བོད་ཀྱི་ལོ་རྒྱུས་ཐོག་བསྟན་པ་ཕྱི་དར་གྱི་དུས་སུ་བྱུང་བའི་གསང་སྔགས་གསར་མ་བསྒྱུར་མཁན་གྱི་ལོ་ཙཱ་བ་མཚན་སྙན་གྲགས་ཤིན་ཏུ་ཆེ་བ་ཞིག་ཡིན། ལོ་ཆེན་རིན་ཆེན་བཟང་པོ་ནི་ས་ཕོ་རྟའི་ལོ་ལ་ཡབ་གཞོན་ནུ་དབང་ཕྱུག་དང༌། ཡུམ་ཅོག་རོ་ཀུན་བཟང་ཤེས་བརྟན་མའི་སྲས་སུ་སྟོད་མངའ་རིས་ཀྱི་གུ་གེའི་ས་ཆར་སྐུ་འཁྲུངས། རིགས་གཡུ་རི་གཡུ་སྒྲ། དགུང་ལོ་བཅུ་གསུམ་བཞེས་པའི་ཚེ་མཁན་པོ་ཡེ་ཤེས་བཟང་པོ་ལས་རབ་ཏུ་བྱུང༌། དེའི་མོད་ལ་འདུལ་བ་རྒྱ་ཆེར་འགྲེལ་ཐུགས་སུ་ཆུད། དེ་ནས་མངའ་རིས་རྒྱལ་པོས་ཁོང་སོགས་མི་ཉི་ཤུ་རྩ་བདུན་ཁ་ཆེའི་ཡུལ(ཀསྨིར)དུ་མངགས་པ་ལྟར་བྱོན་ཏེ། ལོ་ཙཱ་མཁས་པར་བསླབས། པཎྜི་ཏ་ཀ་ར་རྣམ་གསུམ་སོགས་པཎ་གྲུབ་དུ་མ་ལ་གཏུགས་ཏེ་སྔགས་མཚན་ཉིད་ཀྱི་གཞུང་མང་པོ་ལ་སྦྱངས། མཁྱེན་པ་ཤིན་ཏུ་ཆེ་བས་མདོ་སྔགས་ཀྱི་ཆོས་མང་པོ་བསྒྱུར། ཕ་རོལ་ཏུ་ཕྱིན་པ་དག་རྒྱུད་ཀྱི་ཕྱོགས་གཉིས་ཀའི་བཤད་པ་རྒྱ་ཆེར་མཛད། དབང་དང་བསྒྲུབ་པའི་ལག་ལེན་མང་དུ་བསྟན་ཏེ་བསྟན་པ་སྔ་དར་ལས་ཕྱི་དར་སྔགས་ཀྱི་བསྟན་པ་བོད་དུ་དར་བ་ཡང་ལོ་ཙཱ་བ་འདི་ཁོ་ནའི་བཀའ་དྲིན་ཡིན། ད་དུང་གསོ་བ་རིག་པའི་གཞུང་{ སྨན་དཔྱད་ཡན་ལག་བརྒྱད་པ}ལ་སོགས་པ་རྒྱ་གར་ཀྱི་སྨན་གཞུང་མང་པོར་བསྒྱུར། སློབ་མ་སྨན་པ་མཁས་པ་མི་དགུ་སོགས་བྱུང་སྟེ། བོད་ཀྱི་གསོ་བ་རིག་པའི་ཐོག་སླར་ཡང་གོང་འཕེལ་གསར་པ་ཞིག་གི་དུས་སུ་སླེབས། ཁོང་གིས་གསང་སྔགས་གསར་མ་དང། རྒྱ་གར་གྱི་སྨན་གཞུང་མང་པོ་རྒྱ་གར་ སྐད་ནས་བོད་སྐད་དུ་བསྒྱུར་གནང་མཛད་པ་དེ་དག་བོད་ཀྱི་མཁས་པ་ཆེན་པོ་ཀུན་གྱིས་ཚད་མར་འཛིན་པ་ཞིག་ཡིན། བླ་ཆེན་པོ་ལྷ་ལྡེ་བཙན་གྱིས་དབུའི་མཆོད་གནས་དང་རྡོ་རྗེའི་སློབ་དཔོན་དུ་བསྐུར། པུ་རངས་ཞིར་གྱི་གནས་གཞི་ཕུལ། གཙུག་ལག་ཁང་ཡང་བཞེངས། ཁ་ཆེའི་གཙུག་ལག་ཁང་དང་རོང་གི་གཙུག་ལག་ཁང་ལ་སོགས་པ་གནས་གཞི་དང་གཙུག་ལག་ཁང་དང་མཆོད་རྟེན་མང་དུ་བཞེངས། གུར་ཤིང་བརྩོན་འགྲུས་རྒྱལ་མཚན་ལ་སོགས་པའི་སློབ་མ་མཁས་གྲུབ་མང་པོ་དང་ཞུས་ཆེན་ཕེར་པའི་ལོ་ཙཱ་ཡང་བཅུ་ལྷག་ཙམ་ཐོན། འཕྲལ་གྱི་མཛད་པ་ཡང་སྐུ་གཟུགས་བཞེངས་པ་དང༌། འགྱུར་མཛད་པ་ལ་སོགས་རེ་རེའི་རྗེས་ཀྱང་གཞན་གྱིས་མི་རྙོགས་པ་དང༌། མཚན་ཡང་དག་པར་བརྗོད་པ་ཡང་སཾ་སྐྲ་ཏའི་སྐད་དུ་འབུམ་ཕྲག་གཅིག་བོད་སྐད་དུ་འབུམ་ཕྲག་གཅིག །གཞན་ལ་ཡོན་བྱིན་ཏེ་འབུམ་ཕྲག་གཅིག་རྣམས་བཏོན། དགུང་ལོ་བརྒྱད་ཅུ་རྩ་ལྔ་བཞེས་པ་ཆུ་རྟ་ལ་ཇོ་བོ་བོད་དུ་བྱོན་པ་དང་མཇལ་ཏེ་སྔར་བསྒྱུར་བ་མང་པོ་ལ་ཞུས་དག་ཞུས། ཇོ་བོ་ཉིད་ཀྱིས་མཛད་པའི་དམ་ཚིག་བསྡུས་པ་བསྒྱུར་བས་འགྱུར་བཟང་བ་ཞིག་བྱུང༌། དེ་ནས་ལོ་ཆེན་གྱིས་གསེར་སྲང་བདུན་དང་བཅས་པའི་མཎྜལ་ཕུལ་ནས་བདེ་མཆོག་གི་དབང་དང་བསྐྱེད་རྫོགས་ཀྱི་གདམས་ངག་རྣམས་ཞུས་ཏེ་ཇོ་བོའི་གདམས་ངག་སྐྱེས་བུ་གསུམ་གྱི་ལམ་གྱི་རིམ་པ་དང་བསྐྱེད་རྫོགས་ཀྱི་རིམ་པ་རྣམས་ལ་རྩེ་གཅིག་ཏུ་སྒྲུབ་པ་མཛད་པས་དཔལ་གསང་བ་འདུས་པ་དང༌། བདེ་མཆོག་གི་ཞལ་གཟིགས་ཤིང་གྲུབ་པ་བརྙེས་ཏེ་དགུང་ལོ་དགུ་བཅུ་རྩ་བརྒྱད་པ་ཤིང་མོ་ལུག་གི་དགུན་ཟླ་ཐ་ཆུང་གི་ཚེས་བཅུ་བདུན་ལ་མྱ་ངན་ལས་འདས་པའི་ཚུལ་བསྟན་པའི་ཚེ་ནམ་མཁའ་གང་བའི་ལྷ་རྣམས་ཀྱིས་རོལ་མོ་རྒྱ་ཆེར་སྒྲོག་པ་དང༌། མེ་ཏོག་གི་ཆར་འབེབས་པ་ལ་སོགས་པ་གྲོང་པའི་སྐྱེ་བོ་ཐམས་ཅད་ཀྱི་མངོན་སུམ་དུ་གྱུར། གདུང་རྟེན་མ་བྱུང་བས་མཁའ་སྤྱོད་དུ་གཤེགས་པར་གྲགས། རིང་བསྲེལ་འོ་མ་སེའི་མདོག་ལྟ་བུ་གསུམ་བྱུང་བ་ཇི་ཞིག་ན་འབྲུག་ལྟ་བུའི་སྒྲ་དང་བཅས་ཏེ་ནམ་མཁར་སོང་བ་ཞིག་བྱུང་ཞེས་གྲགས་སོ།། ལོ་རྒྱུས་ཞིབ་པར་ཁོང་གི་དངོས་སློབ་ཁྲི་ཐང་པ་ཛྙ་ནས་མཛད་པའི{{ལོ་ཆེན་རིན་ཆེན་བཟང་པོའི་རྣམ་ཐར}}དང་། ལས་ཆེན་ཀུན་དགའ་རྒྱལ་མཚན་གྱིས་མཛད་པའི{{བཀའ་གདམས་ཆོས་འབྱུང་མཁས་པའི་ཡིད་འཕྲོག}}ཤོག་གྲངས༦༦ནས༦༧བར་གསལ།
རྩོམ་སྒྲིག་པ། དོན་འགྲུབ་རྡོ་རྗེ།