༄༅། །ན་མོ་མ་ཧཱ་གུ་རུ་པདྨ་བིདྷྱཱ་དྷ་ར་ཡེ། མཚན་ཙམ་ཐོས་པས་ངན་འགྲོའི་འཇིགས་པ་ལས། །སྒྲོལ་མཛད་རྒྱལ་བ་རིན་ཆེན་གཙུག་ཏོར་ཅན། །རྡོ་རྗེ་སློབ་དཔོན་གཟུགས་སུ་མངོན་སུམ་བྱོན། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །གསང་ཆེན་རྒྱུད་སྡེ་རྒྱ་མཚོའི་མངའ་བདག་མཆོག །དྲུག་པ་རྡོ་རྗེ་འཆང་གི་རྒྱལ་ཚབ་ཆེ། །གྲུབ་པའི་དབང་ཕྱུག་ཀུ་ཀུ་རཱ་ཛ་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །སྡེ་གསུམ་ཀློང་དགུའི་རྫོགས་པ་ཆེན་པོའི་བསྟན། །གངས་རིའི་ཁྲོད་འདིར་འདྲེན་པའི་ཤིང་རྟ་ཆེ། །འཕོ་ཆེན་སྐུར་བཞེངས་བི་མ་མི་ཏྲ་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །ཕྱག་རྒྱ་ཆེན་པོའི་ཡེ་ཤེས་མངོན་གཟིགས་པའི། །རྡོ་རྗེ་དོ་ཧས་འབྲེལ་ཚད་རྡོ་རྗེའི་སར། །སྦྱོར་མཁས་གྲུབ་མཆོག་ས་ར་ཧ་པ་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །གསང་སྔགས་སྟོན་པ་པདྨ་སམྦྷ་ཝའི།། དགོངས་རྒྱུད་བྱིན་ཐོབ་གྲུབ་པ་མཆོག་བརྙེས་ནས། །ལྷ་སྲིན་བྲན་ཁོལ་རླངས་ཆེན་དཔལ་སེང་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །རྫུ་འཕྲུལ་ཐོག་མདས་འཁྲུལ་སྣང་བྲག་གི་རི། །བསྙིལ་མཁས་གྲུབ་པ་མཆོག་གི་བརྟུལ་ཞུགས་ཅན། །སྐད་གཉིས་སྨྲ་དབང་དཀོན་མཆོག་འབྱུང་གནས་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །
མཁན་སློབ་ཆོས་རྒྱལ་གསུམ་གྱི་ཐུགས་བསྐྱེད་མཐུས། །ལེགས་དྲངས་རྒྱལ་བསྟན་ཉིན་མོར་བྱེད་པའི་དཔལ། །བསྟན་པའི་རྩལ་ལག་མངའ་བདག་ཁྲི་རལ་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །བདེན་དོན་མངོན་དུ་གཟིགས་པའི་ཡེ་ཤེས་ཀྱིས། །གཏི་མུག་ལམ་སློང་བརྟུལ་ཞུགས་རྩལ་རྫོགས་པ། །གྲུབ་ཆེན་ཕག་ཚང་པ་ཡི་དངོས་སྤྲུལ་མཆོག །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །ཚེ་གཅིག་རྡོ་རྗེ་འཆང་གྲུབ་མི་ལ་རྗེའི། །སྙན་བརྒྱུད་གདམས་པའི་མཛོད་འཛིན་ཐུགས་ཀྱི་སྲས། །ངན་རྫོང་སྟོན་པ་བྱང་ཆུབ་རྒྱལ་པོ་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག ། བསྐལ་བཟང་རྣམ་འདྲེན་དྲུག་པ་སེངྒེའི་མཚན། །མངལ་གྱི་སྒྲིབ་པས་མ་གོས་སྤྲུལ་པའི་སྐུ། །གྲུབ་པ་མཆོག་བརྙེས་དུས་གསུམ་མཁྱེན་པ་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །ཆོས་ཉིད་མངོན་སུམ་གཟིགས་པའི་བརྟུལ་ཞུགས་ཀྱིས། །ཨོ་རྒྱན་ཡུལ་ཕྱོགས་ས་སྤྱོད་ཞིང་ཀུན་ཉུལ། ། གྲུབ་པའི་དབང་ཕྱུག་གླིང་རྗེ་རས་པ་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །བླ་མ་ཆོས་སྐུར་རྟོགས་པའི་མོས་གུས་ཀྱི། །རྣལ་འབྱོར་མཐར་ཕྱིན་རྟོགས་པའི་དབང་ཕྱུག་མཆོག །སྒྲུབ་བརྒྱུད་བསྟན་འཛིན་སྟག་ལུང་ཐང་པ་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །
རྟོགས་པ་མཆོག་བརྙེས་སྣང་སེམས་དབང་དུ་འབྱོར། །ལྟ་སྟངས་ལ་སོགས་བརྟུལ་ཞུགས་ཀུན་གྲུབ་པ། ཨོ་རྒྱན་རང་བྱུང་པ་ཡི་དངོས་སྤྲུལ་མཆོག །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །རྒྱལ་བ་ཀུན་གྱི་མཁྱེན་རབ་འཇམ་པའི་དབྱངས། །ཐུབ་བསྟན་རྩ་ལག་ངུར་སྨྲིག་འཛིན་པའི་གར། །རྒྱལ་བ་གཉིས་པ་བློ་བཟང་གྲགས་པ་དངོས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །གཞན་ཡང་ཨོ་རྒྱན་ཆོས་ཀྱི་རྒྱལ་པོ་དང་། །རིགས་གསུམ་སེམས་དཔའ་མཆོག་གི་རྣམ་འཕྲུལ་དུ། །རྡོ་རྗེའི་ལུང་གིས་ཡང་ཡང་བསྔགས་པ་ཡི། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །
མདོར་ན་ཕྱོགས་དུས་རྒྱལ་བ་རབ་འབྱམས་ཀྱི། །ཁྱབ་བདག་རྡོ་རྗེ་སེམས་དངོས་ཁྱོད་ཡིན་ཕྱིར། །སྲས་བཅས་རྒྱལ་ཀུན་ཁྱོད་ཀྱི་སྒྱུ་འཕྲུལ་གར། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །རྒྱལ་བ་ཀུན་དངོས་པདྨ་རིག་འཛིན་དང་། །འགྱུར་མེད་ཐེག་མཆོག་བསྟན་འཛིན་དཔལ་བཟང་པོ། །ངེས་དོན་བསྟན་འཛིན་བཟང་པོའི་ཐུགས་བསྐྱེད་མཐུས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །
མི་འགྱུར་ནམ་མཁའི་རྡོ་རྗེ་གདོད་མའི་མགོན། །ཀུན་གཟིགས་ཐུབ་བསྟན་ཆོས་ཀྱི་རྡོ་རྗེ་མཆོག །
འཇིགས་བྲལ་ཐེག་མཆོག་རྡོ་རྗེའི་ཐུགས་བསྐྱེད་མཐུས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །ནམ་མཁའ་འོད་གསལ་གཏེར་ཆེན་ཉི་མ་གྲགས། །རབ་འབྱམས་བསྟན་པའི་རྒྱལ་མཚན་ལ་སོགས་པའི། །མཚུངས་བྲལ་ཐུགས་ཀྱི་སྲས་མཆོག་རྣམས་ཀྱི་མཐུས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །འཇིགས་མེད་འཕྲིན་ལས་འོད་ཟེར་རིམ་བྱོན་དང་། །འཇིགས་མེད་མི་བསྐྱོད་རྡོ་རྗེ་རིམ་བྱོན་སོགས། །བརྒྱུད་འཛིན་སྐྱེས་ཆེན་རྣམས་ཀྱི་ཐུགས་བསྐྱེད་མཐུས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །དཔལ་སྤྲུལ་འཇིགས་མེད་ཆོས་ཀྱི་དབང་པོ་དང་། །མི་ཕམ་འཇམ་དཔལ་དགྱེས་པའི་རྡོ་རྗེ་སོགས། །རྩོད་བྲལ་མཁས་གྲུབ་རྒྱ་མཚོའི་ཐུགས་བསྐྱེད་མཐུས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །རྒྱལ་སྲས་གཞན་ཕན་མཐའ་ཡས་རིམ་བྱོན་དང་། །ཀུན་འབྲུག་གླིང་གསུམ་མཁྱེན་ཀོང་གཉིས་ལ་སོགས། །རྒྱལ་ཚབ་མཆོག་སྤྲུལ་རྣམས་ཀྱི་ཐུགས་བསྐྱེད་མཐུས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །པདྨ་བཀྲ་ཤིས་པདྨ་བཛྲ་སོགས། །འདྲེན་མཆོག་བསྟན་འཛིན་ཆོས་བཟང་བར་བྱོན་པའི། །མཁན་རབས་གསེར་རིའི་ཕྲེང་བའི་ཐུགས་བསྐྱེད་མཐུས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །
ཁྱད་པར་རྒྱ་གཞུང་བཅུ་གསུམ་ཆ་ལག་བཅས། །འཆད་ཉན་ཕྲིན་ལས་གངས་ཅན་མཐའ་དབུས་ཀུན། །སྤེལ་མཛད་གཞན་ཕན་ཆོས་ཀྱི་སྣང་བའི་མཐུས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །བསྟན་པའི་རྩ་ལག་གཞི་གསུམ་ཉམས་བཞེས་གཙང་། །སྔ་འགྱུར་བཀའ་གཏེར་འཕྲིན་སྒྲུབ་ཕྱག་བཞེས་བཟང་། །སྤོང་དང་ཀློག་པའི་སྡེ་ཆེན་གྱིས་འཛིན་པའི། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །མདོ་སྔགས་ཆོས་ཚུལ་རྒྱ་མཚོའི་འཆད་ཉན་འཕེལ། །བྱ་བྲལ་འཁྲུལ་ཞིག་སྒྲུབ་པོས་རི་སུལ་ཁེངས། །བསྟན་རྒྱུན་འཛིན་པས་གངས་ལྗོངས་མཐའ་དབུས་ཁྱབ། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །འཁོར་ལོ་གསུམ་གྱི་ཕྲིན་ལས་ཟླ་མེད་ཕྱིར། །མདོ་ཁམས་སྔ་འགྱུར་བསྟན་པའི་རྩ་ལག་ཏུ། །གྲགས་པའི་ཆོས་དུང་སྒྲ་ཡིས་ས་གསུམ་སྙན། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །
ཀཿ དཔལ་གཉིས་སོགས་ས་དགེ་བཀའ་རྙིང་གི །བསྟན་འཛིན་དུ་མས་མདོ་སྔགས་རིག་གཞུང་བཅས། །གསན་བསམ་མཛད་གནས་ཆོས་ཀྱི་སྡེ་ཆེན་པོ། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །མདོར་ན་སྟོན་མཆོག་ཤཱཀྱའི་རྒྱལ་པོ་ཡི། །བསྟན་པ་ཡོངས་སུ་རྫོགས་པ་འཛིན་པ་ལ། །ཐུགས་བསྐྱེད་སྨོན་ལམ་རྒྱ་མཚོའི་མཐུ་གྲུབ་པ། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །བརྒྱུད་གསུམ་རིག་འཛིན་གྲུབ་ཐོབ་རྒྱ་མཚོའི་ཚོགས། །ཐེག་པ་རིམ་པ་དགུ་ཡི་ཡི་དམ་ལྷ། །མཁའ་འགྲོ་ཆོས་སྐྱོང་སྲུང་མའི་ནུས་མཐུ་ཡིས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །
ཐུགས་རྗེ་ཡས་སྤྲུལ་སྐྱེས་མཆོག་མང་དུ་བྱོན། །ཆོས་བརྒྱུད་འཛིན་རྣམས་འཆད་ཉན་རྟག་ཏུ་འཕེལ། །ཆོས་སྐྱོང་སྲུང་མས་འཕྲིན་ལས་ཚུལ་བཞིན་སྒྲུབ། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །ཕྱོགས་བཅུའི་རྒྱལ་བ་སྲས་དང་བཅས་རྣམས་ཀྱིས། །འགྲོ་བའི་དོན་དུ་བྱང་ཆུབ་ཐུགས་བསྐྱེད་ནས། །ཚོགས་གཉིས་སྨོན་ལམ་ཡོངས་སུ་རྫོགས་པའི་མཐུས། །རྫོགས་ཆེན་པ་ཡི་བསྟན་པ་རྒྱས་གྱུར་ཅིག །བདག་སོགས་དེང་ནས་ཚེ་རབས་ཐམས་ཅད་དུ། །རྒྱལ་བསྟན་སྙིང་པོ་རྒྱལ་བ་རྫོགས་ཆེན་པའི། །བསྟན་པ་འཛིན་ལ་ལུས་དང་སྲོག་འདོར་ཡང་། །ཅུང་ཟད་ཙམ་ཞིག་ལྷོད་པར་མ་གྱུར་ཅིག །རྒྱལ་སྲས་སྨོན་ལམ་འབུམ་ཕྲག་བགྲང་ཡས་པ། །ཀུན་འདུས་དམ་ཆོས་འཛིན་པའི་སྨོན་ལམ་མཆོག །འགྲུབ་པའི་མཐུན་འགྱུར་སྲས་བཅས་རྒྱལ་རྣམས་ཀྱིས། །མཆོག་སྦྱིན་ཕྱག་རྒྱ་སྐྱོང་བཞིན་གནང་བར་མཛོད། །དཔལ་ལྡན་བླ་མའི་སྐུ་ཚེ་བསྐལ་བརྒྱར་བརྟན། །བསྟན་འཛིན་དགེ་འདུན་སྡེ་ཡིས་འཛིན་མར་ཁྱབ། །རྙེད་དང་བཀུར་སྟི་བཅས་ཏེ་ཐུབ་པའི་བསྟན། །རྟག་ཏུ་དར་ཞིང་རྒྱས་པའི་བཀྲ་ཤིས་ཤོག །
ཅེས་པ་འདི་ནི་ཀུན་མཁྱེན་ཆོས་ཀྱི་རྒྱལ་པོ་རིག་འཛིན་འཇིགས་མེད་གླིང་པས་གྲུབ་དབང་རྫོགས་ཆེན་པའི་སྐྱེ་ཕྲེང་གསོལ་འདེབས་གསུངས་པའི་དོན་དང་མཐུན་ཞིང་བསྔགས་བརྗོད་གཞན་རྣམས་ཀྱང་ཟོལ་རྫུན་དང་བཅོས་མ་མ་ཡིན་པ་དོན་ལ་ཇི་ལྟར་གནས་པ་བཞིན་བརྗོད་པའི་སྒོ་ནས། བསྟན་པ་རྒྱས་པར་སྨོན་པ་སྟེ་རབ་བྱུང་བཅུ་དྲུག་པའི་ལྕགས་ཕག་ཟླ་བ་བཞི་བའི་དམར་ཕྱོགས་ཀྱི་ཚེས་ཉེར་ལྔར་སྦས་ཡུལ་འབྲས་མོ་ལྗོངས་ཀྱི་གནས་ལག་རྡོ་རྗེ་གླིང་དུ་གྲགས་པའི་རི་འགུལ་ནས་རུ་དམ་ཨོ་རྒྱན་བསམ་གཏན་ཆོས་གླིང་གི་གྲལ་མཐར་སྐྱེས་ཙམ་བན་ཧྲུལ་ཐུབ་བསྟན་བརྩོན་འགྲུས་ཕུན་ཚོགས་མིང་པས་སུག་བྲིས་བགྱིས་པའི་དགེ་བས་དད་ལྡན་གྱི་གདུལ་བྱ་རྣམས་ཀྱིས་བླ་མ་ལ་སངས་རྒྱས་སུ་མཐོང་བའི་མོས་གུས་དང་རང་བསྟན་འཛིན་སྐྱོང་སྤེལ་འདོད་ཀྱི་སྙིང་སྟོབས་ཉིན་བཞིན་ཕན་ཚུན་འགྲན་པ་ལྟར་འཕེེལ་ནས་རྒྱལ་བསྟན་རིན་པོ་ཆེ་ཉམས་པ་སོར་ཆུད་པ་དང་། མི་ཉམས་གོང་འཕེལ་དུ་དར་ནས་འཇིག་རྟེན་གྱི་ཁམས་འདིར་ཡུན་རིང་དུ་གནས་པར་གྱུར་ཅིག །དགེའོ། །དགེའོ། །དགེའོ། །སརྦ་མངྒ་ལཾ།།
རྫོགས་ཆེན་མཁན་པོ་ཐུབ་སྟན་བརྩོན་འགྲུས། 1920 --- 1981
