དཔལ་ཀུན་ཏུ་བཟང་པོ་ལ་ཕྱག་འཚལ་ལོ།།
པདྨ་ཐོད་ཕྲེང་རྒྱལ་པོ་ངས། །སྣང་ཞིང་སྲིད་པའི་དངོས་པོ་དང་། །འཁོར་བ་མྱ་ངན་འདས་པའི་ཆོས། །ཐམས་ཅད་སེམས་ཉིད་ཐིག་ལེར་ཤར། །ཆོས་ཉིད་ཕྱོགས་བཅུར་བརྡལ་བ་ལ། །རིག་པ་མཐའ་དབུས་ག་ལ་ཡོད། །ཡེ་ཤེས་ཕྱི་ནང་མེད་པ་ལ། །མྱ་ངན་འདས་ཞེས་གོམས་པས་གྲུབ། །མ་གཡོས་པ་ལ་རིག་པ་ཤར། །སངས་རྒྱས་སེམས་ཅན་མྱ་ངན་འདས། །དེ་ཡང་ཐབས་ཆེན་པོ་ཡིས་འགྲུབ། །དཔེར་ན་གསང་སྔགས་ཐབས་ལ་བརྟེན། །འཁོར་བའི་རྟོགས་པ་ཀུན་བྲལ་ནས། །རྫོགས་སངས་རྒྱས་ཀྱི་ཐབས་ལ་བསྔགས། །ཐབས་དང་བྲལ་བའི་སྙིང་རྗེ་ནི། །སྐྱེས་ཀྱང་ངལ་བ་དོན་མེད་ལ། །འདི་དག་ཐབས་སུ་ཤེས་པ་ན། །སངས་རྒྱས་བྱང་ཆུབ་ལོགས་ན་མེད། །ཐབས་ཀྱིས་ཐབས་འདུལ་ཐབས་རེ་ཆེ། །ཐབས་ཀྱིས་དེ་ལ་གོམས་པ་ན། །ངན་སོང་འཁོར་བ་ཐབས་ཀྱིས་ཞི། །ཉོན་མོངས་དུག་ལྔ་ཐབས་ཀྱི་ལམ། །རྟོགས་པ་ཐམས་ཅད་ཐབས་སུ་གསལ། །བདག་གི་སེམས་ཉིད་ཡེ་བརྡལ་ལ། །སངས་རྒྱས་སེམས་ཅན་ག་ལ་ཡོད། །རྒྱུ་ལ་བཟང་ངན་མེད་པ་ལ། །འབྲས་བུ་ཐོབ་དང་མ་ཐོབ་མེད། །ཁོམ་ལྡན་ཆེན་པོ་བདེ་སྐྱིད་ལ། །སྡུག་བསྔལ་ངེས་པའི་འཕོ་འཇུག་མེད། །ཆོས་ཉིད་མཉམཔའི་ངང་ཉིད་ལས། ། གཟུང་འཛིན་རྟག་པ་ག་ལ་ཡོད། །སྟོང་གསུམ་ཀུན་སྣང་ཁྱབ་པའི་དབྱིངས། །མཐའ་ལ་ཐུག་མེད་ཇི་བཞིན་དུ། །ཤེས་རབ་ཐབས་ལ་དེ་ལྟར་སྣང་། །མན་ངག་རྒྱ་མཚོ་ཆེན་པོ་འདི། །ཡོངས་ལ་བསྟན་པ་བྱ་བ་སྟེ། །ཆོས་སྐུའི་ངང་དུ་བློ་ལ་ཆེམས། །ཡོངས་ལ་ཤར་བའི་འོད་བྱུང་ན། །དཀྱིལ་འཁོར་འཕྲོ་འདུ་ཉོན་རེ་མོངས། །རྟོགས་པའི་རླུང་སྒོམ་སྙིང་རེ་རྗེ། །རང་སེམས་མེད་པའི་སྔོན་རོལ་ན། །སངས་རྒྱས་བྱ་བའི་མིང་ཡང་མེད། །སེམས་ཉིད་རྩ་བ་ཆོད་པ་ན། །ཁམས་གསུམ་འཁོར་བ་རྩད་ནས་བཅད། །འཛིན་རྟོགས་ཉོན་མོངས་གླེགས་ཐག་ཆད། །མ་རིག་རྨོངས་པ་སྨོས་ཅི་དགོས། །གཟོད་ཅིག་སྔོན་གྱི་སངས་རྒྱས་ཡིན། །ཆོས་རྣམས་ཐམས་ཅད་ཁོང་ནས་ཤར། །ཤེས་པ་ཉིད་ན་ཤེས་རྒྱུ་མེད། །མཁས་པ་བས་ཀྱང་རྟོགས་པ་གཙོ། །རྟོགས་པ་ཆོས་ཉིད་ཀློང་ན་འཕྱོ། །བཤད་པ་ཚིག་གི་བཤད་རལ་མཁན། །རྟོགས་པ་ཀློང་དུ་གྱུར་པ་ན། །ཉི་ཤར་མུན་པ་དྭངས་པ་ལྟར། །སེམས་ཉིད་རྟོགས་པ་འཛིན་ཆགས་མེད། །དེ་དོན་རྟོགས་པ་རྟག་ཆད་བྲོས། །འཁོར་བའི་དམག་དཔུང་གཡུལ་ངོར་དེད། །ཁམས་གསུམ་མ་ལུས་ཚར་ལ་སྟོན། །སྲིད་གསུམ་མ་ལུས་ཐོག་བརྫིས་བྱ། །འཛིན་རྟོགས་གཉིས་པོ་བརྩོན་དུ་གཟུང་། །ཆགས་སྡང་གཉིས་པོ་དབང་དུ་བསྡུས། །རྟག་ཆད་གཉིས་པོ་རྡུལ་དུ་བརླག །སངས་རྒྱས་སེམས་ཅན་གཉིས་སུ་མེད། །དམྱལ་བ་ཆོས་ཉིད་ངང་དུ་སྦྱངས། །ཡི་དྭགས་བཀྲེས་སྐོམ་རིམ་གྱིས་བསྲེག །བྱོལ་སོང་གཏི་མུག་རྩད་ནས་བཅད། །ཐམས་ཅད་བདེ་ཆེན་དབྱིངས་སུ་དག
ཅེས་གསུངས་སོ།། ཛྙཱ་ན་དག་ལ་གཏད་པ་ཡིན། རྒྱ་རྒྱ་རྒྱ། མ་འོངས་རྣམས་ཀྱང་གྲོལ་བར་ཤོག ཨཱ་ཏི། །། །
རྩོམ་སྒྲིག་པ། དོན་འགྲུབ་རྡོ་རྗེ།