རྒྱུན་ལྡན་གྱི་འཚོ་བའི་ནང་མཐོང་དཀའ་བའི་མངོན་མེད་ཀྱི་བདེ་ཐང་གནད་དོན་ཞིག་རྟག་ཏུ་ང་ཚོའི་གམ་དུ་གནས་ཡོད་ལ། དེ་ནི་ཁྲག་རྩའི་ནང་རོལ་གྱི་གྲོ་ཐིག་རེད། དེས་ན་གྲོ་ཐིག་འདི་དག་གང་ནས་བྱུང་བ་དང་། ཇི་ལྟར་སྐྱེས་པ། མེད་པར་གཏོང་ཐུབ་བམ། ཇི་ལྟར་བྱས་ནས་བཅོས་དགོས་པ་སོགས་ཀྱི་སྐོར་ནས་འགྲེལ་བཤད་ཕྲན་བུ་བཀོད་པ་གཤམ་གསལ་ལྟར།
གཅིག ཁྲག་རྩའི་ནང་དུ་གྲོ་ཐིག་བྱུང་བའི་རྒྱུ་རྐྱེན་གང་ཡིན།
གྲོ་ཐིག་ནི་ཚིལ་དང་འབྲེལ་འདུས་ཕུང་གྲུབ། ཁྲག་ནང་གི་སྲ་གཟུགས་གྲུབ་ཆ་གཞན་པ་བཅས་ལས་ཁྲག་རྩའི་ངོས་སུ་འབྱར་ཡོད་པ་ཞིག་རེད། དེ་ནི་གློ་བུར་དུ་ཆགས་པ་ཞིག་མིན་པ་རྒྱུ་རྐྱེན་སྣ་ཚོགས་ཀྱིས་གྲུབ་པ་ཞིག་ཡིན་པས་གྲོ་ཐིག་གི་གནོད་སྐྱོན་ལ་སྣང་མེད་རྩ་བ་ནས་བྱ་མི་རུང་། ཁྲག་རྩའི་གྲོ་ཐིག་འདིས་ཁྲག་རྩ་འགག་ཉེན་ཡོད་པ་མ་ཟད། སྙིང་ནད་དང་། གླད་པའི་གྲིབ་སྐྱོན་སོགས་ནད་ལྕི་མོ་ན་ཉེན་ཆེ་བའི་སྔོན་རྟགས་ཤིག་ཡིན་པ་རེད། དེ་བཞིན་དུ་གྲོ་ཐིག་དེ་ཆེ་རུ་འགྲོ་བའམ་ཁྲག་རྩའི་ནང་དུ་ལྷུང་སོང་ན་ཁྲག་འཁོར་སྐྱོད་མི་ཐུབ་པ་དང་། ཁྲག་རྩ་འགག་པའི་ཉེན་ཁ་སོགས་ནད་ལྕི་མོ་སློང་ཡོང་བ་མ་ཟད། ཚབས་ཆེ་བའི་རིགས་ལ་བློ་བུར་དུ་འཆི་ཉེན་ཆེ།
ཞག་ཚིལ་མང་བའི་ཟས་རིགས་སོགས་བདེ་ཐང་ལ་གནོད་པའི་བཟའ་བཏུང་གོམས་གཤིས་ཀྱིས་གྲོ་ཐིག་གི་ནད་རྐྱེན་སློང་གི་ཡོད་ལ། འདིས་རྒྱུན་ཆད་མེད་པར་ཁྲག་རྩར་ཕོག་ནས་ཞག་ཚིལ་རིགས་དང་གྲུབ་རྫས་སྣ་ཚོགས་གྱུར་ནས་གྲོ་ཐིག་ཆགས་ཀྱི་ཡོད། ཁྲག་ཤེད་མཐོ་བ་དང་། གཅིག་སྙི་ཡང་འདིའི་ནད་རྐྱེན་སློང་བྱེད་གཙོ་བོ་ཞིག་ཡིན་ལ། འདི་དག་ལས་ཁྲག་རྩའི་ངོས་སུ་གནོན་ཤུགས་འབྱུང་བ་དང་གནོད་སྐྱོན་ཕོག་པས་གྲོ་ཐིག་ལ་ནད་གཞི་བཅའ་སའི་ཞིང་ས་གཤིན་པོ་བསྐྲུན་པ་ལྟ་བུ་ཡིན། ཡུན་རིང་པོར་ཐ་མག་འཐེན་པ་དེའང་ནད་འདིའི་ལག་དམར་ལྟ་བུ་ཡིན། ཐ་མག་འཐེན་པ་ལས་ལུས་པོའི་ནང་གི་ཞག་ཚིལ་གྱི་ཚབ་བརྗེ་འགྱུར་བ་གཏོང་ནས་གྲོ་ཐིག་གི་གྲུབ་རྫས་ཇེ་མང་འགྲོ་བ་མ་ཟད། ཁྲག་ཤེད་དང་ཁྲག་རྩ་ལ་གནོད་སྐྱོན་ཕོག་ཉེན་ཡོད། ད་དུང་སྙིང་ཁམས་ཁྲག་རྩའི་ནད་པར་འདིའི་ཐད་ཉེན་ཁ་ལྷག་ཏུ་ཆེ་བ་རེད།
གཉིས། ཁྲག་རྩའི་ནང་གི་གྲོ་ཐིག་ཇེ་ཆུང་དང་ཡང་ན་མེད་པ་ཆགས་ཐུབ་མིན་སྐོར།
ད་བར་དུ་མི་རྣམས་ཀྱིས་ཁྲག་རྩའི་ནང་དུ་གྲོ་ཐིག་ཆགས་ཚར་ན་མེད་པ་གྱུར་བའམ་དྲག་ཐུབ་ཀྱི་མ་རེད་བསམ་གི་ཡོད་པ་རེད། ཡིན་ནའང་། ཉེ་བའི་ལོར་ཚན་རིག་ཞིབ་འཇུག་དང་གསོ་རིག་གོང་འཕེལ་ཕྱིན་པ་དང་བསྟུན་འདིའི་ཕྱོགས་ཀྱི་ལྟ་ཚུལ་ལ་འགྱུར་བ་འགྲོ་བཞིན་ཡོད། ཞིབ་འཇུག་ཚོགས་པ་ཞིག་གིས་མི་༡༥༢༩ལ་རྗེས་འདེད་ཀྱི་བརྟག་དཔྱད་བྱས་པ་རེད། ལོ་༦གི་རྗེས་སུ་བརྒྱ་ཆ་བརྒྱད་ཀྱི་མི་དེ་ཚོའི་གྲོ་ཐིག་རྩ་བ་ནས་མེད་པ་གྱུར་ཡོད། ཁོ་ཚོར་འདྲ་ས་གཅིག་ཡོད་པ་ནི་ཐ་མག་མི་འཐེན་པ་དང་། ལོ་ན་གཞོན་པ། ད་དུང་གཟུགས་པོའི་ནང་གི་ཚིལ་སྤྲི་དང་ཚི་སྣའི་སྤྲི་དཀར་འདུས་ཚད་དམའ་བ་རེད།
ཁོང་ཚོར་ད་དུང་ཁྱ་ཆོས་གཞན་ཞིག་ཡོད་པ་ནི་ཚང་མ་དུས་སྔ་མའི་ཁྲག་རྩའི་གྲོ་ཐིག་ཡོད་པའི་ནད་པ་ཁོ་ན་ཡིན། ནད་དངོས་བཅོས་ཀྱི་ནད་རྟགས་མངོན་མེད་པ་རེད། དེར་བརྟེན་དུས་ལྟར་སྒྲ་འདས་ནད་བརྟག་སོགས་སྙིང་ཁམས་ཁྲག་རྩའི་བདེ་ཐང་བརྟག་དཔྱད་བྱེད་ནས་སྔར་ཙམ་ནས་ཁྲག་རྩའི་གྲོ་ཐིག་མཐོང་བ་བྱེད་པ་སོགས་དུས་ཐོག་ཏུ་སྨན་བཅོས་བྱས་ན་