ཁམས་པ་ཉི་མ་གྲགས་པའི་རྣམ་ཐར་མདོར་བསྡུས་བདུད་རྩིའི་རྒྱ་མཚོ་བཞུགས། དཔལ་མགོན་བླ་མ་དམ་པའི་ཞབས་ལ་གུས་པ་ཆེན་པོས་ཕྱག་འཚལ་ཞིང་སྐྱབས་སུ་མཆིའོ། །འཕོ་ལུང་ཆོས་རྗེའི་སྐྱེ་བར་འབོད་པ་སྤྲང་པོ་རིགས་འཛིན་རྣམ་རྒྱལ་བ་བདག །ཡུལ་མདོ་ཁམས་སྒོམ་སྡེ་ནང་ཆེན་དུ། །བྱམས་མེ་ཀརྨ་རྣམ་རྒྱལ་དང་། བླ་བཟའ་བསོད་ནམས་མཚོ་གཉིས་ཀྱི་བུ་གསུམ་གྱི་འབྲིང་བ་ལ་སྐྱེས་ཤིང་། ཆུང་ངུ་ནས་ཁུ་བོ་བླ་མ་དང་སྤྱི་བུག་ཀརྨ་བྱང་ཆུབ་སོགས་ལ་བུ་སྟོན་ཆོས་འབྱུང་དང་མ་ཎི་བཀའ་འབུམ། རྗེ་བཙུན་གྱི་བཀའ་འབུམ་རྣམས་ཀྱི་ལུང་ཐོབ། ལྷོ་པ་སྐུ་སྐྱེ་དཀོན་མཆོག་འཕྲིན་ལས་རྣམ་རྒྱལ་ལ། ཞི་ཁྲོ་དགོངས་པ་རང་གྲོལ་གྱི་ཁྲོམ་དབང་། ཡང་ཟབ་ཀྱི་དབང་ལུང་ཡོངས་རྫོགས་ཐོབ་སྟག་ལུང་ལོ་ཆེན་སྒྲོག་ར་བ་ཆེན་པོ་ལ་སྒྲུབ་ཐབས་བརྒྱ་རྩ་ཁྲོམ་ཆོས་སུ་ཐོབ། ཆུང་ངུའི་དུས་ནས་སློབ་དཔོན་ཆེན་པོ་ལ་དད་པ་དབང་མེད་དུ་འབར་བ་ཞིག་ཡོད་པའི་སྟབས་ཀྱིས། སྔ་འགྱུར་རྡོ་རྗེ་ཐེག་པའི་རིང་ལུགས་ཀྱི་ཅོད་པན་འཛིན་པ་ཆེན་པོ་མཁས་གྲུབ་ཀྱི་དབང་ཕྱུག་དམ་པ་རྫོགས་ཆེན་པདྨ་རིགས་འཛིན་གྱི་ཞབས་རྡུལ་སྤྱི་བོར་བླངས་པས། ལོ་བཅོ་བརྒྱད་ཀྱི་བར་དུ་སྐུ་དྲིན་བསམ་གྱིས་མི་ཁྱབ་པས་བསྐྱང་། རིགས་འཛིན་འཇའ་ཚོན་སྙིང་པོའི་དཀོན་མཆོག་སྤྱི་འདུས། གུ་རུ་རཏྣ་གླིང་པའི་ཐུགས་སྒྲུབ། དྲག་པོ་དམར་ནག་མེ་འཕྲེང་ཆོས་སྐྱོང་མ་ནིང་། གཟའ་རྒོད་དུག་གི་སྤུ་གྲི། གྲྭ་པ་མངོན་ཤེས་ཀྱི་ཛམ་བྷ་ལ་དམར་པོ། མངའ་བདག་ཉང་གི་དྲག་པོ་དམར་ཆེན། རྟ་ནག་ལྕགས་རལ་ཅན། རྗེ་རཏྣའི་ཚེ་སྒྲུབ་རྡོ་རྗེ་འཕྲེང་བ་དང་ཚེ་སྒྲུབ་གསང་བ་འདུས་པ། སངས་རྒྱས་གླིང་པའི་ཚེ་སྒྲུབ་ཉི་ཟླ་ཁ་སྦྱོར། ནམ་མཁའ་འཇིགས་མེད་ཀྱི་རིགས་འཛིན་སྲོག་སྒྲུབ། བདུད་འདུལ་རྡོ་རྗེའི་སྤྲུལ་སྐུ་སྙིང་ཐིག མི་འགྱུར་རྡོ་རྗེའི་དཔལ་རྣོ་པྲ། མཁས་གྲུབ་ཐམས་ཅད་མཁྱེན་པ་ཀློང་རམ་པས་མཛད་པའི་རྫོགས་པ་ཆེན་པོ་སེམས་ཉིད་ངལ་བསོ། འགྲེལ་པ་ཤིང་རྟ་ཆེན་མོ། སྤྱི་དོན་ལེགས་བཤད་རྒྱ་མཚོ། ཡང་དག་པར་རྫོགས་པའི་སངས་རྒྱས་ཀྱི་སྐྱེས་རབ་བརྒྱ་རྩ། པདྨ་བཀའི་ཐང་ཡིག་ཤེལ་བྲག་མ། རྡོ་རྗེ་གླིང་པས་གཏེར་ནས་སྤྱན་དྲངས་པའི་ཐུགས་རྗེ་ཆེན་པོ་རྒྱལ་བ་རྒྱ་མཚོ། རྒྱུད་རྒྱལ་གསང་བ་སྙིང་པོ། བཀའ་བརྒྱད་གསང་བ་ཡོངས་རྫོགས་ཀྱི་དབང་མོ་ཆེ་དང་འདོན་ཆོག་གི་ལུང་། ཞི་ཁྲོ་དགོངས་པ་རང་གྲོལ་གྱི་དབང་ལུང་ཡོངས་རྫོགས་དང་དབང་བསྡུས་པ་གཏོར་དབང་རེག་པ་དོན་ལྡན། ལབ་ཀྱི་སྒྲོལ་མའི་གཅོད་ཟབ་དོན་ཐུགས་ཀྱི་ཉིང་ཁུ་དང་གཅོད་དབང་ནམ་མཁའ་སྒོ་འབྱེད། བཀའ་རྫོགས་པ་ཆེན་པོ་མཁའ་འགྲོ་སྙིང་ཐིག་གི་དབང་ལུང་ཡོངས་རྫོགས་དང་། ཟབ་ཁྲིད་ཆེན་མོ་ཉམས་ཁྲིད་དུ་ཐོབ། གནས་མཆོག་ཆེན་པོ་དཔལ་རྩྭ་རི་ཏྲ་རུ་ས་སྤྲེལ་ལ་སོང་ཞིང་། དག་པ་ཤེལ་རིའི་བྱང་ཤར་གྱི་མཚམས་སུ་ཨོ་རྒྱན་སངས་རྒྱས་གཉིས་པའི་བྱིན་གྱིས་བརླབས་པའི་གནས་མཆོག་དཔལ་རི་ཟླུམ་ཅན་བསྐལ་བཟང་སངས་རྒྱས་སྟོང་གི་ཕོ་བྲང་མཚོ་ཆེན་པོ་བརྒྱ་རྩ་བརྒྱད་ཀྱིས་བསྐོར་བ་མཁའ་འགྲོ་མ་བསྒྲུབ་རང་བཞིན་འདུ་བའི་གནས་མཆོག་སྦས་པའི་ལུང་དབེན་པའི་གནས་ཟབ་ལམ་རྡོ་རྗེ་རྭ་བ་ཞེས་བྱ་བར་ལོ་གསུམ་གྱི་བཅད་རྒྱའི་ཁོངས་ནས། དཔལ་རྫོགས་ཆེན་པ་ལ་བཀའ་རྫོགས་པ་ཆེན་པོ་སྡེ་གསུམ་ཀློང་དགུ་མན་ངག་བརྒྱད་ཅུ་རྩ་བཞི་ཤོ་ལོ་ཀ་འབུམ་ཕྲག་དྲུག་ཅུའི་སྙིང་པོ་གཅིག་ཏུ་དྲིལ་བ་བཀའ་རྫོགས་པ་ཆེན་པོ་གསང་བ་སྙིང་གི་ཐིག་པའི་དབང་ཁྲིད་ལུང་མན་ངག་ཞལ་གདམས་དང་བཅས་པ། ཡིད་བཞིན་རིན་པོ་ཆེའི་མཛོད་ཀྱི་ཁྲིད། རྫོགས་པ་ཆེན་པོ་སེམས་ཉིད་ངལ་བསོ། སྒྱུ་མ་ངལ་བསོ། བསམ་གཏན་ངལ་བསོ་སྟེ་ངལ་བསོ་སྐོར་གསུམ་གྱི་ཁྲིད། རིགས་འཛིན་ཆེན་པོ་རཏྣ་གླིང་པའི་གུ་རུའི་གསང་ཁྲིད་རིམ་ལྔ་ཞེས་བྱ་བ་ཁྲིད་ཆེན་ལྔ་ཡོངས་རྫོགས་ཉམས་ཁྲིད་དུ་ཐོབ་ཅིང་མཚུངས་མེད་རིན་པོ་ཆེས་ཐུགས་རྗེས་བཟུང་བས་ཀ་དག་གི་ཡེ་ཤེས་རང་ཞལ་མཇལ་ཏེ་འཁོར་བ་དོང་སྤྲུགས། སྲིད་པ་ཕྱིར་བསྙིལ། བག་ཆགས་དྲུང་ཕྱུངས། ཀུན་བཟང་འཁོར་ལོ་ཚོགས་ཆེན་གྱི་གོ་འཕང་ལ་བཀོད་དོ། མཆོག་གི་སྤྲུལ་སྐུ་རྡོ་རྗེ་བྲག་པའི་སྐུ་གཞོགས་ནས་རིགས་འཛིན་ཆེན་པོ་རྒོད་ཀྱི་ལྡེམ་འཕྲུའི་གཏེར་ཁའི་ཐུགས་རྗེ་ཆེན་པོ། རྡོ་རྗེ་ཕག་མོ་རྒོད་ལྡེམ་པའི་གཏེར་མ། དུམ་པ་རྒྱ་ཞང་ཁྲོམ་ཆེན་པོའི་གཏེར་མ་འཇམ་དཔལ་གཤིན་རྗེ་ཚེ་བདག་ནག་པོའི་དབང་ལུང་དང་བཅས་པ་ཐོབ། པད་གླིང་གསུམ་པ་ཞབས་དྲུང་གསུང་སྤྲུལ་རིན་པོ་ཆེའི་སྐུ་གཞོགས་ནས་རིགས་འཛིན་པདྨ་གླིང་པའི་ཚེ་སྒྲུབ་རྡོ་རྗེ་འོད་ཀྱི་འཕྲེང་བའི་དབང་ལུང་ཐོབ། ཞབས་དྲུང་བསྟན་འཛིན་འགྱུར་མེད་རྡོ་རྗེའི་སྐུ་གཞོག་ནས་འདུས་པ་མདོ་དབང་ཆེན་མོ་དཀྱིལ་འཁོར་བརྒྱ་དྲུག་ཅུ་པའི་དབང་མོ་ཆེ་ཡོངས་རྫོགས། ཐམས་ཅད་མཁྱེན་པ་ཀློང་རམ་སྨྲ་བའི་སེངྒེའི་ཞབས་ཀྱིས་མཛད་པའི་བསྟན་བཅོས་ཡིད་བཞིན་རིན་པོ་ཆེའི་མཛོད། གྲུབ་མཐའ་རིན་པོ་ཆེའི་མཛོད། ཐེག་མཆོག་རིན་པོ་ཆེའི་མཛོད། གནས་ལུགས་རིན་པོ་ཆེའི་མཛོད། ཆོས་དབྱིངས་རིན་པོ་ཆེའི་མཛོད། ཚིག་དོན་རིན་པོ་ཆེའི་མཛོད། མན་ངག་རིན་པོ་ཆེའི་མཛོད་དང་བཅས་པའི་གདམ་པ་མཐའ་རྒྱས་ཐོབ། གདན་ས་ཆེན་པོ་སྨྲ་བོ་ལྕོག་ཏུ་མངའ་བདག་ཉང་ཉི་མ་འོད་ཟེར་གྱི་གདུང་རབས་བཅོ་ལྔ་པ་མངའ་བདག་ཆོས་ཀྱི་དབང་པོའི་ཞབས་དྲུང་ནས། བཀའ་བརྒྱད་བདེ་གཤེགས་འདུས་པ་པུ་ཏི་བཅུ་གཉིས། དབང་སྒྲུབ་ཆེན་དང་འབྲེལ་བ་གཅིག །སྨན་སྒྲུབ་དང་འབྲེལ་བ་གཅིག་དང་ཚར་གཉིས། གཏེར་མགོན་ཕྱག་བཞི་པ་ཐུགས་རྗེ་ཁྲོས་མ་ནག་མོ། ཉང་རལ་པའི་རྣམ་ཐར་གཏེར་འབྱུང་རྣམས་ཀྱི་དབང་ལུང་ཡོངས་རྫོགས་ཐོབ། ལྷོ་བྲག་མཁར་ཆུར་སྒམ་པོ་སྤྲུལ་སྐུ་ལ་རོ་སྙོམས་རྒྱ་གཞུང་ཞུས། རིགས་འཛིན་གུ་རུ་ཆོས་དབང་གི་གདུང་བརྒྱུད་དཔལ་འབྱོར་རྒྱ་མཚོ་ལ། བཀའ་རྫོགས་པ་ཆེན་པོ་སངས་རྒྱས་མཉམ་སྦྱོར། ཐུགས་རྗེ་ཆེན་པོ་ཡང་སྙིང་འདུས་པ། ཐུགས་རྗེ་ཆེན་པོ་འཁོར་བ་དོང་སྤྲུགས། ཐུགས་སྒྲུབ་གསང་བ་འདུས་པ། བཀའ་བརྒྱད་གསང་བ་ཡོངས་རྫོགས་ཀྱི་ལུང་ཕལ་མོ་ཆེ་རྣམས་ཐོབ། རས་ཆུང་སྤྲུལ་སྐུ་ལ་ལུང་འབྲེལ་ཕྲན་བུ་ཐོབ། འཕྱོང་རྒྱས་དཔལ་རི་སྤྲུལ་སྐུ་ལ་བླ་མ་དགོངས་པ་འདུས་པའི་དབང་གི་སྐོར་ཡོངས་རྫོགས། པདྨ་བཀའི་ཐང་ཡིག་སྡེ་ལྔའི་ལུང་རྣམས་ཐོབ། དྭགས་པོ་སྤྲུལ་སྐུ་ལ། དྭགས་པོ་བཀའ་འབུམ་གྱི་ལུང་དང་། ཞབས་དྲུང་རྒྱལ་སྲས་ལས་གསོ་རིགས་རྒྱུད་བཞི་ཐོབ། མཁས་གྲུབ་བྱ་བྲལ་ཆོས་རྗེའི་གདུང་བརྒྱུད་ལྷ་ཡུལ་བླ་མ་རིགས་འཛིན་ལ་མཁའ་འགྲོ་སྙིང་ཐིག་དང་གསང་བ་སྙིང་ཐིག་གི་བསྡུས་དོན་ཤིན་ཏུ་ཟབ་པའི་སྙིང་པོ་ཀུན་མཁྱེན་ཀློང་རམ་ཞབས་ཀྱིས་མཛད་པའི་ཟབ་ཁྲིད་རིན་ཆེན་གསེར་འཕྲེང་དང་རིན་ཆེན་གསེར་སྐྱེད་ཀྱི་ལུང་ཐོབ། གཉགས་ཆེན་ཛྙཱ་ནའི་གདུང་བརྒྱུད་ཆོས་རྗེ་བྲེས་པ་ནས། བཀའ་རྫོགས་པ་ཆེན་པོ་ཡང་གསང་བླ་ན་མེད་པ་ཟབ་མོ་སྙིང་ཐིག་གི་དབང་ལུང་ཡོངས་རྫོགས་སུ་ཐོབ། རྣམ་འབྱོར་པ་ཉི་ཟླ་ཀློང་གསལ་ལ་རིགས་འཛིན་བསྟན་གཉིས་གླིང་པའི་གཏེར་ཁའི་ཟབ་རྒྱ། གཏེར་སྟོན་དྲི་མེད་ལྷུན་པོའི་གཏེར་ཁའི་དོན་ཐིག་འགྲོ་བ་ཀུན་གྲོལ་གཉིས་ཀྱི་དབང་ལུང་ཐོབ། མངའ་རིས་འོད་གསལ་མཆོག་གི་སྤྲུལ་སྐུ་ལས་རིགས་འཛིན་གུ་རུ་ཆོས་དབང་གི་གཏེར་མའི་གུ་རུ་དྲག་པོ། ཕུར་པ། བདུད་འཇོམས་རྡོ་རྗེའི་ཞབས་ཀྱི་གཏེར་ཁའི་ཐུགས་རྗེ་ཆེན་པོ་འཁོར་བ་དབྱིངས་སྒྲོལ་རྣམས་ཐོབ། ཁྲི་རྡོ་ཆོས་རྗེ་བློ་བཟང་ལེགས་པ་ལ་ཡི་དམ་རྡོ་རྗེ་འཇིགས་བྱེད་ཀྱི་དབང་ལུང་དབུ་མ་རྩ་བ་ཤེས་རབ། པཎ་ཆེན་བཀའ་འབུམ་ཕལ་ཆེར་དང་དགེ་ལུགས་ཀྱི་ཟ་ཆོས་སྐོར་རྣམས་ཞུས། སོག་ཟམ་ཁའི་མཁན་པོ་ལ་ནག་པོ་སྐོར་གསུམ་བླ་མ་མཆོད་པ་ཐོབ། ཀརྨ་ཤེས་རབ་མགོན་པོ་ལ་ཕྱག་ཆེན་དང་། ཆོས་དྲུག་ཀུན་རིགས། ཆོས་སྤྱོད་རབ་གསལ་རྣམས་ཀྱི་དབང་ལུང་ཐོབ། གྲུབ་ཆེན་ཀརྨ་མཁས་མཆོག་ལ་ཀར་ལུགས་ཀྱི་ཕག་མོ་ཞུ། ཚང་སར་ཆོས་རྗེ་ལ་གཟུངས་འདུས་ཐོབ། རྒྱལ་རོང་བསྟན་པ་རྒྱལ་མཚན་ལ། གཡུང་དྲུང་བོན་གྱི་ཐེག་པ་སྙན་བརྒྱུད་བོད་ཡུལ་མའི་ཁྲིད་ལུང་དྲན་པ་ཡབ་སྲས་ཀྱི་ཚེ་སྒྲུབ་དང་བཅས་པ་ཞུས། གུ་རུ་བསྟན་གཉིས་གླིང་པའི་གདུང་བརྒྱུད་ཆོས་རྗེ་བདུད་འདུལ་ལ་ལྟ་བ་སངས་རྒྱས་དགོངས་པ་འདུས་པ། རྫོགས་ཆེན་ཕུང་པོ་ཟག་མེད། ཕྱག་ཆེན་མ་རིག་མུན་སེལ། གཅོད་ཡུལ་ཤེས་རབ་རལ་གྲི། བླ་མ་བྱིན་རླབས་ཀུན་འདུས། ཚེ་སྒྲུབ་སྲོག་འཛིན་ཀུན་འདུས། འོད་གསལ་ཐིག་ལེ་ཉག་གཅིག་ཡང་ཏིག་ཡེ་ཤེས་མཐོང་གྲོལ། རྡོ་རྗེ་ཕག་མོའི་ཟབ་རྒྱ། བོན་གསེར་གྱི་ཡང་ཞུན། རྣམ་སྲས་ནོར་བདག་ཀུན་འདུས་ལ་སོགས་པ་དེ་རྣམས་ཀྱི་དབང་ལུང་ཡོངས་སུ་རྫོགས་པ་ཐོབ། ཨོ་རྒྱན་ཆེན་པོའི་སྒྲུབ་གནས་སྲིན་བྲག་དམར་པོ་ལ་རྗེ་བཙུན་གྱིས་ལིང་ང་བྲག་དམར་དུ་མིང་གཏགས་པའི་གནས་མཆོག་དམ་པ་དེར། ཆོས་རྗེ་རྒྱལ་ཐང་པ་ངག་དབང་ཟིལ་ནོན་རྡོ་རྗེ་ལ། རིགས་འཛིན་ཆེན་པོ་རྒོད་ཀྱི་ལྡེམ་འཕྲུའི་གཏེར་ཁའི་བཀའ་རྫོགས་པ་ཆེན་པོ་དགོངས་པ་ཟང་ཐལ། ཐུགས་སྒྲུབ་རྣམ་གསུམ་ཡོངས་རྫོགས། ཀུན་སྐྱོང་གླིང་པའི་གཏེར་མ་རྡོར་སེམས་སྙིང་ཐིག །མ་གཅིག་རྒྱལ་ཐང་ལུགས་དང་བཅས་པའི་དབང་ལུང་ཡོངས་སུ་རྫོགས་པ་ཐོབ། རིགས་འཛིན་ཆེན་པོ་གར་དབང་རྡོ་རྗེ་རྩལ་གྱི་ཞབས་དྲུང་ནས། རྗེ་ཉིད་ཀྱི་གཏེར་ཁའི་བཀའ་རྫོགས་པ་ཆེན་པོ་རྡོར་སེམས་ཐུགས་ཀྱི་མེ་ལོང་། པདྨའི་སྙན་བརྒྱུད་ཡང་གསང་བླ་མེད། ཐུགས་རྗེ་ཆེན་པོ་རྩ་གསུམ་སྙིང་ཐིག་རྣམས་ཀྱི་དབང་ཡོངས་རྫོགས་སུ་ཐོབ། སྐད་གཉིས་སྨྲ་བའི་ལོ་ཙཱ་བ་ཆེན་པོ་འཇམ་དབྱངས་བློ་ལྡན་ལ་རིགས་འཛིན་ཆེན་པོ་པདྨ་གར་དབང་འགྱུར་མེད་རྡོ་རྗེ་འམ་གཏེར་བདག་གླིང་པའི་རིགས་འཛིན་ཐུགས་ཐིག་གཤིན་རྗེ་གཤེད་དྲེགས་པ་འཇོམས་བྱེད། གུ་རུ་དྲག་པོ་རྡོར་སེམས་ཐུགས་ཀྱི་སྒྲུབ་པ། ཨ་ཏི་ཟབ་དོན་སྙིང་པོ། མ་མོ་སྔགས་ཀྱི་སྲུང་མ་རྣམས་ཀྱི་སྐོར་དང་། སྒྲུབ་ཐབས་རྒྱ་མཚོ་རྗེས་གནང་བརྒྱ་དང་ཉེར་བདུན། རྒྱ་གཞུང་ཉིས་བརྒྱ་ཞེ་གཉིས་མ་ལུས་པ་ནམ་མཁའ་དཔལ་བཟང་གི་བོད་ཡིག་དང་བཅས་པ། དྲེགས་འདུལ་གྱི་དབང་། ཕུར་པ་ཡང་གསང་བླ་མེད། དཔལ་ལྡན་ས་སྐྱ་པའི་གཉན་མགོན་ཞལ་བཞི་པའི་སྐོར་ཡོངས་རྫོགས། སྤྲུལ་སྐུ་པདྨ་གླིང་པའི་དྲག་དམར། སྨྱུང་གནས་དཔལ་མོ་ལུགས་དང་བཅས་པའི་དབང་ལུང་ཡོངས་རྫོགས་ཐོབ། རིགས་འཛིན་ཆེན་པོ་བདུད་འདུལ་རྡོ་རྗེ་ལ། ཉིད་ཀྱི་གཏེར་ཁའི་ཚེ་སྒྲུབ་དང་། རི་ཁྲོད་ལོ་མ་ཅན་གྱི་དབང་ཐོབ། མཚུངས་མེད་ཀརྨ་ཆགས་མེད་ལ་ཐུགས་རྗེ་ཆེན་པོ་གསང་བ་འདུས་པ་སོགས་ཀྱི་དབང་ལུང་ཕྲན་བུ་མང་ཞིག་ཐོབ། ཁུ་བོ་བླ་མ་ཀརྨ་དོན་འགྲུབ་ལ། འབྲུག་ལུགས་ཀྱི་ཟ་ཆོས་སྐོར་གྱི་དབང་ལུང་རྣམས་ཐོབ། བླ་མ་ཀརྨ་ཡང་དག་ལ་ཀར་ལུགས་ཀྱི་ཕག་མོ་ལ་སོགས་པའི་དབང་ལུང་ཕྲན་ཚོགས་སྣ་མང་དུ་ཐོབ། ༧ རྗེ་ཐམས་ཅད་མཁྱེན་པ་ངག་དབང་བློ་བཟང་རྒྱ་མཚོའི་ཞབས་དྲུང་ནས། གཤིན་རྗེ་ཚེ་བདག་ལྕགས་སྡིག་གི་གཏོར་དབང་དང་དཔེ་བུམ་གྱི་བཀའ་གཏད་རྣམས་ཐོབ། རིགས་འཛིན་པདྨ་གླིང་པའི་གདུང་བརྒྱུད་ལས། གུ་རུ་དྲག་པོ་འགྲོ་འདུལ། ཕུར་སྒྲུབ་སྲོག་གི་སྤུ་གྲི། བཀའ་བརྒྱད་ཐུགས་ཀྱི་མེ་ལོང་། བཀའ་རྫོགས་པ་ཆེན་པོ་ཀུན་བཟང་དགོངས་པ་ཀུན་འདུས། བཀའ་རྫོགས་པ་ཆེན་པོ་རྒྱུད་བུ་ཆུང་། བདུད་རྩི་སྨན་གྱི་སྒྲོམ་ཆེན། ཞི་ཁྲོ་དམ་པ་རིགས་བརྒྱའི་སྒྲུབ་ཐབས་མན་ངག། རིགས་འཛིན་ཀརྨ་གླིང་པའི་གཏེར་མ་དང་བཅས་པའི་དབང་ལུང་ཡོངས་རྫོགས་སུ་ཐོབ། ཚེར་གསེབ་སྐུ་སྐྱེ་བློ་བཟང་ཆོས་རྒྱལ་ལ་དཔལ་གསང་བ་འདུས་པའི་རྒྱུད་དང་བཅས་པའི་དབང་ལུང་ཐོབ། དེ་རྣམས་བླ་མ་བསྟེན་པ་དང་སྨིན་གྲོལ་གྱི་གདམས་པ་ཐོབ་པའི་རྣམ་ཐར་ཡིན། ཆོས་འཁོར་ལྷ་ས། ཡེར་པ་ལྷ་རི་སྙིང་པོ། དུར་ཁྲོད་ཀླུ་མོ་རྒྱལ། རྭ་སྒྲེངས། སྟག་ལུང། སེ་ར། འབྲས་སྤུངས། བསམ་ཡས། འཆིམས་ཕུ། ཡང་རྫོང་། སྤང་གཤོང་ཧེ་རུ་ཀ། རྡོ་རྗེ་བྲག