ཡང་སྤྲུལ་ཉི་གཞོན།
ཚིག དཀོན་མཆོག་བསམ་གཏན།
དབྱངས། པདྨ།
རྡུང་ལེན་མཁན། བདུད་བྷེ།
མཁྱེན་ནམ་གསོན་དང་རིན་པོ་ཆེ། །
རྒྱལ་ཀུན་སྙིང་རྗེའི་རང་གཟུགས། །
པཎ་ཆེན་སྣང་བ་མཐའ་ཡས། །
ཁྱོད་ནི་གངས་རིའི་ཟླ་བ། །
ཟླ་བ་རེ་ཞིག་ནུབ་པས། །
གངས་ལྗོངས་བོད་ཀྱི་མི་རྣམས། །
སྐྱོ་གདུང་དྲག་པོས་མནར་སོང་། །
མཁྱེན་ནམ་གསོན་དང་རིན་པོ་ཆེ། །
གངས་རི་སྨན་གྱི་ལྗོངས་འདིར། །
མཆོག་སྤྲུལ་ནམ་མཁའི་སྒྲོན་མེ། །
ཞབས་ཟུང་གསེར་གྱི་འཁོར་ལོ། །
མྱུར་བར་བསྒྱུར་བའི་རེ་འདོད། །
གངས་ཅན་བོད་མི་ཡོངས་ཀྱིས། །
སེམས་ཀྱི་གཏིང་ནས་སྨོན་སོང་། །
མཁྱེན་ནམ་གསོན་དང་རིན་པོ་ཆེ། །
གངས་ཅན་བོད་ཀྱི་ཡུལ་འདིར། །
ཐུགས་སྟོབས་འགྲན་ཟླ་བྲལ་བའི། །
ཡང་སྤྲུལ་ཉི་མ་གཞོན་ནུའི། །
ཞབས་པད་ཡུན་རིང་བརྟན་པས། །
སྐྱབས་འཇུག་སྙིང་ནས་ཞུས་སོང་། །
མཁྱེན་ནམ་གསོན་དང་རིན་པོ་ཆེ། །
གངས་རི་བོད་ཀྱི་ལྗོངས་འདིར། །
མཛད་འཕྲིན་ཉི་ལྟར་གསལ་བ། །
ཡང་སྤྲུལ་ཡིད་བཞིན་ནོར་བུས། །
ཐུགས་བཞེད་གེགས་མེད་འགྲུབ་སྟེ། །
བོད་ཡུལ་སྐྱིད་པའི་ཉི་མ། །
རྒྱུན་དུ་ཤར་བའི་སྨོན་ལམ། །