གྲོ་ཐིག་མེད་པ་གྱུར་བའི་རེ་བ་ཡོད་པ་རེད། སྨན་བཅོས་སྣ་ཚོགས་དང་འཚོ་བ་སྐྱེལ་སྟངས་ལེགས་སུ་གཏོང་བ་དེ་མིན། སྨན་བཅོས་དང་། དུས་ལྟར་བརྟག་དཔྱད་སོགས་བྱེད་པའི་བཅོས་ཐབས་ལ་བརྟེན་ནས་གྲོ་ཐིག་ཆུང་དུ་གཏོང་ཐུབ་པ་མ་ཟད་ཚོད་འཛིན་བྱ་ཐུབ་པ་རེད།
གསུམ། ཁྲག་རྩའི་གྲོ་ཐིག་ལ་སྔོན་འགོག་ཇི་ལྟར་བྱ་དགོས།
གྲོ་ཐིག་ནི་གཏན་ནས་བཅོས་ཐབས་མེད་པ་ཞིག་མིན་མོད། འོན་ཀྱང་ཁྲག་རྩའི་ནང་གྲོ་ཐིག་མ་སྐྱེས་ན་དེ་བས་ཀྱང་ལེགས་པ་ཡིན། སྔོན་འགོག་བྱེད་ཐབས་ནི་ལུགས་མཐུན་གྱི་བཟའ་བཏུང་བྱ་རྒྱུ་གཙོ་བོ་ཡིན་ལ། སྔོ་ཚལ་གསར་བ་དང་འབྲུ་རིགས་སོགས་ཚི་སྣ་འདུས་པའི་ཟས་རིགས་མང་ཙམ་ཟོས་ན་ལེགས་པ་དང་། ཚིལ་དང་། གཡོས་སྦྱོར་རིགས། བྲོ་རྫས་འདྲེས་པའི་ཚྭ། ཚྭ་རྐྱང་། སྲན་སྣུམ། སྲན་སྣུམ་འདྲེས་པའི་རིགས་སོགས་ཉུང་དུ་གཏོང་དགོས། མཁྲིས་རྒྱུ་གཤེར་རྩི་དང་སོལ་ཆུ་འདྲེས་རྫས་རིགས་ཚོད་འཛིན་བྱེད་ན་ལེགས།
དེ་མིན་འགུལ་སྐྱོད་རྒྱུན་འཁྱོངས་བྱ་དགོས། དཔེར་ན་མགྱོགས་འགྲོ་དང་། དལ་རྒྱུག་བྱེད་པ། ཆུ་རྐྱལ་བ། རྐང་འཁོར་ཞོན་པ་སོགས་བྱས་ན་ཕན་ཐོགས་ཡོད། ཡུན་རིང་བསྡད་ནས་འགུལ་སྐྱོད་མི་བྱེད་པའི་གོམས་གཤིས་ཡོད་མཁན་གྱིས་འགུལ་སྐྱོད་བྱེད་སྐབས་ཤུགས་ཆེ་མི་ཉེན་ལ། དུས་ཡུན་ཐུང་ངུའི་ནང་ནས་མགོ་བརྩམས་ཏེ་རིམ་བཞིན་དུས་ཡུན་རིང་དུ་གཏོང་དགོས། ཐ་མག་བཅད་པ་དང་ཆང་ཚོད་འཛིན་བྱེད་པ། ལུས་པོའི་ལྗིད་ཚད་ཚོད་འཛིན་བྱ་རྒྱུ། གཉིད་ཡག་པོ་ཁུག་པ་བཅས་བྱ་དགོས། གཅིན་སྙི་ནད་དང་ཁྲག་ཤེད་མཐོ་བའི་ནད་པས་ད་དུང་ཁྲག་ཤེད་དང་ཁྲག་མངར་ཚོད་འཛིན་བྱ་དགོས།
རྩོམ་སྒྲིག་པ། དོན་འགྲུབ་རྡོ་རྗེ།