རྒྱལ་བུ་དྲི་མེད་ཀུན་ལྡན། བདུད་བྷེ་དང་སྐལ་བཟང་གྲགས་པས་བཤད།

རྒྱལ་བུ་དྲི་མེད་ཀུན་ལྡན་གྱི་རྣམ་ཐར།

བདུད་བྷེ་དང་སྐལ་བཟང་གྲགས་པ།

WechatIMG1167.jpeg

《 1 》

《 2 》

《 3 》

དྲི་མེད་ཀུན་ལྡན་གྱི་ཟློས་གར་འཁྲབ་གཞུང་ངོ་སྤྲོད།

སྐྱབས་རྗེ་པདྨ་སྐལ་བཟང་།

ཆོས་ཀྱི་རྒྱལ་པོ་དྲི་མེད་ཀུན་ལྡན་གྱི་རྣམ་ཐར་ཟློས་གར་འཁྲབ་སྟོན་གྱི་གཟིགས་མོ་སྤྱན་ལམ་དུ་བསྟར་བ་ལ། འདི་ཉིད་ཀྱི་ནང་དོན་ནི། བདག་ཅག་གི་སྟོན་པ་བླ་ན་མེད་པ་ཡང་དག་པར་རྫོགས་པའི་སངས་རྒྱས་དེ་ཉིད། སྔོན་སློབ་པ་ལམ་གྱི་གནས་སྐབས་ན་བྱང་ཆུབ་སེམས་དཔའ་རྒྱལ་པོའི་སྲས་དྲི་མེད་ཀུན་ལྡན་དུ་སྐུའི་སྐྱེ་བ་ཇི་ལྟར་བཞེས་པའི་ཚུལ་ཡིན། དེ་ཡང་དཔའ་ཆེན་བྱང་ཆུབ་སེམས་དཔའ་རྣམས་ནི་འགྲོ་ཀུན་ཕ་མར་ཤེས་པའི་སྙིང་རྗེ་ཤུགས་དྲག་པོ་ཀུན་རྫོབ་སེམས་བསྐྱེད་སྔོན་དུ་འགྲོ་བས་སྦྱིན་པ་གཏོང་། ཚུལ་ཁྲིམས་བསྲུང་། བཟོད་པ་བསྒོམ། བརྩོན་འགྲུས་བརྩམ། བསམ་གཏན་ལ་མཉམ་པར་བཞག ཤེས་རབ་ལ་བློ་སྦྱང་སྟེ་ཕ་རོལ་ཏུ་ཕྱིན་པ་དྲུག་ལ་བསླབ་ནས། མཐོང་ལམ་དུ་ཆོས་ཐམས་ཅད་ཀྱི་གནས་ལུགས་དེ་བཞིན་ཉིད། སྤྲོས་པ་ཐམས་ཅད་དང་བྲལ་བའི་ཡེ་ཤེས། སྟོང་པ་ཉིད་ཀྱི་དོན་མངོན་སུམ་དུ་མཐོང་བས་དོན་དམ་སེམས་བསྐྱེད་ཀྱིས་ལམ་ཡོངས་སུ་སྦྱངས་ཏེ་སྟེ་ས་ལམ་རིམ་གྱིས་བགྲོད་ནས། སངས་རྒྱས་ཀྱི་སར་ཕར་ཕྱིན་ཡོངས་སུ་རྫོགས་ཏེ་དག་འབྲས་ཆོས་སྐུའི་ཡོན་ཏན་ཟག་མེད་ཀྱི་ཆོས་སྡེ་ཚན་ཉེར་གཅིག་དང་། སྨིན་འབྲས་གཟུགས་སྐུའི་ཡོན་ཏན་དབུ་ལ་གཙུག་ཏོར་ཞབས་ལ་འཁོར་ལོ་སོགས་མཚན་དང་དཔེ་བྱད་ཀྱི་བདག་ཉིད་ཅན་མངོན་དུ་མཛད་དེ། ཆོས་ཉིད་ཇི་ལྟ་དང་། ཆོས་ཅན་ཇི་སྙེད་པ་མཁྱེན་པའི་ཡེ་ཤེས་རྒྱས་ནས་རྟག་ཁྱབ་ལྷུན་གྲུབ་ཏུ་འགྲོ་བའི་དོན་ཡིད་བཞིན་གྱི་ནོར་བུ་རིན་པོ་ཆེ་ལྟར་འབད་མེད་དུ་འབྱུང་བ་ལས། འདིར་བྱང་ཆུབ་སེམས་དཔས་ལམ་གྱི་གནས་སྐབས