རྫོགས་ཆེན་མཁན་པོ་ཐུབ་བསྟན་བརྩོན་འགྲུས་ལགས་ནི། སྤྱི་ལོ་༡༩༢༠ ལོར་མགོ་ལོག་ཨ་སྐྱོང་དུ་སྐུ་འཁྲུངས། ཆུང་ནས་གྲུབ་དབང་རྫོགས་ཆེན་པའི་གྲྭ་བ་མཛད། རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་མཚན་ལ་ཐུབ་བསྟན་བརྩོན་འགྲུས་ཕུན་ཚོགས་ཞེས་གསོལ་བ་དང་རིན་པོ་ཆེའི་མདུན་ནས་དབང་ལུང་མན་ངག་གསན། རྫོགས་ཆེན་དགོན་གྱི་དབུ་མཛད་སྐར་མགོན་མདུན་ནས་གདངས་དབྱངས་རོལ་མོ། གཏོར་མ་རྒྱན་བཅའ་སོགས་ཆོ་ག་ཕྱག་ལན་ལ་མཐར་ཕྱིན་པ་སྦྱངས། རིམ་པར་རྫོགས་ཆེན་བཤད་གྲྭར་བཞུགས་ནས་མཁན་ཆེན་ཨ་བུ་ལྷ་སྒང་ངམ་པདྨ་ཐེག་མཆོག་བློ་ལྡན་གྱི་མདུན་ནས་བསྙེན་རྫོགས་ཀྱི་སྡོམ་པ་བཞེས། བྱང་ཆུབ་སེམས་སྡོམ་སོགས་ཞུས་ནས་ཕྱིས་རྒྱ་གར་དུ་མ་འབྱོར་བར་ཤ་མི་ཟ་བའི་དམ་བཅའ་མཛད། རྫོགས་ཆེན་ཤྲཱི་སེང་ཧའི་ལས་ཐོག་མཁན་པོ་འཆི་མེད་དང་རྫོགས་ཆེན་མཁན་པོ་ངག་དབང་ནོར་བུ། རྫོགས་ཆེན་མཁན་པོ་འཇིགས་བློ། འཇིགས་མེད་ཡོན་ཏན་མགོན་པོ་སོགས་ལས་རྒྱ་གཞུང་ཆེན་མོ་བཅུ་གསུམ་གཙོས་མདོ་སྔགས་རིག་གཞུང་རྒྱ་མཚོ་དབང་ལུང་མན་ངག་རྫོགས་ཆེན་བརྒྱུད་པའི་བཀའ་སྲོལ་དང་བཅས་པར་གསན་བསམ་མཐར་ཕྱིན་མཛད། དུས་འགྱུར་སྔོན་འཕགས་ཡུལ་དུ་ཕེབས་ནས་འབྲུག་ཡུལ་དང་། སྔ་འགྱུར་ཆོས་སྡེ་ངེས་དོན་དགའ་ཚལ་གླིང་། ཝཱ་རཱ་ཎཱ་སིར་བོད་ཀྱི་ཆེས་མཐོའི་སློབ་གྲྭ། འབྲས་ལྗོངས་གཞུང་གི་བཤད་གྲྭ་མདོ་སྔགས་ཆོས་གླིང་། རྒྱལ་བ་དཔལ་ཡུལ་བའི་བསྟན་པའི་མངའ་བདག་གྲུབ་དབང་པད་ནོར་རིན་པོ་ཆེས་གསར་སྐྲུན་གནང་བའི་སྔ་འགྱུར་ཆོས་སྡེ་ཆེན་པོ་ཐེག་མཆོག་རྣམ་གྲོལ་གླིང་སོགས་ས་ཕྱོགས་སོ་སོར་རྫོགས་ཆེན་ཤྲཱི་སེང་ཧའི་ཕྱག་སྲོལ་བཞིན་གཞུང་ཆེན་གསུམ་གཙོས། བརྡ་དག་སྙན་གསུམ། ཚད་མ་རྣམ་འགྲེལ། བློ་སྦྱོང་གི་སྐོར། ངལ་གསོ་སྐོར་གསུམ། ཡོན་ཏན་རིན་པོ་ཆེའི་མཛོད། ཡིད་བཞིན་མཛོད་སོགས་མདོ་སྔགས་ཆོས་ཚུལ་རྒྱ་མཚོས་ཕྲིན་ལས་དང་བཀའ་དྲིན་བསྩལ། གསུང་གི་བདུད་རྩི་ལས་སྐྱེས་པའི་མཁན་པོ་ངེས་དོན་དགའ་ཚལ་གླིང་གི་མཁན་པོ་རྒྱལ་སྲས་སྤྲུལ་སྐུ་ཤེས་རབ་གྲགས་པ། འབྲས་ལྗོངས་སྒང་ཏོག་གི་བདེ་ཆེན་རྡོ་རྗེ་དང་འགྱུར་མེད་ཕྲིན་ལས། བལ་ཡུལ་བཀའ་རྙིང་བཤད་སྒྲུབ་གླིང་གི་མཁན་པོ་ཆོས་ཀྱི་གོ་ཆ། རྣམ་གྲོལ་གླིང་གི་མཁན་པོ་རྣམ་གྲོལ་ཚེ་རིང་། མཁན་པོ་ཨོ་རྒྱན་ཚེ་བརྟན། མཁན་པོ་པདྨ་ཤེས་རབ། སྤྲུལ་སྐུ་དོན་འགྲུབ། རི་འགུལ་སྤྲུལ་སྐུ། བཀའ་བརྒྱུད་རྡོ་རྫོང་སྤྲུལ་སྐུ། དིལ་མགོ་མཁྱེན་བརྩེ། ཤེས་རབ་རལ་གྲི་སོགས་སློབ་ཚོགས་བརྗོད་ཀྱིས་མི་ལངས་པ་བཞུགས། སྤྱི་ལོ་1981 ལོར་འཕགས་ཡུལ་སྨིན་གྲོལ་གླིང་དུ་སྐུ་གཤེགས།
དོན་འགྲུབ་རྡོ་རྗེས་བྲིས།