རྫོགས་ཆེན་མཁན་པོ་ཐུབ་བསྟན་སྙན་གྲགས།
༡༨༨༣——༡༩༥༩
རྣམ་འདྲེན་སྟོན་མཆོག་ཤཱཀྱའི་རྒྱལ་པོ་དེའི། །བདེན་གསུང་ལུང་གིས་རྒྱ་ཆེན་སྤྱོད་པ་ཡི། །རྨད་བྱུང་ཤིང་རྟའི་སྲོལ་འབྱེད་བསྔགས་པའི་མགོན། །སངས་རྒྱས་གཉིས་པ་དབྱིག་གཉེན་གྲགས་པ་ཡི། །མཚན་གྱི་གདུགས་དཀར་སྲིད་པ་གསུམ་ཉིད་ཀྱི། །བླ་རུ་མཐོ་བར་གྱུར་དེར་བསྟོད་པར་བགྱི། །གང་གི་མཁྱེན་རབ་དྭངས་བའི་མེ་ལོང་ངོར། །གཞུང་ལུགས་འབུམ་སྡེ་དགུ་བཅུའི་གཟུགས་བཀྲ་བའི། །མངོན་རྟགས་དབྱངས་ཀྱིས་ཁ་ཏོན་འཆད་པའི་སྒྲ། །ངན་འགྲོའི་ལུས་ཅན་ཐོབ་པའི་ཐོས་འཛིན་གྱི། །བཅུད་དུ་སོན་པས་སྐྱེ་གནས་དམན་པ་ལས། །ཐར་ཏེ་རྒྱ་གར་ཤར་ནས་ནུབ་ཀྱི་བར། །ལྔ་རིག་སྨྲ་བའི་དབང་པོའི་སྲིད་བཟུང་པ། །སློབ་དཔོན་ཆེན་པོ་བློ་གྲོས་བརྟན་པ་ཞེས། །མངོན་པ་རང་ལས་མཁས་པར་བསྐྱངས་དེར་བསྔགས། །གཞན་ཡང་སྟོན་པ་ཞི་བ་གཟིམ་འོག་ཏུ། །རྒྱལ་ཚབ་ཆོས་འདུལ་ལྷ་ཡི་བདུད་རྩི་མཆོག །རྩ་བའི་ལུང་དང་བཤད་པའི་ལུང་གཉིས་ཀྱིས། །སྲོལ་འབྱེད་འོད་བྱེད་ས་བརྙེས་ཡོན་ཏན་འོད། །འདུལ་བ་རང་ལས་མཁས་པར་བསྐྱངས་དེར་བསྔགས། །སྡེ་སྣོད་ལུང་དང་གཏན་ཚིགས་རིགས་པའི་དོན། །གབ་པ་མངོན་དུ་གསལ་ཏེ་སྲོལ་ཕྱེ་པའི། །རིགས་པའི་སེང་ཆེན་སློབ་དཔོན་ཕྱོགས་ཀྱི་གླང་། །ཚད་མ་རང་ལས་མཁས་པ་བསྐྱངས་དེར་བསྔགས། །རྒྱལ་བའི་ཡུམ་གྱི་སྦས་དོན་བཀྲལ་བའི་གཞུང་། །མངོན་པར་རྟོགས་པའི་རྒྱན་གྱི་དགོངས་པའི་གནད། །ནོར་མེད་བཀྲལ་བའི་འཕགས་པ་རྣམ་གྲོལ་སྡེ། །ཕར་ཕྱིན་རང་ལས་མཁས་པར་བསྐྱངས་དེར་བསྔགས། །དེ་ལྟར་རང་མཁས་དངོས་སློབ་བཞི་ལ་སོགས། །མཁས་གྲུབ་ནམ་མཁའི་སྐར་ཚོགས་ལྟར་བསྐྱངས་ཏེ། །འཕགས་ཡུལ་གསེར་འཛིན་ཤར་རིའི་གཙུག་ཕུད་ནས། །རྒྱ་ཆེན་སྤྱོད་པའི་ལུགས་བཟང་འོད་སྣང་གི། །འབྱུང་གནས་ཐུབ་བསྟན་ཉི་མའི་དཀྱིལ་འཁོར་ཆེ། །ཐུགས་བསྐྱེད་འགྲན་བྲལ་ཤིང་རྟས་ལེགས་དྲངས་ཏེ། །འཛམ་གླིང་ཡངས་པའི་ཐ་གྲུའི་ཁྱོན་ཀུན་ཏུ། །དགེ་མཚན་གསར་པའི་ཕུན་ཚོགས་སྦྱིན་པའི་མགོན། །སངས་རྒྱས་གཉིས་པ་ལས་གཞན་སུ་ཞིག་བདོག །དེ་སླད་སྟོན་པའི་གཟུགས་བརྙན་ཡིད་འོང་གིས། །ས་འདི་རྒྱ་མཚོའི་མཐར་ཐུག་མ་ལུས་པའི། །རྒྱན་དུ་གྱུར་པ་བྲམ་ཟེའི་རིགས་བཟུང་བའི། །སློབ་དཔོན་ཆེན་པོ་ཡི་གེ་དང་པོ་ལ། །བ་ཡི་མཚན་འཆང་འབྱུང་ཞེས་ལུང་ལས་བསྔགས། །དེས་ན་རྒྱ་བོད་གཉིས་ཀྱི་རྣ་ལུང་དུ། །སངས་རྒྱས་གཉིས་པ་དབྱིག་གཉེན་ཞབས་ཞེས་པ། །གྲགས་པའི་ཡབ་སྲས་བརྒྱུད་པ་བཅས་ཀུན་ལ། །མི་ཕྱེད་དད་ཅིང་གུས་པས་བསྟོད་པར་བགྱི། །བདག་སོགས་ཐོག་མེད་དུས་ནས་ད་བར་དུ། །སྲིད་པའི་རྒྱ་མཚོར་བྱིངས་ཏེ་རྨོངས་པ་ཡིས། །བླང་དོར་འབྱེད་པའི་བློ་མིག་བྲལ་ཀུན་ལ། །ཤེས་རབ་གསུམ་གྱི་སྣང་བའི་དགེ་ལེགས་ཚོགས། །བསྩལ་ཏེ་ཐར་བའི་ལམ་ལ་འགོད་པར་མཛོད། །རྒྱལ་བའི་དགོངས་པ་ནོར་མེད་བཀྲལ་བའི་གཞུང་། །རྒྱ་བོད་མཁས་པ་ཀུན་གྱི་ལེགས་བཤད་ཕུལ། །དཔྱད་གསུམ་དག་པའི་གནས་ལ་ཕྱོགས་ཞེན་གྱི། །དྲི་མས་བསླད་པའི་སྐབས་དང་རབ་བྲལ་ཏེ། །ཤེས་རབ་ཟབ་མོས་བཀའ་གནད་མཆིས་སོ་ཅོག །ཚུལ་བཞིན་ཕིག་པའི་རྣམ་དཔྱོད་སྩལ་དུ་གསོལ། །དེ་ལས་བརྟེན་ནས་དམ་པའི་ཚུལ་དགུ་ཡི། །ལེགས་ཚོགས་ཡོན་ཏན་ཀུན་དང་མཛའ་བོ་རུ། །གྱུར་ནས་རྒྱལ་བའི་བསྟན་པ་རིན་པོ་ཆེར། །འཛིན་སྐྱོང་སྤེལ་བའི་བྱ་བ་བྱེད་པར་ཤོག །དེ་མཐུས་འཇིག་རྟེན་དུས་ཀྱི་རྒུད་པ་ཀུན། །ཡོངས་སུ་ཞི་སྟེ་རྫོགས་ལྡན་གསར་པ་ཞིག །སྐྱེ་རྒུའི་དཔྱིད་དུ་ཐོབ་ནས་དགེ་བཅུ་ཡི། །ཁྲིམས་ལ་གུས་རྟག་བརྩོན་པས་གནས་གྱུར་ཅིག །མཁའ་ཁྱབ་སྲིད་པའི་འགྲོ་བ་མ་ལུས་པ། །ཚོགས་གཉིས་རྒྱ་མཚོ་ལྟ་བུ་རབ་རྫོགས་ཏེ། །རྣམ་མཁྱེན་སྐུ་བཞིའི་གོ་འཕང་རིན་པོ་ཆེ། །མི་རིང་མྱུར་དུ་འགྲུབ་པའི་རྒྱུར་གྱུར་ཅིག །
ཅེས་པ་འདི་མངོན་པ་མཛོད་ཞུ་མཁན་རྣམས་ཀྱིས་བསྐུལ་བ་བཞིན་མཁན་ཟུར་ཐུབ་བསྟན་སྙན་གྲགས་ནས་བྲིས་པ་དགེ་ལེགས་སུ་གྱུར་ཅིག །སརྦྦ་དཱ་ཀ་ལྱཱ་ཎཾ་བྷ་ཝནྟུ།
རྩོམ་སྒྲིག་པ། དོན་འགྲུབ་རྡོ་རྗེ།