ལུགས་ཀྱི་བསླབ་བྱ་མེ་ཏོག་ཕྲེང་མཛེས་ཞེས་བྱ་བ་བཞུགས་སོ། །

WechatIMG1424.jpeg

ཀྱེ་ཧོ་གསོན་དང་སྐལ་ལྡན་སྐྱེ་བོའི་ཚོགས། །དཀོན་མཆོག་སྐྱབས་སུ་བསྟེན་ན་ཅི་བསམ་འགྲུབ། །བླ་མ་སྤྱི་བོར་བསྒོམས་ན་བྱིན་རླབས་འཇུག །ཆོས་སྐྱོང་སྲུང་མ་མཆོད་ན་བར་ཆད་སེལ། །ཡུལ་ལྷ་གཞི་བདག་བརྔན་ན་མཐུན་རྐྱེན་སྒྲུབ། །འགོ་བའི་ལྷ་ལྔ་གསོལ་ན་སྡོང་གྲོགས་བྱེད། །ནོར་ལྷ་གཡང་ལྷ་མཆོད་ན་ཕྱྭ་གཡང་འཁོར། །རྗེ་བློན་སྙིང་ནས་བསྟེན་ན་ཁ་འཛིན་ཆེ། །ཕ་མ་སྤྱི་བོར་བཀུར་ན་ཀུན་གྱིས་སྨོན། །མི་མང་གཉེན་དུ་འདུས་ན་རང་དཔུང་བརྗིད། །སྟོབས་ཆེན་མི་དང་འགྲོགས་ན་དོན་དེ་འགྲུབ། །ཕྱུག་པོ་གཉེན་དུ་འབྲེལ་ན་ལོངས་སྤྱོད་འཐོབ། །བློ་ཕུགས་རྒན་ལ་དྲིས་ན་བློ་མི་བསླུ། །དོན་མཐུན་ཀུན་ལ་དྲིས་ན་གྱོད་མི་འབྱུང་། །ལས་ལ་རྟོག་དཔྱོད་ཤེས་ན་བླང་དོར་མཁས། །སེམས་ལ་ཕྲག་དོག་མེད་ན་རང་སེམས་བདེ། །བཟང་ངན་སེམས་ལ་བཟུང་ན་རྗེས་སོར་དགོས། །ནོར་ལ་འཚོ་སྐྱོང་བྱས་ན་ཕྱུག་པོ་ཡོང་། །ཟས་ནོར་ལོངས་སྤྱོད་འཛོམས་ན་ཀུན་གྱིས་བརྩི། །གཡོ་སྒྱུ་ཁྲམ་གསུམ་མེད་ན་ཀུན་དང་མཐུན། །ཚིག་ཉུང་ཁོག་ཡངས་ཅན་ལ་ཁ་མཆུ་ཉུང་། །བཟའ་ཚང་བརྩི་སྒོ་ཆེ་ན་སྐྱིད་གྲོགས་ཡིན། །རྒྱལ་པོ་ཆོག་ཤེས་མེད་ན་རྒྱལ་ཁམས་འཁྲུགས། །རྒྱལ་ཁ་བློན་གྱིས་བསྒྱུར་ན་ཡུལ་སྡེ་དཀྲུག །བློན་པོ་ཞལ་ལྕེ་འཁྱོག་ན་སྡེ་འབངས་འཇིག །བཙུན་པས་ཁེ་ཚོང་བྱས་ན་འདུལ་ཁྲིམས་ཉམས། །རྗེ་བློན་ཁ་བཙན་ཆེ་ན་བྲན་གཡོག་དཀོན། །སྐྱེས་པ་འགྲོ་རྒྱུག་མང་ན་གྱོད་དང་ཐུག །ཆུང་མ་ཁ་ལྕེ་རྒོད་ན་ཐ་མ་ཕུང་། །བུ་མོ་མགོ་བོ་ཡང་ན་མྱི་ཁ་འཁོར། །བན་ཆུང་ཁྱིམ་ལ་དགའ་ན་སད་ཁྱེར་འདྲ། །བུ་མོ་གོ་ཁར་རྒས་ན་མ་ལ་སྡང་། །རྒད་པོས་ཁྱིམ་ས་བཟུང་ན་ཆུང་མས་འབོར། །སྡར་མས་དཔའ་སྐད་བཤད་ན་རོགས་ཀྱིས་འཕྱ། །ཁས་དམན་རྒྱུ་ནོར་ཆེ་ན་དགྲ་ལ་འཆོར། །རབས་ཆད་ལོངས་སྤྱོད་ཆེ་ན་དཔོན་ལ་འཐོབ། །རྩལ་ཆུང་རྟ་ལ་བརྒྱུགས་ན་མགོ་ཆག་ཉོ། །མཁས་པ་ང་རྒྱལ་ཆེ་ན་བདུད་ཀྱིས་བསླུ། །ཕྱུག་པོ་སེར་སྣ་ཆེ་ན་རང་མཆུ་བཅིང་། །མེད་པོ་ཟ་འཐུང་ཆེ་ན་ཟ་ཡུན་ཐུང་། །བསོད་ཆུང་ཅུང་ཟད་འབྱོར་ན་ཁ་ཕོ་ཆེ། །ངན་པ་ཟས་ཀྱིས་འགྲངས་ན་ཆེ་སྐད་འདོན། །མ་རབས་ཆེ་སར་བཞག་ན་ཀུན་ལ་སྡང་། །སྤྲང་བོ་བརྩི་སྒོ་ཆེ་ན་གྲལ་མགོ་སྙེག །ཕ་མ་རང་དུ་མ་སྐྱུར་མྱི་ཁ་འཕོག །བྲན་གཡོག་ཆེ་སར་བཞག་ན་རྗེ་ལ་སྡང་། །འཇིགས་སར་གནས་གཞི་མ་འཛིན་འཇིགས་སྐྲག་འོང་། །བན་བོན་དགྲ་རུ་བཟུང་ན་བྱད་ཁ་ལྡང་། །རྫས་ངན་ཕུགས་སུ་མ་འཇུག་གོད་ཁ་འོང་། །གཉན་སར་ས་རྡོ་མ་སློག་ཀླུ་ཡིས་གནོད། །ཡུལ་ལྷ་གཞི་བདག་མ་དཀྲུག་ཐོག་སེར་འབེབས། །དྲན་ཚད་ཁ་རུ་མ་འདོན་མ་མཆུ་འོང་། །དོན་མེད་འགྲོ་འདུག་མ་མང་གཡེང་བའི་རྒྱུ། །ཕན་མེད་མགྲོན་རྣམས་མ་བསྡུ་ཟས་ནོར་གྱོང་། །ངན་པར་གཏོང་ལེན་མ་ཆེ་ལོན་རྒྱུ་དཀའ། །སེམས་ལ་རྣམ་རྟོག་མ་ཆེ་གདོན་གྱི་གཞི། །ཕ་ཚན་དགྲ་རུ་མ་ལེན་དཔུང་དུ་ཁུག །ཁྱིམ་མཚེས་མཛའ་མཐུན་མ་འདོར་གཡར་སྦྱིན་སོབས། །མཐོ་ལ་ཕྲག་དོག་མ་ཆེ་དམའ་སར་ལྷུང་། །དམའ་ལ་བརྙས་བཅོས་མ་བྱེད་རང་རྒུད་འབྱུང་། །ཅི་གཏམ་བདེན་པར་མ་འཛིན་རྟོག་དཔྱོད་གྱིས། །མཐུན་ཀྱང་སྙིང་གཏམ་མ་བཤད་འཁོན་དུས་ཡོད། །འཁོན་ཀྱང་སྐྱོན་མཚང་མ་འབྲུ་ནམ་ཞིག་འདུམ། །དཔེ་ངན་གཞན་ལ་མ་སྟོན་རང་ལ་མཁོ། །ཟས་ལ་ཁ་ཕོ་མ་ཆེ་ལ་ཡོགས་འབྱུང་། །སུ་ལ་མ་འདྲིས་གོང་ནས་མཐུན་མ་བྱེད། །གང་ལ་མ་བརྟགས་བར་དུ་བློ་གཏད་སྤོངས། །ཐག་ཆོད་བར་དུ་བཟང་ངན་གཏམ་མ་སྨྲ། །ལྟས་ངན་གཞན་ལ་མ་སྟོན་རང་ལ་འཁོར། །བཟང་པོ་སུན་དུ་མ་འཇུག་བཀུར་སྟིས་བསྙེན། །ངན་པ་ཉེ་སར་མ་འཇུག་ཕྱོགས་སུ་བོར། །ནོར་ལ་རྡུང་རྡེག་མ་བྱེད་ནོར་ལྷ་ཉམས། །སྔར་བྱས་ལས་ལ་མ་འགྱོད་ཕྱིན་ཆད་སྡོམ། །ཁ་ཟས་གྲོགས་ལ་མ་སྐུང་གཞན་ལ་བྱིན། །རྒྱུ་ནོར་མྱི་ལ་མ་འཆོར་རང་གིས་ཟུངས། །གོས་བཟང་ཁྱིམ་ནས་མ་ཟད་ཁྲོམ་ལ་གྱོན། །སྐྱིད་ངོམ་མ་བྱེད་སྐྱིད་ལ་ངེས་པ་མེད། །སྡུག་ན་སྡུག་ཡུས་མ་ཆེ་ངེས་གྲངས་མེད། །མ་རབས་སྤྱོད་ངན་ཅན་ལ་འདྲིས་མ་ཆེ། །མི་ཐུབ་པ་ལ་དཀའ་བའི་ལས་མ་བཅོལ། །མི་ཤེས་པ་ལ་སྙིང་གི་གཏམ་མ་འདྲི། །མི་ཉན་པ་ལ་ཁ་ཏའི་ཚིག་མ་བཤད། །མི་བརྩི་བ་ལ་དགའ་བའི་འཛུམ་མ་སྟོན། །མྱི་ཁ་ཕོག་པའི་མྱི་དང་གཉེན་མ་བསྟེན། །ལས་ངན་སྡུག་པོ་ཆེ་ལ་ཡིད་མ་སྨོན། །གཞན་གྱི་ཟས་ནོར་ཧ་ཅང་རྔམ་མ་ཆེ། །སྤྲོ་ཐུང་གྱོད་འཁོན་ཅན་ལ་ཁྱིམ་མ་འཚོལ། །གྱོད་དང་གཏམ་ངན་ཅན་གྱི་ཟོང་མ་ཉོ། །དཀོན་མཆོག་གཏན་དུ་དོར་ནས་མནའ་མ་སྐྱེལ། །ཁྱིམ་མི་ནག་པོའི་ཕྱོགས་ལ་བློ་མ་སྟོན། །ཉེ་དུའི་དོན་དུ་སྡིག་པའི་ལས་མ་གསོག །བློ་མང་དཀའ་སྡུག་ཆེ་བའི་རྗེས་མ་འདེད། །རྐུས་གྱོད་ཁ་མཆུ་མང་པོའི་རྩར་མ་འདུག །གྱོད་དང་བྱད་ཁའི་སྡིག་པའི་རྒྱུ་མ་ལེན། །ཐག་ཆོད་མ་ཡོང་གོང་ནས་མནའ་མ་སྐྱེལ། །སྐྱབས་དང་བློ་གཏད་བྱེད་པའི་མྱི་མ་བསླུ། །འཕྲལ་གྱི་བདེ་བར་ཕུགས་ཀྱི་སྐྱིད་མ་བཙོང་། །ཚེ་འདིའི་ཆེད་དུ་ཕྱི་མའི་ལམ་མ་འགོག །གཞན་སྐྱོན་མཐོང་དུས་རང་གི་སྐྱོན་ལ་རྟོགས། །ཕན་འདོགས་གཞུང་བཟང་ཕྱི་ཐག་ཅན་དང་འགྲོགས། །དྲིན་ཆེན་གང་ཡིན་དེ་ཡིས་ཅི་གསུངས་སྒྲུབས། །བཟང་དགའ་མགྲོན་སྐྱིད་བཟང་མོ་ཆུང་མར་ལོངས། །བྱ་བ་ཐམས་ཅད་ཡུལ་གྱི་དུས་དང་བསྟུན། །མྱི་རྒྱུས་མ་ལོན་བར་དུ་བློ་གཏད་སྤོངས། །ཕན་སེམས་དྲང་པོའི་མི་ལ་བློ་གཏད་གྱིས། །ཚིག་གོ་དོན་རྟོགས་མི་ལ་དྲང་གཏམ་ཤོད། །ཁ་ཡག་ཁོག་ངན་ཅན་ལ་བདེན་གཏམ་སྤོངས། །བཙོག་གྲིབ་མྱི་ཁ་འགོ་བའི་ནད་ལ་འཛེམ། །བྱ་བ་གང་བྱེད་གཟའ་སྐར་བཟང་པོར་བསྟུན། །ཁ་འཇམ་ཁོང་རྩུབ་ཅན་ལ་བློ་མ་འདྲི། །བྲན་གཡོག་རྫུན་ཚིག་ཅན་གྱི་གཏམ་མ་ཉན། །ཁྲེལ་ལྡན་སྙིང་གི་གྲོགས་ལ་འཁྲུག་མ་འཆོར། །མི་ཐུབ་དགྲ་དང་ཆུ་ལ་ཕོད་མ་འཛུགས། །ཕར་སོང་མེད་པའི་མྱི་ལ་རེ་མ་ཆེ། །ཁྲོམ་ཆེན་ནང་དུ་གསང་བའི་ཚིག་མ་སྨྲ། །མང་པོ་ཚོགས་པའི་གསེབ་ནས་གཏམ་མ་མང་། །ཆེ་བཙན་འཚོགས་སར་འཆལ་བའི་གཏམ་མ་སྨྲ། །ལྷ་འདྲེ་བཙན་སར་གཉིད་དང་མཚན་མ་འགྲོ། །ངོ་ནག་ཁོང་དུག་ཅན་གྱི་སར་མ་འདུག །རང་བསྟོད་གཞན་སྨོད་མ་བྱེད་ཚུགས་ཐུབ་མཛོད། །མཐོན་པོར་བརྩི་བཀུར་ཤེས་ན་མཐོ་སར་ཐོན། །དམན་པ་བྱམས་བརྩེས་བསྐྱངས་ན་ཀུན་གྱིས་བཀུར། །མཉམ་པོར་མཛའ་མཐུན་བྱས་ན་ཕན་ཐོགས་ཡོང་། །འདི་གསུམ་མི་ཆོས་ཕལ་ཆེའི་རྩ་བ་ཡིན། །འདི་ལྟར་བྱས་ན་མི་ཆོས་རྩ་བ་ཡིན། །འདི་བཞིན་མཛད་ན་འདི་ཕྱི་གཉིས་ཀར་བདེ། །ལུགས་ཀྱི་བསླབ་བྱ་མེ་ཏོག་ཕྲེང་མཛེས་འདི་ནི་རྒྱལ་ཁམས་པ་འཇིགས་མེད་འཕྲིན་ལས་འོད་ཟེར་གྱིས་འཕར་གྱི་རི་ཁྲོད་དུ་འཆི་ཁར་ཕྱི་རབས་པ་རྣམས་ལ་ཁ་ཏའི་ཚུལ་དུ་བསླབ་བྱ་ཤར་མར་བྲིས་པའོ། །དགེའོ། །

རྩོམ་སྒྲིག་པ།  དོན་འགྲུབ་རྡོ་རྗེ།