གངས་ལྗོངས་མཁས་པའི་འབྱུང་གནས་རྫོགས་ཆེན་ཤྲཱི་སེང་ནཱ་ལེནྡྲ་མཐོ་རིམ་ནང་བསྟན་སློབ་གླིང་གི་སློབ་བསྡུའི་བརྡ་སྦྱོར།
གངས་ལྗོངས་མཁས་པའི་འབྱུང་གནས་རྫོགས་ཆེན་ཤྲཱི་སེང་ལྔ་རིག་ནང་བསྟན་སློབ་གླིང་གི་ལོ་རྒྱུས་བསྡུས་པ།
སྤྱི་ལོ་༡༨༢༦ པར་རྫོགས་ཆེན་ཡིད་བཞིན་ནོར་བུ་སྐུ་ཕྲེང་བཞི་པ་མི་འགྱུར་ནམ་མཁའི་རྡོ་རྗེ་དང་སྔ་འགྱུར་བསྟན་པའི་ཉི་མ་རྒྱལ་སྲས་གཞན་ཕན་མཐའ་ཡས་ཀྱིས་ཕྱག་བཏབ་པ་སྟེ། དེ་ནས་ད་ལྟའི་བར་ལོ་ངོ་བརྒྱ་དང་དགུ་བཅུ་ལྷག་གི་རིང་ཆོས་སྡེ་འདི་ཉིད་ནས་བོད་ཀྱི་གནས་ལྔ་རིག་པ་སྤྱི་དང་མདོ་སྔགས་ཀྱིས་བསྡུས་པའི་ནང་བསྟན་རིག་གཞུང་ལ་འཆད་ཁྲིད་སློབ་གཉེར་རྒྱ་ཆེར་མཛད་པས། སེང་ཕྲུག་པདྨ་བཀྲ་ཤིས་དང་། རྫ་དཔལ་སྤྲུལ་རིན་པོ་ཆེ། མཁས་མཆོག་གུ་རུ་བཀྲ་ཤིས། མཁན་ཆེན་པདྨ་བཛྲ། འཇུ་མི་ཕམ། རྒྱ་རོང་བསྟ ན་འཛིན་གྲགས་པ། མི་ཉག་ཀུན་བཟང་བསོད་ནམས། འབར་བླ་བཀྲ་ཤིས་རྒྱ་མཚོ། འབམ་འདའ་དགེ་ལེགས་རྒྱ་མཚོ། ཨོ་རྒྱན་བསྟན་འཛིན་ནོར་བུ། མཁན་ཆེན་གཞན་དགའ་རིན་པོ་ཆེ། གླག་བླ་བསོད་ནམས་ཆོས་འགྲུབ། འབོ་གངས་དཀར་སྤྲུལ་སྐུ། བོད་སྤྲུལ་མདོ་སྔགས་བསྟན་པའི་ཉི་མ། ཁུ་ནུ་བླ་མ་བསྟན་འཛིན་རྒྱ་མཚོ། ཀཿཐོག་མཁན་ཆེན་ངག་ཆུང་། རྨེ་བ་མཁན་ཆེན་ཚེ་དབང་རིག་འཛིན་སོགས་མཚན་སྙན་འཛམ་གླིང་ལ་གཡོ་བའི་མཁས་དབང་བཅུ་ཕྲག་འགའ་བྱོན་པ་དང་། མཁས་དབང་དེ་དག་རེ་རེ་ལ་གསུང་རྩོམ་པོད་ཆེན་བཅུ་ནས་ཉི་ཤུའི་བར་བཞུགས་པ་ལས་ཕལ་མོ་ཆེ་དབྱིན་ཡིག་སོགས་སྐད་རིགས་འདྲ་མིན་བཅུ་ལྷག་ལ་བསྒྱུར་ཟིན་པ་དེང་དུས་འཛམ་གླིང་གི་རིག་གཞུང་ལྟེ་གནས་གང་སར་ཁྱབ་ཡོད། གཞན་ཡང་ས་དགེ་བཀའ་རྙིང་གི་མཁན་པོ་དང་སྤྲུལ་སྐུ་སོགས་བོད་ཀྱི་བཅུ་ཕྲག་རིག་གནས་ལ་ནང་བྱན་ཚུད་པའི་མཁས་དབང་བརྒྱ་ཕྲག་མང་པོ་སློབ་གླིང་འདི་ནས་རྒྱུན་མ་ཆད་པར་སྔ་ཕྱིར་སློབ་ཐོན་བྱུང་བས་བོད་མདོ་ཁམས་ཕྱོགས་ཀྱི་རིག་གནས་འབྱུང་བའི་ལྟེ་གནས་ཉག་གཅིག་ཏུ་གྱུར་པ་སྟེ། དཔེར་ན་ས་སྐྱའི་ཕྱོགས་ཀྱི་རྫོང་སར་བཤད་གྲྭ་ཆེན་མོ་དང་སྐྱེ་རྒུའི་བཤད་གྲྭ་སོགས། བཀའ་རྒྱུད་ཕྱོགས་ཀྱི་དཔལ་སྤྲུངས་བཤད་གྲྭ་དང་ཟུར་མང་བཤད་གྲྭ་སོགས། སྔ་འགྱུར་རྙིང་མའི་ཕྱོགས་ཀྱི་ཀཿཐོག་བཤད་གྲྭ་དང་། དཔལ་ཡུལ་བཤད་གྲྭ་སོགས་ཀྱང་ཆོས་སྡེ་འདིའི་མཁན་ཆེན་སློབ་བརྒྱུད་དག་གིས་ཐོག་མར་ཕྱག་བཏབ་ཅིང་རྒྱ་གཞུང་བཅུ་གསུམ་ལ་རྩལ་འདོན་གྱིས་བཤད་ཁྲིད་མཛད་མཁན་ཤ་སྟག་ཡིན། །
རྩོམ་སྒྲིག་པ། དོན་འགྲུབ་རྡོ་རྗེ།