རྒྱལ་སྲས་ཆོས་རྗེ་ཉིད་ལྷུན་གྲུབ་གླིང་གི་དབེན་གནས་སུ་བཞུགས་པའི་དུས་སུ། བླ་མ་རིན་པོ་ཆེ་གླིང་པ་ཞི་བར་གཤེགས་ཞེས་ཐོས་པས་ཐམས་ཅད་ཡིད་རློང་རློང་པོར་གྱུར་པའི་སྐབས་སུ། མྱ་ངན་ཆོས་ཉིད་དུ་གྲོལ་བའི་མགུར་འདི་གསུངས་སོ། །
༈ ན་མོ་གུ་རུ་བྷྱཿ སྐྱེ་ཤི་མེད་པའི་དཔལ་མགོན་ཆོས་ཀྱི་རྗེ། །བླ་མ་ཡི་དམ་མཁའ་འགྲོའི་ཞབས་ལ་འདུད། །རིག་སྟོང་སྐྱེ་མེད་ནམ་མཁའ་ལྟ་བུའི་དོན། །མྱ་ངན་གཞི་གྲོལ་ཆོས་ཉིད་ངང་དེར་ལྟོས། །འཁོར་བའི་མྱ་ངན་སྐྱེ་ཤི་འདུ་འབྲལ་ཡང་། །དོན་ལ་མེད་དོ་སྟོང་པའི་ངོ་སྤྲོད་ཡིན། །སེམས་ཀྱི་ཟུག་རྔུ་རང་གིས་མ་བཟོ་བར། །གནས་ལུགས་རིག་པའི་ངོ་སྤྲོད་དོན་ལ་ཉོན། །མྱ་ངན་གཞི་གྲོལ་ཆོས་སྐུའི་ངོ་སྤྲོད་ཡིན། །སྐྱེས་པའི་དུས་ན་དོན་ལ་ཡོད་མ་མྱོང་། །ལྟོས་དང་གནས་ལུགས་ལྟ་བའི་ངང་དུ་གྲོལ། །མཐའ་གྲོལ་ཀློང་ཡངས་ཆེན་པོར་ཟང་ཐལ་ལེ། །སྡུག་བསྔལ་སྟོང་གསལ་ལོངས་སྐུའི་ངོ་སྤྲོད་ཡིན། །མྱོང་བའི་དུས་ན་དོན་ལ་ཡོད་མ་མྱོང་། །ལྟོས་དང་རང་སངས་སྒོམ་པའི་ངང་དུ་གྲོལ། །བར་མེད་ཕྱལ་པ་རྗེན་པར་ཟང་ཐལ་ལེ། །ཡིད་མི་བདེ་བ་སྤྲུལ་སྐུའི་ངོ་སྤྲོད་ཡིན། །བྱུང་བའི་དུས་ན་དོན་ལ་ཡོད་མ་མྱོང་། །ལྟོས་དང་གཉིས་མེད་སྤྱོད་པའི་ངང་དུ་གྲོལ། །ཤར་གྲོལ་རང་ཡལ་གདོད་མར་ཟང་ཐལ་ལེ། །ཟུག་རྔུ་ངོ་བོ་ཉིད་སྐུའི་ངོ་སྤྲོད་ཡིན། །ཚོར་བའི་དུས་ན་དོན་ལ་ཡོད་མ་མྱོང་། །ལྟོས་དང་རང་བྱུང་འབྲས་བུའི་ངང་དུ་གྲོལ། །ཆོས་ཟད་བློ་འདས་ཆེན་པོར་ཟང་ཐལ་ལེ། །དམིགས་བསམ་བྲལ་བའི་རིག་པ་བྱང་ཆུབ་ཀློང་། །མྱ་ངན་ཡུལ་མེད་བྱ་རྒྱུ་མ་རྙེད་དོ། །སྟོང་གསལ་ལྷུན་གྲུབ་རིག་པ་ཆོས་དབྱིངས་ཀློང་། །སྡུག་བསྔལ་ཡུལ་མེད་བྱ་རྒྱུ་མ་རྙེད་དོ། །འཆར་གཞི་མ་འགགས་རིག་པ་འགྱུར་མེད་ཀློང་། །ཡིད་མི་བདེ་མེད་བྱ་རྒྱུ་མ་རྙེད་དོ། །འཕོ་འགྱུར་མེད་པའི་རིག་པ་ཆོས་ཟད་ཀློང་། །ཟུག་རྔུ་ཡུལ་མེད་བྱ་རྒྱུ་མ་རྙེད་དོ། །ཁོ་བོས་ཆོས་རྣམས་བསམ་འདས་ཆོས་སྐུར་རྟོགས། །བུ་ཁྱོད་རྣམས་ཀྱང་དེ་ལྟར་རྟོགས་པར་མཛོད། །བློ་བཏགས་ཆོས་ལ་བདེན་པར་མ་འཛིན་པར། །གཞི་བྲལ་མཉམ་པ་ཆེན་པོའི་དོན་ལ་སྦྱོངས། །འཁོར་བའི་མྱ་ངན་གདོད་མའི་དབྱིངས་གྲོལ་ནས། །ཀུན་ཀྱང་ཆོས་རྗེ་བླ་མའི་ཞལ་མཐོང་ཤོག །མྱ་ངན་གཞི་གྲོལ་རྡོ་རྗེའི་མགུར། རྣལ་འབྱོར་པ་ཀློང་ཆེན་རབ་འབྱམས་ཀྱིས་གསུངས་པ་དགེའོ།། །།
རྩོམ་སྒྲིག་པ། དོན་འགྲུབ་རྡོ་རྗེ།