རྐང་འབམ་བཅོས་ཐབས་ལ། དང་པོ་གསེར་ཐང་བཅོ་བརྒྱད་དང་། ནོར་བུ་བདུན་ཐང་གཉིས་གང་མང་འཐུང་དགོས་སྨན་ཨ་ཀར་སོ་ལྔ་ཐོག་མཐའ་བར་གསུམ་ཀུན་ཏུ་འཕྲོད། འབམ་སྨན་དང་པོ་ནད་སྨད་དུ་འབེབས་པའི་དུས་སུ་གླང་ཆེན་བཅོ་བརྒྱད་ཉི་མ་ཁ་ཡར་གཏོང་དགོས། སྨད་དུ་བབ་ན་སྟོད་ཀྱི་ནད་ཐམས་ཅད་ཞི་ཞིང་རྐང་པ་སྒྱིད་ཁུག་ཁ་དབྱེ་རྒྱུ་མེད་པ་ཞ་ཡག་ཐུབ་ན་རབ་ཞག་ཉེར་གཅིག །ཐ་ན་ཡང་ཞག་བདུན་ཡན་ཆད་ཅིག་ལ། ལ་བཅོས་མི་གཏོང་བར་སྡོད་དགོས། །དེ་ནས་ལ་ཕུག་རྙེད་ན་ལ་ཕུག་ཆུ་ནང་དུ་ལེགས་པར་བཀྲུས། །ལ་བརྡར་ལ་བདར་ནས། རས་དཀར་ཅུང་ཟད་རྐང་ངན་ཞིག་གི་ནང་དུ་བླུགས་ཏེ་ཆབ་སྐོལ་ཚ་མོ་དཀར་ཡོལ་ཕྱེད་ཙམ་ཞིག་གི་ནང་དུ་རས་དང་བཅས་པ་ཤན་ཏེ་བཙག་ནས་ཁུ་བ་དབྱུང་། །ཁུ་བ་དེ་ནང་འདེབས་སྨན་བཏབ་ནས་ཞག་གཅིག་བསྙལ། །ཕྱིར་ནང་། ནང་དེམ་རྒྱབ་འཐུང་རྒྱུ་ཡིན། །བང་ཐོག་སྐྱེས་པ་ཡིན་ན་ཆུ་ནང་བཀྲུས་ནས་ཞིབ་མོར་གཏུབ་སྟེ་རླང་པ་མ་ཤོར་བར་བཙོས་ཏེ། ཚོས་འཕྲལ་ནང་དུ་ཤ་སོགས་བཏབ་ནས་འཐུང་རྒྱུ་ཡིན། འབམ་བབ་ནས་སྟོད་ནད་ཞི་སྟེ་རྐང་པ་ཞ་མ་ཐུབ་བར་སྤྱོད་ལམ་གཡས་གཡོན་དུ་མི་སྔས་པ་དང་། མཚན་མོ་ཡང་གློ་ཕབ་ནས་མི་ཉལ་བཙོག་བུར་སྡོད་ན་རབ། མིན་ན་སྔས་མཐོན་པོ་ལ་རྒྱབ་བརྟེན་ཏེ་གནས་པ་དང་། དུས་རྒྱུན་དུ་ལག་པས་ལས་ཀ་སོགས་མི་བྱེད་པ་དང་། ལུས་སྟོད་སྒུལ་བསྐྱོད་དགོས་པའི་བྱ་བ་རྣམས་གཏན་ནས་སྤངས་པའི་སྤྱོད་ལམ་འདི་ཤིན་ཏུ་གལ་ཆེ། ལ་ཕུག་ནང་འདེབས་སྨན། ཁང་ཕུག་དང་། ཆུ་རུག་གཉིས་ཀྱི་ཕྱེ་ཡིན་ནམ་སྙམ་ཡང་ཞིབ་པར་ཁོ་བོའི་བློ་ལ་མི་ཤེས་འདུག་པས་ཞིབ་པར་ལྷན་ཐབས་ལེའུ་བརྒྱ་དང་གཅིག་པ་དང་སྡེ་མིག་སོགས་སུ་བལྟ་བར་བྱ། འདི་བླུན་པོའི་གོ་བ་དེར་འཕྲལ་དུ་དཔལ་སྤྲུལ་པས་གསུང་བ་ཡིན་ལེགས་སོ།། །དགེའོ།། །
རྩོམ་སྒྲིག་པ། དོན་འགྲུབ་རྡོ་རྗེ།