སྨྲ་བ་ངག་གི་དབང་ཕྱུག་འཇམ་དཔལ་དབྱངས། །དབྱངས་ཅན་ལྷ་མོ་གཙུག་ལག་འདོད་འཇོའི་དཔལ། །དཔལ་ལྡན་ཚངས་པ་སྡེ་བཞིའི་བང་མཛོད་འཛིན། །འཛིན་མའི་མངའ་བདག་རྣམས་ཀྱིས་ཤིས་པར་སྩོལ། །ཆོས་དང་སྲིད་ཀྱི་ཚིག་དོན་ཟབ་བརླིང་སྒྲ། །སྙན་ངག་པི་ཝཾ་རྒྱུད་ཀྱིས་གླུར་བླངས་ན། །རྣམ་དཔྱོད་ལང་ཚོ་རྒྱས་པའི་ཤེས་ལྡན་རྣར། །འཇེབས་ཀྱང་ཕལ་ཆེར་ཐོས་འཛིན་ཚེར་མལ་ཉལ། །དེའི་ཕྱིར་མཆོག་དམན་ཀུན་གྱིས་ལེགས་རྟོགས་པའི། །འབོལ་རྩོམ་ཚིགས་སུ་བཅད་པའི་མུ་ཐི་ལ། །ཆིང་གི་གནམ་གྱི་རིགས་ལས་མི་བདག་མགུལ། །མཛེས་བྱེད་དོ་ཤལ་འཕྲེང་བའི་རྒྱན་དུ་སྤུད། །དེང་སང་རྒྱ་གར་རྒྱ་ནག་ཧོར་བོད་སོགས། །སྔོན་བྱུང་ཡ་རབས་ངང་ཚུལ་ལུགས་གཉིས་ཁྲིམས། །ཆེར་ནུབ་ངན་སྤྱོད་ངོ་སོར་འཁྱེར་དུས་འདིར། །ལེགས་པར་བཤད་ཀྱང་ཙཱུ་ཏའི་རྐང་གཉིས་བཞིན། །བྱང་བསྟན་ཕུག་པར་རྟ་ལྗང་ཅན་གྱི་ཟེར། །མི་འཇུག་དངོས་པོའི་གཤིས་ལ་བཅོས་མེད་ཀྱང་། །ཕྱོགས་གཞན་བུག་པར་ཤར་བའི་སྣང་བ་ཡིས། །འཐིབས་བུའི་སྨག་རུམ་སེལ་བ་འགའ་འབྱུང་སྙམ། །ལྷ་ཆོས་ལྟ་ཞོག་མི་ཆོས་བྱ་གཞག་ཀྱང་། །ལམ་དུ་རྒྱུག་མིན་བསོད་ནམས་ལ་རག་པས། །དཀོན་ཅོག་མཆོད་དང་ངན་སློང་སྦྱིན་གཏོང་སོགས། །ལེགས་བྱས་སྤེལ་བའི་ཚོགས་ཆེན་གསོག་པ་གནད། །མངོན་ཤེས་མེད་ཕྱིར་གྲོས་དང་མདུན་མ་ཀུན། །ཐོག་ཏུ་ཁེལ་དཀའ་ཡུལ་དུས་གནས་སྐབས་དང་། །དགྲ་གཉེན་བར་མ་བརྟགས་ནས་འཕྲལ་ཚོད་འཕྲལ། །བླངས་ཏེ་འཇུག་པ་ཕོ་ཚོད་ཡང་རྩེ་ཡིན། །སེམས་ཀྱི་འཆར་སྒོ་འབྱུང་ལ་མཐའ་མེད་ཀྱང་། །གྲེ་བར་བསྐྱིལ་ནས་མི་སྨྲ་བ་དེ་མཁས། །སྙིང་ནའི་དགྲ་ལ་འཕྲལ་དུ་མི་ཁྲོ་བར། །བཅོས་མ་འཛུམ་གྱིས་བསུ་བ་གྲུང་པོ་ཡིན། །རང་བློར་མི་འབབ་གཏམ་ཚིག་ཅི་བྱུང་ཡང་། །བརྫུ་བཟང་ཁོག་ནས་མི་མངོན་ལེན་པ་ཟབ། །ཟས་ནོར་འདོད་ཀྱང་ངག་འཛངས་གཡོ་ཐབས་ཀྱིས། །མི་མངོན་ཤུགས་ཀྱིས་ལེན་པ་སྤྱང་པོ་ཡིན། །ངན་ལ་མི་འཁང་སླད་ནས་འགྱུར་བ་སྲིད། །བཟང་ལ་མ་བསྟོད་ཅིར་འགྱུར་ཤེས་པ་དཀའ། །གང་གི་ཐོག་ཏུ་འབབ་པའི་གནད་མེད་པར། །གཞན་ཟེར་འབྲངས་བའི་ཞལ་ལྕེ་བཅད་མི་རུང་། །བྱ་བ་གང་ཡང་འགྲུབ་པའི་གདེང་མེད་པར། །ཁ་འདོན་མི་སྐྱེན་ཁོང་དུ་སྦེད་པ་གནད། །བུ་སོགས་གཉེན་ལ་བྱམས་དྲགས་ངན་སྲོལ་ཡོང་། །དགྲ་ལ་ཧ་ཅང་སྡང་ན་རང་ལ་མཚུངས། །གཉེན་ལ་རལ་སྤྱོད་ཆེས་ན་ནམ་ཕུགས་འཁོན། །བྲན་ལ་འབར་ཤ་ཆེས་ན་འཁོར་མཁན་དཀོན། །འཁོར་ལ་ཆེས་ཆེར་རྩུབ་ན་སྙིང་སྐྲན་འཇུག །གྲོགས་ལ་རྔན་ཆེན་མངས་ན་ཞེ་བཞག་ཡོང་། །དཔེ་ངན་གཞན་ལ་གཏོད་ན་རང་ལ་འཁོར། །ཁ་དགྲ་མི་བསག་གནག་པ་སེམས་ལ་ཞོག །གཉེན་ལ་མི་བསྟོད་བྱམས་པ་ཡིད་ལ་འཛིན། །ངན་བློ་ཡོད་ཀྱང་ཕྱི་རུ་འཇམ་སྐད་སྙན། །གདོང་ཐུག་དྲག་པོས་དགྲ་བོ་ཐུལ་དཀའ་བས། །སྣ་ཚོགས་ཐབས་ཀྱིས་མདུན་མ་རླབས་ཀྱིས་ཆོད། །གཏམ་མགོ་འཛུམ་བསུ་མཇུག་མ་དལ་གྱིས་ལོང་། །དགོས་དོན་ཕིགས་སྨྲ་འཚམ་ཞིང་མཛེས་པར་བརྗོད། །སེར་སྣ་ཙམ་གྱིས་ཟས་ནོར་གསོག་དཀའ་བས། །བརྒྱ་བཤིག་སྟོང་འགུགས་སྤྱི་བྱམས་བློ་རྒྱ་བསྐྱེད། །བུ་ལ་ཉེས་སྐྱོན་བཤད་ན་རྗེས་སུ་ཕན། །རང་ལ་ཆེ་བསྟོད་སྤངས་ན་ནམ་ཕུགས་བྲིན། །རང་འདོད་ཞེ་བཞག་སྤྱི་གཙིགས་ཕྱིར་བྱས་བཙུན། །བུད་མེད་གྲོས་དབང་མ་གཏོང་རང་ཐག་ཆོད། །རྨོངས་པར་གྲོས་དང་ངན་ལ་དབང་མ་ཤོར། །གྲོས་ལ་མི་དབང་མི་ལ་གྲོས་མ་འཆད། །དཀྲུགས་ཤིང་བྱེད་མཁན་གྲོས་ཀྱི་ཁྱུར་མ་འཇུག །མཁས་དང་རྒན་རབས་ཉམས་ཆེན་ཤ་ཚར་དྲིས། །གྲོས་མཐིལ་རེ་ཞིག་མ་བཤད་བསྒྱུར་དུ་བཏུབ། །གྲོས་ལ་བསམ་གཞིགས་མང་བཏང་ཧང་བུག་ཆུང་། །མ་དཔེ་རང་ལ་བཀབ་ནས་ཞིབ་མོར་དཔྱད། །ཕྲན་བུའི་ཁེ་ལ་བལྟས་ནས་ཉེན་སྡོ་དང་། །གཏམ་ངན་མི་བསམ་འདོད་ལ་སྲེད་པས་ཕུང་། །ཡ་རབས་དུས་བསྟུན་དམའ་སར་འབེབས་མི་རུང་། །མ་རབས་ཆེ་སར་བཏོན་ན་གཉའ་བ་རེངས། །མཁས་པ་རས་བོར་ཡོན་ཏན་ལྡན་པ་དཀོན། །མི་མངས་དགྲ་རུ་མི་ལེན་གཉེན་དུ་འགུགས། །མི་འགྲུབ་ཁས་ལེན་མ་ཆེ་དེར་མི་འཇུག །གཅེས་ནོར་འདོད་ཅན་མི་ལ་མི་སྟོན་གསང་། །ཆོས་མེད་ལ་གྲོས་ངན་སེམས་ཅན་ལ་བློ། །མི་གཏོད་སྙིང་གཏམ་ཁ་མང་ཅན་ལ་གསང་། །སྣ་ཐུང་ཀུ་རེ་མི་ཐུབ་ལ་སྡོ་སྤོང་། །མི་བདེན་པ་ལ་ཡུས་ཀྱིས་གཤགས་མ་གདབ། །མི་ཉན་གྲོས་འདེབས་མེད་ལ་ཁྱེར་ཤོག་དང་། །མི་ཡོང་ལས་འཆོལ་མི་ཤེས་ཀོ་ལོང་དོར། །དྲིན་འདྲེན་མངས་ན་དགའ་བའི་གདུང་སེམས་འཆོར། །གྱོང་ཅན་མངས་ན་གཉེན་ཡང་ཞེན་པ་ལྡོག །གཞན་སྡུག་སྙིང་ཚིམ་མ་བྱེད་རང་ལ་འཁོར། །རང་སྐྱིད་མ་ངོམ་གཞན་གྱིས་དེ་ལན་འཇལ། །གྲོས་ཉེས་འགྱོད་ཐལ་མི་བྱ་ཕྱིན་ཆད་གཟབས། །དགོས་མེད་འཕོག་ཐུག་གཏམ་གྱིས་དགྲ་བོ་འགུགས། །ཕ་རོལ་བསམ་པ་རྟོགས་ཕྱིར་ཡུན་དུ་སོམས། །རང་མགོ་ཐོན་པའི་འཕྲུལ་ཅན་གྲུང་པོ་ཡིན། །ཆེན་པོར་སླེབས་ཚེ་ཁེངས་དང་ང་རྒྱལ་དམད། །ཀུན་གྱིས་ཁུར་དུས་འོག་འཛུལ་འཇུག་བདེ་བྱེད། །འགྲུབ་ཚད་མི་བྱེད་ཚོད་འཛིན་ཁེ་ཉེན་བསམ། །དཔོན་དུ་གྱུར་ཚེ་འདོད་ཆུང་སྤྱི་གཙིགས་ངོས། །སྒེར་དུ་བལྟོས་རྣམས་མི་མངོན་ཤུགས་ཀྱིས་སྐྱོང་། །ཤེས་ཚད་ལག་ཏུ་མི་ལེན་བླངས་ཕྱིན་ཆད། །ཞི་དྲག་ཐབས་ཀྱིས་བྱ་བ་མཐའ་རུ་ཐོན། །ཟེར་ཚད་བདེན་པར་མི་འཛིན་དཔྱད་དར་གྱིས། །ཟས་ཞིམ་མིར་བྱིན་ནོར་བཟང་རང་གིས་ཆོངས། །མི་སྙིང་གཅོད་པའི་གཏམ་དེ་ལྕེ་ནས་བཟུང་། །སྡང་དགྲའི་ནོར་ལ་མ་བལྟ་བརྗེད་མ་གཞུག །མ་ཞིམ་སྣ་གཉེར་ཞིམ་ལ་ཧབ་ཤ་དང་། །མ་མགུར་འཕྲལ་དུ་མཆུ་མུག་མིག་ལྡོག་སྤོང་། །དོན་མེད་ལས་ལ་བརྩོན་འགྲུབ་རང་ངལ་ཡིན། །གསོད་བརྡུངས་ངེས་པར་དགོས་ལ་སྙིང་ལ་ཆུང་། །འབབ་ངེས་ཁྲལ་དང་ལག་འདོན་ཡང་མི་འཇུག །དགོས་མེད་འབངས་རྣམས་མནར་བའི་ལས་མི་བྱེད། །ཕྲད་མ་ཐག་པའི་མི་ལ་ངོ་ཤེས་དང་། །འདྲིས་མ་ཐག་པའི་མི་ལ་བློ་གཏོད་དང་། །སེམས་ལ་བབས་འཕྲལ་དགའ་བའི་འཛུམ་སྟོན་དང་། །མ་བབས་འཕྲལ་བཞིན་སྡུད་རྣམས་ཀླད་ཆུང་ཡིན། །དྲག་པོ་དྲག་ཁྱེར་མ་མཁས་ནམ་ཕུགས་འཕུང་། །མཛའ་བ་མཛའ་ཁྱེར་མ་མཁས་ནམ་ཕུགས་འཁོན། །མཁས་པ་མཁས་ཁྱེར་མ་མཁས་ནམ་ཕུག་བླུན། །བཙུན་པ་བཙུན་ཁྱེར་མ་མཁས་ནམ་ཕུགས་འཆལ། །ཆེ་བ་ཆེ་ཁྱེར་མ་མཁས་ནམ་ཕུགས་དམའ། །གཏམ་ལ་རྒྱུ་མཚན་ཡོད་པས་གཞན་ཁ་མྱུལ། །བག་ཕེབས་ངག་འཇམ་སྙན་མོས་བློ་བྲིད་ནས། །གཞན་མཚང་ཐབས་ཀྱིས་བྲུས་ནས་ཆམ་ལ་འབེབས། །མ་བཤད་ཕས་ཀྱང་མི་གོ་ལྷོད་པར་སྨྲ། །མ་འབར་བུས་ཀྱང་མི་ཉན་རན་པར་རྒོལ། །མ་བསླབས་སུས་ཀྱང་མི་གོ་ལེགས་པར་བསླབས། །མ་སྦྱིན་གཉེན་ཡང་མི་འཁོར་བག་རེ་སྟེར། །ཡང་ཡང་བྱིན་སར་རྟག་འགྲོ་བྱམས་པ་ཟད། །དྲིན་ཅན་མི་དེ་སུན་དུ་མ་འཇུག་མཛངས། །གཉའ་བར་འཆོར་བའི་དགྲ་བོ་རངས་མ་འཇུག །སུས་ཕན་མི་ཤེས་སྙོམ་ཆུང་རས་མ་བོར། །གང་བཅོལ་གོ་ཆོད་གྱུར་ན་བྲན་གྱི་རབ། །རྫུན་དང་གཡོ་སྒྱུ་མི་ཤེས་ནམ་ཕུགས་བྲིན། །ཁ་ཉུང་ལག་པ་གཙང་བ་ཡོན་ཏན་མཆོག །བྱས་ཡུས་ཆེས་ན་ལས་ལ་ངོ་སོ་ཆུང་། །ཁ་གདངས་སྦར་བསྡམས་མི་དང་འབྲེལ་བྱེད་འཕུང་། །མཐོན་པོ་ང་རྒྱལ་ཅན་གྱི་མཚང་མ་འདྲུ། །བསམ་ངན་ཕྱི་ཐག་ཐུང་དང་གྲོགས་མ་བྱེད། །ཞེ་སྡང་ཁ་འཇམ་ཅན་ལ་རང་ཟོན་ཆུག །དོན་མེད་གཏམ་ལ་ཡང་ཡང་སྐྱོར་ཟློས་སྤོང་། །ཕྱུག་པོ་ནོར་ལ་སྤྱོད་ཤེས་སླད་ནས་འཕེལ། །མི་ལྡོགས་བསྲིས་ཞིབ་བྱས་ན་རང་སྡུག་ཆུང་། །དབུལ་ཡང་སྡུག་ཐེག་བྱས་ནས་ཕོ་བཟོ་བྱེད། །ནོར་ཡོད་མེད་པོར་མ་བརྫུ་ཀུན་གྱིས་ཤེས། །ངན་པ་ཆེ་སྐད་མ་འདོན་ཁྲེལ་བདས་ཡོང་། །གདོང་པར་ཁྲག་མེད་གཉེན་ལ་རེ་བ་ལས། །ངོ་ཚ་ཁྲེལ་ཡོད་ཤེས་པའི་དགྲ་བོ་དགའ། །བློ་གཏད་མི་ཐུབ་སྤུན་དང་བཟའ་ཚང་ལས། །གསང་ཐུབ་བློ་ལྡན་གྲོགས་དང་གྲོང་བ་བཟང་། །ཡོན་ཏན་མེད་པའི་ཚོགས་ཀྱི་སློབ་དཔོན་ལས། །ཤེས་རབ་ལྡན་པའི་གྲྭ་སློབ་བྱས་ནས་འཚེངས། །མི་ཉན་ཁ་འདུས་མང་པོའི་དཔོན་པོ་ལས། །ཡ་རབས་བཟང་སྤྱོད་ལྡན་པའི་གཡོག་པོ་སྐྱིད། །ལང་ཤོར་རྐུན་པོ་མི་ཡི་ཁྱུར་མི་ཚུད། །བློ་གྲོས་ཟབ་དང་མགོ་འཐོམས་ནོར་ས་ཡོད། །ཀླད་ཆུང་མི་དང་གྲུང་པོ་ནོར་ས་ཡོད། །མ་ནུས་ཇོ་བཟང་བརྫུ་ཆེ་ནོར་ས་ཡོད། །བློ་ཤེད་ཅན་དང་དོ་ཐུང་ནོར་ས་ཡོད། །རང་བཞིན་བཟང་དང་མདོ་མེད་ནོར་ས་ཡོད། །དྲང་པོའི་མི་དང་གླེན་པ་ནོར་ས་ཡོད། །ཚུལ་འཆོས་ཅན་དང་བཙུན་པ་ནོར་ས་ཡོད། །ཚེ་བློས་ཐོངས་དང་ཟོག་པོ་ནོར་ས་ཡོད། །བརྫུ་བག་ཅན་དང་མཁས་པ་ནོར་ས་ཡོད། །དེ་ལྟར་ཚེ་འདིའི་མདུན་མ་བསྒྲུབ་པ་ལ། །བླང་དང་དོར་བྱའི་སྐྱོན་ཡོན་ཤེས་བྱས་ནས། །དཔའ་འཛངས་རྟུལ་ཕོད་སྣ་ཚོགས་གཡོ་འཕྲུལ་གྱིས། །རང་ཉིད་རྒྱལ་བའི་སྒྱུ་ཐབས་ལྷུར་ལེན་གཅེས། །འོན་ཏེ་ཚངས་པ་བརྒྱ་བྱིན་འཁོར་ལོས་སྒྱུར། །ལྷ་མིའི་དཔལ་འབྱོར་ཀུན་ལ་ལོངས་སྤྱོད་མཐར། །སླར་ཡང་ལྕགས་བསྲེགས་ས་གཞིར་དམྱལ་བའི་མེ། །འབར་བའི་བུད་ཤིང་བྱེད་སྲིད་ཡིད་བརྟན་ཅི། །འཇིག་རྟེན་གསལ་བར་བྱེད་པའི་ཉི་ཟླ་ཡང་། །སྔོན་བསགས་བཟང་པོའི་འཕེན་པ་རྫོགས་པའི་མཐར། །རང་གི་ལག་པ་བརྐྱང་བསྐུམ་ཡང་མི་མཐོང་བའི། །མུན་པའི་མལ་དུ་ཉལ་འབྱུང་མཆི་མ་དཀུ། །པདྨའི་འདབ་འདྲའི་གོས་ཀྱི་རེག་བྱས་ཀྱང་། །ལུས་ལ་རྩུབ་ཉམས་བྱེད་པའི་སྨིན་ལེགས་མ། །བདག་པོའི་རོ་དང་ལྷན་ཅིག་སྲེག་ཁང་དུ། །རབ་འབར་མེ་ཡིས་བསྲེག་པ་སུ་ཡིས་བཟློག །ནོར་བུའི་གླིང་དུ་བགྲོད་པའི་ཚོང་ཟོག་གིས། །རྣམ་ཐོས་བུ་ལ་འགྲན་པའི་དེད་དཔོན་ཡང་། །འཇུར་གེགས་གནས་སུ་སྐྱེ་ནས་ཟས་སྐོམ་གྱིས། །བཀྲེས་ཤིང་སྐོམས་པའི་ངང་ཚུལ་ཀྱེ་མ་ཧུད། །དགྲ་འདུལ་གཉེན་སྐྱོང་མངའ་ཐང་ལོངས་སྤྱོད་སོགས། །བླ་ནས་བླར་འཕེལ་ཕོ་རྒོད་གྲུང་པོ་ཡི། །གྲངས་སུ་ཆུད་ཀྱང་ཚེ་ནི་ནམ་མཁའི་གློག །རྨི་ལམ་ཙམ་གྱི་བདེ་བས་ཅི་ཞིག་བྱ། །བསམས་ཀྱིན་ནམ་ཡང་རྫུན་ཟོག་མི་གསུང་བ། །འོ་སྐོལ་རྣམ་འདྲེན་ཟས་གཙང་སྲས་པོ་དེས། །འཁོར་བར་གནས་ཕྱིན་སྡུག་བསྔལ་རང་བཞིན་དུ། །བསྟན་ཚུལ་བསམས་ན་སྙིང་ཡང་དུམ་བུར་འགས། །བཟོད་དཀའི་སྡུག་བསྔལ་འདི་ལས་སླན་ཆད་དུ། །མི་ལྡོག་ཐར་བའི་ཁང་པར་འཇུག་པའི་ཐབས། །དཀར་ནག་ལས་འབྲས་བསམས་ནས་བླང་དོར་ངོས། །བསླབ་པ་རྣམ་གསུམ་ཉམས་ལེན་གྲུང་པོ་ཡིན། །སངས་རྒྱས་སྲས་བཅས་མངོན་སུམ་མཐོང་དཀའ་ཡང་། །དེ་དག་ཞལ་སྐྱིན་གསུང་དང་ཐུགས་རྟེན་ལ། །མེ་ཏོག་གདུག་སྤོས་མར་མེ་ལྷ་བཤོས་སྒྲ། །འཕན་གདུགས་ཕྱེ་ཕུར་ལ་སོགས་མཆོད་སྦྱིན་དབུལ། །བསླབ་གསུམ་ལྡན་པའི་དགེ་འདུན་བསྙེན་བཀུར་ནས། །ཐུབ་གསུང་སྒྲོག་སོགས་མཆོད་སྤྱོད་རྣམ་བཅུའི་ལས། །རྣམ་གསུམ་འཁོར་ལོའི་བྱ་བ་ཆེར་སྤེལ་བའི། །བསོད་ནམས་ཚོགས་ཆེན་གསོག་པ་གནད་དུ་ཆེ། །དབུལ་ཕོངས་སྐྱེ་རྒུ་ཀུན་ལ་སྦྱིན་པ་གཏོང་། །ཉམ་ཐག་ནད་པར་གོས་ཟས་སྨན་གྱིས་བསྐྱངས། །འཆི་ངེས་དུད་འགྲོ་གསོད་འོས་ནག་ཆེན་མི། །སྲོག་བླུ་མི་འཇིགས་སྐྱབས་ཀྱི་སྦྱིན་པ་བྱ། །ལྷ་མིའི་རྟེན་བཟང་ཐོབ་པའི་རྒྱུའི་གཙོ་བོ། །བྱ་སླ་ཚེགས་ཆུང་ཡན་ལག་བརྒྱད་པའི་ཁྲིམས། །ཉ་སྟོང་བརྒྱད་གསུམ་རྣམས་ལ་ལེགས་བླངས་ནས། །དམ་བཅའ་སྡོམ་པ་ཚུལ་བཞིན་བསྲུང་བར་མཛོད། །ཚིག་རྩུབ་མཚོན་ལ་ཇི་མི་སྙམ་པའི་གོ །བཙན་པོར་གྱོན་ན་རང་རྒྱུད་མི་འཁྲུགས་པས། །རྣམ་པར་དགེ་བའི་སྲོག་རྩ་མི་གཅོད་ཅིང་། །སྔར་བསགས་འཕེལ་བའི་ཐབས་ཚུལ་འདི་ལ་བརྩོན། །སྒྱིད་ལུག་ལེ་ལོ་བཏང་སྙོམས་དབང་སོང་ན། །ལེགས་པའི་ཡོན་ཏན་གང་ཡང་འགྲུབ་དཀའ་བས། །དལ་མེད་བརྩོན་པ་ཆེན་པོས་འབད་བྱས་ན། །ཆེས་ཆེར་དཀའ་བའི་ལས་ཀྱང་ལྷུན་གྱིས་འགྲུབ། །དེ་བཞིན་གཤེགས་སྐུ་ལ་སོགས་དམིགས་རྟེན་ལ། །མ་ཡེངས་གཞོལ་བའི་ཏིང་འཛིན་བརྟན་པོའི་རྒྱུན། །ཆད་མེད་བསྟར་ན་ཉོན་མོངས་མངོན་གྱུར་མགོ། །ཟིལ་མནན་ལུས་སེམས་ལས་རུང་བསམ་གཏན་རྙེད། །ཆོས་རྣམས་སོ་སོའི་གདགས་གཞིའི་སྟེང་ཙམ་ན། །རྟོག་པས་བཏགས་པ་ལས་གཞན་དོན་དམ་དུ། །མ་རྙེད་རྟེན་ཅིང་འབྲེལ་འབྱུང་དབུ་མའི་ལམ། །ཤེས་རབ་མཚོན་གྱིས་འཁོར་བའི་རྩ་བ་གཅོད། །དྲན་པས་འཆི་བདག་དཔུང་འཇོམས་ཚེ་དཔག་མེད། །ཡིད་སྲུབས་སྡེ་བཅས་མཐར་བྱེད་གསང་བའི་བདག །བླ་མགོན་དབྱེར་མེད་མྱུར་མཛད་ཕྱག་དྲུག་པ། །འདི་ཕྱི་བར་དོའི་སྐྱབས་ཡིན་རྟག་ཏུ་བསྟེན། །དེ་ཡང་གནམ་དང་ས་ཡི་དཀྱིལ་འཁོར་ལ། །དབང་ཕྱུག་མི་ཡི་རྒྱལ་པོ་ཆེན་པོ་རྣམས། །རང་ཉིད་གཅིག་པུར་དགེ་སྦྱོར་ལ་གཞོལ་ལས། །བསྟན་འགྲོའི་བདེ་ཐབས་བསྒྲུབ་པ་མཆོག་ཏུ་བསྔགས། །ཉི་འོག་མི་ཡི་བདག་པོ་ཆེ་རྣམས་དང་། །ཕན་ཚུན་མཉེས་གཤིན་བྱམས་པའི་སེམས་བཟང་པོས། །རང་རང་མངའ་རིས་རྣམས་ཀྱི་ཆོག་ཤེས་ཤིང་། །འབངས་ཀུན་བདེ་ཕྱིར་བཟང་པོའི་གཞུང་བཟང་སྤེལ། །སངས་རྒྱས་ཐུགས་རྗེ་ཕྱོགས་བྲལ་འགྲོ་བ་ལ། །འཇུག་ཕྱིར་ཡང་དག་ཆོས་ལ་རིས་མེད་ཀྱང་། །གནའ་བོའི་དུས་ནས་དར་བའི་ཡབ་མེས་