རང་བྱུང་པདྨ་རྒྱལ་པོས་བྱིན་བརླབས་ཤིང་། །
ངོ་མཚར་ཆོས་ནོར་གཏེར་གྱིས་ཡོངས་གང་མཛོད། །
དམ་པ་དགྱེས་པའི་གནས་ཀྱི་ཡོན་ཏན་ཀུན། །
གཅིག་ཏུ་སྤུངས་པ་རྫོགས་ཆེན་རུ་དམ་ལུང་། ། ༡
རིགས་ཀུན་འདུས་ཞལ་པདྨ་སམ་བྷ་ཝས། །
བྱིན་གྱིས་བརླབས་པའི་གནས་ཆེན་ཉེར་ལྔ་ལས། །
ཡོན་ཏན་གནས་གཙོ་རུ་དམ་ལུང་བ་ཞེས། །
འཁྲུལ་མེད་གཏེར་ལུང་དུ་མས་ཡང་ཡང་བསྔགས། །༢
གསང་བ་གསང་ཆེན་བླ་མེད་སྒྲུབ་པའི་གནས། །
ངོ་མཚར་གནས་མཆོག་སྦས་ཡུལ་བཅོ་བརྒྱད་ཀྱིས། །
ཀུན་ནས་བསྐོར་བའི་ས་སྤྱོད་ས་ཡི་ཞིང་། །
གྲགས་པའི་བ་དན་སྲིད་པའི་བླ་ན་མཐོ། །༣
བརྒྱུད་གསུམ་བླ་མའི་བྱིན་རླབས་སྤྲིན་ཆེན་འཁྲིགས། །
གནས་གསུམ་ཡི་དམ་མཁའ་འགྲོའི་འདུ་བ་རྒྱས། །
སྡེ་གསུམ་སྲུང་མས་སྲུང་བའི་ར་བ་བརྟན། །
ས་གསུམ་ཕན་བདེའི་རྩ་ལག་རུ་དམ་ལུང་། །༤
རབ་དཀར་ཁ་བའི་དབུ་རྨོག་མཐོན་པོའི་རྩེར། །
སྣང་བྱེད་ཉི་ཟླའི་ཏོག་གི་འོད་ཕྲེང་འཕྲོ། །
བྲག་རིའི་མགུལ་དུ་འཁྱུད་པའི་ན་བུན་དབུས། །
དབྱར་སྐྱེས་རྔ་གསང་སྙན་འཇེབས་དལ་གྱིས་ལྡིར། །༥
རྨ་བྱའི་སྒྲོ་གུར་ཕུབས་འདྲའི་ནགས་ཚལ་དུ། །
དྭངས་བསིལ་རྫ་ཆབ་འབབ་པའི་ལྷུང་སྒྲ་དང་། །
འཚེ་མེད་བག་ཕེབས་རྒྱུ་བའི་རི་དྭགས་ཀྱིས། །
སྙན་པའི་སྐད་ཀྱིས་སྡོམ་བཞིའི་དོན་བཟང་སྟོན། །༦
རང་བྱུང་རིན་ཆེན་བྲག་གི་ཕང་བ་རུ། །
དཀར་སེར་དམར་མཐིང་ལྗང་ཀུའི་མདོག་ལྡན་པའི། །
རྣམ་མང་མཚོ་དང་མཚེའུ་འཁྱིལ་བ་རུ། །
མཛེས་པའི་གཟུགས་དང་གཟུགས་བརྙན་དབྱེར་མི་ཕྱེད། །༧
དྲང་སྲོང་གྲུབ་པའི་རིག་འཛིན་བསྟི་བའི་གནས། །
ཡིད་འོང་བྲག་རིའི་ཁང་བཟང་ཉམས་དགའི་འགྲམ། །
སྣ་ཚོགས་ལོ་འབྲས་བཟའ་བཅའ་རྣམ་མང་དང་། །
རྫ་ཆབ་བསིལ་མའི་བཏུང་བ་ཁྱད་འཕགས་འཛོམས། །༨
འོ་མའི་ཆབ་དཀར་གྱ་གྱུར་འབབ་པའི་འགྲམ། །
ལྗོན་ཤིང་མེ་ཏོག་ཚོམ་བུའི་སྐྱེད་ཚལ་དུ། །
སྣ་ཚོགས་འདབ་ཆགས་མང་པོས་གར་རྩེད་དང་། །
