༡ མཐའ་ཡས་ཤེས་བྱ་མ་འདྲེས་གསལ་གཟིགས་མཁྱེན་རབ་གངས་ཀྱི་རི་བོའི་སྤོར།།
ཐེག་མཆོག་ལུང་གི་གཡུ་རལ་ངོམ་བཞིན་དངོས་སྟོབས་རིགས་པའི་གད་རྒྱང་སྒྲས།།
མཐར་འཛིན་ལྟ་བར་ཞེན་པའི་རི་དྭགས་རྣམ་པ་སྟོང་དུ་འཇིགས་མཛད་པའི།།
འཇིགས་བྲལ་སྨྲ་བའི་སེང་གེ་ཆེན་པོ་ཀུན་དགའ་རྒྱལ་མཚན་ཞབས་ལ་འདུད།།
༢ རྒྱལ་བ་ཀུན་གྱི་མཁྱེན་རབ་ཡེ་ཤེས་གཅིག་ཏུ་བསྡུས་པའི་ལང་ཚོ་ཉིད།།
རྒྱལ་སྲས་ཐུ་བོ་ངག་གི་དབང་ཕྱུག་འཇམ་པའི་དབྱངས་ཞེས་གྲགས་པའི་དཔལ།།
གངས་ལྗོངས་ཀུན་གཟིགས་མཁས་གྲུབ་རྒྱ་མཚོའི་གཙུག་གི་རྒྱན་དུ་རྣམ་རོལ་བ།།
དགའ་ཆེན་སྒྱུ་མའི་བདེ་བར་རྩེན་པའི་རིགས་སྔགས་འཆང་བའི་རྒྱལ་པོར་འདུད།།
༣ ཐེག་ཆེན་མདོ་སྔགས་ཆོས་ཀྱི་ཉིན་བྱེད་གང་ཐུགས་དཔལ་དུ་འབར་བའི་གཟིས།།
ཡིད་ཅན་འགྲོ་བའི་རྨོངས་མུན་སྟུག་པོ་མིང་གི་ལྷག་མར་བྱས་པའི་མོད།།
ཟླ་བྲལ་གཟུང་སྤོབས་བློ་གྲོས་པདྨོ་རྣམ་པར་འཛུམ་པའི་དགའ་སྟོན་གྱིས།།
ས་གསུམ་འཇིག་རྟེན་མཛེས་པར་བྱས་པའི་རྣམ་པར་ཐར་བར་གཅིག་ཏུ་གུས།།
༤ མ་སྨད་ཕྲིན་ལས་རྣམ་བཞིའི་གསེར་འཁོར་མཐའ་ཡས་ཞིང་གི་མཁར་འཕགས་ཏེ།།
འདོད་འབྱུང་བསམ་འཕེལ་དབང་གི་ཞགས་པས་ལྷར་བཅས་འགྲོ་ཀུན་དབང་བྱས་ཞིང་།།
མ་ལུས་བདུད་ལས་རྣམ་པར་རྒྱལ་བའི་གཏམ་བཟང་གསེར་གྱི་སྙན་རྒྱན་གྱིས།།
ཕྱོགས་ཀྱི་བུ་མོའི་རྣ་བར་མཛེས་པའི་བཀྲ་ཤིས་བཟང་པོ་རྟག་བརྟན་ཤོག།
༥ ཤེལ་དཀར་མདངས་འཛིན་གངས་ཀྱི་རི་བོས་མངོན་པར་སྤུད་པའི་ཡུལ་གྱི་ཆར།།
ཕུན་ཚོགས་སྡེ་བཞི་འདྲེན་པའི་ཤིང་རྟ་དཔལ་ལྡན་འཁོན་རིགས་ནོར་བུའི་ཕྲེང་།
སྲིད་མཐའི་བར་དུ་རྒྱུན་ཆད་མེད་པའི་མཚུངས་བྲལ་དགེ་མཚན་སྣང་བའི་དཔྱིད།།
བསིལ་ལྡན་ཞིང་གི་རྒྱན་དུ་རྟག་འབར་གངས་ལྗོངས་རྒུད་མུན་གཞོམ་གྱུར་ཅིག།
༦ ཚོགས་གཉིས་ཆུ་གཏེར་བསྲུབས་ལས་ཉེར་ཐོན་ལམ་དང་འབྲས་བུའི་སྤྲིན་ཆེན་ལས།།
གདམས་ཟབ་བདུད་རྩིའི་ཆར་ཆེན་རྟག་འཇོ་རིས་མེད་འགྲོ་བའི་ཞིང་ས་བརླན།།
མཐའ་ཀླས་ཡོན་ཏན་སྙེ་མ་རབ་རྒྱས་ས་འདི་འོག་མིན་ཞིང་མཆོག་ཏུ།།
མྱུར་དུ་འགྱུར་བའི་སྐལ་བཟང་དཔལ་གྱིས་འཇིག་རྟེན་འདི་ཉིད་སྐྱོངས་བར་མཛོད།།
༧ སྟོང་ཆེན་དབྱིངས་ཀྱི་དགའ་མར་རྟག་རྩེན་འོད་གསལ་གཉུག་མའི་ཡེ་ཤེས་ཀྱི།།
རང་མདངས་མ་འགགས་ཇི་བཞིན་མངོན་གྱུར་བགྲེས་རྒུད་བྲལ་བའི་ལང་ཚོ་ཡིས།།
བསིལ་ལྡན་ཞིང་གི་ཆོས་སྲིད་ལེགས་ཚོགས་རྣམ་པར་སྤེལ་བའི་རྒྱལ་རྔའི་སྒྲས།།
དཀར་པོར་སྡང་བའི་ཡིད་ཅན་མཐའ་དག་རྣམ་པར་ཕམ་པའི་བཀྲ་ཤིས་ཤོག།
༸ གངས་རིའི་ལྗོངས་ཀྱིས་མཚོན་པའི་འཇིག་རྟེན་ཀུན་གྱི་ཕན་བདེའི་བྱེད་པོ་དཔལ་ས་སྐྱ་བདག་ཁྲི་རིན་པོ་ཆེར་བསྔགས་པའི་ཚིག་བཅད་རྒྱལ་སྲིད་སྣ་བདུན་གྱི་གྲངས་མཚུངས་འདི་ཉིད་མཆོག་སྤྲུལ་བཀྲ་ཤིས་མགོན་པོས་བཀས་སྐུལ་ལྟར་རྫོགས་ཆེན་མཁན་ཟུར་ཨོ་རྒྱན་རིག་འཛིན་ནས་བྲིས་ཕུལ།
རྩོམ་སྒྲིག་པ། དོན་འགྲུབ་རྡོ་རྗེ།