་ལྔ་བདོ་བའི། །
སྐལ་ངན་གྱུར་བར་རང་བྲིན་རང་ཆེ་དགོས། །
དགེ་བའི་བཤེས་གྲོགས་ཤིན་ཏུ་དཀོན་པས་ན། །
སྡིག་ལ་གཟོན་ཤིག་ཐར་འདོད་གཞོན་ནུ་ལགས། །
མདོ་སྔགས་ཆོས་ཚུལ་ཤིན་ཏུ་མང་མོད་ཀྱང་། །
རང་དོན་དམ་པའི་ལྷ་ཆོས་ལ་བསྟེན་ནས། །
སྒོ་གསུམ་བྱ་བྱེད་ཆོས་མིན་མ་ཤོར་བར། །
བག་ཡོད་མཛོད་ཅིག་ཐར་འདོད་གཞོན་ནུ་ལགས། །
ཆོས་བྱེད་ཕྱི་མར་དོན་གཉེར་མཛད་དགོས་ན། །
སྔོན་འགྲོ་རྒྱུད་སྦྱངས་སྨིན་གྲོལ་ལམ་ཞུགས་ནས། །
རིམ་གཉིས་ཉམས་བླང་སྒྲིབ་གཉིས་མཐར་ཕྱིན་ཏེ། །
དོན་གཉིས་སྒྲུབ་མཛོད་ཐར་འདོད་གཞོན་ནུ་ལགས། །
དེ་ལྟར་གཞོན་ནུ་དྲུག་གི་ཚིགས་བཅད་ཕྲེང་། །
སྐལ་བཟང་རྣ་བའི་དཔྱིད་དུ་བྱིན་པ་ཡིན། །
ཆོས་མཐུན་གཏམ་འདི་རང་ལ་མེད་ན་ཡང་། །
གཞན་ཕན་འགྱུར་སྙམ་བྱང་ཆུབ་རྡོ་རྗེས་བྲིས། །
ཞེས་པ་ནི་སློབ་བུ་པདྨ་ཐེག་མཆོག་བློ་གྲོས་སམ་སྦ་རྡོག་ལ་གདམས་པའོ།།
རྩོམ་སྒྲིག་པ། དོན་འགྲུབ་རྡོ་རྗེ།