པོ་ཏ་ལ། ལྕགས་པོ་རི། ཟངས་ཡག་བྲག འུ་ཤང་རྡོ། གདན་ས་མཐིལ། ཟངས་རི་མཁར་དམར། གཡོ་རུ་ཁྲ་འབྲུག པདྨ་ཤེལ་བྲག ཤམ་པོ་གངས། སྟིས་བརྐོས་ཕུག རས་ཆུང་ཕུག ཚེ་ཆུ་འབུམ་པ། གུང་ཐང་འབུམ་མོ་ཆེ། རྟག་སྤྱན་འབུམ་པ། གཉལ་རྡོ་རྗེ་གདན། བྱར་ཇོ་བོ་དཔྲལ་དཀར། གཉལ་སྨད་དགེ་རི་བྲག ལོ་རོ་དཀར་པོ་དོན་ལྡན། གནས་ཆེན་རྩྭ་རི། དྭགས་ལྷ་སྒམ་པོ། རྒྱལ་གྱི་མེ་ཏོག་ཐང། ཉང་པོ་བྷ་ག་ལྷ་ཆུ། ཉང་པོ་གྲབ་ཀྱི་གཙུག་ལག ཉང་འབུམ་མདའ་རྫོང་། མཆིམ་གད་པ་རྒྱ་བོ། གླིང་མདའ་བྱེ་མའི་མཆོད་རྟེན། མཆིམ་མ་ར་ཏི་ཀ ཀོང་སྒྲོལ་མ་ལ་ཁ། ཀོང་ཨོ་རྒྱན་གངས་ཕུག ཀོང་ཨོ་རྒྱན་དབང་ཕུག ཀོང་ང་ལ་སྒྲུབ་ཕུག དྭགས་གོང་ལའི་ལྷ་ཁང་། དྭགས་བཤད་སྒྲུབ་གླིང་། ཨེ་གོང་པོ་དང་། བྲག་སྣ། ལྷོ་བྲག་སྨྲ་བོ་ལྕོག། གདན་ས་ལྷ་བྲོ་རྣམ་རྒྱལ་ཁང་བཟང་། ལྷོ་བྲག་མཁར་ཆུ། ཚེ་ལམ་དཔལ་རི། ལྷ་མོ་མཁར། ལྕགས་ཕུར་ཅན། གྲོ་བོ་ལུང་། གསས་འཁར་དགུ་ཐོག རྙ་རྙ་ཕུག སྒྲུབ་མཚོ་པདྨ་གླིང་། བསམ་འགྲུབ་བདེ་བ་ཆེན་པོའི་ཕོ་བྲང་། སྦས་ལུང་སྐྱིད་མོ་ལུང་། ཀ་མ་རུ་པ། ཤ་འུག་ལྟག་སྒོ། དོམ་ཚང་རོང། གཟིག་ཚང་རོང། འབུམ་མདའ་བྷི་དྷི། ལྷ་རྗེ་བྲག བྱ་ཕོ་ཟེ་བ། ཁ་ཤ་སྨྱུག་རི། ཉང་ཞུར་མ། རྒྱ་གར་རྩྭ་མཆོག་དྲུང་། བྱ་རྒོད་སྤུངས་རི། ནཻ་རཉྫ་ར། ལུམྦི་ནགས་ཀྱི་ཚལ། ཡངས་པ་ཅན། རྒྱལ་པོའི་ཁབ། ལ་ཕྱི་ཆུ་བར། དིང་རི་གླ་སྐོར། ཟབ་བུ་ལུང་། གནམ་མཚོ་ཕྱུག་མོ། དཔལ་ལྡན་ས་སྐྱ། གྲོམ་པ་རྒྱང་གི་ལྷ་ཁང ། མཁོ་མཐིང་ལྷ་ཁང། དཀར་ཆུ་ལྷ་ཁང་། སྐྱེར་ཆུ་ལྷ་ཁང་། སྙེ་ནམ་གྲོད་ཕུག དང་ར་གཡུ་མཚོ། སྟར་སྒོ་གངས། དཔལ་མོ་དཔལ་ཐང་། ལྷ་མཚོ་སྲིན་མཚོ། གཙང་སྟོད་བྱེ་མ་གཡུང་དྲུང་། གངས་རིའི་རྒྱལ་པོ་ཏེ་སེ། མ་ཕམ་གཡུ་མཚོ། གྲི་གུག་མཚོ་མོ་ཆེ། རི་བོ་འབིག་བྱེད། ཆུ་བོ་གང་གཱ། ཀྲེ་ཏ་པུ་རི། ཁ་ཆར་ཇོ་བོ། མང་ཡུལ་གྱི་རི་བོ་དཔལ་འབར། རག་མ་བྱང་ཆུབ་རྫོང་། རོང་གི་འོད་གསལ་ཕུག རྩ་ཡི་རྐང་གཙུག་ཕུག ལིང་ང་བྲག་དམར། མང་ཡུལ་བྱམས་སྤྲིན། ནགས་ཚལ་ཤེལ་ཕུག །གུ་རུ་མཇལ་ཕུག །འཕྲང་ས་ལ་ཧ་རི། ཡུལ་ཚ་བའི་ཚ་ཤོད། རི་བོ་གླང་རུ། མཆོད་རྟེན་གོ་མ་ས་ལ་གནྡྷ། དུར་ཁྲོད་ལྷུན་གྲུབ་བརྩེགས་པ། ཕག་མོ་མཁའ་སྤྱོད་མ། སངས་རྒྱས་འཁོར་བ་འཇིག་གི་སྐུ་གདུང་མཆོད་རྟེན། སངས་རྒྱས་ཕྱོགས་ཀྱི་གླང་པོའི་སྐུ་གདུང་མཆོད་རྟེན། སྟག་མོ་ལུས་སྦྱིན། གྲུབ་ཆེན་བརྒྱད་ཅུའི་ཚོགས་ཁང་། བལ་ཡུལ་ཨེའི་གཙུག་ལག །མཆོད་རྟེན་བྱ་རུང་ཁ་ཤོར། འཕགས་པ་ཀླུ་སྒྲུབ་སྙིང་པོས་ཀླུ་ཡུལ་ནས་གདན་དྲངས་པའི་འབུམ། ཡང་ལེ་ཤོད་ཀྱི་བྲག་ཕུག