༄༅། ། ཀི རིང་ལ་རྔམ་པ་གཅིག་དང་བཅས། ལྷ་གསོལ་ལོ། ལྷ་གསོལ་ལོ། ལྷ་གསོལ་ལོ། དབུགས་ཐེངས་གཅིག་གིས་འབོད། ༈ ཀི རྃ་ཡྃ་ཁྃ། ཨོཾ་ཨཱཿཧཱུྃ། དབུགས་ཐེངས་གཅིག་གིས་འབོད་པ་འདི་འོག་ཀུན་ལ་འགྲེས། སྐྱབས་གསུམ་རྩ་གསུམ་ཀུན་འདུས་ཀྱི་ངོ་བོ། ཆོས་སྐུ་རྒྱལ་བ་ཀུན་ཏུ་བཟང་པོ། ལོངས་སྐུ་རིགས་ལྔ་ཞི་ཁྲོའི་ལྷ་ཚོགས། སྤྲུལ་སྐུ་འགྲོ་འདུལ་ཐུབ་དྲུག་གིས་མཚོན་པའི། ཆོས་ལོངས་སྤྲུལ་སྐུའི་སངས་རྒྱས། བླ་མ་ཡི་དམ་མཁའ་འགྲོ། བཀའ་སྡོད་ཆོས་སྐྱོང་སྲུང་མ། འཛམ་གླིང་སྲིད་པའི་ཟོ་དོར། དཀར་ཕྱོགས་སྐྱོང་བའི་ཡུལ་ལྷ་གཞི་བདག་དང་བཅས་པ་ཐམས་ཅད་ལ། གསོལ་ལོ། མཆོད་དོ། ༈ ཀི རྃ་ཡྃ་ཁྃ། ཨོཾ་ཨཱཿཧཱུྃ། ཁྱད་པར་དུ་བོད་ཁ་བ་ཅན་གྱི་ཞིང་ཁམས། འབྲི་རྫ་ཟལ་མོའི་སྒང་གི ས་མི་འགྱུར་རུ་དམ་གྱི་ལུང་པ། ཆོས་མི་འགྱུར་རྫོགས་པ་ཆེན་པོ། གནས་མི་འགྱུར་ཨོ་རྒྱན་བསམ་གཏན་ཆོས་གླིང་གི་གདན་ས་འདིའི། དགུ་ལྡན་བརྒྱུད་པའི་བླ་མ། ཡི་དམ་བཀའ་དགོངས་ཕུར་གསུམ། གནས་གསུམ་མཁའ་འགྲོའི་ལྷ་ཚོགས་དང་བཅས་པ་ལ། གསོལ་ལོ། ། མཆོད་དོ།། ༈ ཀི རྃ་ཡྃ་ཁྃ། ཨོྃ་ཨཱཿཧཱུྃ། སྔོན་ཚེ་ཁྲག་འཐུང་དཔལ་ཆེན་ཧེ་རུ་ཀའི་སྤྱན་སྔར་ཁས་བླང་བསྟན་པ་བསྲུང་བར་ཞལ་གྱིས་བཞེས་ཤིང་། བསྟན་དགྲ་དམ་ཉམས་རྡུལ་དུ་བརླག་པར་བྱེད་པའི་འཕྲིན་ལས་ཅན། ལས་དང་ཡེ་ཤེས་འཇིག་རྟེན་པའི་ཚུལ་འཛིན་གྱི་སྲུང་མ། དཔལ་ཆེན་རྟ་མགྲིན་ནག་པོ། དཔལ་མགོན་མ་ནིང་ཕྱག་བཞི། ཕྱུག་མགོན་ཚོགས་བདག་དགྲ་ལྷ། བཀའ་སྲུང་མ་གཟའ་རྡོར་གསུམ། ཞིང་སྐྱོང་དུར་ཁྲོད་ཀྱི་ལྷ་མོ། བཀྲ་ཤིས་ཚེ་རིང་མཆེད་ལྔ། གཡུ་སྒྲོན་བསྟན་མ་བཅུ་གཉིས། གནོད་སྦྱིན་ཤན་པ་དམར་ནག་ལ་སོགས་པ་བཀའ་དང་གཏེར་གྱི་སྲུང་མ་ཐམས་ཅད་ལ། གསོལ་ལོ།། མཆོད་དོ། ། ༈ ཀི རྃ་ཡྃ་ཁྃ། ཨོཾ་ཨཱཿཧཱུྃ། དབང་ཆེན་དབང་གི་དཀྱིལ་འཁོར་ཆེན་པོ་ལ་གནས་ཤིང་། དབང་དྲག་འཕྲིན་ལས་རབ་འབྱམས་ཐོགས་མེད་དུ་སྒྲུབ་མཛད། དབང་མཆོག་པདྨ་རྒྱལ་པོའི་བཀའ་བསྒོའི་ཐ་ཚིག་ལ་གནས་པའི། སྔ་འགྱུར་རིག་འཛིན་བརྒྱུད་པ་སྤྱི་དང་། བྱེ་བྲག་བླ་མ་རྫོགས་ཆེན་ཚང་གི ལྷ་སྡེ་མི་སྡེ་མཆོད་ཡོན་འཁོར་འདབ་དང་བཅས་པའི་རིགས་ལ་འགོ་ཞིང་། དམ་ལ་གནས་པའི་སྲུང་མ་མྱུར་མགྱོགས་ཅན། ལུས་གྲིབ་མ་བཞིན་དུ་འགྲོགས་པའི། རྫུ་འཕྲུལ་གློག་ལྟར་མྱུར་བའི་རྩལ་ཤུགས་ཅན། དམ་ལྡན་བུ་བཞིན་དུ་སྐྱོང་ཞིང་། དམ་མེད་ཀྱི་སྙིང་ཁྲག་འཐུང་བའི། ཆོས་སྐྱོང་ཡིད་བཞིན་ནོར་བུ། གནོད་སྦྱིན་ཙིའུ་དམར་པོ། བཙན་རྒོད་རོལ་བ་རྐྱ་བདུན། དགྲ་ལྷའི་རྒྱལ་པོ་རྡོ་རྗེ་གྲགས་ལྡན། རྒྱལ་ཆེན་སྐུ་ལྔ་བློན་འཁོར་དང་བཅས་པ་ལ། གསོལ་ལོ། ། མཆོད་དོ། ། ༈ ཀི རྃ་ཡྃ་ཁྃ། ཨོཾ་ཨཱཿཧཱུྃ། བདེ་གཤེགས་རིན་ཆེན་གཙུག་ཏོར་ཅན་མངོན་སུམ་མི་ཡི་རྣམ་རོལ་དུ་བྱོན་པ་གྲུབ་ཐོབ་པདྨ་རིག་འཛིན་དང་། གཏེར་ཆེན་ཉི་མ་གྲགས་པ་ལ་སོགས་སློབ་བུ་ཉི་ཟླ་སྐར་གསུམ། ཡབ་སྲས་བརྒྱུད་པ་རིམ་བྱོན་དང་བཅས་པའི་བཀའ་སྡོད་ལས་ཀྱི་སྲུང་མ། མྱུར་མགྱོགས་མཐུ་སྟོབས་དང་དྲག་རྩལ་ཅན། སྒྲོལ་བྱེད་བཙན་གྱི་དམག་དཔོན། བཙན་དམར་པོ་འབུམ་གྱི་རུ་འདྲེན། སྲིད་གསུམ་སྲོག་གི་བདག་པོ། དགྲ་མགོ་བརྡུང་བའི་ཐོ་བ། དངོས་གྲུབ་གཡང་གི་སྣ་འདྲེན། གྲི་བཙན་ཆེན་པོ་རྡོ་རྗེ་དགྲ་འཇོམ་རྩལ། སྤྲུལ་བ་ཡང་སྤྲུལ་ཕྱག་བརྙན་འཁོར་ཚོགས་དང་བཅས་པ་ལ། གསོལ་ལོ།། མཆོད་དོ། ། ༈ ཀི རྃ་ཡྃ་ཁྃ། ཨོཾ་ཨཱཿཧཱུྃ། རིགས་གསུམ་མགོན་པོའི་རྣམ་འཕྲུལ། ཨོ་རྒྱན་པདྨའི་ཐུགས་སྲས། ནག་པོ་བདུད་ཀྱི་ཁ་གནོན། སེར་པོ་ཧོར་གྱི་གཤེད་མ། སྐུ་ལྷ་མོན་གྱི་སྲོག་བདག ས་དམ་འཇང་གི་གཉའ་ཤིང་། ཕྱོགས་བཞིའི་རྫོང་ཆེན་ཆེ་བཞི་དང་། མཐའ་བཞིའི་རྫོང་ཕྲན་བཅོ་བརྒྱད་ཕབས་པའི། དབུ་ནག་བོད་ཀྱི་དགྲ་ལྷ། མི་ཐུབ་བཙན་པོའི་གོང་གནོན། མ་ནུས་ཉམས་ཆུང་གི་ཕ་མ། ཨ་ཀར་འོད་ཀྱི་ཝེར་མ། སྐྱེས་མཆོག་སེང་ཆེན་ནོར་བུ་དགྲ་འདུལ་ལ། གསོལ་ལོ།། མཆོད་དོ།། ༈ ཀི རྃ་ཡྃ་ཁྃ། ཨོཾ་ཨཱཿཧཱུྃ། གླིང་དཀར་པོའི་མགོན་སྐྱབས་ཀྱི་སྲུང་མ། དཔའ་དགྲ་ལྷའི་གྲ་མ་མཆེད་དགུ། མགྲོན་ཡག་དར་མ་བཅུ་གསུམ་སོགས་དང་། ཕུ་བོ་རྒྱ་ཚ་ཞལ་དཀར། ནུ་བོ་རོང་ཚ་དམར་ལེབ། དགྲ་ལྷའི་ཁྲ་ཀླག་སྤྱང་གསུམ། གཅེས་ཕྲུག་དར་མ་བཅུ་གསུམ་སོགས་ཕུ་ནུ་དཔའ་བརྟུལ་སུམ་ཅུ་དང་། དཔའ་བདུད་བརྒྱད་ཅུའི་འཁོར་ཚོགས། དང་སྨན་ཌཱཀྐིའི་ཚོགས་དང་བཅས་པ་ལ། གསོལ་ལོ། ། མཆོད་དོ།། ༈ ཀི རྃ་ཡྃ་ཁྃ། ཨྃ་ཨཱཿཧཱུྃ། བོད་གངས་ཅན་གྱི་མགུར་ལྷ་བཅུ་གསུམ། རྨ་ཆེན་སྲིད་པའི་ཟོ་དོར། ཡང་སྒོས་སུ། འབྲི་རྫ་ཟལ་མོ་སྒང་གི གཡས་ལུང་ཟླ་ཡི་ལུང་པའི། རྫ་རྒྱལ་རྡོ་རྗེ་འཕན་ཕྱུག་སོགས། རྫ་རྒྱུད་ཕྱུག་མོའི་ཡུལ་ལྷ། གཡོན་ལུང་འབྲི་ཡི་ལུང་པའི། འབྲི་གསེར་ལྡན་སྔོན་མོས་གར་ཁྱབ་གི དཀར་ཕྱོགས་སྐྱོང་བའི་ཡུལ་ལྷ་གཞི་བདག་འཁོར་དང་བཅས་པ་ལ། གསོལ་ལོ། ། མཆོད་དོ།། ༈ ཀི རྃ་ཡྃ་ཁྃ། ཨོཾ་ཨཱཿ ཧཱུྃ། ཁྱད་པར་དུ་རྒྱལ་དབང་མཚོ་སྐྱེས་རྡོ་རྗེས། བྱིན་གྱིས་བརླབས་པའི་གནས་ཆེན། གངས་ར་བ་ཉེར་ལྔའི་ནང་ཚན། ཡོན་ཏན་གནས་ཀྱི་གཙོ་བོ། རུ་དམ་གངས་ཀྱི་ར་བའི། གཡང་ཆགས་ས་ཡི་དཀྱིལ་འཁོར་ན་བཞུགས་པའི། ཁྲོ་ཟིལ་ཁྲོམ་རྡོ་རྗེ་གཡུང་དྲུང་། བཙུན་མོ་རྒོད་ལྕམ་ཁ་རག གནས་བདག་ནོར་བུ་གཡུལ་རྒྱལ། གཏེར་སྲུང་ལྕམ་མོ་ཆེན་མོ། དྲལ་པོ་ལྷ་ཡི་དགེ་བསྙེན་ལ་སོགས་པ། སྟོད་གངས་རི་ཤེལ་དཀར་གྱི་ཕོ་བྲང་ལ་གནས་འཆའ་ཞིང་། བར་རྫ་བྲག་མཆོང་སྨུག་གི་སྐུ་མཁར་ལ་བཙན་རྫོང་བཟུང་བ། སྨད་སྤང་གཞུང་གཡུ་མཚོ་ཕྱུག་མོར་རྟེན་གཞི་བཟུང་བའི། དཀར་པོ་ཆོས་ཀྱི་སྲུང་མ། ཆོས་ལྡན་བུ་བཞིན་དུ་སྐྱོང་ནི། ནག་པོ་བདུད་རིགས་ཀྱི་གཤེད་མ། དགྲ་ནག་པོའི་སྲོག་གཅོད་ཀྱི་ཤན་པ། དངོས་གྲུབ་གཡང་གི་རུ་མ། ནོར་ལོངས་སྤྱོད་ཀྱི་ཆར་བ་འབེབ་ནི། ལུས་གྲིབ་མ་བཞིན་དུ་མི་འབྲལ་འབྲོག་པའི། བླ་མ་རྫོགས་ཆེན་ཚང་གི་ལས་ལྷ་མཁའ་འགྲོ་ཆོས་སྐྱོང་། གནས་བདག་གཏེར་གྱི་སྲུང་མ། ཡུལ་ལྷ་གཞི་བདག་དང་བཅས་པ་ལ། གསོལ་ལོ།། མཆོད་དོ།། ༈ ཀི རྃ་ཡྃ་ཁྃ། ཨོཾ་ཨཱཿ ཧཱུྃ། བདུད་རྩི་བསང་གི་མཉེས་རྫས། ཇ་ཆང་ཕུད་ཀྱི་མཆོད་པས། ལྷ་ངོ་དཀར་པོ་དགུང་ལ་བསྟོད་ན། སྤྱིར་སངས་རྒྱས་ཀྱི་བསྟན་པ་དར། སེམས་ཅན་ལ་བདེ་སྐྱིད་འབྱུང་། ནད་མུག་མཚོན་འཁྲུགས་ཞི། ཡངས་བའི་རྒྱལ་ཁམས་ཐམས་ཅད་བདེ་ལ་འཁོད་པ་ནས། ཁྱད་པར་དུ་ངེད་མཆོད་མཆོད་བསྟོད་བསྟོད་ཀྱི་སྒྲུབ་པ་པོ་འཁོར་དང་བཅས་པའི། མི་ནོར་ཆོས་གསུམ་འཕེལ། ཁ་ལས་རླུང་རྟ་དར། དབང་ཐང་དཔལ་ཡོན་རྒྱས། ལས་ཅི་བསམ་ལམ་ལ་འགྲོ་བའི་ཁ་མགོན་དང་རྒྱབ་རྟེན་ཁྱེད་ནམ་པས་མཛོད། ཀི