་ན་སྦྱིན་པའི་ཕར་ཕྱིན་ལ་ཇི་ལྟར་བསླབ་པའི་ཚུལ་ཏེ། སྦྱིན་པ་དེ་ལ་ཟང་ཟིང་གི་སྦྱིན་པ་དང་། ཆོས་ཀྱི་སྦྱིན་པ། མི་འཇིགས་པ་སྐྱབས་ཀྱི་སྦྱིན་པ་སྟེ་གསུམ་ལས། དང་པོ་ལའང་གཏོང་བ་དང་། གཏོང་བ་ཆེན་པོ་དང་། ཤིན་ཏུ་གཏོང་བ་དང་གསུམ་དུ་དབྱེར་ཡོད་པ་ལས། བུ་དང་ཚ་བོ། བྲན་དང་ཆུང་མ། མགོ་དང་ཡན་ལག་གི་གཏོང་བ་ཆེན་པོའི་སྦྱིན་པ་ལ་མཆོག་ཏུ་སྤྲོ་བ། ཇི་སྐད་དུ། ཇི་ལྟར་བྱིན་ཅིག་ཅེས་སྒྲ་ཐོས་ཙམ་ལས། །རྒྱལ་སྲས་བདེ་འབྱུང་དེ་ལྟར་ཐུབ་རྣམས་ལ། །ཞི་བར་ཞུགས་པས་བདེ་བར་བྱེད་མིན་ན། །ཐམས་ཅད་གཏང་བས་ལྟ་ཞིག་སྨོས་ཅི་དགོས། །ཞེས་དང་། ལུས་བཅད་སྟེར་ཞིང་བདག་གི་སྡུག་བསྔལ་གྱིས། །གཞན་དག་རྣམས་ཀྱི་དམྱལ་བ་ལ་སོགས་པའི། །སྡུག་བསྔལ་རང་རིག་ཉིད་དུ་མཐོང་ནས་ནི། །དེ་བཅད་བྱ་ཕྱིར་མྱུར་དུ་བརྩོན་འགྲུས་བརྩོམ། །ཞེས་གསུངས་པ་ལྟར་རྒྱལ་བུ་སྙིང་སྟོབས་ཆེན་པོས་སྟག་མོར་ལུས་བྱིན་པ་དང་། སྐྱེས་བུ་ཆེན་པོ་དྲི་མེད་ཀུན་ལྡན་འདི་ཉིད་ཀྱིས། བུ་དང་ཆུང་མ། དབང་པོའི་དྭངས་མ་མིག་སོགས་ཀྱི་སྦྱིན་པ་བཏང་བས་ཟང་ཟིང་གི་སྦྱིན་པས་མ་ཟད། ལོག་པར་ལྟ་ཞིང་རྒོལ་བའི་རིགས་དག་ཀྱང་ཆོས་ལ་བཙུད་པས་ཆོས་ཀྱི་སྦྱིན་པ་དང་། དེ་དག་ཀུན་ཀྱང་འདི་ཕྱི་གཏན་བདེའི་ལམ་ལ་བཀོད་པས་མི་འཇིགས་པ་སྐྱབས་ཀྱི་སྦྱིན་པ་སྟེ་སྦྱིན་པའི་ཕར་ཕྱིན་རྫོགས་པ་དང་། གྲོགས་ཕྱིན་དྲུག་ཚང་ཞིང་འཁོར་གསུམ་རྣམ་པར་མི་རྟོག་པའི་ཤེས་རབ་ཀྱིས་ཟིན་པའི་དཔའ་ཆེན་བྱང་ཆུབ་སེམས་དཔའ་དེས་རྟག་ཏུ་གཞན་དོན་ལ་བརྩོན་པའི་རྣམ་ཐར་རྟོགས་པ་བརྗོད་པ་འདི་ཉིད་རྒྱས་བསྡུས་འབྲིང་པོའི་ཚུལ་གྱིས་འཁྲབ་སྟོན་བྱེད་པར་ཀུན་གྱིས་གཟིགས་ཤིང་གསན་པར་ཞུ། ཞེས་པ་འདི་ཁྲོམ་ཚོགས་ལྟད་མོ་བར་ཕལ་སྐད་ཀྱིས་ངོ་སྤྲད་བྱ་རྒྱུར་སྐུ་ཞབས་མཚམས་སྦྱོར་པའི་ངག་ཚབ་ཏུ་འཕྲལ་བྲིས་བྱས་པའོ།།

   

རྩོམ་སྒྲིག་པ། དོན་འགྲུབ་རྡོ་རྗེ།