ན་མོ་གུ་རུ་ཝེ།
བློ་གྲོས་འདབ་བརྒྱ་རིག་པའི་མདངས་གསལ་ཅན། །
བརྟུལ་ཞུགས་བཟང་པོའི་གེ་སར་གྱིས་སྤུད་དེ། །
མང་ཐོས་རྒྱ་མཚོའི་དབུས་ན་ལྷམ་མེ་བ། །
ཐུབ་བསྟན་ཉི་མའི་གཉེན་གྱུར་བཤེས་གཉེན་ཁྱེད། །
བློ་གསལ་རྐང་དྲུག་ལྡན་རྣམས་ཉེར་བསྟེན་ཞིང་། །
ལེགས་བཤད་སྦྲང་རྩིའི་དགའ་སྟོན་འགྱེད་དོ་ཞེས། །
སྙན་པའི་དྲི་བསུང་འཕྲོས་པས་ཡིད་ཀྱི་མཚོར། །
དགའ་བའི་ཆུ་སྐྱེས་སྔོན་མེད་འཁྲུངས་པར་གྱུར། །
གཞོན་ནུའི་སར་གནས་རྒྱལ་བའི་སྲས་རྣམས་ཀྱི། །
བློ་གྲོས་དགོངས་ཟབ་རིགས་པའི་རྗེས་འབྲངས་ཏེ། །
ཚུལ་བཞིན་རྟོགས་པའི་ཟབ་དོན་བདུད་རྩིའི་རོ། །
ཡང་ཡང་མྱངས་པས་བདག་ཀྱང་ཉེ་བར་འཚོ། །
ཞེས་པ་ནས། །
ཡང་སྨྲས་པ།
གསུང་རབ་དགོངས་དོན་འབྱེད་པའི་ལེགས་བཤད་ཀྱིས། །
ཤེས་བྱའི་གནས་ལ་བློ་གྲོས་མྱུར་འཇུག་ཅིང་། །
རིགས་པའི་ཚུལ་ལ་གཞན་དྲིང་མི་འཇོག་པའི། །
བློ་གྲོས་བཟང་པོའི་སྤོབས་པ་ཁོ་བོས་བསྒྲུབས། །
ཕན་བཏགས་ལན་དུ་བྱས་པ་གཟོ་བ་ཡང་། །
བསྒོ་བའི་ཚིག་བཞིན་ཉམས་སུ་ལེན་པ་ཡིན། །
དེ་ཕྱིར་ཁྱོད་ཀྱིས་གལ་ཏེ་བདག་སེམས་ན། །
ཐུབ་པའི་བསྟན་ལ་ཚུལ་བཞིན་བྱ་བ་བྱོས། །
མང་པོས་བཀུར་བའི་ཆེན་པོར་གྲགས་རྣམས་ཀྱང་། །
རྙེད་དང་བཀུར་སྟི་གྲགས་པ་ལྷུར་བྱེད་ཀྱི། །
སངས་རྒྱས་བསྟན་ལ་ཆེད་ཆེར་མི་འཛིན་ན། །
འདི་ན་ཐུབ་བསྟན་གཅེས་འཛིན་དམ་པ་སུ། །
མཁས་རློམ་ཕལ་ཆེར་སྨྲ་མཁན་ནེ་ཙོ་བཞིན། །
ཚིག་གི་རྗེས་འབྲང་གཞུང་ཙམ་ཀློག་པར་ཟད། །
རིགས་དང་མི་རིགས་འབྱེད་ལ་འཐོམས་གྱུར་ན། །
འདི་ན་རིགས་ལྡན་ལེགས་བཤད་སྨྲ་བོ་གང་། །
ཉིན་དང་མཚན་དུ་རྣལ་འབྱོར་སྒོམ་རྣམས་ཀྱང་། །
ལྷག་སྤྱོད་ཀྱིས་ནི་ཏིང་འཛིན་སྒོམ་པ་བཞིན། །
ཡང་དག་ལྟ་བའི་གནད་ཀྱིས་དབེན་གྱུར་ན། །
འདི་ན་ཡང་དག་ལམ་ཞུགས་སྒྲུབ་པོ་མེད། །
ལྟོ་ཕྱིར་རབ་བྱུང་བྲལ་ཕྱིར་བསྙེན་རྫོགས་ཀྱང་། །
ཚུལ་ལྡན་བསླབ་ལ་གུས་པའི་དགེ་སྦྱོང་ཉུང་། །
ཀྱེ་མ་ཀྱེ་ཧུད་ཤཱཀྱའི་བསྟན་པ་ནི། །
མིང་ཙམ་ལུས་པར་ཁོ་བོ་གཅིག་པུས་མཐོང་། །
ཞེས་པ་འདི་ནི་ཤཱཀྱའི་དགེ་སློང་གཞོན་ནུ་བློ་གྲོས་ཀྱིས་རང་གི་སློབ་མ་བཀའ་བཞི་འཛིན་པ་བློ་བཟང་གྲགས་པའི་དཔལ་ལ་སྤྲིངས་པའོ།། །།དགེ་ལེགས་འཕེལ་བར་གྱུར་ཅིག།
རྩོམ་སྒྲིག་པ། དོན་འགྲུབ་རྡོ་རྗེ།