རིང་ལ་སྙན་པ་ཞིག་དང་བཅས། ཡག་དང་སྤྲོད། ཉེས་དང་བཟུར། ཁ་ལག་པ་བཞིན་དུ་སྡོང་གྲོགས་གྱིས། དྲིན་ཕ་མ་བཞིན་དུ་མགོན་སྐྱབས་གྱིས། བཙན་པོའི་དབང་འོག་ལ་མ་མངགས། རྣོན་པོའི་སོ་འོག་ལ་མ་མངགས། མགྱོགས་པའི་བང་འོག་ལ་མ་མངགས། མཁས་པའི་ལྕེ་འོག་ལ་མ་མངགས། དམག་ལ་འགྲོ་ན་དམག་གི་དགྲ་ལྷ་གྱིས། ཚོང་ལ་འགྲོ་ན་ཚོང་གི་མགྲོན་ལྷ་གྱིས། ཁྱིམ་ལ་བསྡད་ན་གཞིས་ཀྱི་སྲུང་མ་གྱིས། དགྲའི་དམུ་གབ་ནག་པོ་མགོ་ནས་བཤུས། ཐབས་ཤེས་རབ་གི་བློ་རྒྱ་ཁོག་ནས་ཕྱེས། ཀི གཡུལ་རྒྱལ་ལྷ་ཡི་བ་དན་དགུང་ལ་ཕྱོར། ཕུན་ཚོགས་སྡེ་བཞི་མ་བོས་མགྲོན་དུ་ཁུག དབུ་འཕང་རི་རྒྱལ་ལྷུན་པོ་རྟག་ཏུ་བརྟན། ཆོས་སྲིད་བསྟན་པ་མཐའ་རྒྱས་བཀྲ་ཤིས་ཤོག ཀི་ ལྷ་རྒྱལ་ལོ།།
ཞེས་པ་འདི་བསང་ཆོག་གི་དགྲ་བླའི་དཔང་བསྟོད་རྒྱས་འབྲིང་བསྡུས་པ་གང་འོས་ཀྱི་སྐབས་སུ་བུ་རྟ་གང་ཧྲག་ཚོགས་ནས་རྐྱ་ཚོགས་ཀྱིས་བསང་ཁྲིའི་ཕྱོགས་ཐམས་ཅད་འཁོར་བར་བྱས་ཏེ་མདའ་དར་བཟུང་། མདུང་དར་གཡོབ། མཚོན་ཆ་ཕྱར་བཞིན་འཁོད་པའི་དགྲ་ལྷའི་དཔང་བསྟོད་མཇུག་དང་བསྟུན་ཏེ། གཙོ་བོ་ཞིག་གིས་ཕུད་སྐྱེམས་དང་བཅས་འདི་ཉིད་སྐད་གསང་མཐོན་པོས་བསྒྲགས་རྗེས་ཀུན་གྱིས་ལྷ་རྒྱལ་དང་བཅས་བསང་བསྐོར་ལན་གསུམ་བྱ་བ་དང་། གཞན་ཡང་ཕྱོགས་བསྐྱོད་ཀྱི་ལ་བཙས་བསྟོད་སྐབས་སོགས་གང་ལའང་ཁྱེར་བདེ། ཁྱིམ་པ་ཕོ་གཞོན་ཚོའི་དགོས་མཁོར་ཁོང་ཚོའི་ཁམས་དབང་དང་མཐུན་པར་འབྲུག་ཚང་སྡེ་བས་བསྐུལ་ངོར་ཡུལ་སྐད་ཀྱིས་འདོན་རྒྱུར་མེ་སྤྲེལ་ལོའི་ས་ཟླར་པདྨ་ཐང་གི་གཞིས་སྒར་དུ་འབྱོར་བའི་ཉིན་གཉིས་པའི་སྔ་དྲོའི་འབྲུག་ཆར་འབབ་པའི་གུང་གསེང་སྐབས་པདྨ་སྐལ་བཟང་དེས་བྲིས། ། ། །
རྩོམ་སྒྲིག་པ། དོན་འགྲུབ་རྡོ་རྗེ།