བཀྲ་ཤིས་ཆར་བ།
ཚིག་དང་དབྱངས། པདྨ།
ལེན་མཁན། བདུད་བྷེ་དང་བཀྲ་ཤིས་སྒྲོལ་མ།
བཀྲ་ཤིས་ཤོག བཀྲ་ཤིས་ཤོག
དག་གཙང་གངས་ཀྱི་རི་ནས་འོད་དཀར་འཚེར། །
ལྷུང་ལྷུང་གཙང་ཆུ་རིང་མོ་རྟག་ཏུ་འབབ། །
ཆུ་འཛིན་ལང་ལོང་རབ་དཀར་ཁ་བཏགས་མཚུངས། །
གངས་ལྗོངས་ཡུལ་ལ་བཀྲ་ཤིས་དགེ་མཚན་རྒྱས། །
བཀྲ་ཤིས་ཤོག བཀྲ་ཤིས་ཤོག
མཐོ་སྒང་སྨན་གྱི་ལྗོངས་ལ་དཔྱིད་དཔལ་བཞད། །
ཡར་འབྲོག་གཡུ་མཚོའི་ཁ་ནས་གསེར་ཉ་རྩེ། །
ཧི་མ་ལ་ཡའི་རི་ལ་གངས་སེང་འགྱིང་། །
གངས་ལྗོངས་ཡུལ་ལ་རྟེན་འབྲེལ་བཟང་བོ་འགྲིག།
བཀྲ་ཤིས་ཤོག བཀྲ་ཤིས་ཤོག
ཤར་ཕྱོགས་དགུང་སྔོན་མཐའ་ནས་གཡུ་འབྲུག་གྲགས། །
ས་ལའི་ལྗོངས་ལ་བཀྲ་ཤིས་ཆར་བ་འབེབས། །
འཛམ་གླིང་ཉི་ཟླ་སྐར་གསུམ་མགྲོན་ལ་ཕེབས། །
གངས་ལྗོངས་ཡུལ་ལ་བདེ་སྐྱིད་འོད་དཔལ་འབར། །