མགོན་པོ་དེ་ཉིད་ཀྱི་ཞབས་ཀྱི་པདྨོ་ལ་དུས་ཐམས་ཅད་དུ་ཕྱག་འཚལ་ལོ། ། ཉི་མའི་གཉེན་གྱི་ལྗགས་ཡངས་པདྨོའི་མཚོར། ། ལུང་བསྟན་བུང་བའི་དར་དིར་འབུམ་འཁྲིགས་པས། ། དྲི་ཟའི་འཕང་འགྲོ་ལྟ་བུར་ཁྱོད་བསྔགས་ན། ། བདག་ལྟས་ཅུང་ཞིག་བསྟོད་ལ་ཅི་ཞིག་བལྟོས། ། འོན་ཀྱང་རྙེད་དཀའི་ལུས་འདི་རོ་འཛིན་བཅས། ། སྙིང་པོར་བགྱི་སླད་མགོན་ཁྱོད་ཡོན་ཏན་གྱི། ། རྒྱ་མཚོ་ཆེ་ལས་སྤོབས་པའི་རྔ་ཡབ་རྩེས། ། ཕྲ་མོའི་ཆུ་ཐིགས་བླངས་ཏེ་གར་བགྱིད་དོ། ། མཐའ་དབུས་ཀུན་བྲལ་ཟབ་ཡངས་ཡིད་བཞིན་མཚོར། ། ལྟ་ཟེར་ཕྲེང་བས་སྟུག་པོའི་མུན་གནག་འཇོམས། ། ས་གསུམ་རིན་ཆེན་གཅིག་གྱུར་གདེངས་ཀ་ཅན། ། དཔལ་ལྡན་ཀླུ་ཡི་དབང་པོར་ཕྱག་བགྱིད་དོ། ། གཉིས་མེད་གསུང་བའི་སྒྲོ་ལྡན་གཅིག་གིས་ཀྱང་། ། རྨོངས་པའི་གྲོང་ཁྱེར་སུམ་བརྩེགས་མཐར་མཛད་པས། ། སྲིད་སྒྲུབ་ལྔ་བའི་མཐའ་ལ་བསྙེགས་གྱུར་ཅིང་། ། མདའ་ལྔ་བས་ཀྱང་ལུས་མེད་གནས་སྐབས་བསྟེན། ། མཁར་ཉལ་སར་གཤེགས་བ་ཏའི་གྲོང་ཁྱེར་དུ། རྨུགས་འཛིན་ལ་འཁུ་འབྱོར་བའི་བང་མཛོད་ཅན། ། རིག་བྱེད་གཏེར་གྱུར་གཉིས་སྐྱེས་དབང་པོ་ཡི། ། སྲས་སུ་ལེགས་པར་འཁྲུངས་ལ་ཕྱག་འཚལ་ལོ། ། དེ་ཚེ་མཚན་མཁན་དག་ལ་ལེགས་བསྟན་པས། ། མཚན་བཟང་མན་ངྷ་ར་ཡི་ཕྲེང་རྒྱས་ཀྱང་། ། ཚེ་ཡི་ཚད་ནི་ཞག་བདུན་གཉིས་སྐྱེས་དང་། ། དགེ་སློང་བརྒྱ་ལ་ཆོས་སྟོན་གསོལ་བ་ན། ། ལོ་བདུན་འཚོ་ཞེས་སྨྲས་ལས་ཕ་མ་ཡིས། ། ཉི་མའི་བུ་ཡི་མཆེ་བའི་ཕྲག་ཏུ་ནི། ། ཞུགས་པ་ལྟ་བར་མ་བཟོད་གྲོགས་དང་བཅས། ། སྤྲིངས་ལས་ནཱ་རེན་དྲར་གཤེགས་ཁྱོད་ཕྱག་འཚལ། ། དེར་ནི་ལྷ་བརྒྱའི་གཙུག་ནོར་འོད་ཟེར་དང་། ། རབ་མཛེས་ཐུན་མཚམས་སུ་ཤར་ཟླ་འོད་བཞིན། ། མདའ་བསྣུན་ཞབས་སེན་མཆོག་གི་དངོས་གྲུབ་ནི། ། རྣམ་པ་དང་བཅས་ཁྱོད་ཀྱི་སྤྱི་བོར་ལྷུང་། ། ངུར་སྨྲིག་རྒྱལ་མཚན་