སྙན་པའི་མགྲིན་གླུ་ཀུན་ཏུ་སྒྲོག་ལ་བྲེལ། །༩
རྫ་བྲག་རི་བོས་བང་རིམ་བརྩེགས་པའི་ཁྲིར། །
གཏན་འཁྱིལ་གཡུ་ཡི་མཚོ་མོའི་མཐའ་སྐོར་དུ། །
གངས་ཀྱི་ལ་ཐོད་འཛིན་པའི་ཤེལ་བྲལ་མགུལ། །
རང་བྱུང་པདྨའི་སྒྲུབ་ཕུག་བྱིན་རེ་ཆགས། །༡༠
གྲུབ་བརྒྱའི་གཙུག་རྒྱན་ཤྲཱི་སེང་པད་འབྱུང་རྗེ། །
དབྱིངས་ཕྱུག་མཁར་ཆེན་ཡེ་ཤེས་མཚོ་རྒྱལ་སོགས། །
གྲུབ་རིག་མང་པོའི་ཕྱག་ཞབས་སྐུ་ཡི་རྗེས། །
སྲ་མཁྲེགས་བྲག་གི་ངོས་སུ་རྣམ་པར་བཀྲ། །༡༡
སངས་རྒྱས་གཉིས་པ་རྒྱལ་དབང་པད་འབྱུང་རྗེས། །
གནས་འདིར་བདུད་རྩི་སྨན་བསྒྲུབ་མཛད་པའི་ཚེ། །
མཁའ་དབྱིངས་ལྷ་རྣམས་གཏོར་བའི་སྨན་གྱི་འབྲུ། །
ད་ལྟའང་རི་རྩེར་ཅི་དགར་རྙེད་དུ་ཡོད། །༡༢
པདྨའི་རྒྱལ་ཚབ་མཆོག་གྱུར་བདེ་ཆེན་གླིང་། །
ཀློང་གསལ་སྙིང་དང་ལས་རབ་གླིང་པ་སོགས། །
ཚད་ལྡན་འགྲོ་འདུལ་གཏེར་ཆེན་དུ་མ་ཡིས། །
ཆོས་ནོར་གཏེར་རྫས་བཞེས་པའི་རྗེས་ཤུལ་གསལ། །༡༣
གྲུབ་བརྙེས་མཆོག་གྱུར་ཀུན་བཟང་གཞན་ཕན་པར། །
ཆེ་མཆོག་དཔལ་ཆེན་འདུས་པའི་རྣམ་པ་རུ། །
བཞེངས་ཏེ་དངོས་གྲུབ་བསྩལ་བའི་བྲག་གི་རི། །
རབ་འབར་མེ་ཡི་དབྱིབས་ཅན་མཁའ་ལ་བསྙེགས། །༡༤
མཚན་གྱི་བདུད་རྩིའི་ཟིལ་མངར་རེ་རེ་ཡིས། །
དུ་མའི་སྐྱེ་རྒུའི་གདུང་བ་ཀུན་སེལ་བའི། །
བདེ་བར་གཤེགས་དེའི་ཡེ་ཤེས་སྒྱུ་མའི་འཕྲུལ། །
རིམ་པར་བྱོན་རྣམས་ཐུགས་བསྐྱེད་སྨིན་པའི་ཞིང་། །༡༥
ཤར་དུ་མཁས་པའི་རྒྱུ་ལམ་ཡངས་ཤིང་རིང་། །
ལྷོ་ཕྱོགས་འདོད་རྒུ་འབྱུང་བའི་རི་ཆེན་སྤུངས། །
ནུབ་དུ་དབང་གི་དར་ཡོལ་ཀུན་ནས་ཟླུམ། །
བྱང་གི་རི་སྣས་དགྲ་སྒོ་བསྣོལ་མར་བསྡམས། །༡༦
ཕྱོགས་བཞིར་སྲུང་བཞི་མཚམས་ཀྱི་དཔལ་བཞི་དང་། །
གསེར་གཞོང་མར་ཁུས་བསྐང་འདྲའི་ནེའུ་སེང་སོགས། །
མདོ་རྒྱུད་གཙུག་ལག་གཞུང་ནས་བཤད་པ་ཡི། །
གནམ་ས་བར་གྱི་ས་དཔྱད་ཕུན་སུམ་ཚོགས། །༡༧
གཡུ་འབྲུག་ཁ་སྤྲོད་རི་བོའི་མུ་ཁྱུད་དང་། །