ཀྱི། །ཆོས་ལུགས་གྲུབ་པའི་མཐའ་དེ་ཤིན་ཏུ་ཤིས། །བྱང་ཕྱོགས་ཆེན་པོ་ཧོར་གྱི་རྒྱལ་ཁམས་སུ། །ཨལ་ཐན་ཆོས་ཀྱི་རྒྱལ་པོའི་ཏི་ཤི་རིར། །བསོད་ནམས་མཚན་ལྡན་ཏཱ་ལའི་བླ་མ་གང་། །བྱོན་ནས་དེང་བར་ཞྭ་སེར་ཅན་གྱིས་ཁྱབ། །རྒྱུ་མཚན་དེས་ན་འཇམ་མགོན་བཙོང་ཁ་པའི། །བསྟན་པ་རིན་ཆེན་བཀུར་ན་ཕྱག་དྲུག་མགོན། །ལས་གཤིན་འདོད་ཁམས་མ་སོགས་ཆོས་སྲུང་གིས། །རྟག་ཏུ་བསྲུང་ཞིང་མངའ་ཐང་བདེ་སྐྱིད་འཕེལ། །ལུགས་གཉིས་ཟུང་འབྲེལ་ཡབ་མེས་རྒྱལ་པོའི་ཁྲི། །མནན་ནས་ས་ཆེན་འཇམ་དར་ཡིག་གཅིག་དང་། །ཕ་རོལ་ཕྱིན་དྲུག་སྤྱོད་པ་ཉེར་སྤྱད་པས། །འདི་ཕྱི་གཏན་གྱི་མདུན་མ་ལྷུན་གྱིས་གྲུབ། །དེ་ལྟར་ཆོས་སྲིད་བླང་དོར་རང་ཉིད་ལ། །མི་ལྡན་ནེ་ཙོའི་བརྗོད་པ་ལྟ་བུའི་ཚིག །སྨྲ་ལ་མཁས་རྣམས་ཁྲེལ་ཡང་སྟོན་ཟླ་ལྟར། །ཆེས་དཀར་སེམས་བཟང་བ་ལ་ཉེས་པ་མེད། །འདིས་མཚོན་དགེ་བས་གནམ་བསྐོས་མི་ཡི་བདག །བཙུན་མོ་སྲས་བཅས་བློན་འབངས་རབ་བརྟན་ཅིང་། །མངའ་ཐང་དཔལ་འབྱོར་རྣམ་མང་ཐོས་སྲས་དང་། །མཚུངས་པའི་སྐལ་བ་བཟང་པོར་འགྱུར་བར་ཤོག །
དེ་ལྟར་ལུགས་གཉིས་དང་འབྲེལ་བའི་བསླབ་བྱའི་རིམ་པ་མུ་ཐི་ལའི་འཕྲེང་བ་འདི་ནི་ཚེ་རིང་གནམ་གྱི་ཤེ་མོང་གིས་སྟོབས་ཀྱི་དབང་ཕྱུག་ཆིང་གིས་ཀྱི་རིགས་ལས་ཁལ་ཁ་ཐུ་ཤེ་ཡེ་ཐུ་རྡོ་རྗེ་རྒྱལ་པོས་རི་ཁ་བ་ཅན་གྱི་ལྗོངས་སུ་དཀོན་ཅོག་གསུམ་ལ་བླ་མར་བཟུང་སྟེ་མཆོད་པར་བྱོན་པའི་ཚེ་རྩོམས་ཤིག་པར་གསུང་གིས་བསྐུལ་བ་ལྟར་ཟ་ཧོར་གྱི་རིགས་ལས་སྡེ་སྣོད་གསུམ་པ་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེས་ཕོ་བྲང་ཆེན་པོ་པོ་ཏ་ལར་སྦྱར་བའི་ཡི་གེ་པ་ནི་འཕྱོང་རྒྱས་བཀྲས་རབ་ཕུན་ཚོགས་དབང་པོའོ། །
རྩོམ་སྒྲིག་པ། དོན་འགྲུབ་རྡོ་རྗེ།