ཨ་སུ་རའི་བྲག་ཕུག རྒྱ་གར་གླང་པོ་སྒང་ལ་སོགས་པའི་གནས་རྣམས་མཇལ། ཁས་ཉེན་པའི་སྡུག་བསྔལ་དུད་འགྲོ་ལྟ་བུ། ཚ་གྲང་དམྱལ་བ་ལྟ་བུ། བཀྲེས་སྐོམ་ཡི་དྭགས་ལྟ་བུ། དོན་ཡོད་ཙམ་མེད་ཙམ་ལ་ཕྲག་དོག་ལྷ་མ་ཡིན་ལྟ་བུ། སྐྱེ་རྒས་ན་འཆི་ལ་འཇིགས་པ་མི་ལྟ་བུ། གནས་རྟེན་འཇལ་ནས་སྨོན་ལམ་བཟང་པོའི་འབྲེལ་བ་ཐོག་དུས་ལྷ་ལྟ་བུ་སྟེ་མདོར་ན་རིགས་དྲུག་གི་ཁམས་ལུས་འདིའི་སྟེང་ནས་སྤྱད་པས། ཕྱིན་ཆད་འཁོར་བ་ལ་རང་དབང་མེད་པར་མི་འཁྲུལ་ལམ་སྙམ་ཡོད། དེ་དག་གནས་རྟེན་མཇལ་བའི་རྣམས་ཐར་རོ། །ཁམས་རི་བོ་ཆེའི་དྲེའུ་སྐེ་ན་རིགས་འཛིན་གཏེར་བཞད་སྙིང་པོའི་རྡོ་རྗེ་གྲོ་ལོད་སྒྲུབ་པའི་བདུན་མཚམས། རྩྭ་རི་ཏྲ་ན་ལོ་གསུམ། ཁམས་སྲིང་མོ་རྫོང་ལ་ལོ་བརྒྱད། རྒོད་ཚང་གུ་རུ་ཕུག་ལ་ལོ་གཅིག །གཞན་གྱི་གནས་རྣམས་སུ་ཟླ་སྒྲུབ་བདུན་སྒྲུབ་བྱས་པ་མང་ཞིག་ཡོད་པ་རྣམས་མཚམས་སྒྲུབས་བྱས་པའི་རྣམ་ཐར་ཡིན། རིགས་འཛིན་ཆེན་པོ་རཏྣ་གླིང་པའི་བླ་མ་སྐུ་གསུམ་གྱི་སྒྲུབ་ཐབས། མངའ་བདག་ཉང་རལ་པའི་རྟ་ནག་ལྕགས་རལ་ཅན་རིགས་འཛིན་འཇའ་ཚོན་སྙིང་པོའི་དཀོན་མཆོག་སྤྱི་འདུས། རིགས་འཛིན་བདུད་འདུལ་རྡོ་རྗེའི་པདྨ་འོད་འབར། བདེ་མཆོག་ཐུགས་རྗེ་ཆེན་པོ། ཚེ་སྒྲུབ། དྲག་ཁྲོས། གསང་འདུས། ཟབ་ཏིག་རྣམས་ལ་བསྙེན་པ་རྟགས་ཐོན་རེ་བསྐྱལ་བ་བསྙེན་སྒྲུབ་བྱས་པའི་རྣམ་ཐར་ཡིན། སྣང་སྲིད་ཀྱི་ཆོས་ལ་བདེན་མེད་སྒྱུ་མ་ལྟ་བུའི་ཉམས་དང་། དག་པའི་ལྷ་ཞལ་འགའ་རེ་མཇལ་བ་སྣང་སེམས་འདྲེས་པའི་ཕྱི་རྟགས་ཕྲན་ཚེགས་རྣམས་བྱུང་བ་དྲོད་ཅུང་ཟད་ཐོབ་པའི་རྣམ་ཐར་ཡིན། །བླ་མ་ལ་སྤོང་དག་ལན་བཞི། བསམ་ཡས་ཀྱི་ཞིག་བསོས། ཁམས་སྲིང་མོ་རྫོང་གི་ཕོ་བྲང་གཡུ་མཚོའི་ཁ་ན་ཀེའུ་ཚང་ཁྲ་མོ་མཚན་བརྒྱད་ལྷ་ཁང་། སྲིང་མོ་རྫོང་སྲིན་ཐོད་སྔགས་པ་གླིང་གི་ལྷ་ཁང་། གུ་རུའི་སྐུ་རྟེན་ཀརྨ་བདུད་འདུལ། ཕུག་ནག་བདེ་བ་ཆེན་པོར་གུ་རུ་མཚོ་སྐྱེས་རྡོ་རྗེ། ཕག་མོ་རིགས་ལྔ། ཆགས་རུ་བདེ་མཆོག་ཕོ་བྲང་། ཤར་སྟག་མོ་སྒང་བསྐལ་བཟང་ཕུན་ཚོགས་གླིང་གི་ལྷ་ཁང་། ཀ་བ་བརྒྱད་ཅུའི་ལྡེབས་འབུར་བརྒྱ་དང་བརྒྱད་ཅུའི་འདུས་སྡེ། བཀའ་འགྱུར་རོ་ཅོག་ཚར་གསུམ་སོགས་ལྷ་འབྲི་རྟེན་བཞེངས་ཕྲན་ཚེགས་གང་འགྲུབ། ཡར་མཆོད་མར་སྦྱིན་གྱི་བསམ་པ་དང་ལེན་ལས་རང་བརྣོག་གི་ཕུག་ཟོག་གཙོ་བོར་མ་གཏོན་དཀོར་ཟོས་པའི་རྣམ་ཐར་ཡིན། མི་དབང་བསྟན་པའི་བདག་པོས་ཨོ་རྒྱན་ཆེན་པོའི་ལུང་བསྟན་དུས་བབ་ལྟར། བོད་ཁམས་ཀྱི་བདེ་ལེགས་བསྐྲུན་པའི་ཕྱིར་སའི་གནད་གཟེར་བསོས་ཞེས་བཀའི་བསྐུལ་བས། གནས་མཆོག་ཁམས་སྲིང་མོ་རྫོང་གི་རིགས་གསུམ་མགོན་པོའི་ལྷ། མཆོད་རྟེན། སོག་མེ་འབར་ཐང་གི་མཆོད་རྟེན། སོག་རོང་ནག་འབལ་མཆོད་རྟ ེན། བོང་གི་མཆོད་རྟེན་དཀར་པོ། བོང་གི་མཆོད་དམར་པོ། ནགས་ཤོད་གསེར་ཁུངས་མཆོད་རྟེན། གིལ་དག་མཆོད་རྟེན། སྦ་མཆེད་མཆོད་རྟེན། སྦུད་མདའི་མཆོད་རྟེན། སྙག་མདའི་མཆོད་རྟེན། རེ་བ་ཐང་གི་མཆོད་རྟེན། ཐང་མགོའི་མཆོད་རྟེན། ཤགས་གད་པོའི་མཆོད་རྟེན། རྔོག་རྩེའི་མཆོད་རྟེན། འབྲིང་རྒྱུད་མཆོད་རྟེན། རྗེ་རོག་མཆོད་རྟེན། ཟླ་ཕུའི་མཆོད་རྟེན། རེ་ཤོད་ཀྱི་མཆོད་རྟེན། རེ་རྔུ་སུམ་མདོའི་མཆོད་རྟེན། ལྕམ་མདའི་མཆོད་རྟེན། རྒྱལ་ཤོད་བན་སྒར་མཆོད་རྟེན། ཡ་ང་བྱ་མདའི་མཆོད་རྟེན། འབྲོང་ཐང་མཆོད་རྟེན། རྒྱལ་རྔུ་སུམ་མདོའི་མཆོད་རྟེན། ས་ཤོད་མཆོད་རྟེན། འབིས་ཡུལ་མཆོད་རྟེན། ཐུལ་འདབ་མཆོད་རྟེན། ལྷོ་བདེ་སྟེང་མཆོད་རྟེན། སྨེ་རྔུ་སུམ་མདོའི་མཆོད་རྟེན། སྒོ་ཁྲི་ཐང་གི་མཆོད་རྟེན། གསུ་ར་ལམ་གཤིས་ཀྱི་མཆོད་རྟེན། རྟ་མདའ་ལྷ་ཁང་གི་མཆོད་རྟེན། སྨེ་ཤོད་མཆོད་རྟེན། ས་ཤོད་ལྷ་རྩེ་མཆོད་རྟེན། གླ་རོང་ལྷ་ཁང་མཆོད་རྟེན། གཟེ་མདའི་ལྷ་ཁང་མཆོད་རྟེན། གཞོག་གཡས་ཐང་གི་ལྷ་ཁང་མཆོད་རྟེན། རག་ཡུལ་ལྷ་ཁང་མཆོད་རྟེན། གསུ་རྔུ་སུམ་མདོའི་མཆོད་རྟེན། གཤེ་མདོའི་མཆོད་རྟེན། མཆོད་རྟེན་ཉག་གི་མཆོད་རྟེན། ཁྱུང་པོ་གསེར་ཡིས་སུམ་མདོའི་མཆོད་རྟེན། རྡོ་བ་བཤར་རྩའི་མཆོད་རྟེན། ཚང་སར་རྟ་རྒྱུགས་ཐང་གི་མཆོད་རྟེན། ལ་གོང་མཆོད་རྟེན་སྣའི་མཆོད་རྟེན། རྫ་སྙིང་ཐང་གི་མཆོད་རྟེན། ངད་ཐང་ལྷ་ཁང་ཐང་གི་མཆོད་རྟེན། གླིང་རྡོ་རྗེ་ལའི་མཆོད་རྟེན་དཀར་པོ། ཁམས་གླང་ཐང་སྒྲོལ་མའི་ལྷ་ཁང་བདུད་འདུལ་མཆོད་རྟེན། མཆོད་རྟེན་བཀྲ་ཤིས་སྒོ་མང་། མདོ་ཁམས་མཆོད་རྟེན་དཀར་པོ། མཆོད་རྟེན་མཐོང་གྲོལ། བསྐལ་བཟང་ལྷ་ཁང་རྣམས་བོད་ཁམས་བདེ་བའི་ཕྱིར་མཐའ་འདུལ་ཡང་འདུལ་གྱི་ལྷ་ཁང་མཆོད་རྟེན་ཞིག་གསོས་དང་སའི་གནད་གཟེར་བསྡམས་པའི་རྣམས་ཐར་ཡིན། རིགས་འཛིན་ཆེན་པོ་གར་དབང་རྡོ་རྗེ། རྗེ་དྲུང་ཟིལ་ནོན་རྡོ་རྗེ། འཇམ་དབྱངས་ཆོས་རྒྱལ་རྡོ་རྗེ། འོད་གསལ་མཆོག་གི་སྤྲུལ་སྐུ། ཞབས་དྲུང་པདྨ་གར་དབང། ཨོ་རྒྱན་ཆོས་རྒྱལ་རྡོ་རྗེ། ལོ་ཆེན་འཇམ་དབྱངས་བློ་ལྡན། མཆོག་སྤྲུལ་འགྲུ་ལ་སྤྲུལ་སྐུ། གྲུབ་ཆེན་ཉི་ཟླ་ཀློང་གསལ། ཆོས་རྗེ་བློ་བཟང་ལེགས་པ། བླ་ཆེན་རིན་ཆེན་བཟང་པོ། པད་གླིང་གདུང་བརྒྱུད་མཚུང་མེད་ཨོ་རྒྱན་ཆོས་རྒྱལ། བསྟན་པའི་རྩ་ལག་སྐྱེས་མཆོག་སྡེ་དགེ་སངས་རྒྱས་བསྟན་པ། ཤར་མེ་ཉག་རི་ཁུག་དགོན་གྱི་མཁན་ཆེན་ཤཱཀྱ་འོད་ཟེར། ཆོས་གཏེར་གླིང་པ་པདྨ་འཕྲིན་ལས། རོག་དོམ་མཁན་པོ་ནམ་མཁའ་འོད་གསལ། གྲུབ་པའི་དབང་པོ་བླ་མ་མདོ་ལུ། གསང་སྔགས་འཆང་བ་གཡག་ར་བདུད་འདུལ། མ་བཅོས་ལྷུག་པ་ཨ་འདར་བླ་མ། མཐོང་གྲོལ་བླ་མ་པདྨ་ཚུལ་ཁྲིམས་སྐུ་མཆེད། གྲུབ་པ་མཐར་ཕྱིན་གྲགས་པ་དོན་ལྡན། འཇང་པ་བླ་མ་དར་རྒྱས། དབོན་པོ་ཆོས་ཉིད། ཚང་སར་ཆོས་རྗེ། འཇའ་མོ་སྤྲུལ་སྐུ། འཕོ་ལུང་བྱམས་མེ་སྤྲུལ་སྐུ། རྡོ་ཕྱུག་སྤྲུལ་སྐུ། སྤྱི་བུག་སྤྲུལ་སྐུ། སྟག་ལུང་ཞབས་དྲུང་རིན་པོ་ཆེ་རྣམས་ལ་དབང་ལུང་ཆོས་གསུམ་གྱི་ཞབས་ཏོག་དགྱེས་བསྐང་དུ་བསྒྲུབ་པ། བྱང་ཆུབ་པའི་དགེ་བའི་བཤེས་གཉེན་རྣམ་ལ་ཆོས་ཀྱིས་མཆོད་པའི་རྣམ་ཐར་ཡིན། རང་དང་འབྲེལ་ལྡན་སྣ་ཚོགས་ཀྱིས་མཐུན་འཇུག་ཆོས་ལ་སྤྱོར་ཅི་ཐུབ་ལ། བློ་ལུས་ངག་ཡིད་གསུམ་གཏུད་དེ་འབུང་བ་འཁོར་སྐྱོང་བའི་རྣམ་ཐར་ཡིན། མངའ་རིས། མང་ཡུལ། མོན། ཀོང་པོ། ཉང་པོ། དྭགས་པོ། ཁམས། མེ་ཉག རྫ། གླིང་། འདན། ཁྲི་འདུ། སྡེ་དགེ རེ་ཤོད། དཀར་ཤོད། བོད་སོག ནགས་ཤོད། མདོ་ཁམས་མཆོད་རྟེན། ཧོར་ལ་སོགས་རྣམས་སུ་དབང་ཆོས་ཀྱི་འབྲེལ་པ་བསམ་གྱིས་མི་ཁྱབ་པ་བྱས་པ་འགྲོ་ལ་ཆོས་སྦྱིན་བཏང་བའི་རྣམ་ཐར་ཡིན། མ་ཎི་དུང་བརྒྱ་དང་དྲུག་ཅུ་རེ་གསུམ། ཨ་དཀར་དུང་གཅིག་གིས་གཙོས་པའི་དགེ་སྒྲུབ་སྡིག་སྤང་གི་དམ་བཅའ་དཔག་ཏུ་མེད་པ་གཞན་རྒྱུད་ལ་ཕོག་པ་དགེ་བའི་བསྐུལ་མ་བྱས་པའི་རྣམ་ཐར་ཡིན། གཉེན་བྱམས་དང་སྡང་དགྲ་ལ་སོགས་ལ་སྙིང་ཁམས་ཀྱིས་དགྲ་གཉན་རྩོལ་ཕོད་དུ་མ་བསྣུན་པ། དགྲ་གཉེན་ལ་འདོར་ལེན་མ་བྱས་པའི་རྣམ་ཐར་ཡིན། སངས་རྒྱས་གཉིས་པའི་ཟབ་གཏེར། ཐོས་བསམ་སྒོམ་གསུམ་ཕྲན་ཚེགས་ཅི་ལྡན་གྱིས་རང་བཞིན་ཆེ་དྲེགས་ཀྱི་འདུ་ཤེས་དང་ཕྲལ་བ་དམན་ས་བཟུང་བའི་རྣམ་ཐར་ཡིན། རྩ་བཞི་ཆང་ལྔའི་བསྲུང་སྡོམ་ཤ་ཆང་སྒོག་གསུམ་སྤངས་པ། ཉེ་གནས་བན་ཆུང་བསྟེན་པ་ལ་སོགས་ལ་ཉེར་ལྔ་ཕན་ཆད་བརྩོན་པ་སྡོམ་པ་བསྲུང་བའི་རྣམ་ཐར་ཡིན། དུག་ལྔ་བྱུང་བརྒྱལ་དྲན་ཐང་སྨྱོ་སྤྱོད་དགའ་བཞིའི་དབབ་བཟློག་འཛིན་འདྲེན་བཀྲམ་སོགས་ལ་འབད་པ་བསྲུང་སྡོམ་ཤོར་འདུག་ཀུན་གྱིས་ཟེར་བའི་རྣམ་ཐར་ཡིན། རིག་པ་ཚོགས་ཞུགས་ཀྱི་སྤྱོད་པ་ཕྲན་བུ་རེ་སྤྱད་དེ་དམར་ཐག་བཅད་པ་སྨྱོ་འདུག་ཟེར་བའི་རྣམ་ཐར་ཡིན། མི་གཙང་འབྱུང་འདུས་ཀྱི་གཡར་ཁང་བག་མའི་སྒེག་ཆོས་ལྟར་ཚུལ་འཆོས་ཀྱིས་མ་བྲན་པ་ཟོག་པོ་རེད་ཟེར་བའི་རྣམ་ཐར་ཡིན། ལྕང་ལོ་སྔགས་ཀྱི་ཆས་ཆོས་ལ་སྤྱོད་པ་མི་འདྲ་དགུ་གཟུགས་རེད་ཟེར་བའི་རྣམ་ཐར་ཡིན། ཐོས་བསམ་སྒོམ་གསུམ་ཉན་བཤད་འཛིན་གསུམ་དབུ་ནས་ཞབས་མ་སྡོམ་གྱི་བར་དུ་ཐང་ལྷོད་མེད་པར་འབད་པ་བརྩོན་འགྲུས་བརྩམས་པའི་རྣམ་ཐར་ཡིན། བསམ་ཡས་མཆིམས་ཕུའི་མེ་ཏོག་མཆོད་པའི་དུས། ཨོ་རྒྱན་ཆེན་པོའི་སྐུ་ཆས་བཻ་རོའི་ཕྱག་བཟོའི་ཞལ་འབག་གདུགས་རྒྱལ་མཚན་དཔའ་བོ་མཁའ་འགྲོའི་ཚོགས་དང་བཅས་པས་བརྒྱན་ཅིང་། རྟ་ར་རྒོད་པོ། ནོར་བུ་བཟང་པོ། གང་བ་བཟང་པོ། གནམ་ལྷ་བྱང་ཆུབ། གཟའ་མཆོག་ནམ་མཁའི་སྙིང་པོ། མཁའ་འགྲོ་ཨེ་ཀ་ཙ་ཏི། ཇོ་མོ་གངས་དཀར་ཤ་མེད། མཆིམས་ཕུའི་བྲག་བཙན་རྡོ་རྗེ་དྲག་པོ་རྩལ་དང་བཅས་པས་གཙུག་གིས་མཆོད་ཅིང་རྡོ་རྗེ་སློབ་དཔོན་དུ་གྱུར་པ་དང་། གནས་ཆེན་པོ་རྩྭ་རི་ཏྲའི་ཚོགས་དཔོན་དུ་མངའ་གསོལ་བ་སོགས་ཤུགས་ཀྱིས་རྟེན་འབྲེལ་འགྲིགས་པའི་རྣམ་ཐར་ཡིན།། །།
རྩོམ་སྒྲིག་པ། དོན་འགྲུབ་རྡོ་རྗེ།