དཀྱིལ་དབུས་དྲག་དལ་སྤེལ་མའི་བཞུར་རྒྱུན་གྱིས། །
དེར་བཞུགས་མཚུངས་མེད་དམ་པའི་ཡོན་ཏན་ཀུན། །
ཕྱོགས་ཀྱི་སྐྱེ་རྒུའི་རྣ་བའི་བཅུད་དུ་འགྲེམ། །༡༨
དལ་གྱིས་ཉལ་བའི་གླང་ཆེན་མཁལ་ཁུང་དུ། །
སྟག་འབྲུག་སེང་ཆེན་རྨ་བྱའི་གདན་གྱི་སྟེང་། །
ཐུབ་བསྟན་ཡོངས་སུ་འདུས་པའི་གྷནྡྷོ་ལར། །
གསང་ཆེན་རྒྱུད་སྡེའི་དཀྱིལ་འཁོར་བཀོད་པ་རྫོགས། །༡༩
གྲུབ་པའི་དབང་ཕྱུག་པདྨ་རིག་འཛིན་རྗེ། །
རིམ་བྱོན་གསེར་གྱི་ཕྲེང་བ་ཚར་དངར་དང་། །
ཐུགས་སྲས་མཁས་གྲུབ་ཉི་ཟླ་སྐར་གསུམ་གྱི། །
དོན་ལྡན་མཚན་སྙན་སྒྲ་ཡིས་ས་ཆེན་བསྒུལ། །༢༠
རིམ་བྱོན་གྲུབ་པའི་དབང་ཕྱུག་རྫོགས་ཆེན་པའི། །
ཞལ་ཆབ་བདུད་རྩིའི་བཅུད་ཀྱིས་ཉེར་སྨིན་པའི། །
འཇའ་ལུས་འོད་སྐུར་གྲོལ་བའི་རྡོ་རྗེ་འཛིན། །
བཅུ་གསུམ་བྱོན་པའི་གཏམ་གྱིས་ས་འདི་བརྒྱན། །༢༡
སྔ་འགྱུར་བསྟན་རྩ་མདོ་སྒྱུ་སེམས་གསུམ་གྱི། །
ཆོག་ཁྲིགས་ཕྱག་བཞེས་བཀའ་མའི་སྒྲུབ་ཆེན་སྲོལ། །
གསར་དུ་ཕྱེས་པའི་ཕྲིན་ལས་རླབས་ཕྲེང་གིས། །
གངས་ལྗོངས་མདོ་སྨད་ཁྱོན་ཀུན་མཛེས་པར་བྱས། །༢༢
རི་ཕྲན་ཤེས་རབ་རལ་གྲིའི་དབྱིབས་ཅན་སྤོར། །
འཕོ་ཆེན་སྐུར་བཞེངས་རིག་འཛིན་ཤྲཱི་སེང་ཧས། །
རྒྱལ་བའི་སྲས་པོ་གཞན་ཕན་ཕ་མཐའ་ཡས། །
མངོན་སུམ་རྗེས་སུ་བཟུང་བའི་རྗེས་ཤུལ་གསལ། །༢༣
གནས་དེར་གྲུབ་བརྒྱའི་གཙུག་རྒྱན་པདྨ་འབྱུང་། །
མངོན་སུམ་མི་ཡི་གཟུགས་སུ་ཉེར་བྱོན་པ། །
མཁྱེན་བརྩེ་འཇའ་ལུས་ཡེ་ཤེས་རྡོ་རྗེ་ཡིས། །
རྫུ་འཕྲུལ་ཐིག་ཆོག་མཛད་པའི་གྲགས་སྙན་འཇེབས། །༢༤
དྭངས་བསིལ་རྫིང་བུའི་ཡོན་ཆབ་ཡིད་འོང་དང་། །
སྟར་ལེགས་ལྗོན་ཤིང་ཕྲེང་བས་ཡོངས་བསྐོར་དབུས། །
འཕགས་ཡུལ་གཙུག་ལག་རིག་གཞུང་ཐོས་བསམ་ལ། །
བརྩོན་པའི་རིགས་གྲྭ་གངས་རིའི་རྒྱན་དུ་མཛེས། །༢༥
དེ་ཡི་གཙུག་ལག་ཁང་གི་སྒོ་ཁྱམས་སུ། །
འཇམ་པའི་དབྱངས་དངོས་ཀུན་མཁྱེན་མི་ཕམ་པའི། །
ཕྱག་གིས་བསྟར་བའི་ཀུན་བཟང་འཁོར་ལོའི་རིས། །
དཔྱོད་ལྡན་སྐྱེས་བུའི་མིག་གི་དགའ་སྟོན་བཞུགས། །༢༦
སེམས་དཔའ་ཆེན་པོ་ཆོས་ཀྱི་དབང་པོ་ཡིས། །
བྱང་ཆུབ་སེམས་བསྒོམས་བྱང་སེམས་སྤྱོད་འཇུག་མཆོག། །
འཆད་པའི་སྤོང་ཁང་རང་བྱུང་བྲག་ཕུག་གི། །
བྱིན་རླབས་འོད་ཀྱི་སྣང་བས་མཛེས་པར་སྤུད། །༢༧
དེར་བྱོན་མཁན་ཆེན་པདྨ་བཀྲ་ཤིས་དང་། །
ཁྱབ་བདག་རྒྱལ་བའི་སྲས་པོ་གཞན་ཕན་པའི། །
མཛད་བཟང་ཤིང་རྟས་འདུལ་བསྟན་ཉིན་མོར་བྱེད། །
མདོ་སྨད་སྔ་འགྱུར་བསྟན་པའི་རྒྱན་དུ་དྲངས། ། ༢༨
གསང་ཆེན་བཀའ་བབས་པདྨ་བཛྲ་དང་། །
བཅུ་གསུམ་གཞུང་ཆེན་སྲོལ་འབྱེད་གཞན་ཕན་སྣང་། །
རིམ་བྱོན་མཁས་མང་འཆད་རྩོད་རྩོམ་པ་ཡིས། །
གངས་ཅན་ཤར་ཕྱོགས་མཁས་པས་ཁྱབ་པར་མཛད། །༢༩
སྐྱ་རེངས་དང་པོ་དེ་ཉིད་སྣང་བྱེད་སོགས། །
ལུང་རིགས་བརྒལ་བརྟག་རྣོན་པོའི་འོད་སྣང་གིས། །
ལོག་རྟོག་མུན་ཆེན་གཞོམ་པའི་གྲགས་སྙན་སྒྲས། །
མཐའ་ཡི་རྒྱ་མཚོའི་མུ་ཁྱུད་ཡོངས་སུ་བརྒལ། །༣༠
མཚུངས་མེད་དམ་པའི་སྐྱེ་སྤྲུལ་མང་པོ་ཡི། །
ཐུགས་སྟོབས་སྨོན་ལམ་རླུང་གིས་མཐོར་བཏེགས་པའི། །
སྔ་འགྱུར་བསྟན་པའི་ཉི་མ་རྫོགས་ཆེན་པའི། །
གཟི་བྱིན་མདོ་སྨད་ས་ཡི་རྩེ་མོར་བརྗིད། ། ༣༡
བཀྲ་ཤིས་བྱེ་བའི་གཏེར་གྱུར་སྲིད་ཞིའི་རྒྱན། །
བཀྲ་ཤིས་ཕན་བདེའི་དངོས་ཀུན་འབྱུང་བའི་གནས། །
བཀྲ་ཤིས་སྔ་འགྱུར་བསྟན་པའི་རྒྱལ་མཚན་མཆོག །
བཀྲ་ཤིས་གནས་འདིར་མི་ནུབ་ཡུན་བརྟན་ཤོག ། ༣༢
ཅེས་བསྟོད་ཚིག་ཤོ་ལོ་ཀ་མཚན་བཟང་སོ་གཉིས་ཀྱི་གྲངས་མཚུངས་འདི་ཉིད་གྲུབ་དབང་རྫོགས་ཆེན་པའི་ཆོས་བརྒྱུད་འཛིན་པ་ཡོངས་ལ་སྤྱི་ལོ་ཉིས་སྟོང་ཉེར་ལྔ་ལོ་སྟེ་བོད་ཤིང་སྦྲུལ་གནམ་ལོ་གསར་བསུའི་ལེགས་སྐྱེས་སུ་ཨོ་རྒྱན་རིག་འཛིན་ནས་ཕུལ་བ་དགེ་ཞིང་ཤིས་པའི་སྣང་བས་ཕྱོགས་དང་དུས་ཀུན་ཡོངས་སུ་མཛེས་པར་གྱུར་ཅིག། །།
རྩོམ་སྒྲིག་པ། དོན་འགྲུབ་རྡོ་རྗེ།