གྱིས་ཀླུབས་ཚེ་དཔག་མེད། ། འཆི་བདག་འཇོམས་པའི་དཀྱིལ་འཁོར་དུ་དབང་བསྐུར། ། དུས་ཀྱི་བེ་ཅོན་རི་མོའི་གནས་བཀོད་དེ། ། འཆི་བདག་གཡུལ་ལས་རྒྱལ་ལ་ཕྱག་འཚལ་ལོ། ། སྒྲ་གཅན་འཛིན་ལས་དགེ་སློང་དངོས་པོ་ནི། ། ལེགས་བཞེས་དཔལ་ལྡན་ཐུབ་པའི་མཚན་འཆང་བ། ཐུན་མཚམས་སྤྲིན་ཆགས་འཆི་མེད་རི་བོ་ཡི། ། མཛེས་པ་ཕམ་པར་མཛད་ལ་ཕྱག་འཚལ་ལོ། ། དཔལ་སྟུག་དབྱར་སྐྱེས་མངལ་ལས་ལེགས་ཐོན་པའི། ། མཐའ་མེད་མདོ་དང་རྒྱུད་སྡེའི་ཆུ་ཀླུང་དག ། རྣམ་དཔྱོད་ཧུབ་ཐེངས་གཅིག་གིས་ཞལ་གྱི་སྒོར། ། ལེགས་དྲངས་མཁྱེན་པའི་གཏེར་གྱུར་ཁྱོད་ཕྱག་འཚལ། ། རྒྱལ་དང་རྒྱལ་སྲས་སེམས་མའི་ཚོགས་རྣམས་དང་། ། ཕྱོགས་ཀྱི་མགྱོགས་འགྲོ་མ་ལུས་ལྷན་ཅིག་ཏུ། ། མི་བསྐྱོད་ཞིང་དུ་ཐིམ་ཚེ་མཁའ་ཁྱབ་ཏུ། ། སྒྱུ་འཕྲུལ་དྲ་བའི་རོལ་གར་འཛིན་ལ་འདུད། ། མགོན་ཁྱོད་དབང་བཅུ་བརྙེས་ཀྱང་གསེར་འགྱུར་གྱི། ། རྩི་ཡི་ཟོལ་ལས་ཟླ་བའི་སྤུན་ཟླ་བཞིན། ། འདོད་དགུའི་ཆར་ཕབ་དགེ་འདུན་འདུས་པའི་སྡེ། ། ཕོངས་པའི་དགྲ་ལས་སྲུང་མཛད་ཁྱོད་ཕྱག་འཚལ། ། ཀུན་ཏུ་གཏོང་བ་ཡངས་པའི་ཕྱག་བརྐྱངས་ནས། ། རྫོགས་ལྡན་བཞིན་དུ་འགྲོ་ཀུན་ཚིམ་མཛད་པས། ། སྐྱེངས་པས་སྟོབས་ལྡན་ས་འོག་ཏུ་ཞུགས་ཤིང་། ། ཟླ་བའི་མ་མ་ཀུན་ཏུ་འདར་བ་སྙམ། ། གདེངས་ཅན་འདྲེན་པས་རང་གི་ཕོ་བྲང་དུ། ། སྤྱན་དྲངས་ནོར་བུའི་ཁྲི་ལ་ཞབས་བཀོད་དེ། ། སྐལ་ལྡན་ལྟོ་འགྲོའི་ཚོགས་རྣམས་མ་ལུས་པ། ། ཐེག་མཆོག་བདུད་རྩིས་ཚིམ་མཛད་ཁྱོད་ཕྱག་འཚལ། ། རྒྱལ་བ་ཀུན་ཡུམ་སྟོང་ཕྲག་བརྒྱ་བ་དང་། ། རྡོ་རྗེའི་འཇིམ་པ་མང་པོ་ལེགས་བསྣམས་ཏེ། ། འཛམ་གླིང་མཆོད་རྟེན་བྱེ་བས་མཛེས་བྱས་ཤིང་། ། བགྲང་ཡས་མཁས་ལ་ཆོས་སྟོན་མཛད་ཕྱག་འཚལ། ། རྒྱལ་བའི་གསུང་ལ་དྲང་ངེས་ལེགས་ཕྱེ་ཞིང་། ། ཐུབ་པའི་ཆོས་ཚུལ་ཀུན་གྱི་བླ་མ་མཆོག ། དཔལ་ལྡན་འདུས་པ་ལ་སོགས་བཀའ་ཀུན་གྱི། ། དགོངས་པ་རང་དབང་འགྲེལ་མཛད་ཁྱོད་ཕྱག་འཚལ། ། མདོ་རྒྱུད་དགོངས་པ་འགེལ་བའི་བསྟན་བཅོས་དང་། ། གསོ་རིག་ལ་སོགས་ཐུན་མོང་རིག་གནས་དང་། ། འཇིག་རྟེན་ལུགས་ཀྱི་བསྟན་བཅོས་མང་མཛད་ནས། ། ས་གསུམ་འགྲོ་འདི་སྣང་མཛད་ཁྱོད་ཕྱག་འཚལ། ། རྫུ་འཕྲུལ་རོལ་བས་སྒྲ་མི་སྙན་དུའང་གཤེགས། ། གཞོན་ནུ་བདེ་སྤྱོད་རྒྱལ་པོར་ལུང་བསྟན་ཅིང་། ། བདེ་སོགས་བདག་པོའི་འབྱོར་བས་རྣམ་རྩེན་ཏེ། ། རྡུལ་བྲལ་བཀུར་སྟིས་ཁྱོད་ཞབས་རིང་དུ་མཆོད། ། དྲུག་གིས་བཅིངས་པའི་བརྒྱ་ཕྲག་ལོ་ཚིགས་སུ། ། བསྟན་པ་བསྐྱངས་ནས་ཐུགས་རྗེས་སློང་བ་ལ། ། རང་གི་དབུ་སྩལ་བདེ་བ་ཅན་གྱི་ཞིང་། ། གཤེགས་པའི་ཚུལ་བསྟན་ཁྱོད་ལ་ཕྱག་འཚལ་ལོ། ། རྣམ་ཀུན་མཆོག་ལྡན་འཇའ་ལུས་རྡོ་རྗེའི་སྐུ། ། སྒྲིབ་བྲལ་འོད་གསལ་དབྱིངས་དང་རོ་གཅིག་པ། ། ཁ་སྦྱོར་བདུན་ལྡན་གོ་འཕང་མངོན་མཛད་དེ། ། ཁམས་གསུམ་འགྲོ་བའི་སྐྱབས་གྱུར་ཁྱོད་ཕྱག་འཚལ། ། དེ་ལྟར་མགོན་ཁྱོད་ཡོན་ཏན་རྒྱ་མཚོ་ལས། ། ཆུ་ཐིགས་ཙམ་ཞིག་བརྗོད་པའི་བསོད་ནམས་ཀྱིས། ། བརྒྱ་ཕྲག་དཀའ་བ་སྤྱད་ལ་མ་ལྟོས་པར། ། ཚེ་འདི་ཉིད་ལ་སྐུ་གསུམ་ཐོབ་གྱུར་ཅིག ། མདོ་དང་སྔགས་ཀྱིས་རྒྱལ་བའི་ཆོས་ཚུལ་ཀུན། ། མགོན་པོ་ཁྱོད་ཀྱིས་ཇི་བཞིན་ལེགས་བཀྲལ་བའི། ། དགོངས་དོན་བདེ་བླག་ཉིད་དུ་རྟོགས་གྱུར་ཏེ། ། ཐུབ་བསྟན་ཕྱོགས་དུས་ཀུན་ཏུ་རྒྱས་བྱེད་ཤོག །
ཅེས་དཔལ་མགོན་འཕགས་པ་ཀླུ་སྒྲུབ་ལ་རྣམ་ཐར་དང་མཐུན་པར་ཅུང་ཟད་བསྟོད་པ་འདི་ནི་སྡེ་སྣོད་འཛིན་པ་དགེ་འདུན་ལྷུན་གྲུབ་ཀྱིས་ཀྱང་ཉེ་བར་སྐུལ་ཅིང་། ཁྱད་པར་རང་གི་དད་པས་ཀུན་ནས་བསླངས་ཏེ་བཙུན་པ་དགེ་འདུན་རྒྱ་མཚོའི་དཔལ་གྱིས་ཆོས་འཁོར་རྒྱལ་བཀྲ་ཤིས་ལྷུན་གྱིས་གྲུབ་པའི་གཙུག་ལག་ཁང་དུ་སྦྱར་བའོ། །
རྩོམ་སྒྲིག་པ། དོན་འགྲུབ་རྡོ་རྗེ།